الموضوع: بفكر اشتري سيات 133 ياريت تردو عليا

عايز اسأل هل العربية ديه ينفع يركبلها ماتور الماروتى؟؟؟؟

هى دى الـ سيات 133 ..

فيه غيرها فيات 126 ، برضه موتور ورا ولها نفس المشاكل

والاتنين فى نفس مستوى السعر.

وطالما دى امكانياتك يبقى اتكل على الله ، بس استنضف بقدر الإمكان.

انا اشتريت السيات 133 أربع مرات ، اولها كان 1995 وبعتها 1997 ، واخرها 2005 وبعتها 2007، واقدر اقول لك بكل اطمئنان وراحة ضمير اوعى تشترى سيات 133 ، حرام عليك فلوسك، العربية دى كانت حلوة من 15 سنة فاتت لما كان عمرها 15 سنة، وانا اول عربية سيات جبتها برغم ان كان عمرها 15 سنة لكن كانت ممتازة، لا كانت بتسخن ولا ضايقتنى فى الفتيس ولا الفلانشات(آلات الجر) ولا اى حاجة
لكن كل واحدة كنت بجيبها بعد كدة كانت أسوء من اللى قبلها، وقطع الغيار عماله تقل وسعرها يزيد والموجود منها مستعمل وحالته زبالة، لحد آخر عربية سيات جبتها فى 2005 ، خلال سنتين مكملتش بيها 6 آلاف كيلومتر وصرفت عليها 6 آلاف جنيه فوق تمنها وبعتها اقل ما اشتريتها ، وكانت مركونة طول الوقت واعتمادى كله على عربيتى الكبيرة ومش بتكمل مشوار من غير ما تعطل وكانت بتتفنن فى ابتكار اعطال لا أول لها ولا آخر ، وعملت فيها كل العمايل ولعبتها كل الألعاب، ركبت الطنبورة الصغيرة لطرمبة المية وشلت قميص الردياتير وركبت لها مروحة عربية لادا، وركبت على وش الردياتير من الناحية التانية مروحة كهربا وجبت لها ردياتير جديد، وعلمت لها عمرة موتور وبرضة بتسخن، اما بالنسبة لألات الجر فحدث ولا حرج، غيرت لها الجير بوكس مرتين لأن اللى موجود فى السوق مستعمل وتعبان، كما ان كل الل موجود ديلوقتى بتاع الزستافا 750 ونسب تخفيضه اقل من بتاع السيات وبيخليها ماشية تزحف، وقلبت الفلانشات الى كبالن بعد ما فقعتنى اكتر من مقلب وكلفتنى مبلغ وقدره، ده غير بأة العيوب العجيبة اللى كانت بتوقف العربية، مرة تقف ويطلع مسمار الكوندنسر مفوت وبالتالى بيضيع الشرارة، مرة الضفيرة شاطت بدون ادنى سبب، مرة صرة العجلة هربت من أكس الجر، مرةقاعدة دواسة الدبرياش طرقعت وبقت العربية بدون دبرياش(عيب شهير ومتكرر فى السيات)، وكانت لما متلاقيش عطل تعطله تختار مطلع كوبرى او منزل نفق وتضرب فردة كاوتش، وبعدين العربية قطع غيارها قليلة جدا، هيقولولك كل قع غيار ال127 بتركب عليها وهذة معلومة غير صحيحة، اللى بيركب عليها من قطع غيار ال127 هى قطع غيار الموتور(ماعدا عمود الكامة ) وفيه حاجات بتحتاج تعديل علشان تركب عليهامن قطع ال127 زى المارش والدينامو والحاجات دى (بما فيها عمود الكامة اللى مش بينفع) علشان موتور عربية من الاتني بيلف يمين والتانى بيلف شمال، وطرمبة المية والكاربراتير مختلفين بين العربيتين، اما بأة بالنسبة للفتيس( وده اكبر مصيبة فى السيات وبيتغير زى البنزين والزيت وغالى موت ومش موجود وان لقيته هتلاقيه حالته عدمانة) فمش بيركب عليها غيرا بتاعها وبتاع الزاستافا 750 وكلاهما نادر، مش هيركب عليها فتيس اى عربية تانية علشان هى جر خلفى ومتور بالطول وباقى العربيات جر امامى ومتور بالعرض، كمان موضوع ال 120 كيلو يوميا للسيات ده حتى لو كانت فى افضل حالاتها(وهو ما لن تجده) مأساه، وجو اسيوط حر لن تتحمله السيات(دى بتفطس فى جو القاهرة)
نصيحة يا أخى الصغير حافظ على فلوسك واصبر لحد ما يكون معاك على الأقل ثمن ال 127 او ال 128، انا كل اللى اعرفهم اشتروا سيات 133 بما فيهم انا خربت بيتهم وفلستهم واتباعت بأرخص من تمنها علشان يتدبس فيها واحد تانى تفلسه وهكذا ، ده ناهيك عن انها مبتكملش مشوار بدون مشكلة، لو كنا من 20 سنة فاتوا كنت قلت لك اشتريها بلا تردد، لكن النهاردة علشان تشترى عربية عمرها 30 سنة وهى اصلا من ساعة كان عمرها 10 سنوات ابتدت تبان لها مشاكل فنصيحتى لك هى حافظ على فلوسك ، ونصيحة اخرى متعيشش فى قصة انك هتجيبها وتركب لها موتور عربية تانية(ألماروتى مثلا) لا هيبات مكان موتور السيات ولا ينفع يترخص مكانه، كما ان مشاكلها مش فى نوعية موتورها لأن نفس الموتور راكب فى ال127 بدون مشاكل، هى مشاكلها من تصميم الحوض ومكان الموتور خلف السيارة اللى بيخليها تسخن وده اى موتور هيتركب مكانه هيعانى نفس المشكلة (فيه ناس بتعدل موتور ال 127 وتركبه مكان موتورها وبتسخن برضه) وباقى مشاكلها من آلات الجر اللى مبينفعش يركب مكانها غير بتاعتها او بتاعت عربيات اسوأ منها زى الزاستافا وبالتالى تغيير الموتور مش هيحل لك المشكلة دى