الموضوع: رابطة الوحوش ملاك السيفيا (ج2)

المشاركة الأصلية كتبت بواسطة max_ziro

انا هاجى معاكو
رغم انكم مش جدعان
بس اهو
انا محتاج جورج

يا باشا تنورنا
أنا بقول احنا نخلى الجمعة اللى جاية مقابلة للسيفياوية أهو منها نتقابل ومنها فرصة للى عايز يكشف على حاجة ومنها نخلى جورج يشوف عزوتنا

المشاركة الأصلية كتبت بواسطة المناور

اليكم ما حدث
قابلت عصام الساعة 11:30 والجو كان شكله مش عاطفى واتحركنا على جورج وصلنا لقيناه واقف فى ورشته شوية سلامات وكده ويلا يا جورج جرب العربية ركب ومشى بالعربية ومن غير ما يبص عليها قبل كده لقيته بيقولى وهو ماشى بالعربية انت عندك مشكلة فى الكاوتش ؟ قلتله اه عندى 3 فرد ممسوحين ونقشاتهم مختلفة عن بعض قالى أنا مش حاعرف اشتغل فى عريبتك ولا اعمل أى حاجة لان اللى حاشوفه حايبقى خداع لازم تغير الكاوتش على الاقل الاتنين اللى قدام ويكونوا نفس النقشة .... أنا بصراحة استغربت ايه علاقة السيور والفلاتر بالكاوتش واتكلمنا معاه ان الميزانية مضروبة وموضوع الكاوتش ده لسه عليه بتاع شهرين أو ثلاثة كمان والراجل بصراحة قعد يشرحلنا المهم لما لقيناه مصمم عصام اقترح انى اخد فردتين عنده قدام نفس النقشة وكمان حالتهم افضل من اللى عندى وبالمرة اجيب الاسكاترا لانه بص عليها وقالى المفروض ماسيبهاش كده

اتحركنا فى طريقنا إلى القناطر والجو بقى اسوأ من الأول عفرة حاجة مفيش بعد كده وأنا وعصام سفينا شوية تراب لما قلنا يا بس .... وصلنا القناطر وشوفت جراج عصام ولاول وهلة تحس انك داخل محل قطع غيار استيراد كاوتشات على مساعدين على سماعات على سيور على زيوت كل اللى نفسك فيه حتلاقيه ..... بصينا على الكاوتشات واستنضفنا اتنين نفس النقشة نسيت اقولكم ان عصام سابلى المهمة دى اصله طلع بيخاف من العناكب وجبنا كمان الاسكاترة بتاعته .... وبدأت رحلة العودة وعصام استغل الفرصة دى عشان يعرفنى بالاماكن التاريخية فى القناطر زى عزبة أبو الغيط اللى فيها اشهر تجار المخدرات والسلاح والانفاق اللى كل يومين تحصل فيها حادثة

رجعنا لجورج بص على الكاوتشين وقالنا مناسبين للتجربة طلعنا على بتاع كاوتش يركبهم أول ما جيه يفك كان معاه مسدس بيفك الصواميل بس لقينا المسدس عمال يفوت فى صواميل الفردة الشمال ومش عارف يفك بيه كويس واضطر يفك بالمفتاح زائد ان كان راكب 3 صواميل بس ..... سيبته فى عناء فك الكاوتشات وتبديلها وروحت اشتريت صامولتين ب 8 جنيه واحدة علشان اللى ناقصة والتانية احتياطى عقبال ما رجعت عرفت ان فى صواميل منحولة فين وفين عقبال ما عرفنا نركب صواميل العجل .... خلصنا واتحركنا لجورج تانى مفيش كام متر وسمعنا صوت من ناحية العجل الشمال كان فردة الكاوتش نايمة بصينا مفيش أى حاجة روحنا لجورج جربها وقالنا مسامير العجل مش هى بتاعة العربية والصواميل حالتهاوحشة طيب ايه الحل قال هاتولى طقم المسامير والصواميل وحاتسيبوا العربية هنا مش حاينفع تمشوا بيها كده وممكن كمان تبات وما تخافش يا بيه المنطقة هنا امان هو يادوب خلص الكلمة من هنا قامت خناقة فى الشارع وطلعت السنج والمطاوى وحدف طوب وحاجة اخر جمال طبعا هو شاف المنظر ده قالنا طيب انتم تروحوا تجيبوا الحاجة وتمشوا على مهلكم جدا اتحركنا وكانت اقصى سرعة 20 كيلو لأن اكتر من كده العربية كان بتترج .... وبكمالة الموضوع المطر بدأ ينزل علينا وفضلنا ماشيين كده لغاية اما قربنا من روكسى لقينا وضع الكاوتش بقى اسوأ فركنا العربية وعصام نزل يأكد على الصواميل ويجرب يفك من هنا ونركب من هنا لغاية اما اطمنا شوية وخلال ده كنا استحمينا من المطرة والارض اتحولت لوحل

وصلنا للجندى فى شارع دمشق جيبنا 4 مسامير و4 صواميل اصلى ب 80 جنيه وبدأنا فى رحلة العودة لجورج فلقينا موزع ليكوى مولى فعصام سأل عن الزيت بتاعهم وأنا جيبت منظف الانجيكشن ب 35 جنيه ورجعنا لجورج تانى بعد لفة طويلة عريضة وعصام بيه المرشد بتاع الطريق مشانى اكتر من 3 مرات اتجاه معاكس عقبال ما رجعنا الخناقة كانت هديت والوضع بقى مستقر طبعا كان اليوم انضرب ومش حاينفع يتعمل غير قصة المسامير بس فظبطت معاه يوم الجمعة اللى بعدها علشان اعمل اللى ما اتعملش ويوم تانى لطقم اصلاح الاسكاترة .

وبدأ شغل فى تغيير المسامير وهو فى نص الشغل قامت الخناقة تانى وطلعت السنج والمطاوى ورجع اللبش من جديد وجورج اتلبش وفضل يشتم فى المنطقة واحنا كل ده عمالين نضحك على جورج وكلمته ماتخافش يا بيه المنطقة هنا امان ... المهم خلص الشغل وروحت محاسبه وطيران طلعنا من المنطقة واحنا بنحمد ربنا اننا سلام

وبكده انتهى اليوم الغريب ده بس بجد كان ضحك السنين

هو لسه عينه محمرة من طلقة الخرطوش اللى خدها فى خناقة اللى حصلت فى المنطقة عنده ؟؟

المشاركة الأصلية كتبت بواسطة ahmed_ramadan

هو لسه عينه محمرة من طلقة الخرطوش اللى خدها فى خناقة اللى حصلت فى المنطقة عنده ؟؟

هو قالنا على الطلقة اللى جت فيه من خناقة بس ما كنتش اعرف انها فى عينه .... وهو على فكرة لسه فاكرك بموضوع الرماية لما كنا بنتكلم عن الرابطة وناسها