الموضوع: مشوار إصلاح سيارتى بالأسعار

أولاً كل عام و أخواتنا المسلمين بألف خير و ربنا يعيد العيد على العالم كله بألف خير و صحة و سلام.
طبعاً أجازة العيد خلاص على الأبواب إن مكانش فيه ناس بدأو بها فعلاً و طبعاً أنا من بكرة أجازة و لأنى مستغل قررت أستغل فرصة أجازة العيد و نسافر شرم الشيخ بالرغم من أنى الاجازة عندى 3 أيام فقط و المشوار كبير لكن مش مشكلة أهو نغير جو المهم نزلت من 4 أيام أودى العربية للميكانيكى عشان يشيك عليها و أبقى مطمن و خاصة عامود الكردان و فوجئت بأنى العربية أصلاً مش بتدور جبت الميكانيكى تحت البيت و قالى طرمبة البنزين مش بتضخ بنزين و راح ساحب بنزين ببقه و بخ فى الكربراتير و وراح موصل الخرطوم تانى و دورنا العربية دارت و وصلنا الورشة و فكينا الطرمبة و جبت طرمبة جديدة (حكتب الأسعار كلها تحت بعض فى الآخر) راح و هو بيركب سمعت حاجة قال طك اتارى البيه الصنايعى اللى عنده كسر فبرة الزغاد بتاع طلمبة البنزين و رحت جبت فبرة بالزغاد بكله و ركبنا تانى و بالمرة جبت فلتر بنزين و تمام الحمد لله.
فكينا الكربراتير و نضفناه و كان فيه بلاوووووووى و ركبنا و كله تمام.

نزلنا تحت عشان عامود الكردان (الذل بعينه) فك العامود و قال لى هات لى صلايب رحت جبت صلايب صينى للأسف و طلعت بايظة مع انه قال لى تمام و كرسى نص روسى و (قال لى فى كمان خرطوم البنزين اللى جايب من التنك مقطوع أغيره قلتله غير طبعاً و غيرناه) و قال لى يالا اطلع جرب و يارتنى ما طلعت العربية لحد 40 / 50 كيلو تمام بعد كدة تحس انى حد ماسك فى بطن العربية و نازل فيها شلاليت دبدبة رهيبة من تحت رجعت له قال لى لا كدة روح لبتاع الكرادين قل له الكردان عندى فيه رفه و هياخد منك 25 جنيه كل ده كلام ابن عم حديث هو عارف و متأكد من أنى الصلايب اللى هو شكر لى فيها بايظة.
ماشى رحت لبتاع الكرادين فكيت الصلايب القديمة (قصدى الجديدة) اللى لسه راكبة و معداش عليها 24 ساعة فى العربية و حطيت جديد يابانى و قعد يظبط رفة الكردان مش اقل من ساعة و الحمد لله ركب و تمام بس كل اللى غايظنى و حارق دمى و عايز اسيح دمه الراجل اللى باع لى الصلايب المعفنة و يقولى دى تمام و اللى حارق دمى اكتر الميكانيكى اللى عك فى الكردان و هو مالوش فيه.

و رجعت تانى للميكانيكى عشان فيه صوت فى المقص اليمين قدام و فعلا طلع لحامه فك و عايز لحام و اتلحم و رجع احسن من الاول لانه لحم من جوة و برة.
و كمان حسيت انى فيه بلية خشنة و فعلا البلية اليمين ورا و ركبت و الحمد لله بدون مشاكل.

الأسعار:-
طلمبة بنزين 75.00 جنيه أخدتها بـ 70.00 أعتقد روسى
سبراى تنظيف كربراتير 20.00
فلتر بنزين 4.00 أوكرانى
جوانات كربراتير 3 جوانات 10.00
فبرة زغاد بالزغاد لطلمبة البنزين 20.00
ضبط رفة الكردان (على مسؤولية عم سعيد الميكانيكى) 25.00 بس انا زى ما قريتم فوق موضوعى مختلف و الكرادن طلع عينه فأخد منى مصنعية 45.00
صلايب عامود كردان صينى زبالة 20.00 * 2 = 40.00
صلايب عامود كردان يابانى نضيفة 55.00 اخدتهم بــ 50.00 يعنى لو كنت جبتهم من الاول بــ10 جنيه زيادة كنت ارتحت و وفرت بس الحمد لله على كل حال.
كرسى نص روسى 45.00
بلية أكس إيطالى 30.00
تفوير بلية الأكس عند الخراط 20.00
لحام مقص 10.00
فلتر هواء مصرى بس بصراحة نضيف 10.00
سير دينامو (إحتياطى) 12.00 كورى

مقص فوق 75.00 و تحت 100.00 أو العكس مش فاكر بالظبط لأنى محتجتهمش و الحمد لله.

و طبعاً بعد الأسعار و المصنعيات دى كنت حالتى:-



الدروس المستفادة بالنسبة لى:
1- متسترخصش قطع الغيار و خاصة لو كانت قطع غيار حساسة زى الصلايب و أجزاء آلات الجر و الموتور و اللذى منه.
2- الميكانيكى مش بيعرف يعمل كل حاجة فى العربية و اللى يقولك كدة كداااااااااااب و لو أنى كتير منهم بيقولوا كدة.
3- اللى قبلنا قالوا أدى العيش لخبازه و لو أكل نصه و أنا مكنتش أعرف أنى عم الكردان له خباز و صنايعى مخصوص و إلا كنت رحت له لكن اتضح انى فى صنايعى كردان و صنايعى كرونة و صنايعى فتيس كمان.
4- حاول تتفق مع بتاع قطع الغيار انى لو حصل حاجة فلوسك ترجع لك.
5- أوعوا تحاولوا لزق فبرة الزغاد بتاعة الطلمبة بعد كسرها لأنها عادة ما تفشل و خاصة لو كنت مسافر زى حالاتى.

و الحمد لله ظبطنا الكلام و ربطنا العفشة و قفلنا و حتكل على الله من القاهرة على الساعة 1 - 2 صباحاً إنشاء الله و أدعولنا نروح و نيجى بالسلامة و لو افتكرت حاجة حبقى اكتبهلكم.

و أجازة سعيدة للجميع و آسف لعدم وجود صور لأنى مكنتش شايف قدامى اصلاً و آسف لطول الموضوع بس حسيت أنى عايز أفيد كل الناس عشان ميحصلش معاهم زى ما حصل معايا.