زي ما كتير منكوا عارف انا باشتغل في شركة Recruitment توظيف و عملائنا شركات في كتير منها مالتيوناشيونال و إنترناشيونال، طبعا احنا بنحاول على أد ما نقدر نجيب للعميل candidates مرشحين للوظيفة مطابقين للشروط اللي هو حاططها.

من فترة غير قصيرة انتشرت ظاهرة ان الشركة الفلانية المدير فيها عايز سكرتيرة غير محجبة أو موظفة إستقبال غير محجبة و ده بقاله كتير، اما الجديد بأه هو الشركات الكبيرة اللي الحجاب أصلا ما بقاش شئ مرحب بيه فيها و منها الشركات الخليجية الكبيرة اللي جاءت إلى مصر مؤخرا.. الأول كانوا بيقولوا لنا يفضل غير محجبة.. و طبعا احنا بنبعت الqaualified بغض النظر عن اللبس، بس لقينا انهم بيختاروا يقابلوا الغير محجبات و يرفضوا المحجبات

المشكلة دلوقتي فعلا ان فيه بعض الشركات دي يكاد يكون شرط عدم الحجاب ده مطبق على وظايف تانية مالهاش دعوة بالسكرتارية و لا الظهور قدام الناس، بس اهو مش عايزين محجبات في شركاتهم و خلاص

الملفت للنظر بأه هو ان الشركات اللي بتطلب كده بتبقى غالبا بيديرها عرب.. و مفروغ منه طبعا انهم بيكونوا مسلمين

طبعا شئ في منتهى السخافة ان الواحد بيبقى بيدور على حد كويس لوظيفة و ألاقيني مضطرة أقول للسكرتيرة اللي هاتكلم الناس اسأليها في التليفون انتي محجبة و لا لأ