محتار اشترى يابانى ولا كورى ولا اية

**Tarek218** · 29-11-2011 02:12 PM

المشاركة الأصلية كتبت بواسطة M.Nabeeh

Lancer 2000
Sunny2005

لانسر 2000 الى هى كرستالة 1300 سى سى؟

المشاركة الأصلية كتبت بواسطة MaZaGAngeE

لو ظغت نفسك شوية و تجيب لانوس يبقى افضل اختيار
عربية زيرو و مش هتتعبك خلال 5 سنوات

طيب وبعد عمر طويل إن شاء الله هتفتح بقها ومتسواش جنية؟
اعذرنى معلوماتى محدودة بخصوص الكورى

المشاركة الأصلية كتبت بواسطة crayvor

شوف.. مع اعتذاري للي قالك هات زيرو.. بس لو جبت زيرو بكل اللي معاك وانت بتسدد الأقساط حصل (لا قدر الله) حادثة (لأن الحوادث عيوب استخدام مش تبع الضمان).. طبعا التوكيل مش مسئول عن تصليحها مجانا.. وفي نفس الوقت مالكش غير التوكيل (اللي حايضربلك سعر في السما) اما تصلح عنده واما أي حاجة تصلحها تطلع من الضمان (لو شمو ريحة سلكة متغيرة الضفيرة كلها تطلع من الضمان مثلا).
أنا مابقلش ماتجيبش زيرو. أنا باقول لازم تخلي مبلغ علي جنب مصروف للعربية عشان ماتتزنقش لو حصل أي مشكلة.

نرجع للموضوع.. حاحكيلك حاجة الأول..
أنا لما اشتريت مستعمل مادورتش علي كسر زيرو لأن بعد سنة سعره بيقع بسرعة.. أنا لأني واحد لسة باكون نفسي الي آخره قلت أشتري مستعمل حالته كويسة وموديل قريب وراشش خوارج فابريقة دواخل..
أول حاجة فابريقة الدواخل مفروغ منها لأن أي حاجة غلط ف دواخل العربية استحالة ترجع للي كانت عليه. الخوارج بقي انت وشطارتك.. ميكانيكي وسمكري محترمين يا اما التوكيل نفسه يكشف عليها ولو كل عيوبها هي دهان الخوارج اتوكل علي الله.. والخمس ست آلاف اللي حاتخسرهم ف بيع العربية قدام هم هم الخمس ست ألاف اللي وفرتهم.. حاييجي سؤالك.. طب ما تشتري فابريقة خوارج يا عم الحج

؟
أنا عن نفسي مهندس مواقع بارمي العربية علي أي حتة رصيف واسيبها.. فا طبيعي كلها سنتين وتاخد حزام نضافة وسعرها يقع.. طب مانا أشتريها آخدة حزام نضافة من الأول ومش خسران حاجة

دي مجرد وجهة نظر شخصية مع لانوس 2008 واخدة رشة نضافة عشان صاحبها كان بيسيبها جنب مدرسة والعيال بتحسبها امتداد للسبورة.

أما عنك انت ممكن تشوف حتة كريستالة (لو عاوز ياباني) أو فيكترا 2000 مثلا (لو عاوز ألماني أسعاره زي الياباني.. ماعدا الفوانيس

) الاتنين أوتوماتيك سعرهم مش وحش. ممكن تزود حبة كمان وتجيبلك صني 2004 مثلا اوتو رشة خوارج. مانصحش بالبومة أوتو بسعر في الحدود دي لأن 99% اما حاتكون 1300 سي سي وصباح السلاحف يا اما 1600 وفيها حاجة غلط.

نصيحة أخوية: السيفيك مش عائلية ومش بتاعة حد لسة حايجرب فيها.. انوي ع السيفيك لو ناوي تسقط موتور علي الأقل.

ألف شكر على النصائح الجميلة يا باشمهندس

_______________________________________________

انا طبعا اتأخرت فى الرد على الموضوع لأنى كل دا بدور واخر حاجة وصلتلها
جين 2 2007 وانت طالع
هيونداى اكسنت 2006 * الشكل القديم *
إلينترا 2004-2006 الشكل القديم برضو
جراند بونتو 2006 وانت طالع " معرفش هل فية فعلا جراند بونتو موديل 2006 ولا لأ "

ومازالت الحيرة مستمرة

**Mahmode** · 30-11-2011 02:57 PM

ياباني

**crayvor** · 30-11-2011 11:49 PM

لانسر 2000 الى هى كرستالة 1300 سى سى؟

آه هيه.. اللانسر كريستالة لغاية 2001

طيب وبعد عمر طويل إن شاء الله هتفتح بقها ومتسواش جنية؟
اعذرنى معلوماتى محدودة بخصوص الكورى

بلاش لانوس.. أنا واحد معاه لانوس وباديك نصيحة أهه.. بلاش لانوس..
وحاليا أول ما أفضي حاشوفلها بيعة وأشوفلي كورسا سيدان يا كليو 2008 يا اما بقي أطلع شوية وأجيب صني.

انا طبعا اتأخرت فى الرد على الموضوع لأنى كل دا بدور واخر حاجة وصلتلها
جين 2 2007 وانت طالع
هيونداى اكسنت 2006 * الشكل القديم *
إلينترا 2004-2006 الشكل القديم برضو
جراند بونتو 2006 وانت طالع " معرفش هل فية فعلا جراند بونتو موديل 2006 ولا لأ "

ومازالت الحيرة مستمرة

جين 2 بلاش عشان سببين.. أولا ماليزي ومش بجودة الياباني حتي. ثانيا ودا الأهم ان قطع غيارها ف السما ومش متوفرة أوي برة.
أكسنت الشكل القديم لا مؤاخذة دلوقتي عامل زي اللادا. ممكن تفكر في النيو أكسنت اللي هي 2006 ل 2010
الينترا الشكل القديم ممكن تتوه شوية ف قطع غياره؟ ماعرفش بس لو عاجبك أنا عن نفسي مش شايفه وحش ولا شايفه حلو للدرجة اللي ينافش بيها بعض الحاجات في نفس الفئة السعرية.
الجراند بونتو ماعرفش أولها 2006 ولا 2007 ف مصر بس أولها ف أوروبا 2005.. ولو سعرها أقل من 60ألف أنا ممكن أساسا أفكر فيها بس برضه حاتصدم بقرف توكيل فيات اللي أساسا نسيت اسمه من قلة ما باشوفه.

رأس شخصي.. برضه حاحط الصني علي أساس انها عربية ماتتعابش.. ممكن أضيف لانسر مكواه 1600 رغم ان موتورها كاربيراتير. برضه حارشح الفيكترا 2001 اوتو... فيه كليو أوتو لو عرفت تلقط واحدة رغم اني بصراحة أشك ان حد حايبيعهالك.. مممممممممم... والله عاوز أقولك اني أساسا لسة مارسيتش حاجيب ايه بعد ما أبيع اللي معايا في مش عارف ازاي أختار لحد وانا مش عارف أختار لنفسي..

طلب لله.. أول ما ترسي علي حاجة تبقي تقوللي معاك

**blazer** · 01-12-2011 06:40 AM

فيرنا
لوجان كسر زيرو
نوبيرا 2 2006 " بس لازم اللى يسوقها يكون بيعرف يسوق عشان العربيه كبيره

**Dr'AhmZZong** · 05-12-2011 10:01 PM

المشاركة الأصلية كتبت بواسطة sonasteel

ممكن تدفعهم مقدم صني او تيدا او اوبترا او جين تو
والقسط يعتبر مصارف الصيانة للمستعملة .... واسمك معاك زيرو من اولها
ده رأي الشخصي
بعد ما اتشنيرت في عربية يوسد وكانت الماني
والالماني باللي انا شوفته ده ميتجابش الازيرو اصلا .... غير كده لو مستعمل يبقي كوري او ياباني حنين
ومتنساش الاستخارة وربنا ييسرلك الخير

كلامك منطقي بصراحة ..

**el_nahal2004** · 07-12-2011 01:17 PM

الله ينور -متابع

**mody3on** · 07-12-2011 02:32 PM

هات حاجة كسر زيرو عشان تستفيد ان العربية جديدة وفي نفس الوقت سعرها حنين ومتتعبكش
انصحك بفيرنا او لانوس كسر زيرو
وبالنسبة لقطع غيارهم تمنها قليل جدا ومش هيتعبوك في الصيانة اي ميكانيكي بيصلحهم

**medo111** · 07-12-2011 08:30 PM

لانوس دي فكسانه
بص دور علي صني 2003 الياباني مريحه جدا عن تجربه واوتو وحتي لو مستعمله مشكلها قليله جدا وسيبك من الصني الجديد دور علي الياباني
وممكن استرا او كورسا 2004 هتلاقي في السعر دا واكشف عليها في التوكيل كويس وبلاش الفيكترا عشان مش هتلاقي حاجه نضيفه بسهوله
وهات العربيه راشه برا وفبريكه جوه عشان متخسرش لو جبتها واتخبطت ورشتها حاجه تانيه كمان الصني الي اقصدها قطع غيرها برخص التراب