الموضوع: العربيه بتسخن جامد وتوصل لحد 100

المشاركة الأصلية كتبت بواسطة nesr_2020

فى ترموستات خاص بالحرارة و الصنايعية بيسموه ساعة الحرارة ساعات و ده اللى بيظبط تشغيل المروحة عند وصوله لدرجة حرارة معينة بيشغل المروحة على طول..
ده يكون موجود فى الرادياتير نفسه فى الحتة الفبر اللى اسمها الخزنة مش عارف يمين عندك ولا شمال..
اصل طالما المروحة شغالة بس من عند 100 يبقى عايزة تنزل عند 92 مثلا للتشغيل كما هو معروف عليه فى الاوبل
و دى اى كهربائى يعملهالك او ممكن تحتاج تغير الترموستات لو لزم الامر و هو مش غالى على اما اتذكر كنت جايبه ب 80 جنيه بس من سنة فى العربية الاسترا.

لما بيكون فى خرم فى الخزنة ممكن ينزل مية و يبوظ الساعة لانها بتوصل كهرباء للعدادات..

راجع تانى ان المية مش بتنقص من القربة لان دى الحاجة رقم 1 فى التفكير فى ارتفاع الحرارة..
لو بتنقص بس مش لاقى مية بتسرب تحت العربية يبقى فيه خرم خبيث و بيسقط على الكساحة او بينزل نقط و لازم توصله عشان حيفضل مزاولك لحد ما تعمله.

تحياتى و اتمنى اكون افدتك.

هيا الساعات دي عندي فعلا في الخزنه تحت الكوعه شمال وانت واقف قدام العربيه
بس هيا على فكره بتشتغل قول مثلا من عند 92 بس الحراره بتخليها تعلا لحد ما توصل 99 مثلا وترجع تاني
وبعدين هو فعلا ممكن الكهربائي يظبط الساعات بدل ماتشتغل عند 92 مثلا تشتغل عند 88؟؟؟
ولسه فاكك الرادياتير امبارح ببص النهارده تحت العربيه من تحت الخزنه اللي فيها الساعات لقيت في بقع ميه شويه صغيرين كده مع اني لسه عامله امبارح
والترموستات الكوعه اللي فوق الخزنه بتاع الساعات لو مش موجوده ممكن تشقلب حال العربيه كده لان في واحد بتاع رادياتير قالي دي مش مهمه دي بتركب عشان تسخن العربيه ولا انتو ايه رايكو؟؟؟
معلش يا نسر طولت عليك والف شكر على تعاونك معايا

المشاركة الأصلية كتبت بواسطة caboo_1

بصرف النظر عن التبخير اللي لازم يتعالج هتعمل
تراجع علي كتاوت المراوح عشان ممكن تكون ضعفت وتراجع علي الثرموستات ويستحسن تعمل تقوية لارضي المراح

تقويه ازاي لارضي المراوح
وهيا الكتاوت ممكن تضعف؟؟
الف شكر يا كابو

المشاركة الأصلية كتبت بواسطة nesr_2020

للعلم المروحة الكبيرة ( الامامية) بس للتكييف او للعمل اثناء الطوارئ فى حالة ارتفاع الحرارة المبالغ فيه او بعد وصولك من مشوار طويل للعربية تشتغل المروحة الكبيرة او الجو الحار اثناء القيادة و الوقوف بالسيارة فترة طويلة.

المروحة الداخلية هى لتبريد الموتور .

اذن لا تحكم على قوة التبريد من المروحة الكبيرة .

ثانيا انت قلت موضوع غسيل الرادياتير بالماء و ده غلط لو وصلت مية على الساعات او الحساسات لان فيها كهرباء رايح جاى فاكيد لازم تتحرق لو عليها مية..

تحياتى و الحل بسيط ان شاء الله و ذكرته فى المشاركة السابقة :)

بس انا عندي المروحتين بيشتغلو مع بعض انما السرعه التانيه بتاع المروحه الكبيره هيا اللي بتشتغل في الطوارئ
هو الصنايعي لما جه يغسل الرادياتير اول حاجه بيفصل البطاريه ويخرجها من العربيه
مشكووووووووووووور يا نسر

المشاركة الأصلية كتبت بواسطة ashrafnoby

باجماعه انت قولتو كل حاجه مش سيبين اى حاجه الواحد يقولها وبسم الله فادى ربنا يكرمك على المعلومات ده وللعلم انا برده بزود ميه كل ممكن شهرين او تلاته والعيب مش هيطلع بعيد واول متوصل للعيب ابقى طمنا عليك

ربنا يبارك لك فيها يا اشروف
وان شاء الله انا اول ما اوصل للعيب هاقولكوا ان شاء الله بس ادعولي

باركولي يا جماعه
الحمد لله انا صلحت العربيه ومابقتش تسخن الحمد لله
وفعلا انا بشكر كل الاعضاء اللي تعبوا معايا الف الف مليون شكرا لكل الاعضاء اللي اضافت ردود

والموضوع على ما اعتقد انه طلع من الساعه الرصاصي "حساس الحراره" اللي موجود في خزنة الرادياتير
وعلى فكره انا ركبت ترموستات الكوعه برده
بس السبب كان من الساعه

وده بقى تقرير عن خلاصة اللي عملته في العربيه بالظبط من يوم ما موضوع السخنية ده بدا معايا
العربيه كانت شغاله زي الفل
بدات بان الحراره بقت بتعلا واحده واحده يعني يوم تبقى 90 بعدها بيومين مثلا 92 بعدها بقت توصل 95 لحد ما بقت توصل 100 بس المراوح شغاله عادي معاك
بس اللي يجننك انها ممكن تلاقيها ماشيه معاك في يوم بتوصل 98-100 وبعدها بيوم بالظبط تلاقيها شغاله زي الفل معاك تحس انها كانت تهيئات وانت بس اللي مجنون شويه
اول حاجه عملتها روحت لواحد بتاع رادياتير بس على قده كده فك الرادياتير وسلكه وغسله كويس وظبطه وركبه وحطيت ميه خضره صناعه سعودي هيا بس زباله بصراحه"25 جنيه" جيت بعدها لقيتها كويسه شويه ويومين اتنين بالظبط ورجعت زي ما هيا تاني بتسخن برده على ما رجعت اجازه تاني اوريها لميكانيكي واتنين وتلاته بس للاسف اغلبهم مش بيفهم في الاوبل اوي مره مثلا الاقي في تسريب من عند الساعات بيزاولني مره الاقي كوع الخزنه بتاع الرادياتير مشروخ وكل مره من دول فيها حوار
وديتها لكهربائي على قده برده بس عشان يختبرلي السرعة التالته بتاع المروحه الكبيره شغاله ولا ايه لاقها تمام
روحت لبتاع الرادياتير تاني فك الرادياتير كمان مره عشان نربط الساعات كويس عشان ما تسربش حواليها ربطنا وكل تمام نجرب يا ريس الاقي الحراره بتوصل لحد 98-99-100 واستحاله تنزل عن كده الا لو نزلت من العربيه احط ميه على الرادياتير مباشره عشان يبرد والكلام ده كل نص ساعه مشي مثلا
طلعت بقه على الكهربائي قولتلو على اللي فيها قالي هات ساعة بتاع الرادياتير "الرصاصي بتاع الحراره" جبتها الماني بس مش جي ام بــ 95 جنيه والمعلم اكد على الوصلات والفيش والكلام ده وركب الساعه الجديده وانا كده كده كنت عايز اركب ترموستات الكوعه كمان جبتها هيا كمان بـــ105 ايطالي هيا ركبنا الكلام ده كله وزودت ميه معدنيه جراكن وخدنا الهو وجربنا باذن الله اشتغلت كويس وهيا شغاله معايا لحد دلوقتي تمام ربنا يسهل ان شاء وتخليها كده على طول

ودي الحاجات اللي جبتها
- ترموستات كوعه بالكوعه نفسها ايطالي بـــ105
-حساس حراره اللي الفيشه بتاعته على شكل مثلث لونه رصاصي راكب اول واحد فوق في خزنه الرادياتير بــ95
- علبة سيلكون رصاصي حراري بــ5

وعلى فكره جبت عداد كمان عشان بتاعي بايظ جي ام اصلي بيعد بالكيلو والميل بــ250
والكهربائي خد 35 جنيه و 5 جنيه للصبي
يعني بالصلاة ع النبي كده كيشت 495 عسكري
اسف لو طولت عليكوا بس انا دخلت في التفاصيل عشان الافاده والله