الموضوع: لللافادة العامة : جمـيع تجارب اعضاء منتدى نايل موتورز مع زيـوت ومنتجـات ليكـوى مــولى

الموضوع هام جدا ومفيد لكل الاعضاء اللى داخلين على مرحلة تغير زيت

لقيت ان بيواجهنا دايما الحيرة فى مسائلة تغير الزيت خصوصا بالانواع الحديثة من الزيوت اللى نزلت مصر مؤخرا

وبدل ما نقعد نستنى رد الناس على تجربة زيت معين .. فعملت الموضوع ده جمعت فيه تجارب الاعضاء مع زيت ليكوى مولى
عشان يبقا التجربة خير دليل .. ويكون تجارب الاعضاء مسجلة ومجمعة فى الموضوع

وباذن الله حجمع فى موضوع اخر تجارب الاعضاء مع الزيوت الاخرى .. بس حقيقى مقدرتش .. لان الموضوع اخد منى وقت فى البحث .. وكمان فى القراءة .. لان مفروض اقراء مشاركة مشاركة فى الموضوعات اللى بتخص ليكوى

واتمنى الاعضاء يفكروا فى عمل موضوع مثل هذا بس يكون منفصل يكون فيه تجارب الاعضاء مع الزيوت الاخرى

اتمنى انكم تقرائوا كويس المشاركات لان فى مشاركات منها مفيدة للدكتور المناهرى عن تفسيره لبعض المصطلحات وسؤاله للالمان المنتجين للزيت وعن كفائته .. وكان موجود فى هذ الحفل ايضا اعضاء بارزين من نايل موتورز على راسهم .. حبيبنا كريم منير .. ودكتور المناهرى .. ومحمد الجرجاوى .. وحسين جمال .. والعبد لله

اسيبكم بقا مع تجارب الاعضاء

المشاركة الأصلية كتبت بواسطة mnelmasry

اما عن تغيير الزيت فانا كنت معتاد علي موبيل 1
بس المرة دي غيرت لزيت ليكوي مولي الماني الصنع ودة بعد ما قرأت عنة كثير واقتنعت انة افضل الموجودين-وفي انتظار التجربة الفعلية ليتم الحكم بشكل صحيح
والزيت نوعة لايت لوف من ليكوي مولي وهو احدث تكنولوجيsm
وسعرم 285 عبوة 5 ليتر
وجبت معاة كمان اضافة السيراتك ب 126
وموتور فلاش ب 29
ارجو ان تكون مشاركتي مفيدة . والسلام عليكم

المشاركة الأصلية كتبت بواسطة mnelmasry

السلام عليكم
اولا الله يبارك فيكم
ثانيا بالنسبة لاضافة السيراتك هي مادة تضاف مع الزيت تقوم بعمل طبقة رقيقة من مادة السيراميك حول البساتم لتقليل الاحتكاك
ثانيا بالنسبة لفلتر التكييف انا قمت بتغييرة لاني قمت بتنظيفة اكتر من مرة وهو لم يتغير منذ شراء السيارة وكان فعلا متسخ جدا
ثالثا بالنسبة للزيت فلون العلبة موف وعموما ممكن تدخل علي الموقع الخاص بالشركة وتدخل بيانات سيارتك وسيظهر لك اي من انواع ليكوي مولي المناسب لسيارتك طبقا للنوع والموديل
وفي النهاية اشكركم علي التهنئة والمشاركة

المشاركة الأصلية كتبت بواسطة tarakgalal

أنا جربت ليكوى مولى + السيراتك بصراحة نتائج مذهلة حتى استهلاك البنزين اتحسن كتير
سيارتى كانشيل 1999

المشاركة الأصلية كتبت بواسطة محمد الجرجاوي

عشان زيت الماني ومش داخل فيه ايادي مصرية وكل الناس اللي جربتوا شكروا جدا فيه بخلاف الانواع التانية في ناس شكرت وفي ناش مشكرتش وكمان الاضافات بتاعتهم انا جربتها وفعلا فرقت جامد في تصارع العربية زي منظف الكربراتير وعملت تنظيف للرداتير وكل يوم ببص على المياه في الرداتير بلاقيها احلى من المياه المعدنية ههههه وكمان جبت الفلاش وحطوا على الزيت القديم وبعد كدا هحط الزيت الجديد وربنا يكرم وصوت الموتور يرجع زي الاول منه لله موبيل 1 والزيت تمنوا 250 ج وهو تخليقي مضاف اليه بعض المواد اللي بتحافط على عمر الموتور والتصارع المفروض انوا يتحسن + كمان بيقلل استهلاك البنزين

المشاركة الأصلية كتبت بواسطة محمد الجرجاوي

انا زيك بالظبط شغال موبيل وان على طول ولكن بعد 5000 كم بيتحرق وناوي اغير لمولي ان شاء الله عشان استعملت كذا حاجة من منتجاتهم وطلعت تمام وجبت لواحد صاحبي السيراتك وقاللي العربية تصارعها بقا رهيب جدا وطبعا زيت مولي فيه نسبة من السيراتك دا و كمان الماني الصنع والتعبئة بخلاف الانواع الاخرى

المشاركة الأصلية كتبت بواسطة asemx1

قولت النهارده ادور على حد بيوزع منتجات liqui mole الالمانيه

بعد اتصالات مكثفه لقيت ناس جايبين كام كونتينر كدا وفيه زيوت ومنتجات كتير

اتصلت بيهم لقيتهم فى الزقازيق قومت لابس ونازل مسافرلهم

المفاجئه لقيت عندهم منتجات كتير للشركه الالمانيه تحححححفه

اولها createc المنتج دا رهيب وبيتحط على العربيات الزيرو والمستعمله عادى وبيوفر فى استهلاك البنزين ب 35% وبيقلل الاحتكاك فى المحرك وبيديلك ضمان 50 الف كيلو لو الزيت وقع ومعدش فى العربيه زيت لمده 50 الف كيلو اييييييييييوه :m_yes[1]: 50 الف كيلو وبيقلل الدوشه من المحرك بصراحه جربته على ياريستى تحفه فنيه بجد وسحر
ceratec - liqui moly (protector cerأ،mico de motor) - youtube

وجبت من عنده منظف انجيكشن روعه برضو وزيت بيتحط على الزيت بتاع العربيه بيظبط التاكيهات ويظبط صوتها لو فيها تكتكه
injection cleaner liqui moly - youtube

وعنده كمان بخاخه بتشيل صوت الفرامل لو بتصفر وبتحافظ على الفرامل لفتره اطول

ولاول مره لو ريحه التكيف وحشه ومش بيبرد كويس مش محتاج تروح لبتاع تاكيفات ينظفلك التلاجه بتجيب بخاخ فى الفيديو دا عنده برضو وبتقوم تنضف بيه التلاجه الداخليه بدون ما تفك بيعمل على تعقيم التلاجه لمده سنه كامله
klima fresh liqui moly - youtube

لا والاجمد كمان لا تقولى موبل ولا شيل

عنده زيوت للمحركات بتاعتنا صناعه المانى 100% بتقعد لحد 40 الف كيييييلو :b4_556:

انا مصدوووم بصراحه من الى عنده حاجات كتير وهيجيب المنظف بتاع الطابلوه الى بيشيل الاميييير من على الطابلوه عن تجربه والله كان معايا فظيييييييييع

ولو رادياتيرك بيسرب ميه عنده منظف رادياتير وبيعالج التسرب

وعنده سحر للصندوق التروس سواء اوتوماتيك او عادى بيقلل الاحتكاك فيه وبيعالج التروس وبيخلى صوتها اوطى وكفائتها اعلى

وعنده كل حاجه للديزل والبنزين عنده وكلها صنع فى الماااااانيا

المشاركة الأصلية كتبت بواسطة asemx1

جربت الى كاتبه فى اول الموضوع ال 3 منتجات الى حاطط صورهم لان فى منتجات تانيه بتاعت العمره وانا مش محتاجها الحمدلله وفى منتجات بتاعت اضافات لصندوق التروس سواء اوتوماتيك او مانيوال بيقول انه بيقلل الاحتكاك وبيزود عمر الزيت وعمر التروس جامد ل 100 الف كيلو وبيقلل الصوت واستهلاك الوقود بس الصراحه ماكنش معايا فلوس ساعتها اجيبها :)

المشاركة الأصلية كتبت بواسطة asemx1

بس كنت عايز اقولك ان منتجات ليكوى مولى رقم 1 فى المانيا وعلى فكره العربيات فى اوروبا كلها بتحط زيوت ليكوي مولى فى التوكيلات



دا معناها يا فندم انك ماتضيفش اى عبوه تانيه طوال ال 2000 كيلو علشان لا تتسبب فى تاكل الرشاشات او الخراطيم وان عبوه واحده تكفى ولو حسيت ان مافيش تاثير فممكن تضيف بعد ال 2000 كيلو

ومعناها برضو ان النظافه تستمر لحد 2000 كيلو ولو بتحب تعمل صيانه دوريه لدوره الوقود تضيف كل 2000 كيلو عبوه

وقولنا رايك فى السيراتك؟؟
بجد سحر انا ماشى بيه بقالى شهر اهو صوت الماتور بيبقى اهدى كل يوم من اليوم الى قبله وكنت بشد مع منيكوبر بصراحه طلعت منه ههههه مع انى 1300 سى سى يظهر سواق عوييل باين بس سامعه بيحرق اوى انا ماكنتش مصدق نفسى بس اكيد كان فى خطا عنده فى السواقه وخلى بالك حط السيراتك مع التغيير بتاع الزيت علشان ماتحطوش وتنزله تانى علشان ياخد راحته فى المحرك يملى الفراغات والمسامات الى فى غرفه الاحتراق ويبقى زى جدار السيراميك كدا

تحياتى لك والف مبرووك



مبرووك وعقبال ما تجرب الليكويمولى حطه فى دماغك مش هتندم





ربنا يوفقك ويعينك يااااااارب

تحياتى لكم ..... م / عاصم جاد

المشاركة الأصلية كتبت بواسطة ali_abo_amr

السلام عليكم

حبيت انقل لكم تجربة وضع زيت liqui moly وبعض الاضافات الالمانية وذلك فى سيارة احد الزملاء الغير مشتركين فى المنتدى
والسيارة هى لانسر مانيول عاملة 85 الف كيلو

........................

طبعا معرفتى بالزيت ده كانت من خلال اخويا العمدة احمد مصطفى -عمدة قسم نيسان- من خلال آخر مقابلة لينا فى التجمع الخامس .. لما كانت معاه كتالوجات لليكوى مولى ووزعها علينا

تانى يوم نزلت الشغل لاقيت زميلي فى العمل بيقولى انه هايغير زيت والعربية عاملة 80 الف كيلو (لانسر بومة 2008 مانيوال) فقلت له على زيوت ليكوى مولى وانها المانى وجبنا العنوان والتليفون وهو بسرعة نزل اشترى الآتى :

- قام بشراء زيت موتور liqui moly top tech 4100 5w40

بيقعد على الاقل 12000
واشترى الجركن ال4 لتر =250 جنيه

- وقام بشراء اضافة من اضافات ليكوى مولى اسمه ceratek

وده بيعالج تآكل الموتور وبيحافظ عليه وبيعمل مادة من السراميك عشان تقلل الاحتكاكات وبيقلل استهلاك البنزين
طريقة استخدامه = بيتحط بعد ما بتغير زيت جديد , وعلى فكرة بيتحط على اى زيت مش شرط ليكوى مولى وبعد وضع الـ ceratek بيوم او يومين يكشف على زيت الموتور ويزوده تانى اذا احتاج تزويد , وعلى فكرة بيقعد حوالى 50 الف كيلو مفعوله والطبقة اللى بيعملها , يعنى ممكن تغير 3 مرات مثلا زيت ولسه مفعوله موجود فى الماتور
سعر السيراتك =126 جنيه والمانى طبعا .. انا سمعت ان فى منتجات زيه كدا لشركات اخرى بيبتدى سعرها من 200 الى فووووق

- وقام بشراء منظف انجكشن

وده بيتحط على تنك البنزين عند التفويل
وسعره 30 جنيه

وبعد التجربة افاد زميلي بالآتى :

- زيت الموتور : فرق معاه فى صوت الموتور اصبح اهدأ والسحب افضل من الاول (كان الزيت القديم موبيل 1)

- زيت علاج التآكل : لم يفرق معه فى شئ ولم ينتج نقصان فى زيت الموتور وده دليل على عدم وجود تآكل فى الموتور ماشاء الله على المواتير اليابانى

- منظف الانجكشن : فرق معاه فى السحب والطلعة الاولى على حد قوله ان سحب العربية اصبح اشبه بوقت شرائها جديدة وانه اصبح ينقل على rpm اقل من الاول بدلا من الحرق على الغيار

اتمنى اكون نقلت لكم التجربة وبالتوفيق لكل اللى هايجرب الزيت ده

المشاركة الأصلية كتبت بواسطة محمد الجرجاوي

السيراتك جبتوا لواحد زميلي عربيتوا تويوتا 95 1500 خليجي وبيقول انه ادى الى تصارع رهيب للعربية مع الكيك داون ماشاء الله وصوت الموتور اهدى كتير عن الاول في التصارع

المشاركة الأصلية كتبت بواسطة yoko

الكاسترول عندي صوت العربيه أول ما أقرب من زون ال3000 أر بي إم صوت العربيه عالي جدا ومش مريح وسحب العربيه ضعف
فالفولين في عربيه صاحبي نفس مشكله الصوت بس السحب متأثرش
ليقوي في عربيه التالت الصوت تمام والسحب تمام

المشاركة الأصلية كتبت بواسطة elmanahry

اشكركم على اهتمامكم وسوف ابتدا الاول بغيار الزيت االشل الترا نزل من السيارة ماء اسود ورائحته شياط يعنى زيت محروق مع ان الزيت لم يكمل الفين كيلو وهذه الرائحة كنت اشمها وانا اقود السيارة مع الحرق على الغيار والميكانيكى عبر بالفاظ غير لائقة على الزيت وبعدها وضعت الزيت ال liqui moli الزيت مقفول باحكام والطباعة على العلبة استحالة تكون غير اوربى ومكتوب على العلبة made in gemany ومكتوب على ظهر العلبة باللغة الالمانية ولون الزيت اصفر فسفورى وغيرت فلتر الزيت لفلتر متسوبيشى مصنوع فى اليابان وبعد تدوير السيارة بدقيقة لم اسمع صوت الموتور على السيلانسيه وهذه اول مرة تحدث فى اى سيارة اقتنيتها اوقفت صوت الموتور واعدت تشغيل السيارة نفس انخفاض الصوت حتى تشعر ان السيارة غير دائرة جربت السيارة 25 كيلو لكنى شعرت ان الزيت فعلا لزوجته ثقيلة ولكن دوران الموتور انعم من سابقة جربت السيارة مساءا وغدا باذن الله سوف اخرج بالسيارة فى وقت الظهيرة ومعى شخصين فى السيارة وسوف احكم على الزيت وسوف اكتب عن تجربة الزيت فى اقصى ظروف التشغيل التكييف مع كيك داون مع حرارة الجو وللحديث بقية وشكرا جزيلا

المشاركة الأصلية كتبت بواسطة elmanahry

باشمهندس حسام عجبنى جدا تعليقاتك والاستاذ باسم وتحت امر الاستاذ ايهاب فى العنوان ورقم التليفون وسوف اكمل تجربة الزيت اليوم فى عز حر المنيا والقيادة لمدة ساعتين داخل وخارج المنيا ومشغل التكييف ومعى صديقين من الاحجام الكبيرة
الزيت جربته فى الاول مساءا وكان موطى صوت الموتور على السيلانسية اليوم كانت السيارة ولاول مرة لا يتاثر سحبها مع تشغيل التكييف بل تسير بنفس السرعة والتسارع عندما شغلت التكييف صحيح الصوت يعلى عند الكيك داون وهذا طبيعة الاوتوماتيك ولكن ليس ببشاعة الصوت الاول مع شل الترا وقت الظهيرة وفى وسط المدينة الدوس على دواسة البنزين يجعل السيارة تستجيب بسرعة تشعرك ان قدمك يجب ان تكون جاهزة للفرامل من قوة السحبة والاستجابة الزيت محترم جدا جدا وغير من اداء السيارة الى الافضل بطريقة ملحوظة جدا شعرت اليوم ان الزيت يصلح لسيارات الاشغال الشاقة ولى تعليق على الزيت اذا عشت وعملت خمسة الاف كيلو وشكرا لحسن اهتمامكم

المشاركة الأصلية كتبت بواسطة elmanahry

اذا كان مكتوب على الزيت انه 5w-40 فليست هذه الارقام تعنى انه يعمل فى rang حرارة من 5 درجات مئوية الى 40 درجة مئوية هذه معلومة غلط بل 5w تعنى انك تستطيع تشغيل السيارة فى درجة حرارة 30 مئوية تحت الصفر ورقم 40 او 50 معناها احتفاظ الزيت بلزوجته تحت اعلى درجات الحرارة التى تصل الى المئات من درجات الحرارة بسبب احتراق البنزين وهذا يوضح مايسمى بمقدرة صانع الزيت التخليقى بما يسمى wide rang of viscosity واذا دخلت على الرابط الذى وضعته سوف تجد ان الزيت الذى اخترته صالح لسيارتى وعندما اخترت فيات برافو تربو 120 حصان اعطانى الموقع نفس نوع الزيت وكتبت فيات برافو تيربو 150 حصان اعطانى نفس نوع الزيت وهو liqui moli high tech 4100 وهذا يعنى احتمال الزيت لاقصى ظروف التشغيل وهو السخونة والجهد الناتج من موتور تيربو
المهم هنا نوع الزيت ومدى جودته هناك زيت يتحمل الى فترة قصيرة ثم يحدث مايسمى it breaks down اى تلف الزيت بعد فترة قصيرة من التشغيل وهذا الزيت الذى ذكرته لو قرات عنه فعلا يستعمل فى اوربا لمدة 30 الف كيلو ويسمونه oil of the year اى الزيت التى تضعه فى السيارة وتنساه لمدة عام فكيف يكون انك قرات عنه وعرفت انه زيت اى كلام الزيت المانى وليس تعبئة اى دولة سوى المانيا ومكتوب على الجركن مصنوع فى المانيا وانت سيد العارفين ان الالمان لا يستخفون باى منتج لهم ثم ان هناك هيئات امريكية والمانية تختبر الزيوت المخلقة ولا تصرح بتداولها فى السوق الا بعد اختبارات عديدة وقاسية وهذا الزيت حاصل على كل علامات الاختبار وهو زيت معتمد لمرسيدس وبى ام والفولكس فاجن
اسم الهيئتين التى تختبر وتجيز لزوجة الزيت وهما
the society of automotive engineers (sae)
the american petroleum institute (api)
وبالمناسبة كلمة 5w حرف w لايعنى weight اى وزن بل تعنى winter start

المشاركة الأصلية كتبت بواسطة elmanahry

شكرا على الردود اللطفية واود ان استكمل موضع الزيوت لانتهى منه لان الموضوع طويل جدا ودراسة الزيوت تحتاج الى فترات طويلة من الدراسة ولكنى اورد هنا نوع الاختبارات التى تجريها هيئة api الامريكية للحكم على زيت السيارت
اول اختبار ويسمى thin film oxygen uptake test ويقيس مدى ثبات الزيت للاحتفاظ بالاوكسجين اللازم للاحترق
ثانى اختبار ويسمى
the high temperature high shear test وهذا الاختبار لمدى تحمل الزيت اقصى ظروف التشغيل وثبات لزوجته فى درجات الحرارة العالية
ثالث اختبار يسمى noack volatility test ويقيس كم التبخر فى الزيت وفقدانه فى ظروف قاسية او بعد مدة معينة
رابع اختبار ويسمى pour point وهو قدرة الزيت على التخلل لاجزاء الموتور عند تشغيل الموتور فى درجة حرارة منخفضة جدا تصل الى 30 درجة مئوية تحت الصفر

خامس اختبار للزيت ويسمى total base number ويقيس فائض القدرة القلوية للزيت بعد محاربته للاحماض التى تنتج بسبب ظروف التشغيل وهذه الاحماض تسبب تلف لاجزاء الموتور اى مقدرة الزيت ان يكون له alkalinity reserve
سادس اختبار ويسمى cold cranking simulator test وهو اختبار لتشغيل الزيت فى اقصى برودة واقصى حرارة
الاختبار السابع والاخير ويسمى the four ball wearing test وهو اختبار طريف اذ يربطون ثلاث كرات معدنية مع بعض ويضعون عليها الزيت ويضربوها بكرة رابعة دوارة ويقيسوا مدى حماية الزيت للثلاث كور من الكرة الرابعة ومدى الخدوش الناتجة عن اصطدام الكرة الدوارة
الطريف بعد كل الاختبارات وجدوا ان زيت amsoil الامريكى هو الاول على كل الزيوت ويستعمل هذا الزيت فى الطائرات النفاثة وفى السيارات واى زيت يتم انتاجه يجب ان يعدى كل الاختبارات السابقة وان كان لايوجد زيت سوف يعطى نتائج مثل هذا الزيت واذا كانت هيئة api اجازت زيت ال liqui moly فهذا يدل على ان الزيت ممتاز

المشاركة الأصلية كتبت بواسطة elmanahry

هذه الدراسة على النت تسمى the last combat between liqui moli and castrol

the last combat of liqui moly vs castrol

burn!
دى مقارنة عدد المرات
لللاحتراق وتحلل الزيت
عند اشعال النار بشكل مباشر للزيت فى اناء!حتى

shoot!فى بعض المحركات هناك رشاشات للزيت تحت البستم
مباشرة
كمحركات كامينز الديزل وبعض البركينز
ومحركات البنزين الرياضية السريعة الدوران
التى تصل
ل18000
rbm
فابلطبع يقزف الزيت كالطلقة ليواكب سرعة صعود
وهبوط البستم بالزات فى النقطة الميتة السفلى
hang!عندما يطحن عند
حدبات الكامة والكتاين الجنزير هذه درجة تحملة وكاءنه يشنق
drown!معدل تحلل جزيئات الزيت حتى صارت قاعدته الكيميائية
كالماءو فقد خواص الحماية

explode!
عند ملامسته لقاع البستم عند الانفجار داخل المحرك هذه
هى قدرة تحمله بالنسبة للنقطة الميتة العليا فى الشوط ستروك !
behead!
درجة تحمله للاحتكاك فى الجاب و الخلوص بين الشمبر والشميز فى الحيز الضيق الذى لا يتعدى مللى ميكرونات
استعنت بصديق مهندس صديق وارسل لى هذه التفسيرات يعنى فى النهاية زيت liqui moli يكسب

المشاركة الأصلية كتبت بواسطة blademaster

انا استعملت زيت لكوى مولى 5و40 فى عرابيتى نوعها فولكس جيتا . بصراحة الزيت رائع و قلل الاستهلاك .و ارخص من موبيل 1 كمان .
و جربت زيت super formula 20w50 فى عرابيت مراتى هيونداى ماتركس ... علشان موديلاها قديم بس فعلا احسن من الزيت الى كنت بستعملة و ارخص.
بجد انا بنصح الناس كلها انها تستعملة ....

المشاركة الأصلية كتبت بواسطة blademaster

انا فى واحد قالى انو استعمل منظف الريداتير من لكوى مولى و بعدها درجة حرارة العربية مش بتزيد عن 80 حتى لو درجة حرارة الجو عالية .... بس انا استعملت منظف المحرك بس ........
و معرفش اية تانى كويس ........ يا ريت لو حد جرب اضافات من لكوى مولى و فرقت فى العربية يقولى.............
وعايز اعرف شركة لكوى مولى فيها زيوت فرامل ولا لأ ؟
شكرا

المشاركة الأصلية كتبت بواسطة elmanahry

احمد باشا شكرا جزيلا على تشريفك للموضوع واضافة معلومات عالية عن زيت liqui moli الحقيقة سيادتك قدمت دراسة غنية عن الزيوت فى قسم النيسان ودعوت الاخوة الاعضاء فى موقع byd لقرائته وهذه المقالة دفعتنى للقراءة عن زيوت السيارات عبر النت والمصطلحات المختلفة التى لم اكن اعرف عنها شئ وبسبب ماحدث معى بعد صيانة ال 10 الاف ان التوكيل وضع لى زيت xhp الذى لم يتحمل ثلاث الاف كيلو وعرفت تلف الزيت من صوت الموتور واسرعت بتغييره بزيت اخر بعد ان وضعت engine flush لغسل الموتور لان الزيت نزل ماء اسود ووضعت زيت شيل الترا ولكن لم يتحمل بعض مشاويرى فى محافظة المنيا شهرى 7 و 8 وابتدات اشم رائحة شياط من السيارة وانا اقودها ركنت السيارة واسرعت فى البحث على النت واخترت زيت ال liqui moli بعد دراسة مستفيضة وبحث عن توكيل له فى مصر الى ان دلنى موقع alibaba على البريد الالكترونى للانسة ريهام وردت بعد اسبوع وفرحت جدا لوجود توكيل له بمصر يبيع العبوة ومكتوب عليها made in germany والموقع اختار لى زيت top tech 4100 5w-40 وبعد القراءة عن الزيت عرفت ان شركة liqui moli صنعت هذا الزيت مواكبة مع شركة بيجو التى ارادت ان تصنع مواتير خاصة وتحتاج الى زيت خاص يصل فيه العادم الخارج من السيارة الى اقل قيمة من الضرر للبيئة وقدمت شركة liqui moli هذا الزيت لشركة بيجو
اما عن اداء الزيت ال liqui moli فهو يمتاز بالنعومة والثبات فى الاداء سواء فى جو حار او فى جو اقل حرارة مساءا مثلا والسيارة تندفع وتتسارع مع تشغيل التكييف وصوت السيارة على السيلانسيه هادئ عن الاول بمراحل ومع الكيك داون السيارة تتسارع بدون time laps ولذلك اردت ان اعرف الزملاء على قسم ال byd على هذا الزيت
شكرا احمد باشا على المعلومات التى اضفتها سيادتك وتشريفك للموضوع

المشاركة الأصلية كتبت بواسطة blademaster

طبعا يا باشا لية وكيل فى مصر . انا اشتريت الزيت منهم . و بصراحة كويس اوى . انا مشيت بية 8000كم و لما كشفت علية لاقيتة كويس و ممكن اكمل بية .
انا مجربتش الانواع التانية . انا جربت لكوى مولى علشان كان فية اصحاب ليا جرابوة و قالولى انو فرق معاهم و كمان المانى فطبعا اكيد نظيف .

المشاركة الأصلية كتبت بواسطة elmanahry

طبعا قرات كل شئ بتمعن ويهمنى جدا ال technical data مثل ال viscosity index وال pour point ... الخ والزيوت متقاربة جدا فى القوة ولكن مايفرق فى الانتاجات الحديثة ال additives وهم فى ملف ال pdf لن يذكروا نوع الاضافات الاحدث لان هذه اسرار شركات والزيوت الذى تكرمت سيادتك بذكرها هى من انتاج يناير 2010 كما يذكر الرابط
http://www.lubromoly.com/liquimoly/web.nsf/id/li_domb829mmf.html

ولكن ياسيدى برغم انى اريد الاحدث الا ان هناك نقطة مهمة جدا عندى وهو الزيت الذى يتحمل الحرارة لان درجة حرارة المنيا وصلت الى الخمسين معظم الايام فى شهر يوليو واغسطس عندما دخلت على الموقع واختار لى زيت high tech 4100 كتبت نوع السيارة فيات برافو تربو 150 حصان ذكر لى الموقع نفس النوع اى ان الزيت له اعلى shear index ولكن طبعا الزيوت التى ذكرتها سيادتك احدث بنفس القوة يصير هناك اضافات جديدة ومفيدة يجب ان يعتد بها
واريد ان اعرف راى سيادتك فى الزيت liqui moli 10w-60 synthetic motor oil
هل هو الزيت الانسب للحرارة العالية جدا سالت هذا السؤال للاستاذة ريهام ولكنها قالت لى ان زيت leichtlauf high tech 5 w-40 يساوى هذا الزيت فى تحمل الحرارة اريد راى سيادتك

المشاركة الأصلية كتبت بواسطة blademaster

بص يا باشا ... انا اخويا عندة كورولا 2004 1600cc و جبتلة liqui moly اسمة leichtlauf high tech 5 w-40
فى الشركة قالولى ان الزيت دة لسة منزلش مصر علشان ال api : Sn و دة اعلى زيت فى مصر . هو لسة حطة من يومين . هسألة اية الأخبار و فرق معاة فى اية و هقولك .

المشاركة الأصلية كتبت بواسطة blademaster

بص يا باشا انا سألتة قالى انو حط الزيت بعد منظف المتور و حط منظف الحقن من عندهم بردة .
بس هو بيقولى ان العربية كانت بتقطع منة قبل كدة .فطبعا منظف الحقن الى جابوا عالج النقطة دى خالص . و منظف المتور بيقولى نزل حاجات ذى الفل طبعا فاهمنى يا باشا (عربية قديمة فالمتور كان مليان رواسب و غيرة ). و بالنسبة للزيت فرق معاة فى صوت المتور بقى اهدى كتير و استهلاك البنزين قل و سحب العربية بقى احسن بكتير .
و ربنا معاك ... اصل الموضوع دة محير اوى و الأتنين نزلوا فى نفس الوقت .

المشاركة الأصلية كتبت بواسطة elmanahry

ايهاب باشا اذا كان الزيت نفع فى المنيا فبالاولى فى القاهرة طوال النهار اشارات وتوقف فى الاشارة فى درجة حرارة عالية وتشغيل التكييف الموضوع حمل على الموتور والزيت بالاولى واذا كان الزيت يستعمل فى اوربا فهو ايضا يستعمل فى درجة حرارة تحت الصفر بل الزيت ال top tech تقدر تشغله فى 30 درجة تحت الصفر ولكن الرائع هنا فى الزيت انك ايضا تقدر تسير به فى درجة حرارة 50 فوق الصفر مع تشغييل التكييف والاجمل ان يسير بك الزيت ما يقارب ال 15 الف كيلو

المشاركة الأصلية كتبت بواسطة elmanahry

ولا تزعل ولا تحتار سيادتك ذكرت الزيوت الحديثة التى شرحها الاستاذ احمد منسق قسم نيسان انا اخترت زيت liqui moli لانه المانى ومعبا فى المانيا عملت به للان 2500 كيلو والزيت افضل من اى زيت استعملته فى السابق بمراحل بعد قراءة كل الصفحات التى كتبت على الزيت ال liqui moli زيت المانى تكنولوجى المانى زيت موصى باستعماله لمرسيدس والبى ام والفولكس والرينو صدقنى انا لم استعمل هذا الزيت الا بعد قراءة ايام واسابيع عن الزيت وذهبت للشركة فى القاهرة وتناقشت مع الالمان الذين اتوا لمصر لمتابعة منتجهم وذلك لمدة ساعة ونصف من الاسئلة الفنية والتقنية لانى مسؤل امام الله وامامكم عندما تكلمت عن هذا الزيت اعقلها وتوكل على احد المنديات الاجنبية احد اعضاء هذا المنتدى عجبنى تعبير عبر به بعد استعمال الزيت وكتب


after pouring it in, i noticed the immediate effect on the first start - upon ignition, the engine cranks to start smoother, and somehow a hair quieter. Subsequent test drives proved that the engine felt 'silky', and not so harsh even when i revved hard. Overall, i love the feeling. The car felt lighter to accelerate, and smoother when cruising. Since i travel the highway daily, i can consistently gauge any improvements on fuel economy. Overall, i get slightly better fuel economy

المشاركة الأصلية كتبت بواسطة elmanahry

ربنا يباركلك على زوقك وتواضعك ياباسم باشا صاحب الروح الجميلة والعقل الراجح
اما من ناحية الاسئلة فكانت عن--- هل من يستخدم زيوت ال liqui moli يحتاج الى اضافة anti friction وكانت الاجابة لا
السؤال الثانى هل هناك نية بعد انتشار الزيت فى مصر ان تكون العبوات تعبا فى مصر ولا سوف ترسلون الزيت معبا فى المانيا كما يباع الان وكانت الاجابة قاطعة ان الزيت سوف يستمر تسويقه فى مصر تعبئة المانيا وهذه النقطة كانت مهمة جدا بالنسبة لى
السؤال الثالث كانت على شكل طلب مهم قلت لهم يجب ان تصنع معاملكم formula مخصوصة لمصر بسبب الحرارة الشديدة التى ممكن ان تصل لاكثر من خمسين درجة مئوية ورد الرجل بمنتهى الكبرياء الالمانى وقال لى ان الزيوت التى انزلوها فى مصر تتحمل الحرارة اما قصة الاتربة فهى قصة تغيير فلتر زيت سالته هل تصنعون فلاتر الزيت ولكنه قال لى يجب على كل مستهلك للزيت ان يستعمل الفلتر ال oem اى الاصلى حسب نوع الموتور قال لى بمنتهى الكبرياء نحن نصنع زيوت خاصة بروسيا وتستعمل فى سيبريا وسمى الزيت 0w-20 ورجعت بالحاح اطالبه ب formula خاصة بمصر ولكنه اصر على ان الزيوت المتواجدة فى مصر ال 5w-40 هى زيوت مناسبة لحرارة مصر
المهم كنا اخر مجموعة يلتقوا بها والاسئلة التى تلقوها من الجميع جت على راس الانسة ريهام وعملوا سيمينار اليوم بعد التالى والمسكينة حضرت محاضرات لمدة ساعات للاجابة على اسئلة الحضور
حاولت اعرف من الانسة ريهام بماذا ادلى الالمان فى السيمنار قالت لى نقطة واحدة فقط ان الالمان قالوا لها انهم درسوا الزيوت فى مصر والزيت يتكون من مجموعة اولى لا تتحمل الحرارة ومجموعة ثانية لها معدل لزوجة ثابت وتتحمل الحرارة وثمن المجموعة الثانية اغلى وان هناك شركات يشترون المجموعة ويضعون عليها الاضافات additives الخاصة بهم ويعبوها للبيع للمستهلك ولكن الزيت ال liqui moli مصنع ومعبا فى المانيا يضعون فيه افضل شئ زائد اضافاتهم والاضافات ونسب خلطها بالزيت تعتبر اسرار شركات وتحت امر معاليك وسامحنى للاطالة

المشاركة الأصلية كتبت بواسطة walidadel

تم بحمد الله اضافة منظف الانجكشن اللي الاخ احمد مصطفي جابهولي ساعة المقابله الاخيره كاتكريم يشكر والله

هو من انتاج شركه ليكوا مولي الالمانية

اولا تم الاضافه مع التفويله عند اول طريق مصر اسكندريه الصحراوي الحموله انا و ابويا و امي و شنطتين (تعتبر حمزله كامله للعربيه)
الكاوتش مظبوط علي 36-33
لما البنزين مشي بقي حبه كده نقول لحد ماوصلت الماستر مثلا
السحب اختلف و الحمد لله عن الاول بكتير

الانطباعات بقي وانت لوحدك في العربيه و مشغل التكييف

* السحب وانت علي التاني مثلا و نازل من علي مطب صناعي فرقة في الطلعه
* الموتور صوته انخفض عن الاول بنسبه ملحوظه علي ار بي ام عالي 4 - 4.5 - 5
* العربيه بتسحب وانت مش واحد بالك من كتر ماهتزازا الموتور قلة علي الار بي الام العالي
* صوت الموتور انخفض انخفاض ملحوظ علي السرعات العاليه 150 علي ار بي ام 4
* استهلاك البنزين قل حاجه بسيطه او يمكن انا مش عارف احسبها لان المشي بتاعي فوق ال 120-130 علطول
* النقلات فى الغيارات بقة اخف مش عارف ازاى
* الاضافات دي عموما بتبقي للعربيات اللي عدة ال 100 الف كيلو متر علشان يبقي فيه فرق تحسه

المشاركة الأصلية كتبت بواسطة أبو عبدالله

انا بستخدم منتجات liqui mole من 2006
من ايام الفرسان ماركت كان بيجيبهم كلهم وكنت دائما لازم اجيب منظف الرشاشات من هناك واسبراي التزييت وغيرهم

ولكن للأسف بعد ما قفل مبقتش عارف الاقيه فين واقعدت ادور في كل حته ومحدش طبعا عارف حاجه
فأنا مجربه وعارفه

المشاركة الأصلية كتبت بواسطة sas5

اخى عصام السلام عليكم انا كنت عامل صيانه ال 15000 يوم 17 اغسطس وبغير الزيت كل 5000كم يعنى سوف يظل السيراتك لمده شهرين او اكثر فى الموتور

بس فيه شى غريب لاحظته يوم امس بعد ان اضفت السيراتك
وهو ان نسبه التسارع للسياره زادت ممكن يكون احساس خطا
بس انا حاسس انه بضغطه بسيطه على البنزين التسارع بتاع السياره اصبح اكثر من قبل
مش عارف هل هذا صحيح ام احساس خطا الله اعلم

المشاركة الأصلية كتبت بواسطة asemx1

لا هوا بالفعل صحيح الاحساس دا وانا صدقنى شديت مع عربيات كتير فعلا ماعادتش بتكسفنى خالص ودا واضح اساسا من استهلاك البنزين الى قل

ومع المده سيتم تغطيه المحرك باكمله بالسيراتك ( بياخد وقت ) وهتلاقى فرق شنيع لدرجه انى حاسس ان المكنه مفوته من كتر النعومه هههههههههههههههههههههه بس الى مطمنى ان السحب كل يوم بيعلى بصراحه تحفه وانا مش ندمان على الفلوس الى دفعتها فيها

وعايزك تقرا اكتر عن السيراتك انه بيحمى المحرك فى حاله لو وقع الزيت منه لمده 50 الف كيلو

وهتلاقى ورقه معاه استيكر كدا اكتب عليها فى الخانه الاولى عدد الكيلوهات الى انتا عاملها والخانه التانيه اجمع 50 الف كيلو علي الكيلوهات دى

وتحياتى لك والف مبروووك

ودا فيديو بيوضحلك ايه فوايده
ceratec - youtube
هوا باللغه الحلبتنشيه بس هتفهم بالرسوماه

المشاركة الأصلية كتبت بواسطة asemx1

امبارح كنت متضايق حبه من حوار كدا ( ادعولى بقى الحسد يروح )

فقولت اروح اقعد مع ا/ احمد واسهر معاه كدا واغوص فى منتجات ليكوى مولى

وبعدين قالى ان فى واحد اسمه ا/ مصطفى معاه ماتسوبيشى سوبر اكشن

قام ا/ احمد كلمه وقام مكلمنى

جرب منظف الانجيكشن وقالى روووووووووووووعه وقال ان استهلاك البنزين قل جدااااااااا جدااا ودا سحر

وقام مغير زيت جركن ليكوي مولى 5w-30 واتبسط منه جدا

وبصراحه راجل محترم جدا وانا بشكره على ثقته فيا وتجربته للمنتجات دى

وبعدين فى نهايه القعده معاه لقيت منتج بيتضاف للفتيس الاوتوماتيك ومكتوب عليه انه بيقلل الصوت الفتيس وبيشيل الاحتكاك وبيعالج الفتيس من النقر والنتش وبيعالج لو فى تسرب او الزيت بتاع الفتيس بينقص لو فى جوان بيسرب ولا حاجه

قولت اما اجربه

حطيته عندى قبل ما امشى على الساعه 1 وسلمت عليه ومشيت

النتيجه :

انا لو قعدت اقولكم تحفه للصبح مش هيكفى صوت الفتيس انعدم خاااااااااالص السحب زاد جداااااااا
معدش فى نتش فى الغيارات وكمان مكتوب ان عمر الزيت بيطول جدا 100 الف كيلو

من الاخر صوت الماتور انعدم بسبب السيراتك وصوت الفتيس انعدم ( كنت بحس بصوت التروس على الاول ) ودا طبيعى فى اى عربيه حتى لو زيرو

لقيت المشكله دلوقتى المزعجه صوت العجل على الطريق يااااااااارب ليكوى مولى ينزل حل للحوار دا ههههههههههههههههههههههه

بجد والله عن تجربه تحفه من التحف للفتيس الاوتوماتيك وعنده كمان اضافه للفتيس المانيوال علشان الناس ماتزعلش

محلوظه مهمه :

لا يصلح لفتيس cvt الى زي بتاع السوبر اكشن وزى بتاع الهوندا سيفك الجديده ( فى زيت مخصص ليه بس تقريبا مش موجود عنده )

المهم من انبهارى روحت ووالدى ركب العربيه تانى يوم بدون ما اقوله على الاضافه دى قالى انه ملاحظ نعومه اوى وصوت المحرك ماعدش باين والى مضايقه صوت العجل ( احتكاك العجل بالارض ) هههههههههههه

دا شكل العبوه
نتيجة بحث google عن الصور حول http://ecx.images-amazon.com/images/i/31ukfrlj7ql._sl500_aa300_.jpg

وكان تمنه 70 جنيه وبيتضاف على مقياس الزيت بتاع الفتيس العبوه كلها

تحياتى لكم وان شاء الله هجيبلكم كل جديد ادعولى بالتوفيق

م/ عاصم جاد

المشاركة الأصلية كتبت بواسطة mazagngi2010

انا بحط ليكيو مولى الازرق ابو 112 جنيه مناسب للعربيه وظابطها تمام التمام وبغيره من 4,5 الى 5 الاف كيلو
هو اغلى من التعاون الازرق (الضعف تقريبا) بس معدله برضه الضعف وفوق كده اداء ممتاز عن التعاون

المشاركة الأصلية كتبت بواسطة askafrawy

مبدئيا مش هقدر اقيم الزيت حاليا لكن انا جربت العربية على طريق اسكندرية بورسعيد الساحلى بعد تغيير الزيت والفلتر ووضع عبوة سيراتك على الزيت والملاحظ حتى الان
1- صوت الموتور اهدى لان مع شل وكاسترول كان على سرعه 140 كم/ساعة صوت الموتور بيبقى عالى شوية
2-تسارع العربية احسن كتير والاستجابة اعلى من الاول
دة لاحظته مبدئيا واعتقد ان مش هقدر اقيم الزيت الا بعد كام سفرية بالعربية وخصوصا ان كل مشاويري سفر.

المشاركة الأصلية كتبت بواسطة superreham2011

علميا هناك بالفعل عملية التصاق بين جزيئات السيراتك والاجزاء المعدنية للمحرك ، فهناك ما يسمىchemisorption او ما يسمى بعملية الامتزاز الكميائيه ( و ليس الامتصاص ) وفيه يتم عملية الالتصاق عن طريق الروابط الكميائيه بين الاضافات و السطح المعدنى و هناك ايضا ما يسمى عملية phyisorption او مايسمى بعملية الامتزاز الفيزيائيه و فيه تتم عملية الالتصاق عن طريق قوى فاندرفالز او القوى الكهروستاتيكيه .
بالنسبه لمنتج السيراتك فأنه يحتوى على جزيئات من السيراميك فائق الدقه ( اقل من 50 ميكرون ) هذه الجزيئات تقوم بعملية الالتصاق بالسطح المعدنى للمحرك ( الامتزاز الفيزيائى ) ( اى انها تعمل مثل المغناطيس ) كما انه يحتوى على مركبات كميائيه نشطه تكون روابط كميائيه بينها و بين السطح المعدنى للمحرك ( عملية الامتزاز الكميائى )
و لذلك يتم حماية المحرك عن طريق استخدام سيراتك على المستويين الكميائي و الفزيائى مما يقلل عملية الاحتكاك للحد الادنى

المشاركة الأصلية كتبت بواسطة asemx1

ان جيت للحق انا لا بعترف بتسويق ولا بعترف بكلام حد

انا اعمل سيرش على النت وعلى الكتب ومن هنا اجيب نتائجى
وبصراحه انا كنت شوفت فيديو على اليو تيوب بس الكلام دا من 3 سنين على السيراتك
ان واحد قام جايب جهاز كدا بيقيس الاحتكاك على عمود بيدور
وقام مجرب الجهاز على الناشف العامود اتحك والماتور وقف
قام مجربه على زيت عربيات قام قايس 300 كيلو اقصى حمل وقام الجهاز واقف
قام مجرب السيراتك مع الزيت قاس 1300 كيلو والجهاز ماوقفش لانه جاب اخره
وقام مجرب السيراتك لواحده برضو قاس 1300 كيلو والجهاز برضو ما وقفش
ومن هنا انا اقتنعت بيه من 3 سنين ولما درست النانو تكنولوجى استنتجت انه شغال بالنانوتكنولوجى وبالفعل لقيت مكتوب فى الكاتالوج بتاع السيراتك انه نظريته بالنانو تكنولوجى

المشاركة الأصلية كتبت بواسطة flyermoustafa

السلام عليكم ورحمه الله وبركاته

الزيت مشيت بيه حوالى 2500 كيلو وبصراحه ما شاء الله مخلى عربيتى الكارينز انعم مليون مره من الزيت اللى كان جاى فيها وابتديت احس ان استهلاك العربيه للبنزين اتحسن كتير برضه

مجمل القول انى حسيت ان العربيه بقت احسن كتييير عن الاول بس مظهرش الفرق ده غير بعد ما مشيت حوالى 1000 كيلو على الزيت ده

الزيت لونه فسفورى وله ريحه كويسه يعنى دول حاجتين يخلوك تقدر تفرق ما بين الاصلى والمضروب لاقدر الله فى حاله وجوده لما يثبت نجاحه

اللى بيستوردو الزيت هما 4 فى مصر واحد فى القاهره اللى محطوط رقم تليفونه

وواحد فى الزقازيق ( اللى انا جبت منه ) وواحد فى المنصوره الراجل بتاع الزقازيق قالى ان اللى فى المنصوره هو ابن الشيخ متولى الشعراوى الله يرحمه

دى صوره الزيت اللى انا حطيته حطيت نفس الرقم اللى موجود على الموبيل وان ( w5-50 )





سعر الجركن كان تقريبا 248 جنيه مش فاكر بصراحه


مجمل القول انا متوقع بصراحه ان الزيت ده هياخد مكانته فى مصر فى خلال سنه

وبرضه فى منتجات كتير للشركه دى للعنايه باجزاء العربيه ( الميكانيكا ) زيوت واضافات للسوائل بس بصراحه اسعارها غاليه

ياريت برضه اللى جربه يقول رأيه

المشاركة الأصلية كتبت بواسطة flyermoustafa

مقدرش اقولك انه احلى غير بعد ما اغير الزيت

بس هو فى اول 3000 كيلو ممتاز

كمان ده سعره اقل من الموبيل والكاسترول وبيمشى اكتر من الموبيل وهو الزيت رقم واحد فى المانيا ومعروف فى الخليج

اعتقد انه هيكون واعد جدا فى السوق المصرى

المشاركة الأصلية كتبت بواسطة flyermoustafa

الزيت اكتر من ممتاز بعد 7000 كيلو ولا يزال تحت التجربه لحد ما يجيب اخره

المشاركة الأصلية كتبت بواسطة arabino

الله الوكيل الزيت دا تحفه فنيه بجد العربيه سحبها زاد جداااااااااااا و جبت بيه 180 ثابت بدون حرق عالعربيه و صراحه الزيت تحفه و المكنه حسسها صوتها اقل و انعم من ناحيه استهلاك البنزين لسه معرفش عشان انا لسه حطه امبارح و بعدين كفايه ان كل الزيوت بقه تعبانه و مصري دا العلبه اصلا متبرشمه برشمه السنين الراجل زهق علما فتحها هههههههههه و الناس كلها ف التوكيل عماله تقولى ايه دا يا باشا لونه اخضر كدا ليه اقولهم اصله زيت قليه واللى اقوله دا ميه خضرا احسن للموتور هههههههههههههه

المشاركة الأصلية كتبت بواسطة mazagngi2010

انا عامل بيه 1500 كيلو لحد دلوقتى فى المازدا وبسم الله ماشاء الله العربيه نعمت جدا وسحبها فارق
وناوى اغيره كمان لما اعمل بيه 2500 كمان
انا حاطط الازرق (ارخصهم)

تحياتى
اخوكم فى الله

احمد مصطفى
منسق قسم نيسان