الموضوع: ليه قطع الغيار لأستيراد كالجديدة ؟؟؟؟

المشاركة الأصلية كتبت بواسطة ashouhdy

ايهاب منصور

الله يسامحك يأخى

ربنا يسامحنا جميعا
بس ليه ؟؟؟
عشان نقل واقع عايشينه

المشاركة الأصلية كتبت بواسطة MASERATI

السلام عليكم و رحمة الله و بركاته

أنا داخل عشان أعلق فى ايجاز شديد على 4 نقط:

أن ظروف تشغيل السيارات هناك مثالية جدا جدا جدا.

أن قطع الغيار هناك أصلية, مافيش الهجص اللى عندنا هنا فى مصر ده.

أن هناك, اللى يبيع عربية فيها عيب و مايقولش عليه للمشترى, بيتنفخ جدا و بسرعة و بالتالى تلاقى الواحد يقولك على العيب اللى فى العربية أول حاجة عشان تبقى على نور و تلاقيه مصورهولك و عاملك عليه سهم و لا دايرة عشان الأعمى يشوفها, ده اللى بيبع عربية متصلحة بعد خبطة و لا حتى مغيرة موتور, بيقول للمشترى.

أنى أحيب أديكم اللينك ده, عشان تشوفوا العربيات المرسيدس العيون الموديل قبل الأخير, حالتها ايه و بتلمع ازاى و عاملة كااااااااااااااام كيلومتر و بكام !!!!!!!.

http://www.autoscout24.de/List.aspx?vis=1&make=47&model=1862&fuel=B&fregfrom =01%2f01%2f2003+00%3a00%3a00&kmto=100000&page=1&ma xresults=500&results=20&ustate=N&ustate=U&um=True& sort=price&zipc=D

فعلا موضوع ظروف التشغيل دة انا شوفته علي اليوتيوب
الشوارع مختلفة تماما عن عندنا
الطقس مختلف تماما (تقريبا مفيش تراب)

المشاركة الأصلية كتبت بواسطة nicegypt

السلام عليكم ..

حسب زيارتى للامريكا وروسيا اقدر اقول لحضرتكم اسباب كتيرة موجزة ف النقاط التالية :

اولا : قطع الغيار وهى محور الحديث الرئيسي .. هناك فية قطع الغيار الاصلية .. وهناك فية الخبرة ف تركيب القطع اللى هي
ف الاصل اصلية بأجهزة حديثة وخبرة ودون فــهـلوة

ثانيا : هناك مفيش حاجة اسمها كهربائى بس سروجى بس ميكانيكي بس .. هناك العربية بتدخل زى مصنع كبير
داخل المصنع دة كرفانات مقسمة .. حضرتك بتنتظر بالخارج والعربية بتدخل على سير لجوة .. الميكانيكي هو نفسة الكهربائى هناك على فكرة ... يخلص الميكانيكي كهربا وميكانيكا .. تدخل على الكير كار تتظبط سمكرة ودوكو ثم تلميع
وف الاخر بتطلع بالشكل النهائى اللى حضراتكم شايفينة

ثالثا : الجو هناك سواء ف امريكا او روسيا تلج .. وتلج بمعنى الكلمة .. فية صور لمنظر الشتاء والتلج ف بروفايلي على الفيس بوك لاخر زيارة ليا .. طبعاَ فية تراب .. لكن مش زي هنا .. ودة طبعا كفيل انة يحافظ لك على العربية لانك مش محتاج تصنفر ف عربيتك كل شوية علشان تمسحها من التراب

رابعا : هناك فية احترام .. فية اشارة للمشاة .. واشارة تانية مختلفة للسيارات .. مفيش انك تفاجئ زى محصل معايا قبل كدة بواحد قرر انة ينزل من فوق الرصيف فجأة .. وطبعا تضرب فرامل .. وتلاقى واحد دخل ف اكصدامك الخلفي لانة ماشى لازق ف حضرتك ... هناك فية مسافات قانونية بين كل سيارة . وهناك حاولت اسوق بطريقة طبيعية اللى بنسوق بيها هنا .. وكنت ماشى بدون رخصة واللى كان معايا اتخض وحسسنى انى قلبتها ملاهى وقرر انى لازم اركن وهو يكمل سواقة لان السواقة دى ف مصر بس هنا فية سجن :) .. اللى قدامك يقف .. حضرتك تقف وراة .. مفيش تجاوز

ولو واحد ماشى كسلان وبطيئ .. ملكش الحق تنقل من وراة للحارة التانية الى فى اماكن محددة وبسرعة محددة لازم تبقى ماشى عليها . * هناك فية رادرات للسرعات الاقل تخيلوا ؟؟ يعنى لو الطريق 90 مثلا وحضرتك ماشى 40 تتاخد رادار وتدفع غرامة !!!!! *

ودة بيحل مشكلة ان حد ماشى كسلان ف الشمال ومش عارف مين بيجري ف اليمين .. وبالتالى عربيتك المستعملة مستريحة ف المشى على طرق نظيفة ودون حرق غيارات ودون حرق دم ووجع قلب

*- محدش سأل نفسة لية قطع الغيار الاستيراد اللى هي ف الاصل مستعملة بتبقى قريبة من الجديدة ؟؟ خصوصا المساعدين واجهزة التعليق ؟؟
الاجابة بكل بساطة .. قطع غيار اصلية بتركب بخبرة + طرق نضيفة جداَ مش هتكسر ف عفشة حضرتك ولا هتبهدلك المساعدين .. انا بمجرد ما احد الاشخاص قلت لة انى خارج اغير مساعدين لعربيتى ... حسسنى انى متخلف ! مساعدين اية يا بنى اللى هتغيرها ؟ دى بتفضل ف العربية طول حياتها .. بتتغير عندهم ف حالة الحوادث الشديدة لا قدر الله .. وبالتالى قطعة الغيار الاستيراد بتيجي نضيفة لانها مشيت على طرق نضيفة + استخدام نضيف + متركبة ف مكنها صح وبخبرة جيدة

مرحلة بيع السيارات المستعملة هناك :
هناك فية حاجة اسمها junk park دة مكان لبيع قطع غيار السيارات زى الوكالة كدة عندنا بس هناك انضف شوية
حضرتك قبل ما تبيع .. بينص القانون ف امريكا انك سيارتك تبقى سليمة من الناحية الامنـيـة بنسبة 100 %
معنى كدة ان الشاري هيشتري عربية مستعملة مش هيغير فيها ولو فردة كاوتش حتى ! مش حضرتك تشتري مستعمل هنا
وتبدء مسيرة اللف على الصنيعية .. والافتاء المصري اللى ملوش حل .. والاختراعات اللى غلبت الخواجة بيل جيتس نفسة
ولو احتجت اي قطعة غيار مهمة بتجبها من الجنك بارك بكل سهولة ..

.. انا ركبت عربيات هناك يا جماعة اسعارها برخص التراب وحالتها فوق الممتازة ومؤمن انى مهما اشتغلت مش هركب
ف مصر عربيات زي اللى ركبتها هناك

شكرا علي نقل التجربة

المشاركة الأصلية كتبت بواسطة ahmedsrs

مش كل العربيات عندهم كده دى العربيات المتصانة لكن العربيات الى نص نص او متبهدلة بتترمى فى ساحات الخردة وطبعا فى مصر مفيش ساحات خردة لان العربيات الخردة ماشية عادى فى الشوارع

بس نسبة كبيرة بالشكل بتاع الصور دة
والأهمال موجود في كل حتة

المشاركة الأصلية كتبت بواسطة a333

تجريبتى فى النوبيرا 1
العربية عن طريق المعاقين باسم والدى من بورسعيد
العربية موديل 1997 عاملة 113000 فبريكة بالكامل
تركبها تقول عاملة 1000 ولا 2000 كيلو

بسم الله ماشاء الله

المشاركة الأصلية كتبت بواسطة ehab_mansour

ليه بس يا دكتور أحمد ؟؟؟؟؟؟؟
ربنا يسامحنا جميعا لكن صدقني انا رجعت من هناك قعدت فترة بحاول أمشي زي هناك و أحترم كل شيء لقيتني بتبهدل في الشارع و بيتلطشلي من كل مخاليق ربنا اللي ماشية في الشارع !!!!!!!!
قلت يعم كبر دماغك و خليك زي بقيت الخلق و خلاص ولكن صدقني لما بمشي في مكان و ألاقي حد بيحترم الطريق بحترمه جدا و بحييه علي ذلك لأنه صبووووووووووووور جدا وربنا يكرمه

و صدقني احنا فقط ينقصنا الأخلاق و بس احنا شعب متدين و فطرته سليمة و محترم جدا ولكن محتاجين نفعل أخلاق الاحترام المتبادل و احترام حقوق الأخرين و احترام حق الشارع اللي هو ملك للجميع و ليس ملكي ولا ملك أحد
و ينقصنا أيضا ان نقيم العدل بيننا و ان تقيم فينا حكامنا العدل و المساواه

" ربك بيقيم دولة العدل ولو كانت كافرة و بيسقط دولة الظلم ولو كانت مسلمة "
الهم وحد صفوفنا و ارزقنا الحكام الصالحين و جنبنا الفتن ما ظهر منها و ما بطن

ياريت كلنا نعمل كدة
انا كمان بحاول قدر المستطاع اكون مثالي في سواقتي لكن بفشل بسبب مطاردة الميكروباصات لبعض والكلاكسات والأنوار
ربنا يهدي الجميع

وياريت ياباشمهندس لو تقرا الموضوع دة وتقولي ردك http://www.nilemotors.net/Nile/242683-a.html

المشاركة الأصلية كتبت بواسطة matrix_it

استاذ ايهاب منصور ياريت تكملنا بقية الحكاية حتى لو فى موضوع منفصل بعد اذنك!!!!!!

111111+