الموضوع: محتار اشترى يابانى ولا كورى ولا اية

ايه العربيات اللى انت منقيها دى
واضح ان قطع الغيار الغاليه مؤلمه بالنسبه لك
يبقى خليك فى الكورى طبعا ، وبعديه اليابانى
انا معاك تماما فى الفيرنا ، اللانوس ، النوبيرا ، الماتركس ممكن تجيب موديل 2005 او 2006 ، برضه المكواه ممكن تجيب ، صعب بوما بالسسعر ده الا لو صدفه يعنى ، انما ابعد طبعا عن الالمانى ، والكلام الوهمى بتاع الاحساس بالعربيه الالمانى دى ، لان المانى موديل تسعين ، هيبقى اقل بكل تأكيد من الكورى واليابانى بتاع 2005 وانت طالع ، وبعدين احساس ايه ياعم ، ديتها مرتين عند الميكانيكى احساس تمن قطع الغيار هيضيع اى احساس تانى لو وجد اصلا ، انت مش حمل الالمانى ولا اسعار قطع غياره ياراجل ، خليك واقعى

المشاركة الأصلية كتبت بواسطة i_Boy

اشتري اوبل
الماني
وقطع غيار في الحنين مش لدرجه ال 10 تلاف في العفشه
وانصحك ب فيكترا تسعينات
98- 99- 2000
60 يجيبولك حاجه نضيفه قوي واقل من 60 كمان ممكن

+1

لانوس حتبقى كسر زيرو ومش حتحتاج مصاريف

شوف.. مع اعتذاري للي قالك هات زيرو.. بس لو جبت زيرو بكل اللي معاك وانت بتسدد الأقساط حصل (لا قدر الله) حادثة (لأن الحوادث عيوب استخدام مش تبع الضمان).. طبعا التوكيل مش مسئول عن تصليحها مجانا.. وفي نفس الوقت مالكش غير التوكيل (اللي حايضربلك سعر في السما) اما تصلح عنده واما أي حاجة تصلحها تطلع من الضمان (لو شمو ريحة سلكة متغيرة الضفيرة كلها تطلع من الضمان مثلا).
أنا مابقلش ماتجيبش زيرو. أنا باقول لازم تخلي مبلغ علي جنب مصروف للعربية عشان ماتتزنقش لو حصل أي مشكلة.

نرجع للموضوع.. حاحكيلك حاجة الأول..
أنا لما اشتريت مستعمل مادورتش علي كسر زيرو لأن بعد سنة سعره بيقع بسرعة.. أنا لأني واحد لسة باكون نفسي الي آخره قلت أشتري مستعمل حالته كويسة وموديل قريب وراشش خوارج فابريقة دواخل..
أول حاجة فابريقة الدواخل مفروغ منها لأن أي حاجة غلط ف دواخل العربية استحالة ترجع للي كانت عليه. الخوارج بقي انت وشطارتك.. ميكانيكي وسمكري محترمين يا اما التوكيل نفسه يكشف عليها ولو كل عيوبها هي دهان الخوارج اتوكل علي الله.. والخمس ست آلاف اللي حاتخسرهم ف بيع العربية قدام هم هم الخمس ست ألاف اللي وفرتهم.. حاييجي سؤالك.. طب ما تشتري فابريقة خوارج يا عم الحج؟
أنا عن نفسي مهندس مواقع بارمي العربية علي أي حتة رصيف واسيبها.. فا طبيعي كلها سنتين وتاخد حزام نضافة وسعرها يقع.. طب مانا أشتريها آخدة حزام نضافة من الأول ومش خسران حاجة
دي مجرد وجهة نظر شخصية مع لانوس 2008 واخدة رشة نضافة عشان صاحبها كان بيسيبها جنب مدرسة والعيال بتحسبها امتداد للسبورة.

أما عنك انت ممكن تشوف حتة كريستالة (لو عاوز ياباني) أو فيكترا 2000 مثلا (لو عاوز ألماني أسعاره زي الياباني.. ماعدا الفوانيس ) الاتنين أوتوماتيك سعرهم مش وحش. ممكن تزود حبة كمان وتجيبلك صني 2004 مثلا اوتو رشة خوارج. مانصحش بالبومة أوتو بسعر في الحدود دي لأن 99% اما حاتكون 1300 سي سي وصباح السلاحف يا اما 1600 وفيها حاجة غلط.

نصيحة أخوية: السيفيك مش عائلية ومش بتاعة حد لسة حايجرب فيها.. انوي ع السيفيك لو ناوي تسقط موتور علي الأقل.