والله أنا مخدش بالى ومش عارف بعداد ولا من غير لأن الواحد كان مركز فى التخليص السريع وطبعاً ممكن يفوتنى حاجات من دى .
السؤال بقى يادكتور وراكبى الـ 620 طبعاً عاوز أركب ارضيه بس خايف أشيل كرسى السواق علشان بالكهرباء مفيش حد يعرف حاجه عن الموضوع ده
عرض للطباعة
والله أنا مخدش بالى ومش عارف بعداد ولا من غير لأن الواحد كان مركز فى التخليص السريع وطبعاً ممكن يفوتنى حاجات من دى .
السؤال بقى يادكتور وراكبى الـ 620 طبعاً عاوز أركب ارضيه بس خايف أشيل كرسى السواق علشان بالكهرباء مفيش حد يعرف حاجه عن الموضوع ده
انت بص من تحت الكرسى لو لقيت الفيشه سهله الفك و الكرسى مواتيره جواه و بيجرى على مجارى عاديه يبقى مافيش مشكله من فكه و تركيبه بس عند واحد محترف
استاذ طارق
اولا الف مبروك على الترخيص و النمره حلوه
ثانيا بالنسبه للموبايل انا كنت بعمل زيك بالضبط و بحطه مكان حامل الاكواب بس بطلت لانى بحط الموبايل فى الجراب الجلد بتاعه و بحطه فوق الغطاء بتاع حامل الاكواب و مش بيتزحلق و بشغل البلوتوث مع سماعة ودن و لما بيضرب برد عليه من السماعه لانى مش بحب اسيبها فى ودانى
ثالثا بالنسبه للرخصه فهى ليها درج فى الشمال و انت قاعد على كرسيك درج صغير كده و ظريف جربه بس انصحك تعمل زيى ما تسيبش رخصة العربيه فيها ابدا و دى كانت تجربه اتعلمتها و انا لسه صغير من ظابط مباحث
رابعا تسخين كرسى السواق المفروض يشتغل و لو مش شغال لما تروح مركز الصيانه قول لهم عليه بس يمكن الجو كان حر جدا فى اليومين اللى فاتوا و عشان كده انت ما حسيتشى بيه
خامسا اعتقد ان الارضيه ده امر مش ضرورى دلوقتى حاول تستمتع بالعربيه بوضعها و ارضيتها الحاليين و بالنسبه للدواسات انا اشتريت 3 اطقم لحد دلوقتى و كل ما كنت بجيب واحد ارجع الاقى واحد احلى انصحك سيب اللى جيبته فيها و فى مركز الصيانه طقم دواسات ظريف و سعره كويس و حيعجبك و فى كذا طقم برضه لو سالت عليهم بره حيعجبوك بس اغلى شويه
سادسا بكره حتتعود على انك تقفل الزجاج قبل ما تنزل منها بس انا مش فاهم ايه اللى انت مش شايفه من شنطة العربيه
سابعا ربنا يبارك لك فيها و يديمها نعمه على كل من يقدرها
اول حاجة نقول مبروك يا استاذ حسام وربنا يباركلك فيها
كنت عاوز اسال فيها H.A.C ولا لا؟
وحاجة تانيةهوا انت استلمت العربية من امتى وليها معاك اد ايه دلوقتى
والف مبروك
ثانيا للاستاذ زيودا
انا ليا واحد صاحبى مجرب الشاريد وبيقول عليها ممتازة وانا سقتها بصراحة جامدة
البيكانتو بصراحة معرفش حاجة عنها
والاسبيرانزا يقوللك عليها استاذ حسام
هوه حد ضرب حد بحاجه ؟؟؟؟؟؟؟؟؟؟؟؟؟؟؟
ولاَ مين قال لمين إيه ؟؟؟؟؟؟؟؟؟؟؟؟؟؟؟؟؟؟ :(
يوسف بك :
تقصد مكان الرخصه إللى هوه درج الفكه ؟
وفكرة إنى عاوز أعمل أرضيه جلد لأن الموكيت بيلم تراب وكذلك هتكون أشيك وبالتالى تستمتع أكثر وأنظف كمان وعلى فكرة أنا دايماً أعمل كده فى كل عربيه جديده وفور الإستلام .
وبالنسبه لزرار التسخين فهو ملغى تماماً وسوف أسئل عن السبب .. بس عموماً أنا شايف إنه مش مهم .. ياريت تقولى رأيك .
وسوف أنتظر لأرى دواسات مركز الصيانه .. بس أنا فى اسكندريه .
أما بالنسبه لموضوع الشنطه فبيكون فى المرشيدير وإنت باصص ورا مبتشوف حدود الشنطه خالص علشان جده لازم سنسور .. وعلى فكره أنا متعود أركن وأنا باصص ورا مش بمرايات الجنب .
وأشكرك كثيراً على التهنئه .
آه نسيت أقولكم ياجماعه برضه من إنطباعاتى .. إن الجماعه الصينيين دول كان المفروض يعملوا المفتاح حته واحده مش الواحد يفضل ماشى بقطعتين كده زى مايكون مركب الريموت عند الكهربائى .
عزيزى الاستاذ طارق
اشكرك على ردك
انا فعلا كنت اعنى درج الفكه بس هو درج للرخصه اصلا و فيه مشبك بيمسك الرخصه جربه حتلاقيه مناسب ليها
بالنسبه للارضيه انا دايما بحب احافظ على الشئ و استمتع بيه و كل شئ له بديل
يعنى لو حضرتك حطيت فرش على الارضيه بيكتمه و لا منك استمتعت بيه و لا منه حيفضل زى ما هو و لما لا قدر الله يحصله حاجه ممكن تنضفه او تغيره بنفس الخامه و برضه تبقى استمتعت بيه
اقترح عليك مكنسه بتشتغل على ولاعة العربيه هى برميليه الشكل و بتشتغل بلاور فى نفس الوقت بعمليه عكسيه لدورة الهواء و سعرها مناسب انا اشتريتها ب 65 جنيه
بالنسبه لعملية الرجوع للخلف فهى فعلا زى ما بتقول انت مش بتبقى شايف اخر الشنطه بس ممكن تعدل وضع الكرسى لفوق شويه و تعتمد على مرايات الجنب و بالخبره بعد شويه حتتعود على ابعاد العربيه بس انا موافقك ان ابعادها مختلفه شويه
و الباركينج سينسورز موجودين فى مركز الصيانه ب 425 جنيه ممكن تركبهم فى اول صيانه بس انا شوفتهم بس مش داخلين دماغى لانى ناوى اركب باركينج سنسورز بكاميرا
اما بالنسبه للريموت بتاع العربيه فكلامك صحيح بس انا عاجبنى فيه الانفصال ده لانى فاصل المفتاح عن الريموت و سايب المفتاح احتياطى فى البيت و اديت الريموت للبواب علشان تنضيف العربيه علما بان العربيه لا يمكن حتدور الا بالمفتاح الاصلى
اسالك انا
جربت الانذار
اقفل العربيه بالريموت
جرب تفتح الكبوت كده او الشنطه
فى الاول الانذار ما كانش شغال عندى فى العربيه الكبيره بس واحد صاحبى قاللى اضغط ضغطه طويله فى اول مره تشغله و فعلا اشتغل
اتمنى لك التوفيق و ربنا يديم عليك نعمته
مساء الخير جميعا
اول تجربه فعليه مع العربيه كان يوم السبت الى فات قلت الين
العربيه ( لانى مكنتش ركنتها غير للمرور ) وبناء على نصايح الاخوه
هنا خدت الاسره وطلعت على الاسكندريه . العربيه يا جماعه اكتر من ممتازه
ناعمه وسحبها ممتاز وسهله جدا فى المناوره يعنى فى السواقه رائعه
حتى بالنسبه للحجم ولكن فى الركن العزاب كله . فعلا العربيه مش سهل
تعرف حدودها ومحتاج دايما حد يساعدك معرفش البركينج سينسور هيحل المشكله
دى ولا لا . بالنسبه للتكييف اكثر من رائع وخاصيه انك تعرف درجه الحراره بره
جميله برضه . بصراحه يا جماعه الدلع الى فى العربيه كتير و جميل .....
سؤال للاستاذ يوسف يعنى ايه اعلى الكرسى ؟ انا حسيت انه بيميل لقدام او للخلف
مش بيعلى و يوطى . بالنسبه للاستهلاك انا محسبتوش بالظبط علشان قريت انك
متقدرش تحسبه غير بعد الالف الاولانى ( بعد التليين يعنى ) . ولكن مبدئيا اعتقد انه كويس
لانى مكنتش مفول تماما و اخذت اكتر من نصف التنك بحاجه بسيطه ذهابا و ايابا
بالنسبه للون الاسود
جميل وشيك ولكن اى خدش بيبان قوى طبعا اخدتلى شويه خدوش ولكن محتمله
الاسره منبهره بالعربيه وانا كمان . دى كده اول انطباعات عن العربيه وهاتابعكم بالاخبار
اول باول علشان هى خلاص نزلت الخدمه و معلش سؤال تانى للاستاذ يوسف حضرتك
جبت المكنسه منين ؟ واى سؤال انا تحت الامر
:shock:
مبروك لجميع الاخوة و انا سعيد جداً لانى لقيت حد يشجعنى بعد ما كنت لوحدى و سعادتى اكتر اننا كلنا متجمعين هنا فى موضوع واحد و كل واحد بيحاول يفيد و يستفيد .. اتمنى دايماً نفضل بنفس الحماس و ارائكم كلها تهمنى .. و بالنسبة لى مفيش جديد تقريباً اتكلمت عن كل حاجة فى بدايات الموضوع اللهم انى كل ما باركب العربية باحس بالفخامة و الراحة و حسن الاختيار
لكن حكاية الانذار اللى قال عليها يوسف باشا دى جديدة و ياريت نجربها.
اخوكم حسام