الموضوع: مزادات وزارة المالية جمارك

ههههههههههههههههه لا مش هتلاقي من دا تقريبا
انا بردو نفسي في موستانج قدييييم دي فاااااااااااااااااجرة
والكامارو اوع وشك بس 8 سلندر ياعم دا انت عايز مقطورة بنزين وراك

يا جماعة طب ما نفكر كدة مع بعض هي العربيات دي جت منين ؟


العربيات دي واحد زينا كدة جابها من برة ووصل لحد هنا ومعرفش يعديها من الجمارك (سواء غايب واحدة أو رسالة كاملة ) ، ليه معرفش يعديها ؟
- يا إما ورقها مش مظبوط (يعني مثلاً مش المالك الاول ليها ،أو عليها مشاكل، أو فات على موديلها أكتر من المسموح بإدخاله مصر، أو حاجات كدة ..)
- يا إما طلع عليها جمارك أكتر من اللي صاحبها حاسبه ، و بالتالي مش هيقدر يدفع
- يا إما العربية نفسها مش ممكن تدخل البلد عشان غير مناسبة لقوانين البلد (ذي مثلاً عربية دركسيون يمين أو عربية سباق أو حاجات من النوع دة )

بالتالي في الحالات دي صاحب العربية أو مستورده قدامه حل من اتنين يا إما تتصدر لبلدها تاني على حساب صاحبها أو تتصادر لحساب الجمارك وتتباع في المزاد . كل ما يجمعوا عدد من العربيات بيعملوا المزاد دة ويبيعهم للناس كل شهرين أو تلاتة أو حتى ست شهور ، حسب الظروف والعدد .



في المزاد بقى .. ممكن صاحب العربية يدخل ويزايد عليها تاني هو أو حد من قرايبه وياخذها تاني بس بسعر أقل من اللي كان هيدفعه لو كان دفع رسمي (لأن المزاد إنت وشطارتك ) ، أو ممكن ياخذ تاجر ويقطعها خردة ، ودة في حالة العربيات اللي كدة كدة مش هتترخص وبالتالي مش أي حد هياخدها ، يا إما عربيات تروح لأصحاب نصيبها وكل واحد ورزقه


الخلاصة إحتمال انك تلاقي عربية لقطة وتتركب وتمنها أرخص من السوق إحتمال ضعيف جداً ، لكن مش مستحيل
لكن لو الهدف مختلف عن كدة (يعني مثلاً عايز عرايبية عشان ياخد منها موتور أو عايز تحفة يحطها في جراج ويتفرج عليها أو .. أو .. أو ) ، كدة الاحتمال انك تلاقي طلبك هيكون أكتر


وربنا يوفق الجميع

يعني مش ممكن الواحد يلاقيلة حتة بي ام او الفاروميو ؟؟؟ ):

العربيات دي لازم هيتصرف عليها لانها بتكون مرميه في الطل فترة طويله وعوامل التعريه ماثرة فيها جامد وعشان تركب عربيه من مزاد لازم تركب مرسيدس او بي ام او شيروكي انا اعرف شخص وقع شيروكي موديل 94 بحوالي 30 االف بندق فيه لقط وبالزات العربيات الشبح

المشاركة الأصلية كتبت بواسطة maserati

السلام عليكم و رحمة الله و بركاته

أنا مرة كنت بحضر مزاد فى اسكندرية سنة 2001 و كان فيه عربية mercedes 380 sel مو 1983 و كانت جاية من ألمانيا و متصادرة فعلا و صاحبها اللى كان راكبها هناك كان قاعد جمبى فى المزاد عشان يخلص فيها و كان حتى معاه الكتالوجات و المفاتيح بتاعتها و كان عامل حسابة يخلصها على 50 و لا 60 ألف جنيه, بس عدت و قدر يخلصها بس على 85000 جنيه, كان أيامها هو ده سعرها فى السوق و يبقى هو كسب أنه ركب عربية عارفها لأنها كانت عربيته, واحد تانى, كان جايب عربية ألفاروميو كوبيه من ايطاليا و نفس النظام برضه هو اللى خلصها, حتى كان جايب علبتين بوهية لون العربية و كان سايبهم فى العربية.

الموضوع اللى فيه مخاطرة فعلا, أنك ممكن تجيبلك مثلا واحدة mercedes e200 model 1997 من ألمانيا و تكون أقل من 100000كم, هى سعرها هناك بتاع 4000 يورو, تجيبها و تفك منها كوووووووووووووووول حاجة ممكن تتفك و تسيبها لحد ماتتصادر منك و تدخل المزاد و تشتريها, لو ربنا مسهلهالك, هتقدر أنت تخلصها من غير التجار مايترازلوا عليك و استلمها بالجواب اللى ترخص بيه فى المرور, بس تبقى مظبط أمورك, أن العربية فى النهاية, ماتقفش عليك بأكتر من سعر السوق هنا, يعنى ماينفعش العربية دى هنا فى مصر تكون بتعمل 165000 جنيه مثلا, تقوم أنت تفضل تزايد و تقوم مخلصها من المزاد ب180000 جنيه, لأنك لسه هتحط عليهم ال4000 يورو اللى أنت دفعتهم فى ألمانيا, تبقى الشغلانة خسرانة معاك.

الله ينور عليك، هو دة الكلام السليم ،
إلي ملوش في لعب التجار وحوارات الورق والتخليص وكدة ، هيكون الموضوع بالنسبة ليه مخاطرة كبيرة وإحتمالات الخسارة أكبر من المكسب
عشان كدة بنقول إن الموضوع مش لقطة ولا كنز ذي ما الناس متصورة ، في إحتمال تطلع حاجات كويسة لكن إحتمالات قليلة