دوخت ومحتاج مساعدة ضروري - فتحت سقف

**ahmed_bq** · 30-10-2011 12:49 PM

اعضاء المنتدى الاعزاء

انا فتحت السقف بتاعت عربيتي مكسوره ... سوبر اكشن 2008 خليجي سعودي .. لون الشامبين او الذهبي.

في التوكيل قالو ان سعر الازازه دي 3 الاف جنيه وشويه ... طبعا حرام اوي دي حتت ازاز .. وبيقول ان لون الفاميه بتاعها بيختلف حسب الموديل واللون (بتفرق؟)
عملت واحده عموله فيبر ... بس مش مظبوطه في الفتح والقفل وقطعت الجوان وغيرته قبل كده وحاسس انها هتقطع الجوان تاني.

ارجو من حضراتكم ان حد يدلني على واحد بيبيع الزجاج بتاع فتحت السقف ده استيراد ... انا من بنها وعايز بدل مروح الحرفيين الف وملقيش خصوصا ان ظروف شغلي اليومين دول مقدرش اخد اجازه اروح .. لو حد يعرف حد هناك او يديني ارقام حد بتاع قطع غيار استيراد اكلمه واساله قبل مروح .. ابقى متشكر ليه جدا وليه الحلاوه :)... ومش هيجيبها الا نايل موتورز ان شاء الله

**HeMa_LanCeR** · 30-10-2011 01:30 PM

طيب ماتسأل في مصنع جريش اللي في العاشر

**ahmed_bq** · 30-10-2011 01:34 PM

المشاركة الأصلية كتبت بواسطة hema_lancer

طيب ماتسأل في مصنع جريش اللي في العاشر

والله يا هيما مش عارف ... بس انا عايز بتاعت بلادها ... حاسس ان العموله مهما كانت نضيفه مش هتبقى مظبوطه ... وهوا جريش هيعملهالي ولا عنده اصلا؟ وهيعمل الفاميه بتاعه المتدرج زي الاصليه وكده ولا ايه الكلام؟

لو معاك نمرتهم اكلمهم اسألهم

فين شبكة علاقاتك يا هيما ... عايز حته استيراد قبل الشتا ميدخل ............. الازازه بس مش اكتر

**M.Al-Hefnawy** · 30-10-2011 02:02 PM

بص يا باشا معلشي انت هتغرم مشوار لغاية طنطا الحكاية كلها نص ساعة من بنها.

أنا شفت واحد بيركبها مره عند محل زجاج "الحاجة" في سكة المحلة في طنطا ممكن تروحله وان شاء الله تلاقيها.

**ahmed_bq** · 30-10-2011 02:28 PM

المشاركة الأصلية كتبت بواسطة egy77

بص يا باشا معلشي انت هتغرم مشوار لغاية طنطا الحكاية كلها نص ساعة من بنها.

أنا شفت واحد بيركبها مره عند محل زجاج "الحاجة" في سكة المحلة في طنطا ممكن تروحله وان شاء الله تلاقيها.

يباشا اروحلو مش مشكله طنطا قريبه وطريقها سالك ... بس هيا معموله ولا استيراد؟

**ahmed_bq** · 30-10-2011 03:44 PM

المشاركة الأصلية كتبت بواسطة hema_lancer

طيب ماتسأل في مصنع جريش اللي في العاشر

انا اتصلت بيهم وهما الحقيقه قمه في الذوق والاحترام ... خد رقمي وقاللي هتصل بيك لما اشوف موجود ولا لأ بتاع اللانسر بومه

وبعد كده اتصلو بيا وقالو للاسف بتاع اللانسر ده مش بيتصنع عندهم :(

مش معقول يعني مصر كلها مفيهاش .. انا زي مكون بدور على ابره في كوم قش

متعرفش حد بتاع استيراد او اي حد في الحرفيين يسألي عنها؟

**bassem_sams** · 30-10-2011 09:23 PM

ربنا يعينك و يكرمك يا استاذ احمد و تلأقيها ان شاء الله

**M.Al-Hefnawy** · 30-10-2011 10:32 PM

المشاركة الأصلية كتبت بواسطة ahmed_bq

يباشا اروحلو مش مشكله طنطا قريبه وطريقها سالك ... بس هيا معموله ولا استيراد؟

الحقيقة ما اعرفش بس أنا لاقيتهم بيكسروا القديمة عشان يركب الجديدة واهتمش قوي عشان عربيتي بدون فتحة سقف.

**HeMa_LanCeR** · 30-10-2011 11:28 PM

المشكله لو استيراد انها هتبقي غالية لأنك كده هتبوظله السقف كله
عموما هسألك وارد عليك

**ahmed_bq** · 31-10-2011 08:23 AM

المشاركة الأصلية كتبت بواسطة hema_lancer

المشكله لو استيراد انها هتبقي غالية لأنك كده هتبوظله السقف كله
عموما هسألك وارد عليك

والله يا هيما مش هتبقى غاليه اكتر من الاصليه طبعا ... غير كده مش هيبوظ ولا حاجه انا عندي اللي معموله عموله دي فيبر ومتفرقهاش عن الاصليه خالص .. ممكن يبقى ياخدها ويركبها في السقف اللي عندو واللي هيشتري السقف مش هيبقى مدايق يعني ... مشكلتي بس اني مبحبش اخلي العربيه فيها حاجه خالص وموسوس ولازم كله يبقى متظبط وتمام ... والاصليه عندي مكسوره :(

ياريت يا هيما تشوفلي الحوار ده عشان بجد حاسس انه خانقني .. وشكرا مقدما يا غالي