الموضوع: دماغى وقفت - ممكن مساعدة

المشاركة الأصلية كتبت بواسطة crayvor

الحصر كله بين النوبيرا والفيكترا..
الليجانزا قطع غيارها غالية وهي أساسا مش منتشرة.. علي أساس انها كانت بتعامل معاملة الكروز حاليا. أما مقارنة سريعة بين الأسترا والفيكترا ترجح الفيكترا الا لو مهتم بسنة الصنع..

أنا عن نفسي مهتم بسنة الصنع وحاقولك نوبيرا..
أنت ممكن تجيب نوبيرا فابريقة بالكامل أوتو مو2006 ويمكن كمان مرفوعة فترة بأقل من السعر اللي حاتجيب بيه فيكترا اوتو مو99 أو 2000 رشة خوارج ولو مش رشة كلها سنة وانت اللي حاترشها :ka_che1[1]:
بالنسبة للفرق بين الكوري والألماني.. بيبان أوي أوي أوي في المانوال.. بس في الأوتو مش بيبان للدرجة اللي تخليك مقروف مثلا أو مش عاوز تركبها أو الكلمتين اللي ملهمش لازمة دوول. ماااااااا علينا مش مجاله.
الألماني دايما معروف.. طالما انه فابريقة اضربله تعظيم سلام.. طول ما اللي بيتغير فيه حاجات علي قدها مش مشكلة.. انما لما يفتح بقه قوول علي قلوسك السلام. لو عيب جامد يا اما تروك للتوكيل ومش حاكمل حايحصل اييه.. يا اما تلاقي واحد يعرف يعملهالك (بعد ما خمسة قبله لعبو فيها) ويعملك فيها أبو العريف وبرضه كمات تلات ايام حاتطلع ع التوكيل. طب لييه وجع الدماغ ده؟؟ طالما قدامك المضمون بتخاطر علي أساس اييه؟؟ وحتي لو مافيش مخاطرة.. هل فرق ال 6 سنين دا مش مشكلة؟؟ بأبسط الأحوال بعد 3 سنين حاتكون الفيكترا دي أتمت 14 سنة من البهدلة ف الشوارع المصرية.

حارجع وأقول دا رأي شخصي.. ولو كل الناس رأيها هو رأيي ماحدش كان حايشتري ألماني مستعمل.. أهم حاجة غير كل ده الفحص.. ولو برة التوكيل خلي معاك سمكري نضيف عشان انا كنت حاتعك ف مشوار مش لطيف قبل كدة.

انا مش عارف اقولك اية على الكلام الجميل دة
بس انا عايز اقولك انا معايا كورسا 97طلعت عين أبوها ومع ذلك أصيلة و برضو اخويا نوبيرا 2002 كانت اوتو بس للاسف اسبوعين والاتو باظ وريح نافسو وقلب مانيوال وبيقولك بقى النوبيرا يعيبها الاوتو دة كلام سمعتوا هل دة كان صدفة والا حقيقى

طلب أخير ايهما أحسن بقى كا ركوبة فيكترا والا نوبيرا

المشاركة الأصلية كتبت بواسطة crayvor

بالنسبة للي حصلك دا شيء عادي.. علي ما يبدو انه واحد غشيم كان بيشد جامد مع الاوتو وجابه الأرض فا لصمه وباعه لي حد وأخوك طبعا لبس الليله. أوووو ان أخوك نفسه غشيم ف الشد بيها . لو عاوز قصة تانية قريبي جايب فيكترا والكهربا بتاعتها مدوخاه مش بتتظبط اسبوع علي بعضه واكتشف في التوكيل ان حد مفورلها ضفيرة قبل كدة.. طبعا غير الضفيرة ولسة بتهيس منه. أنا مش باحببك في دي أو اكرهك في دي أنا باتكلم في ان دي عيوب سوء استعمال مش عيوب بسبب العربية نفسها فا دي مش مقياس.
في الحالتين عيب النوبيرا الوحيد ف جلب المقصات بتغيرها مرة كل 50 ل 80 ألف كيلو والتوكيل بيغيرهم دايما فا مش حاجة عويصة. وفيه ناس عدت بيها ال 100 ولسة ماغيرتش دا بقي بيعتمد علي كمية المطبات اللي بتاكلها في الثانية الواحدة

كا ركوبة أكيد طبعا الأوبل ودا مفروغ منه. بس طبعا من ناحية تانية لازم تصرف عليها صح (زي أي الماني) عشان تفضل ركوبة صح.

بص أقولك.. لو معاك حد خبير بجد يا اما في التوكيل.. لو الفيكترا مش ملعوب في أي حاجة جواها توكل علي الله.. لو فيها أي حاجة جوة الكابوت متغيرة اهرب منها. وبعدين أنا حاسس انك رابط نفسك رابطة وحشة أوي علي فكرة.. لو بصيت برة حتلاقي بدائل.

مثلا بعيدا عن قلق الفيكترا بص علي كريستالة مو 2001 مثلا.. أوتو ويكون حد مسقطلها موتور عالي. عربية ياباني وحلوة وماحدش بيشتكي منها وقطع غيارها رخيصة جدا.. برضه لو تزود سنة صغيرة ف الفلوس تدخل في صني 2003 أو 2004 أو ممكن مثلا جيتز. ممكن حتة أكسنت 2007 برضه نضيفة ومريحة وكله بيفهم فيها. لو مصمم علي ألماني بس مش لازم أوتو اعلي شوية وخليك ف كورسا سيدان 2005 والله عربية ممتازة رغم ان صالونها أكيد أصغر من الفيكترا. لو عاوز حاجة ألماني ومميزة شوية بس قطع الغيار حاتبقي مع التوكيل شوف بوينتر 1600. بلااااااااااااش خش ف قرب ال 60 وهاتلك اوكتافيا 2000 أو 2001 والله ف نظري تضرب الفيكترا.. نفس الكلام أوائل الميجان 2.

ماتربطش نفسك بحاجة معينة عشان حاتتوه.. قارن مجموعة كبيرة وكل حاجة ليها عيوبها.. شوف اللي عيوبها بالنسبة لك كبيرة احذفها لغاية ما توصل للي محتاجه. وبالتوفيق ان شاء الله ف اختيارك.

والله يا معلم تفكيرك مش بطال أن الواحد يحبس نفسوا فى حاجة واحدة ولقيت اية فور (سكودا) تحفة من جوة بس الموديلات الجديدة شوية سبعينات يا معلم وانت طالع ياما أجيب موديل 99 ...

سيبك بالصدفة عرفت أن الميجان بنفس السعر 55-60 ,,,, العربية دى شكها شيك قووى من برة وجوة ,,,, وقد كان رحت القسم بتاعها طبعا الناس بيدافعوا عنها جدا بس برضوا السعر قليل قووى بالنسبة للامكانيات ودة فى حد ذاتة يقلق

بينى وبينكوا الواحد بيضعف قدام العربية الركوبة و بالذات لو أوروبى

بص بالنسبة للميجان عربية ممتازة بجد ك كماليات و و شكل و موتور ( بس مش بتاع شد و كدة)

ثانيا ابعد عن موديل 20005 منها لانو كان فى عيب ف الكنترول ( تقريبا) و اتحل بعد 2005
بالنسبة للسعر الحكاية و ما فيها ان الميجان نزلت 2005 و كان العيب فيها ( و التوكيل صلحها ) بس طبعا السمعة لزقت فيها + انها متعملهاش دعاية كافية
ف كل ده ادى الى قلة الطلب عليها + تدنى اسعار اعادة البيع

بس خلى بالك الميجان فئتها السعرية كعربية الزيرو بتاعها غير كعربية استعمال بمعنى

متعاملهاش ع انها عربية ب 60-70 باكو و تهمل الصياانة و اى ميكانيكى يعك ( زى اغلبية الفئة السعرية المقابلة ف الزيرو زى الفيرنا و الانوس مع احترام مالكى العربيات دى ) و خلاص فلازم تحط ف دماغك النقطة دى

المشاركة الأصلية كتبت بواسطة m.alaa92

بص بالنسبة للميجان عربية ممتازة بجد ك كماليات و و شكل و موتور ( بس مش بتاع شد و كدة)

ثانيا ابعد عن موديل 20005 منها لانو كان فى عيب ف الكنترول ( تقريبا) و اتحل بعد 2005
بالنسبة للسعر الحكاية و ما فيها ان الميجان نزلت 2005 و كان العيب فيها ( و التوكيل صلحها ) بس طبعا السمعة لزقت فيها + انها متعملهاش دعاية كافية
ف كل ده ادى الى قلة الطلب عليها + تدنى اسعار اعادة البيع

بس خلى بالك الميجان فئتها السعرية كعربية الزيرو بتاعها غير كعربية استعمال بمعنى

متعاملهاش ع انها عربية ب 60-70 باكو و تهمل الصياانة و اى ميكانيكى يعك ( زى اغلبية الفئة السعرية المقابلة ف الزيرو زى الفيرنا و الانوس مع احترام مالكى العربيات دى ) و خلاص فلازم تحط ف دماغك النقطة دى

بص أنا العربية بتلعب فى دماغى جامد بسبب الكلام اللى أنت بتقولوا دة ,,, بس ياريت تحكيلى عنها أكتر لو كنت أتعملت معها خصوصا قطع الغيار وأسعارها بما أنها عربية أصلا عالية ... برضة من الحاجات اللى تقلق شوية و هى عدم الانتشار ز