جين 2 اوتوماتيك ولا ياريس 1300 اوتوماتيك ............ انا بصراحه دوخت :majd(4):
عرض للطباعة
جين 2 اوتوماتيك ولا ياريس 1300 اوتوماتيك ............ انا بصراحه دوخت :majd(4):
الجين احسن بمراحل
الياريس دي تتقارن مع النيو اكسنت و هي غالية عشان عليها علامة تويوتا بس...لكن مش شايف فيها اي ميزة غير المحرك الكويس
نصيحة لوجه الله و عن تجربة ب 4 سنين هات اليارس الاوتوماتك بس هاتها رقم 1 جناح و جنوط هتفرق معاك في الثبات كتير , العربية مشاكلها تقريبا ما فيش و موفرة بطريقة غريبة في كل حاجة , كان معايا قبلها بيجو 307 الفرق كان في الثبات فقط غير كدة كانت مشاكلها كتير عكس اليارس , واحد صحبي كان شاري معايا وقتها اوبترا و بردو غير في العربية حاجات كتيير . والدي معاه كورولا 2003 الكورلا اوسع طبعا بس الباور بتاع اليارس افضل و كرسي السواقة اعلي و كمان اعلي من الكورلا في المطبات
الجين كماليلات ... اليارس تكنولوجيا اعلى - جودة - موتور - اوفر صيانة - يبانى بمعنى الكلمة
الياريس اكيييييد اعتقد انها اعتماديه اكتر بمراحل عن الجين تو والايام هتثبت ذلك لان بالمنطق اسم تويوتا ووراه اليابان اكيد مش كلام له وزنه والسابق والتاريخ يشهد بذلك
قوة موتور و تسارع ... جين تو
راحة داخلية .. ياريس
ثبات و أمان .. جين تو
قطع غيار و صيانة .. ياريس
كماليات .. جين تو
مع سعر الجين تو الممتاز جدا ... أنا شايفها تتفوق
و عموما لو الأهم عندك النعومه في السواقه و قطع غيار رخيصة خليك في الياريس
لكن لو بيهمك الأداء الرياضي ..الجين تو أفضل بمراحل عن تجارب عديدة
بالنسبة للاعتمادية .. جين تو موجوده في السوق من 2006 ، و ياريس من 2007 .. و حتى الآن ماحدش بيشتكي من جين تو غير فقط من التوكيل بتاعها .. و الياريس كل الناس بتقول عيبها الثبات لإنها خفيفة جدا ، و مابتسحبش أبدا أبدا أبدا ( عن تجربة شخصية ) سحبها فعلا ضعيف ... لكنها موفره في البنزين جدا و اقتصادية في قطع الغيار و سهله في الصيانه فعلا ...
بس كل حاجة ليها ثمن .. هتدفع 90 ألف زيرو .. و تاخد أداء رياضي جداااااا و ثبات ممتاز جداااااااا .. هتتعب شوية مع التوكيل ...وهي د ي الضريبة ..
محدش قال عن اليارس ابدا ان سحبها ضعيف .... بس كويس انك قولت عن تجربة شخصية و الا كنت زعلت
اليارس مشكلتها ان سحبها العالى مخلى الناس تفتكر انها خفيفة ... ليه ؟
لأنها اصلا عربية 1300 بتوصل ل 200 km توب سبيد
فى عربيات 1600 اخرها 180
بتوصل160 بسهولة و عربية عالية على الارض وكاوتش رفيع و طيارة
اتحداك اى عربية 1500 تطلع منها ماعدا ال city
, ولا المانى ال 1600 ماعدا ال 116i و ال TSI
لأ اى فرنساوى 1600 نهائى الا 206 cc
و الباقى كله تقريبا 1600 ميجبش معاها غير ال cerato و الelantra
, و اسأل لو مش مصدق و اقرا فى المنتدى
ال يارس دى لو اتجهزت نفس تجهيزات العربيات ال 1600 هتبقى زيها و احسن
تويوتا افضل وانعم مع الوقت والزمن والاستخدام
الياريس كل الناس بتقول عيبها الثبات لإنها خفيفة جدا ، و مابتسحبش أبدا أبدا أبدا ( عن تجربة شخصية ) سحبها فعلا ضعيف ...
مع كل احترامي لكلام حضرتك اخر حاجة ممكن تتوصف بيها اليارس 1300 ان سحبها ضعيف
لمدة اربع سنين ماشي بيها علي طريق السرعة فيه لحد 160 و بعدين بقت 140 و فيه طبعا اماكن ما فيهاش ردارات و بشد مع عربيات كتيير منها الانسر 1600 بتاعت زميلي في العمل و كمان الاوبترا بتاعت وميل ليا تاني و اليارس بتطلع منهم بمنتهي السهولة رغم ان العربيتتين 1600 و هي 1300
الاسترا وحش بسم الله ماشاء الله ربنا يباركلك فيها خاصا ال GTC كلام تاني خاااااااااالص
وانا اصدق انها تعملها بس برضوا عايز اقول لحضرتك نقطة لازم كل واحد يكون حاطط في اعتباره لما يجي يحكم انه طلع من عربية (طبعا مش قصدي ابدا اني اقلل من قيمة عربيتك فانا عارف ومتاكد انه وحش وتعملها)
انت لما بتجري مع عربية انت مابتقاش عارف حالة العربية اللى انت بتجري معاها دي عاملة ايه
هل مفتح الماتور كويس ؟ البوجيهات كويسة ؟ مهتم بعربيته ؟ فيها اوزان ولا مافيهاش ؟ ودي كلها عوامل بتفرق كتير في السحب
يعني على سبيل المثال انا اول امبارح كنت عند ارابكوم بجنط عربيتي
وانا وراجع كنت حاطط في الشنطة الاربع فرد القدام بالحديد والطاسات بتاعتهم الى غير كان معايا 2 زمايلي
الاربع فرد مع 2 زمايلي وانا فالعربية كانت تقيلة كتير في السحب
جريت على كوبري اكتوبر مع لانسر كريستالة وعلى الرغم من التقل اللى عندي الا انه مطلعش مني الا على سرعة 120 كان بدأ يطلع ويفرق ومش فرق جامد
فهل كدة معناه انه طلع من الياريس ؟ انا متاكد ان الاربع فرد القدام لو ماكنوش في الشنطة ماكنش هيشوفني
عشان كدة محدش يضمن حالة اي عربية انت بتجري معاها
انا عن نفسي مش بحكم ولا اقول اني طلع من العربية الفلانية الا لما اطلع منها كذا مرة على طرق مختلفة سعتها يبقى فعلا عربيتي تطلع منها :x1[1]:
انا شايف ان سعر الياريس اوفر اوي عليها
و اعرف ناس معاهم جين 2 بيقولوا انها تحفة
والله أنا أعرف 3 اصحابي عندهم ياريس مانيوال .. هما اللي بيقولوا عليها سحبها وحش كمان مش أنا و بس .. أنا عربيتي لانسر 1600 أوتو ، و بيكون معايا كتير كارينز و سيراتو و أوبترا و كورولا كلهم أوتو عدا الأوبترا .... حتى الكارينز اللي بنطلق عليها لقب السلحفاه بتطلع من الياريس ... بصراحه انت كلامك غريب جدا ... حتى على اليو تيوب كل فيديوهات الياريس ولا مرة طلعت من ولا عربية 1600 أبدا !!!
عموما .. برضه مافيش مشاكل .. ده رأي حضرتك و أنا بحترمه و ممكن يكون فرق سواق أو أو أو هو اللي بيعمل الفوارق دي ، أو أنا اللي كل اصحابي اللي معاهم ياريس مثلا مش مهتمين بيها ولو إن ده صعب جدا ... خصوصا كمان إني مهندس ميكانيكا و بعرف أكتشف الفروق دي بسرعة ..
أيا كان ..هي مقارنة و الراجل صاحب الموضوع عايز رأينا .. هو ممكن ينزل يعمل تيست درايف للعربيتين و يختار المناسب ليه أكتر ..
بالتوفيق ...
الموقع الرسمي لشركة تويوتا بيقول إن الياريس 2011 اللي هي 1500 بتطلع من 0 - 100 كم في 12 ثانية .. فتخيل انت بقى الياريس 1300 سي سي ..
مع العلم إن البومه 1600 أوتو بتوصل من 0 إلى 100 كم في 9 ثواني ....
بصراحه أنا مش عارف ألاقي أي دليل على إن الياريس 1300 سحبها حلو غير كلام حضرتك ..
منتدى تويوتا الناس اللي فيه و اللي معاهم ياريس نفسهم بيقولوا الياريس سحبها وحش !!!
و كمان اللي بيقول إن الياريس كمالياتها أفضل مش عارف برضه جاب الكلام ده منين ... !!!
إذا كان الكورولا الجديدة الناس بتقول إن عيبها إن مافيهاش كماليات مناسبة.. !!!!
والله العظيم كل فيديوهات الياريس اللي على النت كلها لحد دلوقتي متفرج على 9 فيديوهات لسحب الياريس .. أتخنها عربية ياريس 1500 بتوصل من 0 إلى 100 كم في 12 ثانية و انت طالع ، حتى الـ 1800 بموتور تكنولوجيا اسمها ts مش عارف ده بينزل فين .. المهم يعني إنه جاب من 0 إلى 100 كم في 10 ثواني و ده كان الإبداع يعني بتاع أتخن ياريس موجوده على اليوتيوب كله على بعضه ... هل فيه عربية ياريس تعرف تكسر حاجز الـ 10 ثواني ؟؟؟
أنا عايز رد واضح بدليل .. هل ممكن ؟
يا جماعه اللي يتكلم على عربيه يكون عارفها كويس مش بس سمعها
بص انا معايا ياريس 2007 اوتوماتيك
انت عايز ايه عايز جري وتنطيط وشد يبقى جين 2
عايز عربيه تنساها وتنسى انك تروح للصيانه ومتشيلش هم قطع الغيار تبقي ياريس
الياريس ثياتها ضعيف بعد ال140 ولو فاضي لكن لو معاك ناس كويسه
انت اللي تحدد عايز ايه الأول
بس عايز اقولك حاجه
لو انت عايز ثبات عالي وشد وجري وفي المقابل تتنازل عن ميزة الصيانه في الياريس ايه اللي يخليك تجيب جين 2 البي ام هي بتاعة الشد والجري بس اللي يستحمل مصارفها
.....
معلش بس أنا مهتم جدا بموضوع الياريس ده لإني مهندس ميكانيكا ، و كان تقييمي للياريس إنها مش بتسحب .. فلما لاقيت اصحابها بيقولولي سحبها حلو حبيت أتأكد برضه يمكن أكون أنا الغلطان ...
2009 Toyota Yaris - Consumer Guide Automotive
ده تقييم للياريس 2009 ... هتلاقي إن عيوبها حسب ما الموقع بيقول حاجتين .. صوت موتورها و سحبها السيء
و هتلاقي في التقييم إن فئة السيدان من الياريس اللي هي منتشرة عندنا في مصر دي الـ 1300 واخده 3 من 10 كتقييم للسحب ... أيييييون زي مانت قريب كده 3 من عشرة والله ده تقييم الموقع و الناس اللي مجربها على الموقع ..
و عندك قناة كاملة خاصة بإنها تسوق للياريس على موقع تيوب عندك اللينك أهه .. أتخنها ياريس 1300 عملتها في 13 ثانية و ركز كويس و شوف الفيديوهات كلها براحتك ..
Video
بيحرق على 6 rpm علشان يوصل لـ 13 ثانية في السحب ... في حين إن الانسر 1300 بتوصل في أقل من 11 ثانية على 4-5 rpm و عربيتي 1600 أوتو بتوصل في 9 ثواني على 5 rpm ....
أنا والله مش هنا علشان أتحدى حد أو أثبت حاجة شخصية ... بس الموضوع شدني أوي و بدأت أبح فيه برضه من الأول تاني علشان أتأكد هل الياريس تستحق ولا لأ ... و حتى الآن مازلت مقتنع برأيي ..
اللي فات ده بس كان مجرد شاهد على كلامي و إثبات لشهادتي ..
و ربنا يوفق صاحب الموضوع في الاختيار ...
انا مش عايز اكبر النقاش مع حضرتك اكتر من كدة عشان مانتوهش صاحب الموضوع ونعمله تشتيت
ولان كمان حضرتك بتحكم على الياريس لمجرد كام مرة سقتها او من كلام اصحابك
لكن استوقفني كلمة ان البومه الاوتو بتجمع من 0-100 في 9 ثواني ! ! معناها ان المانويل بيبقى اقل بفارق ثانية او ثانية ونص يعني على كدة البومه المانويل ممكن تجمع من 0-100 في 8 او 7.5 ثواني ؟
حضرتك عارف يعني ايه عربية تجمع من 0-100 في 7.5 ثواني ؟ ؟ انت كدة عديت فئة العربيات التربو البرافو واللينا والجولف ال tsi وغيرهم
ده انت على كدة ممكن تشد مع هوندا sir ! ! !
واذا كان السيراتو اللى كل الناس بتشكر في سحبها ومعروف انها من اقوى ال 1600 في السوق بتجيب من 0-100 في 11 ثانية
ازاي البومه هتجبهم في تسع ثواني ؟ ؟
ممكن حضرتك تديني المصدر اللى جبت منه ان المعلومات دي ؟ سواء عن الياريس ال 1500 او البومه
لية بس يا باشا؟؟اقتباس:
انا قلت ان فعلاً ميزتها الوحيدة في موتورها الموفر في البنزين و اللي سحبها كويس (بالنسبة لل1300) .. اللي هو نفس موتور السيريون اما غير كدا حضرتك قوللي اية المميز فيها؟؟
عفشة خلفية متصلة زي فئتها الأرخص منها
انتريور فقير و تابلوه شكله مش لطيف :( سعر مبالغ فيه جداً
لكن دي غالية عشان اسمها تويوتا
البروتون اسم صغير عشان كدا ميقدوش يطلبوا سعر عالي
بس في نفس الوقت محرك محترم + ثبات و عفشة مستقلة و شكل ممتاز و كمااان سعر اقل :))
طب ما تفكر في الاكسنت rb ؟ او النترا الشكل القديم
الاتنين في حاجات احسن منهم كتير جدا ومنهم الاكسنت rb والنترا الشكل القديم وممكن سيراتو واوبترا ولانسر بومة
وهيونداي ماتريكس ورينو سكالا ونيسان صني
الخيارين مش كويسين بصراحة ومش منتشرين وفيهم عيوب كتير
أولا لازم تعرف إن أي عربية بيكون مكتوب في المنيوال بتعاها إن التسارع بتاعها و ليكن 10 ثواني .. ده بيكون محسوب على عدد لفات متوسطه من الموتور .. يعني مثلا على 4000 لفة في الدقيقة مثلا .. لكن دايما بتكون العربية عندها استعداد تجيب أكتر من كده لو انت طلعت بيها مثلا لعى 6000 لفة و فضلت حارق عليها أكيد هتجيب أسرع من كده .. إلا طبعا العربيات السوبر اسبورت دي بيكتبوا في الكتالوج أفضل تسارع ليها لإنها معموله أصلا علشان التسارع و الشركات بتنافس بعضها في الفئات دي بالأرقام دي .. لكن أنا مهندس ميكانيكا و عارف الكلام ده كويس أوي .. لما بيقولك الباسات TSI التسارع بتاعها من 0 إلى 100 في 10 ثواني .. ده مش معناه إن آخرها كده ... لا انت ممكن تجيبهم في 8 مثلا لو حرقت أوي عليها ... و هكذا قيس بقى على كل العربيات .. و جربها بنفسك .
البرافو بنجيب بيها 100 في 7 ثواني بالظبط أو اقل بأجزاء من الثانية ، و الجولف بنجيب بيها في 6 ثواني و نص تقريبا ... مع إن الكتالوج بيقول 8 تقريبا أو 7 و نص .... و ادخل على اليو تيوب و اكتب بس كده bravo acceleration أو أي موديل تحب تشوفه و هتفهم كلامي كويس و هتعرف و تتأكد من المعلومه دي ..
و السيراتو بطه بالنسبة للبومه على فكره ( ادخل على أي موقع تقييمات عالمي و شوف بنفسك ، و فكك من كلام المصريين الله يكرمك لإنهم مش بيعرفوا يعملوا حاجة غير إنهم يفتوا و خلاص ) البومه 2006 أسرع من السيراتو 2011 :
Mitsubishi Lancer 1.6L Vs. Kia Cerato 1.6L - YouTube
ولو عندك العكس هاتلي الدليل .. الكتالوج و التقييمات على النت و الفيديوهات كلها بتقول لانسر
يبقى لانسر لما تجيب 100 كم في 9 ثواني تقريبا:
lancer acceleration from 0 to 100 km/sec - YouTube
و ده كمان دليل ..و عربية 2006 كمان .. و أوتوماتيك
ده معناه إن الجولف تقدر تجيبها في 6 ثواني و نص و ده برضه بالتجربة العملية :
2010 Vw Golf GTI Acceleration - Launch Control - YouTube
و ده دليل
Golf 6 GTI 6 speed acceleration 0-220 - YouTube
و كمان دليل ( و على فكره أنا عمري ما هقول كده غير لو كنت جربتها بنفسي كمان و عملت كده بنفسي مش مجرد فيديوهات .. كل الكلام ده أقسم بالله عندنا في طنطا في قعدة على الكافيه كده بنطلع على السريع و نختبر كل العربيات بتاعتنا قدام بعض و أي واحد مجرب كويس و لف و ساق كتير عارف كلامي ده كويس أوي )
فهمتني يا باشا ؟؟؟
عايز أقولك حاجة بس .. اللي بيقولك السيراتو دي طلقه ، و الإلنترا دي فظيعة ، و الكروز دي جميلة ، و الفيرنا دي ماحدش يعرف يطلع منها و كل كلام القهاوي ده ............... عايزك تسأله سؤال واحد بس ..... قوله هو انت سوقت إيه في حياتك قبل العربيات دي ؟؟؟ لو قالك يا باشا سوقت بي إم ، و سوقت مرسيدس ، و سوقت جولف ، و سوقت جيتا ، و سوقت سيفيك .... قوله طز فيك انت فشار ...... ولو قالك ماسوقتش غيرهم .. قوله يبقى لما تسوق غيرهم ابقى اتكلم و قول ...
مش كل واحد شاف قدامه عرية على الطريق فسخن و جري و عدى منها يبقى ده معناه إن عربيته أكفأ من العربية التانية دي ...
علشان تقارن صح .. لازم تكون سوقت دي و دي كويس و كتير و جربت تعمل كل حاجة بيهم ...
و أنا بقولك أنا سوقت الياريس كتييييييييييييييييير جداااااااااااااااااااااا ..... و سوقت أحسن منها مليون مرة كتير أوي ... و أنا بقول رأيي بكل حيادية و بدون تحيز ... الياريس سحبها مش حلو أبدا .
لا بجد يا أستاذ محمد حضرتك راجل محترم .. و أنا بحب أقول الحق .. مش علشان عربيتي داخله مقارنه مع عربية تانية يبقى لازم عربيتي تكسب .. لا .. لازم نكون منطقيين ... و أنا مثلا مع إني أمتلك لانسر بس مستعد أطلعلك فيها 100 عيب .. لكن هرجع و أقول إنها مناسبة ليا و مكفياني .. و كل واحد دايما بيكون ليه عربيته اللي تعجبه حتى لو فيها عيب معين .
بالنسبة لأستاذ Ahmod نسيت بس كمان أضيف لحضرتك إني مش مجرد سوقت الياريس مرة ولا مرتين ... لا .. أنا سافرت بيها على القاهرة اسكندرية الزراعي أكتر من مرة طريق سفر و لف جوه البلد و بره كتير ... دي عربية 2 من أعز اصحابي اللي باخدها منهم كتير و أتحرك بيها براحتي .. أنا عمري ما بعتمد على كلام الناس مهما قالوا ... يقولوا اللي يقولوه ... المنطق و الدليل بيغلب كلام الناس دايما .. و أنا والله لو فيه موضوع أنا ماعنديش علم كافي فيه مش هفتي و أقول أي كلام وخلاص ..... لف و دور في مواضيعي و مشاركاتي كلها بحاول أكون دقيق أوي .. و لما بغلط بقول أنا غلطت بكل حيادية و روح رياضية لإن الحق حق.
الياريس عربية مش وحشه .. و أنا ماقولتش إنها سلحفاه ... لكن تسارعها مناسب جدا لعربية 1300 .. و ممكن تكون من أفضل مواتير 1300 في السوق ، و ممكن تقولي إنها بتطلع من عربيات كتير 1300 و أصدقك ... لكن صعب أوي تكون أفضل في التسارع من الجين تو و اللانسر و عربيات كتير أوي كده قالهالي واحد من الشباب المشاركين هنا إنها أحسن منهم .. فده شيء مش طبيعي و مش منطقي أبدا ..
أنا مش بقول وحشه .. العربية ركوبتها ناعمه جدا جدا جدا ..و مريحة لأبعد الحدود .. و أنا عن نفسي شايف صالونها كويس مش وحش زي مافيه ناس بتقول .. و اعتمادية و عالية و قطع غيارها رخيصة و معمره و شكلها كويس و صاجها كمان كويس و مقاساتها حلوه في المنورات داخل المدينة ...
لكن زي ماقولنا المزايا نقول العيوب لإنها بتتقارن بالجي تور :
تسارعها أقل من الجين تو .. عفشتها أضعف من عفشة الجين تو ( فرق تكنولوجيا العفشة لمصلحة جين تو - مالتي لينك ديبيندانت ) .. ثباتها أقل من ثبات الجين تو .. كمالياتها أقل من كماليات الجين تو ..
ده اللي أنا بقوله .. أنا مش متحامل على الياريس لإنها فعلا عربية مش وحشه أبدا و مناسبة لفئة كبيرة أوي من الناس .. و مش متحيز للجين تو لإن مافيش شيء يدعوني للتحيز للجين لإنها مش عربيتي .. أنا بفصل بينهم و بتكلم كلام منطقي و واقعي جدا جدا جدا .
والله انت اللى باشا
انا هقول لحضرتك ليه
Toyota Yaris Made In JAPAN ! ! !
الجملة دي اختصرت حجات كتير اوي والمفروض تكون انهت المقارنة لكن انا هوضح لحضرتك اكتر
صناعة وتقفيل ياباني 100% معناها انك هتنسى حاجة اسمها عيوب التقفيل
مش ممكن ابدا بعد كام شهر ولا كام سنة حتى تلاقي زرار علق منك ! ولا تلاقي الازجاج معلق ومش بينزل
او الزرار اتكسر او ما الى ذلك من عيوب التقفيل اللى موجودة بالفعل في الجين 2 ومن كلام احد ملاكها اللى هو صديقي ومعاه العربية بقالها سنتين
حضرتك بتقول مافيش فيها مميزات غير التوفير في البنزين انا هقول لحضرتك الباقي (طبعا اول واهم حاجة انها صنع في اليابان)
1-قطع الغيار متوفرة وهتلاقيها موجودة بسهولة ومش هتتعب فيها
2- سعر اعادة البيع ممتاز جدا جدا انا اشتريت عربيتي اتوماتيك من 5 سنين ب 89 جابتلي دلوقتي 80 الاف ورفضت ابيعها ! ولو حبيت ابيعها بكرة تتباع وبالسعر اللى انا عايزه طالما حالتها كويسة
3- الباور كهرباء والعربية عفشتها ناعمة جدا ومريحة في السفر لابعد الحدود
4- عالية عن الارض يعني هتنسى انك تحك في اي مطب وحتى لو مركب معاك 4 افراد مش بتهبط للدرجة اللى تخليك تحك في المطبات
5- اعتمادية لابعد الحدود هتشتريها وهتنساها وانسى حاجة اسمها ميكانيكي او توكيل حتى الصيانات الدورية بتاعتها ممكن تكبر دماغك منها
6 - عزل محترم وصوت الماتور هادي جدا والتسارع بتاعه ممتاز
7- تكييف جبار بمعنى الكلمة
يمكن العيب الوحيد اللى شايفه في الياريس هو ثابتها لكنه يكاد يكون معقول بالنسبة للاشخاص اللى سواقتهم عادية وده شئ طبيعي لان الياريس مش عربية رياضية
واي شخص سواقته عادية هيحس ان العربية ثابتها مرضي جدا
ثبات العربية بيضعف في الملفات على سرعات عالية وغرز مقفولة على سرعات عالية
غير كدة الثبات كويس جدا
وانا عن نفسي عرضت الكاوتش وركبت جنوط 16 وفرقت معايا في الثبات كتييييييييير !
والله يا باشا انا بصراحة عمري مابعترف ان اي فيديو على اليو تيوب مصدر رسمي او موثوق ابدا خاصا في مجال العربيات
لسبب انك ماتضمنش ان العربية اللى نازل الفيديو عنها دي استوك ومش ملعوب فيها
وهل انا اضمن ان العربيات دي فعلا 1600 استوك ؟ ماهو ممكن تكون 2000 او معدل فيها
واما بالنسبة لتسارع السيراتو من 0-100 فانا قلت انه 11 ثانية بناء على تجربة ياسر الصياد معانا هنا في المنتدى وماقلتش كدة بناء على كلام المانويل او الكتالوج
وبصراحة حضرتك قلت معلومات كلها جديدة عليا
انا اول مرة اعرف ان السيراتو بطه بالنسبة للبومه
واول مرة اعرف ان الانسر ال 1300 اللى كل الناس بتشتكي من سحبها بتجمع من 0-100 في 11 ثانية وده معناه انها هتثبت مع السيراتو !
واول مرة اعرف ان البومه الاوتو بتجمع 0-100 في 9 ثواني ! والفيديو اللى حضرتك حاطه ده فيديو غريب انا شايف انه حارق لحد 110 على الغيار الاول ؟ ؟ ؟ ولا هو نقل من غير مانا اخد بالي ؟ ؟
واول مرة اعرف ان البرافو ال 150 حصان بتكسر ال7 ثواني في التجميع من 0-100 ! ده اللينا التربو اللى هي بتطلع من البرافو مش بتعملها !
وبرضوا مستني من حضرتك مصدر للارقام دي بعيدا عن فيديوهات اليو تيوب لانها مش مضمونة :B4_388:
الانسر 1300 لا استحاله تكون احسن من الياريس صعبه
واحد صاحبي معاه صني 2008 كان بيشد مع ياريس كان هيتجنن مكنش عارف يجيبو
أستوقفتني الجملة دي قوي و مش هاعلق عليها و هاكتب بس لا تعليق !اقتباس:
toyota yaris made in japan
بالنسبة للمقارنة
العربيتين كويسين و كل منهم لها مميزات و لها عيوب
مميزات الياريس
موتور موفر في البنزين (بيجر جسم خفيف و أستجابته حلوة بسبب وجود فتيس ممتاز للمانوال ) و أستجابة عادية للأوتوماتيك (المانوال بتاع الياريس حلو قوي بعكس الأوتوماتيك )
أوتوماتيك الياريس سحبه عادي جدا و يكاد يكون مخنوق أما المانوال فظيع في السحب .
عربية منتشرة و سعر اعادة بيع حلو جدا ( أسم تويوتا عامل شغل عالي في النقطة دي )
العربية عالية عن الأرض و مش بتحك في المطبات .
معرفش حاجة عن أسعار قطع الغيار و توافرها و بالتالي مش هاعلق على النقطة دي .
العيوب
الثبات نتيجة للعلو عن الأرض و الوزن الخفيف و تصميم العفشة المتصل
و التصميم النهائي للعربية مش بيعجبني شكلا و ده شئ شخصي يختلف من شخص لآخر و بالتالي هو مش عيب لو العربية عاجباك شكلا
ثمنها غالي مقارنة بأمكانيتها (طبعا أنت دافع مبلغ زيادة محترم علشان أسم تويوتا مش علشان العربية نفسها )
توكيل الناس كلها بتشكر فيه و الشكوى منه قليلة جدا .
الجين 2
أثقل وزنا و بالتالي أقل في السحب على السرعات الصغيرة لغاية 80 أو 90 كم س
المهم المميزات
توافر عناصر الأمان كتجهيز أساسي في العربية - 2 وسادة هوائية و فرامل اي بي أس و اي بي دي abs ebd
مجهزة تجهيز كامل من ناحية الكماليات
ثبات أفضل بكتير من الياريس و تحكم في العربية أيضا أفضل (عفشة مستقلة و قطر دوران صغير للدريسكيون ووزن أكبر )
العيوب
مش كل قطع الغيار متوفرة بأستمرار و لكن يوجد محلات قطع غيار متوفرة دلوقتي متخصصة في البروتون و بتلاقي عندهم أغلب الحاجات الأستهلاكية اللي بتحتاجها بأستمرار و التوكيل برضه بيوفر كل حاجاة بس فيه حاجات ممكن تأخد وقت لوصولها .
التوكيل مش كل الناس بتشكر فيه و لكن أن شخصيا لم أواجه معاهم أي مشاكل .
سعر البيع مختلف عن الياريس
طبعا أحنا في سوق مصر فيه عربيات بتتباع بالاسم زي تويوتا و هيونداي
و فيه عربيات تانية بتتباع لأصحاب المزاج و اللي نازلة تشتري حاجة معينة زي البروتون و زي السوبارو و زي الهوندا
سعر الاعادة البيع كنسبة ممكن يكون متساوي نسبيا
الياريس سعرها التوكيل بيعليه و بالتالي القديم ممكن يتباع بسعر قريب و هو سعره جديد
بعكس البروتون اللي من ساعة ما نزلت في 2006 لغاية دلوقتي السعر ثابت لم يحدث عليه تغييرات
بعكس الياريس اللي ناس اشترتها مثلا في 2007 ب 90 الف
و سعرها غلي من التوكيل في 2010 أصبح 100 ألف فطبيعي أن سعر المستعمل ل 2007 ما ينزلش كتير لأن سعر الجديد أصبح عالي و بالتالي عمل ميزة للقديم .
بعكس لو كان السعر ثابت للجديد ... فالقديم هاينزل بنسبة معينة
ما علينا
بالنسبة للجين 2
سعر اعادة البيع لموديل 2009 مثلا بيكون من 65 إلى 75 ألف حسب الحالة و حسب عدد الكيومترات .
فأنا شايف أن سعر اعادة البيع في الأثنين يكاد يكون متساوي و اللي بيفرق ان الياريس هاتبيع أسرع من الجين 2
نتيجة برضه للجملة اللي الأستاذ أحمد قالها و أنا كتبت عليها لا تعليق !
أنا أمتلكت جين 2 موديل 2007 و جين 2010 و الحمد لله لم أحتاج للتوكيل و لم أشتكى من شئ و أقدر أقولك أنت ممكن برضه تشتري العربية و تنساها لو بتحافظ عليها .
بالنسبة للشد و الكلام ده
أنا مش شايف أن الشد يميز عربية عن التانية في أي شئ
و لحد دلوقتي برضه معرفش صاحب الموضوع بيقارن ياريس القديمة 1300 و لا الجديدة لأنه محددش
عموما بأختصار
عايز عربية حلوة ......... الأثنين حلوين
عايز توفر فلوس ...... هات الجين 2
عايز تشتري ماركة مكتوب عليها " صنع في اليابان " و مستعد تدفع فلوس زيادة علشان النقطة دي هات الياريس .
أحد العيوب الآخرى للجين 2
بسبب قطر دوران الدريسكيون الضيق ..... في الملفات الضيقة أحيانا بتحتاج تأخد الملف على مرتين
و أستهلاك بنزين أكيد أعلى من الياريس
و أستهلاكها تقريبا حوالي 20 لتر لكل 200 إلى 250 كم في المتوسط ممكن تزيد عن كدا شوية كمان لو أنت سواقتك هادية
الجين 2 المانوال من صفر لمائة في عشرة ثواني و نصف
الجين الأوتوماتيك في 11و نصف ثانية بالعافية
مش بتجيب في أقل من كدا أبدا ....... جربت و حرقت و هي يا دوبك ثانية أقل من الكتالوج .
بس في التجميع فوق 100 كم - س ........... حدث و لا حرج ............ ممتازة و بتوصل لسرعات عالية بسرعة و لغاية 175 كم - س
طبعا أخوكم اصلا مش بتاع ضد و آخري 90 كم -س في الحارة اليمين
انا عايز بس الفت الانتباة لحاجة كلمة تويوتا صنع في اليابان موش مجرد شعار بس علشان سعر العربية يبقي غالي
انا في 2006 كان معايا بيجو 307 فرنساوي زيرو اوتو يعني اوربي موش كوري ولا ماليزي و كنت ساعتها بقارن بينها و بين الكوروا 1300 مشيت ورا كلام الناس و جبتها 1600 و اوربي وواحد صحبي اشتري كورولا 1300 ساعتها
العربية طلعت عيني في كل حاجة و بعتها بطلوع الروح بعدها بسنتين و خسرت فيها كل مبلغ كبير بس قلت احسن الحمد لله خلصت منها نيجي لصاحبي الكورولا لسة بايعها من كام يوم تقريبا مخسرش فيها حاجة غير انه كنا بنحسبها حسبة بسيطة طول ما هي كانت معاة كان بيغير تيل فرامل كل كام سنة و تغير الزويوت و الفلاتر بس عربيته ماشية 190 الف .
نيجي بقي ليا بعد ما بعت البيجو اشتريت يارس و عاملة معايا دلوقت 130 الف كيلو مغيرتش غير تيل الفرامل مرتين بس مرة علي ال60 و التانية عند 125 الف و بطارية مرتين بس و عمري ما روحت الوكيل و بغير برة زيوت كل 3 الاف في محطة الامارات .
صدقوني الموضوع في شركة تويوتا انك بتشتري عربية يمكن تكون اغلي من العربيات التانية بس بعد كدة بتلاقي نفسك موش بتصرف علي العربية غير الحاجت الضرورية بس و كل فين و فين.
بالنسبة لصاحب الموضوع نصيحة اركب المنتشر في البلد و مصر البلد الوحيدة اللي البومة فيها احسن عربية معرفش لية يعني هات لانسر بومة بس نصيحة هاتها 1600.
بصراحه أنا مش عارف أقولك إيه تاني ..
بقولك أنا عملت بنفسي بعربيتي كذا ، مش مصدقني .. أجيبلك أكتر من فيديو يثبت كلامي ، مش مصدقني ..... !!!
و تيجي حضرتك اللي تعمل عكس ماكنت بتقول ، و تعتمد على كلام فلان أو على توقعات ...
انت جربت تسوق البرافو الباكيدج الرياضي الثاني ؟؟؟ جربت تسوق الجولف gti ؟؟ جربت تسوق السيراتو بنفسك ؟؟ جربت تسوق البومه بنفسك ؟؟ جربت تسوق الجين تو بنفسك ؟؟
أنا بقولك .. أنا جربت ، و عملت أرقام كذا كذا ، و لو مش مصدقني عندك 50 ألف واحد غيري رافعين فيديوهات على اليوتيوب بتأكد كلامي .... المفروض أجيبلك دليل أكتر من كده إيه ؟؟؟؟
المفروض إنك انت اللي تجيبلي دليل واحد بس على إن الياريس ممكن تطلع من الجين تو ، أو تجيبلي دليل إنها تطلع من لانسر 1600 على حد كلامك ... مش تكدب كلامي و خلاص بدون مبرر غير مجرد تخيلات أو كلام فلان ...!!! صح برضه كلامي ولا غلط ؟؟
بالنسبة للبومه اللي جابت 100 كم في 9 ثواني .. دي عربية أوتو على فكره مش مانيوال ، بس الفيتيس cvt علشان كده الـ rpm مش بيتحرك من مكانه زي أي فيتيس عادي ... وعلى فكره ده موجود في إصدارات كتير من الهوندا و النيسان ...
المشكلة إنك مش بتعلق على حاجات كتير في كلامي .. عندك قناة كاملة على اليوتيوب فيها كل العربيات الجولف gti بتجمع أقل من 7 ثواني بكتير .. عندك فيديو تقريبا 5 ثواني و نص .. و هلاقي كتير أوي في الحدود دي .. مع إن الكتالوج و الويب سايت و الناس هنا في المنتدى بيقولوا 8 ثواني ...
بالنسبة للبرافو و اللينا .. أنا ماسوقتش ليينا .. بس أبصم بالعشرة إن 7 ثواني للبرافو أعلى باكيدج بتجيبها على المستريح ( كلام ناس مجربين ، و فيديوهات على اليوتيوب ، بس ماحبتش أنزلك فيديوهات تاني علشان بتقولي مش بصدقها ، مع إنك لو جبتلي فيديو أنا عمري ما هقولك مش مصدقه ، و على فكره أرقام العربية بتكون مكتوبه على الفيديو .. لو قريت تحت هتلاقي غسم الفيديو أو المواصفات مكتوب فيها مثلا لانسر 2006 موتور 1600 ، أو هتلاقي جولف 1600 gti و هكذا ... بالتالي الناس دي مش محتاجه تكدب ، ولو العربية عليها تعديل بيكتبوا نوع التعديل ، ولو هي استوك مش بيكتبوا حاجة زي كل الفيديوهات اللي جيبتهالك دي ، و عندي فيديوهات إفليوشن بتجيب 100 كم في أقل من 4 ثواني .. بس دي عربيات ملعوب فيها بره مصر ، هتقولي يعني تطلع من البي إم ... ايييييييون ادخل على توب جير الموقع الرسمي للمنافسات بين العربيات و هتلاقي الفرق بينها و بين الجاليردو يكاد يكون معدوم ).
و لو هناخد بكلام واحد معاه جين تو ، و بيتكلم بكل حيادية عندك كلام الأستاذ اللي المعرف بتاعه على المنتدى ( توت عنخ آمون ) ... معاه جين تو ، و كمان مش عاجباه الطلعه بتاعتها لكنه بيقولك إنها بتطلع في 10 ثواني مانيوال ، 11 أوتو ..... يعني كده بقت زيها زي السيراتو الحمد لله بكلام أصحاب السيراتو و الجين .... و الياريس أنا عمري ما عرفت أجيب بيها أقل من 13 ثانية في أحسن حالات العربية و الطريق المانيوال ... تخيل لو أوتو هتبقى كام !!!
مش هتصدق كلامي .. هاتلي انت أي أي مصدر يقول غير كده .. حتى لو كان فيديو على اليوتيوب هصدقه.
شكراً لكل واحد قال رأيه بصراحه وفعلاً انا استفدت جداً من كلام حضراتكوا ومن تجرابكم الشخصيه ( مع انها قلبت خناقه لاثبات وجهات النظر ) 100000000 شـــــكر للجميــــــــــــــع