الموضوع: حسبى الله ونعم الوكيل بنزين مغشوش

يا جماعة احنا نستغنى عن البنزين ونقضيها عصير قصب بأه
حصلى موقف بايخ واكتشفت ان عربيتى بريئة وملهاش ذنب كنت رايح مشوار مهم اول امس ومعايا اسرتى وقبل ما اتحرك روحت بنزينة فى روكسي الخليفة المأمون علشان احط بنزين وللعلم 92 وخلصت ومشيت و رحت المشوار وانا راجع العربيه فجأه لقيتها بطلت تمشى و فضلت تنط بعيد عنكوا زى ما يكون جالها زغطة او ركبها عفريت المهم ركنت وبصيت على كل حاجه لقيتها مظبوطة بس العربية لا فيها اول ولا تانى ولا راضية تمشى المهم فضلت اتحايل عليها لحد ما ابتدت تتحرك و توقعت ان الكربرتير فى حاجه بس قولت اجرب ادخل بنزينة يمكن انا مشيت على الإحتياطى وسحبت رواسب وفعلا حطيت 10 لتر 92 فى بنزينة تانية وابتدت العربية تستجيب الى ان وصلت الحمد لله البيت وتانى يوم نزلت فكيت الكربرتير لقيت حاجه غريبة جدا من المعروف ان البنزين لو نزل على حاجه بعد دقايق بيطير انما شوفت سائل ومسحته بإيدى ومش بيطير واتأكد انه ميه والله العظيم ميه واكتشفت ان البنزين اللى انا حطيته اول مرة كان مخلوط بالماء جبت سائل تنضيف كربرتير ونضفته وركبته وروحت فولت العربيه فى بنزينة اعرفها كويس ومشيت ورجعت العربية زى الفل
الموضوع ده انا عملته علشان الناس تخلى بالها لو بنزينة معروف عنها الغش نبعد ولو حصلت مشكلة زى دى اطمن العربية شربت شوية ميه وحسبى الله ونعم الوكيل فيكى يا مصر

المشاركة الأصلية كتبت بواسطة =islam=

لا حول ولا قوه الا بالله انا مشتري العربيه من سنه تقريبا ومن ساعه ما اشتريتها وانا بحط بنزين في النزينه دي وتقريبا بالعدد 4-5 مرات اللي فولت فيهم براها اللي كنت مسافر وقتها علشان كنت فعلا بثق فيها جدا ومحترمه ونضيفه

حسبي الله ونعم الوكيل

والله يا اسلام انا زيك بالظبط وعمال ادورلهم على حجه او حاجه تبرئهم لإنى فعلا مكنتش بتعامل الا مع البنزينة دى وفعلا لما سألت حد مصدر ثقة ومتابع موضوع البنزين ده قالى البنزين ممكن يكون جايلهم مخلوط من المورد نتيجة ازمة البنزين بس اللى مش فاهمه مش المورد ده المفروض يكون هو نفس الشركة مبقتش فاهم حاجه ده غير ان استحالة بأى شكل من الأشكال ان عربيتى تعمل كده لوحدها ولما افك الكربرتير اكتشف مية على جوان الكربرتير واقول يمكن غسيل الجيران هو اللى نقط عليه بس انا هجازف عن قريب واروح اجرب تانى علشان اقطع الشك باليقين خصوصا انى بفك الكربرتير بنفسى ومش بروح لحد .. مش عاوز اخسر البنزينة دى جمب شغلى وبيتى ومتأكد انها كانت كويسة