الموضوع: بجد حرام اللى بيحصل دة الواحد تعب

بعد السلام
بجد انا مخنوق و على اخرى و زهقت من حاجة اسمها عربيات بقالى 5 شهور دايخ على عربية مستعملة كويسة .
و فى خلال المدة دى قابلت اشكال و الوان من البشر و من العربيات . اللى عمال يفتى على الفاضى و يقنعك ان العربية فله و تطلع قريبة من التوك توك
و العربيات الكويسة اللى ورقها فى مشكلة و انفض و اللى معقولة و صاحبها بيفترى فى السعر و تكلمه يقولك مش بايع .
بالامانة و الله انا اتعلمت الادب فى الكام شهر دول .

و هتستغربوا انا عملت الموضوع هنا ليه . لانى قررت بعد م شفت كذا موضوع فى القسم و خصوصا مشاركات الاخ العزيز طنانى باشا . انى اجيب العربية الاول الاسترا 2001 اللى كنت شفتها من كام شهر و لسه موجودة !!!!

الله اعلم هو دة العادى بتاع الاوبل و لا فيها حاجة بس كلمت الراجل و قلت هجيب ميكانيكى يشوفها و كان اخر كلام فيها على 46500 بالضبط

كلمت الراجل هو شباب و شكله محترم و قلتله بالامانة العربية دى فيها ايه و محتاجة ايه قالى موتورها حالتة تمام و الفتيس تمام

لكن عايزة مساعدين خلفى شمال و تمنه حوالى 250 جنيه ....!!!

اتمنى منك حد يقولى المساعدين دة يعيب العربية و لا عادى اجيبها و اتوكل على الله و اخلص لانى تعبت بجد و لو تمام يبقى اجيبه منين و سعره كام

متشكر جدا لليكم و ربنا يجزيكم الخير لانى بعتبركم املى الاخير بجد