بركن فى جراج فى العماره اللى جنبى ب100 جنيه و أخذت القرار ده لأن الشارع اللى انا ساكن فيه كله مدارس و مش محتاج أوصفلكم المناورات اللى بتحصل الصبح لما الشارع بيتقفل بعربيات أولياء الأمور و الأتوبيسات اللى جايبه التلامذه و خصوصا لما تكون واحده ست هى اللى سايقه و جايبه و لادها المدرسه ده غير قعاد العيال بره المدرسه على العربيات ده غير ان الشارع مش واسع وكل العربيات متبهدله و طبعا انك تلاقى ركنه اصلا صعب و خصوصا لو راجع متأخر..........................
انا لسه متجوز قريب وقبل كده فى بيت بابا كنت باركن فى الشارع و كانت المنطقه أرحم بكتير من ناحيه بهدله العربيات بس كان بردو فى مشكله انك متلاقيش مكان و خصوصا لو راجع متأخر بس عشان الشارع واسع الناس بتركن صف تانى و تسيب فرامل اليد بس بردو كان بيحصل غباء من بعض الناس و هو بيزق عربيتك و ساعات فى ناس مش بتبقه حاطه عربياتها مضبوط بحيث تقدر تزقها و تطلع!!!!!!
الميزه اللى عاجبانى فى الجراج بتاعى ان ليه باكيه خاصه بيه و مفتاح العربيه معايا ما بسيبهوش للسايس أبدا و مش قافل على حد ولا حد بيقفل عليا ده غير انه قريب جدا منى فى العماره اللى جنبى وفيما عدا ذلك فيه عيوب الدنيا كلها بس مستحملها غشان خاطر مصلحه عربيتى و انه أقرب جراج ليه و انى بركن فيه فى حته مستقله و معايا المفتاح.
العيوب القاتله فى الجراج ده:
1-هو صغير مش كبير وأخره 12 عربيه بالكتير قوى بس ده كويس بس العيب الحقيقى انه ضيق و مناوراته صعبه عشان تدخل و تحط عربيتك فى مكانها و لو ما بتعرفش تسوق كويس لازم هتخبط العربيه و انا الحمد لله باعرف اتعامل معاه بس فيه ناس تانيه لازم بتلجأ للسايس عشان يدخل و يخرج العربيه.
2- المطلع بتاعه حاد جدا لدرجه ان لو عربيتك قديمه و موتورها بارد مش هتقدر تطلعه و لازم تسخنه اجبارى حتى لو مستعجل بس الحمد لله المشكله ده مش عندى بس فى ناس تانيه بتركن فى الجراج ده بيعانوا من الحكايه ده.
3-الأرض تراب مش متبلطه و لا متسفلته و لو اتخاشمت بزياده و انت طالع المطلع العجيب اللى قلتلكم عليه ده العجل بيفوت فى الارض.
باختصار لازم تكون محترف أو تسلم الموضوع للسايس عشان العربيه ما تتبهدلش و ده من اسباب عدم الاقبال على الجراج ده و خلتنى اعرف الاقى مكان فيه من البدايه(مصائب قوم عند قوم فوائد!!!)
4-السايس و مراته و عياله الصغيرين عايشين فى حجره داخل الجراج و عايشين حياتهم و بيغسلو و ينشروا الغسيل فى الجراج و انت خارج ممكن تعدى من جوه الغسيل و ياسلام بقه لو كان الغسيل مبلول لسه و يلحوسلك العربيه ده غير الكراكيب اللى السايس شايلها فى الجراج و عياله فيحطوا لعبهم و ساعات أكل كمان على العربيه و صباح اللحوسه و لجأت انى اغطيها جوه الجراج و اغليه يلمعها قبل ما اخرج علطول واللى مساعد ان العربيه بتفضل نضيفه ان الغطا ووتر بروف ما بيعديش التراب...... ده غير انك ممكن تشوف صرصار أو خنفسه على الأرض أو على الحيط و مرات السايس بتبيع خضار أمام الجراج و ممكن يقع منها طماطم أو بصل أو أى خضار من فوق و ينزل من على المنزل و يبقه فى الأرض و العربيات و هى ماشيه تفعصه فى الأرض .......................و ربنا يعين بس كله أهون من ان العربيه تتخبط و نسيت أقولكم انها اتخبطت فعلا من أول يوم ركنتها فى الشارع و كلفتنى 500 جنيه بعدها علطول سألت على جراج.
المفضلات