الموضوع: تقرير رحلة جبل موسي بكاترين+دهب

السلام عليكم ورحمه الله وبركاته
اليوم وبعد عودتي من رحلتي الى جبل سيدنا موسي عليه السلام مع صديقنا مينا خبير السفاري في المنتدى
حبيت احكيلكم تجربتنا يمكن شخص يستفاد منها خاصة وان ده هدف المنتدى تبادل المعلومات والمنفعة
ورايي عبر فقط عني انا كريم منير
ويوجد بالرحلة 5 افراد من 3 في المنتدى ممكن الاتنين الاخرين يحكو انطباعتهم عن الرحلة خاصة انهم اعضاء فعالين ونشيطين جدا وهما محمد دماسري وهاني رزيني
اولا نبذة عن جبل سيدنا موسي
هو من اعلى الجبال في مصر ويعتبر ثاني اعلى قمة في مصر بعد جبل سانت كاترين
ارتفاع جبل موسي 2285 متر
ويقع على هضبة سانت كاترين بجنوب سيناء
وهنا معلومات من وييكيبيديا
ظ…ط.ظ…ظٹط© ط³ط§ظ†طھ ظƒط§طھط±ظٹظ† - ظˆظٹظƒظٹط¨ظٹط¯ظٹط§طŒ ط§ظ„ظ…ظˆط³ظˆط¹ط© ط§ظ„ط.ط±ط©
وهنا لجبل موسي
http://ar.wikipedia.org/wiki/%D8%AC%D8%A8%D9%84_%D9%85%D9%88%D8%B3%D9%89_(%D9%8 5%D8%B5%D8%B1)

نرجع لرحلتنا
اولا كنت تعبان جدا قبل الرحلة بيوم والتعب شد ودخول دور برد يوم الرحلة
اخدت اذن نص يوم ورحت نمت شوية
وكملت الرحلة مسكنات اصل ماينفعش تتاجل او تتلغي خلاص
وانا بحب التزم بكلمتي جدا جدا

شدينا الرحال من القاهرة يوم الخميس بعد الشغل الساعة 6 مساء وفعليا خرجنا من القاهرة 7 تقريبا
وصلنا في حدود الواحدة فجرا بواسطة سيارة زميلنا مينا اللاند كروزر التعلب وهي اسد الصحراء والسفاري بلا منازع لكن متعبة شوية
لكن اتعب شوية واكون راكب عربية اعتماديتها تفوق مثيلتها في الراحة
خاصة وان الوقفة في الصحراء مافيهاش هزار
وصلنا عند الشيخ سلمان البدوي
حطينا شنطنا وغيرنا هدومنا واتوضيت عشان اكيد صلاة الفجر هاتاذن فوق القمة
بدانا الصعود من طريق الخديوي عباس او طريق الجبال
وكل شوية تلاقي روث جمل في وشك :-) وتعرف انك ماشي صح
اقصد الريحة يعني مش الروث نفسة
طبعا استعدادات الرحلة كانت واضحة وصريحة
هدوم تقيلة عشان السقعة فوق بتوصل للتجمد
صحيح ماشوفناش جليد لكن كان فيه سائح معاه ترمومتر وكانت درجة الحرارة علية قبل الفجر -2 ولما طلعنا القمة كانت -5 تقريبا
الكشاف الضوئي حاجة اساسية برضه
مع زجاجة مياه
بارات الشيكوليت للسعرات الحرارية مطلوبة بشدة مش هاتتخيلو حجم المجهود الا لما تبدئو تتطلعو
سنيكرس على مارس واي شوكليت بار واعمل حسابك في 5 ولا 6 مثلا
لانك مش هاتطلع وانت واكل عشان تكون خفيف
كل شوية على طريق الصعود نلاقي استراحات
ومش هاكلمكم عن السياح اللي عدو ال 60 وطالعين احسن مننا
في ناس بتتعب وتاخد جمل سواء من اول الطريق او نصه
مش عارف ليه كنت سابق مجموعتي وبيفيصو ويستريحو دايما مع ان الاجانب ما بيقفوش راحات خالص
طالعين ابطئ بس مستمرين
وطبعا الشباب المصري بيقف كتير
انا اتبعت طريقة الاجانب ومشيت بالراحة بس مستمر
وسيبت فريقي عشان اعرف انجز
واستنيتهم عند اول الدرجات الحجرية
750 سلمة :-)
سلمة حجر محطوطة بطريقة عشوائية
وصلنا القمة من اول الناس
فوق في حاجتين
مسجد
وكنيسة
اول ما طلعت سمعت اذان الفجر
لحقت اول جماعة ودخلت اصلي على صوت امام شاب اسيوي يقرا بخشوع جميل
مع لفحة الهوا في القفا لاني كنت اخر صف والدفا اللي جاي من جوة عشان المسجد بدون تهوية
مش محتاج احنا في ماينص فايف :-)
المهم
صليت وخرجت اطلع عدة التصوير
وبدنا التصوير
في اول الشفق ما بيدء يخط من وراء الافق
ويبدء الافق يحمر
سبحانك يا رب
واتصورنا في كل مكان وسط تواجد كبير لسياح كتير
وعلى الساعة 6:30
بدانا نشد الرحال لتحت
ومحدش يقولي النزول اسهل
انسي
عضم الفخد والحوض والسمانة اللي بدء ينقح من الطلوع والبرد
شد كل العضلات من بعض
والنزول بتقاوم الجاذبية انك تقع والمشوار طويل
وكون انك شايف الطريق اللي طلعتة في الضلمة وانت مش شايف يديلك احساس بالتعب جدا
الحمد لله نزلنا
فطرنا وكلنا الفراشيح
وطبعا كنت عامل حسابي وجايب حلاوة اسبريد ومربي وطلعتهم في السكرتة احسن البدو يفتكرونا بنشتمهم عشان عيب تطلع اكل عندهم :-)
واحنا محتاجين نعوض السعرات اللي راحت دي
المهم كلنا ونمنا على الحصي
ماتسالوش نمنا ازاي 3 ساعات وقمنا فايقين
واخدين الجدي في العربية التانية ورايحين نشوي بقي
ناس عارفة بتعمل ايه بجد
سمي واسقي الدبيحة مية وادبح واسلخ ونضف وقطع وجهز وتبل في 40 دقيقة
ايون بما فيهم توليع فحم الشوي
ساعة وربع وان الشوي جاهز للاكل
اطيب لحم نيفة مع تتبيلة حلوة والجدي راعي عشب لا واكل زبالة ولا فيه دهون
كله اصلي
المهم
كلنا وشربنا الشاي عالفحم برضه وهوب الجو غيم والسحاب الرمادي ازف قولنا كويس ما مطرتش على الولعة
ركبنا العربية استعدادا للذهاب الى دهب
قبلة الغطاسين الاولي في العالم
وصلنا الكامب وحطينا شنطنا واستحمينا اخيرا
نزلنا اتمشينا شوية وكلنا تاني
ايوة
يعني اتغدينا الساعة 3 جدي
والساعة 9 كنا بنضرب اكل تاني
مش هااتخيلو التعب بس تعب حلو جدا
وروحنا نمنا ومن الساعة 7 الاورجانيزر بتاعنا مينا باشا بيرزع على الابواب
قومو انتو جايين تنامو
بجد مينا حريص على استمتاعنا بوقت الرحلة جدا اكتر مننا
اينعم ساعات بتبقي طالبة انتخة لكن هو
تك تك تك يلا انجزو عشان ننفذ بقية البروجرام
شكرا على اهتمامك بالعميل فعلا
ورغم انه صديقي لكن اتعامل على اني عميل لازم اخد البروجرام كامل
طلعنا على البلو هول
اجمل بقعة غطس في العالم
قبلة الغطاسين
عمق 110 متر تحت رجلك في اجمل انكسار اخدودي محاط باروع شعب مرجانية
البلو هول مش لابلاج ولا لافام ولا تفتكر انك في الساحل
البلو هو جاي تحط وشك في المية وتقول
سبحان المبدع الخالق
ايه الرووووووووووعة دي
مش طبيعية
المهم قعدنا في مكان حلو واجرنا النضارات عشان نشوف تحط المية طالما مفيش بدل غطس الا لما تكون بتعرف تغطس
واكتفينا باللي نشفوة من مكانا
ايه كمية الالوان دي
ايه درجات الاسماك الزرقا دي
ولا الشعب
محدش يفكرني عشان سايبة شوية خراشيم في جسمي عشان كنت بعوم فوقها مش عايز ابعد عنها
والمحار وهو بيفتح ويقفل
واسماك من كل لون وحجم في حجم لمحتة كان يوصل ل 70 سم او اكتر
والصغير والريشة وكل اللي بتشوفوة في ناشيونال جيوجرافيك
بجد هي دي متعة واسترخء الرحلة
وشك في المية
وبتتنفس بالراحة
وبتتفرج على اجمل مخلوقات ربنا في صمت مهيب
وتطلع وتانتخ شوية
ونستعد للعودة للغداء والاستحمام ومغادرة الكامب
ونتوكل على الله نرجع لاشغالنا
بعد رحلة اكثر من رائعة
معلش رغيت كتير قوي
بس في كلام اكتر بكتير
ملحوظة
لو قررت تطلع الجبل فعلا لازم تلبس راننج شوز
اللي هو شبه الاديداس والنيكي
نعل سميك ووش خفيف
عشان كنت لابس بوما بنعل خفيف رجلي اتبهدلت من الصخور في الطلوع
وتقريبا الكوتشي باظ :-(
ولازم تلبس بنطلونين فوق بعض خاصة لو في الشتاء
وانت طالع خد الجاكت في ايدك ماتلبسوش غير لما تقرب توصل
عشان وانت طالع جسمك سخن وبيعرق
ولما هاتبرد هاتتعب اكتر
انا رغم اصابتي بدور برد بلبعت بنادول عشان يسد شوية معايا واعرف اكمل
لان الرحلة مجملا رائعة
يؤخذ فقط على الرحلة العربية مش مريحة
لكن يعوضها فعلا انها اعتمادية جدا واعطالها معدومها واللي سايقها محترف سواقة ومحترف صحراء
مينا شخص تطمن ليه انا مش ممكن اقعد جنب سواق
مينا قعدت جنبه رايح جاي يعني اكتر من 14 ساعة سواقة
ومعدلتش عليه لانه رزين وهادي جدا
كمان هو ملتزم زيادة شوية
صحيح لو حد عايز يشتري حاجة سيبوة يفاصلكم بيعرف يفاصل كويس :-)
مجملا المدفوع يساوي المتحصل علية في الرحلة
خاصة لو حسبنا الانتقالات ودخول الصحاري وتنظيم كل تفاصيل الرحلة وحجز الكامب والمعارف الخ الخ
وان شاء الله هاكررها تاني اول ماعرف الاقي وقت تاني
وجينا للي كلكم مستنينه
الصور
نبتدي على بركة الله
شوية صور صغيرة والباقي يتصفح الالبوم على الفيس بوك لان الالبوم 148 ده بعد الاختصار لانهم كانو 780 صورة :-)

دي في استراحة طلوع الجبل في الفجر



تلون الشفق من ورا الجبل فوق قمة جبل موسي









انا فوق قمة الجبل قبل



الشفق