خبراء الكريستالة, رعشة و صوت الموتور عالى بعد الصيانة

**kid** · 09-10-2011 11:57 AM

أعضاء المنتدى الأعزاء:

لقد قمت بالأمس بعمل صيانة ال 125000 لسيارتى الكريستالة موديل 1998 و لكن للأسف بعد استلامى للسيارة من الميكانيكى لاحظت وجود رعشة فى العربية على السلانسية و علو صوت الموتور بشكل عام و لو زودت على النقلة علطول اسمع نعرة من الموتور و السحب مش اللى كنت منتظرة خالص مع العلم إن الصيانة كانت كالآتى مع أسعار بعض قطع الغيار

تيل فرامل ريمسا أسبانى 95 جنية

فلتر بنزين هيونداى كورى 20 جنية

طقم بوجيهات ngk 21 الكترونى, مع العلم إنى سألت الميكانيكى وأكدت علية وقالى هوة دة المناسب لعربيتى 50 جنية و القديم اللى كان راكب كان دنسو

إسبراى منظف كربراتير 20 جنية

غيرت القواعد الأربعة وأسعارهم 55 + 55 + 85 + 40 جنية حشو للقاعدة الرابعة أتشحط جواها

و المصنعية 120 جنية

و بدلت الكاوتش أمامى مكان خلفى و ظبطت زوايا

و لما سألتة على الصوت العالى قاللى علشان إسطوانة الدبرياج خفيفة بس حسيتة بيستعبط علشان من أول ما روحت قولتلة إكشف على الدبرياج و قاللى تمام زى الفل!!!

أنا لسة هغير زيت موتور أخر الأسبوع كمان.

أنا شاكك إن الموضوع لية علاقة بالبوجيهات و الكهرباء بس طبعا مستنى ردود خبراء الكريستالة !!

و جزاكم الله خيرا

**husseinthemaster** · 09-10-2011 12:08 PM

غيرت القواعد الأربعة وأسعارهم 55 + 55 + 85 + 40 جنية حشو للقاعدة الرابعة أتشحط جواها
طب هو حضرتك جبت الحشو منين وشكرا

**mohammedabdallh** · 09-10-2011 12:16 PM

ارجعله خليه يظبطلك الكهربه وسعات البوجيهات بتيجى بيظه فخلى بالك

**kid** · 09-10-2011 12:21 PM

شكرا أستاذ محمد عبداللة, المشكلة إنى فى 6 أكتوبر و الميكانيكى فى العاشر مدينة نصر :(

**M.Elgergawy** · 09-10-2011 01:07 PM

هل كان عندك رعشة قبل الصيانة ؟
بالنسبه للرعشة لو عندك ار بي ام قولنا هو كام على السلانسيه
والقواعد جبتها تايواني كلها ؟؟
وفلتر البنزين زي بتاعنا الاصلي ولا هوا مولف دا على دا
وعلى فكرة البوجيهات الدينسو افضل من ngk عن تجربة وكمان اوفر في البنزين

**kid** · 09-10-2011 01:20 PM

ما كنش فية رعشة خالص قبل الصيانة
للأسف ما عنديش rpm
القواعد تايلاندى كلها
و الفلتر زى بتاعنا المدخل و المخرج
طب ngk اللى يركب عندى 21 اليكترونى فعلا ولا اللى راكب دة ماينفعنيش
و شكرا

**M.Elgergawy** · 09-10-2011 02:09 PM

طيب لما انت معندكش رعشة له غيرت القواعد
انا مركب عندي واحدة تايواني وعملالي تنميلة خفيفة والقديمة مكنتش عاملة حاجة خالص الميكانيكية بيفتوا وخلاص يقولك القواعد عايزة تتغير وانت معندكش اي مشكلة حاول تركب القدام تاني وياريت متكونش سيبتهم عنده
وبالنسبة للبوجيه مفيش مشكلة في المقاس عادي يركب انا عندي مركب ال 16 دينسو وعادي جدا وكان قبليه ال 21 ngk بس الدينسو افضل بكتير نظرا لوجود ngk غير اصلي كتير

**kid** · 09-10-2011 02:33 PM

بس أنا قاعدة الفتيس عندى كانت مقطوعة, هىة ماكنتش مأثرة فى حاجة بس أكثر من واحد قاللى قبل كدة على الموضوع دة أول ماالكبوت يتفتح...
طبعا القدام سبتهم عندة خلاص!
حضرتك تقصد إن الرعشة دى ممكن تبقى من القواعد مش الكهرباء و هتفضل فى العربية على طول ولا إية ؟؟؟