الموضوع: رسالة هامة الى كل مالكى شيفروليه وبالذات أفيو

ربنا معاك وينصرك على الظلم اللى فى البلد
متسبش حقك ولو هيكلفك حياتك وتاكد ان ربنا هينصرك طالما مظلوم

شكرا جزيلا لكل الاخوة المهتمين وانا فعلا مع الاخ afrtow انى حتى لو معرفتش اخد حقى انبه كل المهتمين من باب التوعية وحتى لايتكرر الخطأ لأنى متأكد أن كتير من الناس تجاهلو كده جزء من الناس بيدفع الضريبة وهى خسارتهم لحقهم المتمثل فى تمن عربية اللى اكيد مش قليل دا غير العطلة وحرقة الدم فانا عايز انبهكم للنقط التالية:
1- أولا اوعى تستنى على أى عيب ظهر فى العربية روح مباشرة على التوكيل ولو ظهر تانى نفس العيب عليك بالشكوى فى حماية المستهلك لانهم بينفعوا بس لو الشكوى بدرى غير كده هيطنشوك زيى.
2- بالنسبة لعيوب الأفيو اللى ظهرت معايا
مثلا بالنسبة لموضوع ارتفاع الار بى ام الموضوع لو عايز تحله من الأخر غير ضفيرة الكهرباء بحالها لان دا الحاجة الوحيدة اللى حلتلى المشكلة بعد 6 شهور عذاب وللامانة انا غيرتها على حساب التوكيل.
3- موضوع الطنابير بصراحة انا معرفتلوش حل لان لو عرفتله حل مكنتش رفعت قضية اصلا واعتقد بعد بحث شديد ان العيب مش فى الطنابير اصلا العيب فى حاجة تانية بس ايه هيا الله وحده اعلم.
3- لو قدر الله وروحتو زى اخوكم الغلبان لحماية المستهلك متتنازلوش وتسمعو اصلا لكلامهم لان اللى عرفته ان قانونا لو ظهر عندك عيب وتكرر فى العربية من حقك استبدال العربية بأخرى او استرداد تمنها بالكامل.
4- الفواتير الفواتير الفواتير . حافظو على كل الفواتير بتاعة التوكيل سواء صيانة أو اصلاح لان دى الحاجة اللى ممكن تحميكم او تضيع حقكم لو مش معاكم ودى الحاجة الوحيدة اللى معتمد عليه فى القضية وانا عارف طبعا ان معظمنا بيرمى الفواتير .
5- وانا هارفعلكم بس عشان انا مشغول دلوقت بيان بالارقام المهمة سواء لحماية المستهلك او لبعض بيانات القضايا المحكوم فيها بالنسبة لقضايا السيارات.
اسف للاطالة وانا برضه تحت اى امر اى حد عايز يستفسر عن حاجة لان( كان الله فى عون العبد مادام العبد فى عون اخيه) والسلام عليكم وعلى كل أعضاء المنتدى المحترمين وأشكركم على اعطائى الفرصة لابداء رأييى

انت دلوقتي ممكن تترفعك عليك قضيه من منصور بسبب الكلام ده
انت تعرف ايه معني كلامك
انت تشكك في كل مؤسسات الدوله
بمعني وزارة التموين
هيئة الرقابه علي الصدارات والواردات
هيئة التنميه الصناعيه
وخد عندك ظبط الجوده التابعه لوزارة التموين
يعني هتيج عليك الناس كلها
روح ارفع قضيه وانت لو عندك هتاخد تمن العربيه
طيب وانت سكت علي العربيه ليه وانت في فترة الضمان
وارجوك ان الاتشوه سمعة عربيه عن عربيه
وانت لوعندك انشر بعد كده القضاء حكم بايه
ولاتتهم احد حتي يبان حكم القضاء

ياأخ هانى انا فعلا بشكك فى كل مؤسسات الدولة ودا رأييى الشخصى وأعتقد انى حر فيه وبعدين انا مش بتكلم عن تجربتى لوحدى انا بتكلم عن تجربتى و2 من اصدقائى كمان ومتفتكرش ان بلدنا مؤسساتها عشرة على عشرة يعنى واظن كمان انى وضحت فى الاول ان مش كل الناس حصل معاها المشاكل دى ومش معنى ان معاك عربيتك تمام يبقى كل العربيات تمام وفى النهاية هارجع واقولك ان دى تجربتى الشخصية حبيت افيد بيها الناس وبالنسبة لقصة انا مسكتش ليه ايام العربية ماكانت فى الضمان بالعكس انا ماشى فى الموضوع ده من ايام العربية ماكانت لسه فى الضمان وانا رأييى مبنى على تجربة شخصية مش اشتغالات وكل اللى انا عايزه انى اوعى الناس لوجه الله ومتزعلش قوى كده ياسيدى خليك حليم