...شوية كلام...

**A7MED_PHARMA** · 20-11-2011 10:12 PM

المشاركة الأصلية كتبت بواسطة ss

اعتقد ان اللى تاعبك مش كلام الناس فى حد ذاته ... اللى تاعبك فكرة انك تتظلم بدون سبب

مش مهم الظلم ده شكله ايه او حجمه...لكن هو فى النهاية ظلم من ناس ما اذيتهاش فى حاجة ...ده اذا ماكنتش خدمتها

يعنى مش القضية انه شخص بيتكلم عليك ...و لا عملك حاجة فى عربيتك و لا خد دواء و مدفعش فلوسه

الفكرة فى النهاية انه شخص بيجور عليك حتى لو فى حاجة هايفة.....

و اللى بيتعبك اكتر انه انت ما بتقدرش تاخد حقك او ترد الاساءة....

مش علشان مش هاتقدر تعمل فيهم انيل من اللى بيعملوه.....

و لكن عشان مش ها تعرف تعيش بنفس المنهج اللى هما عايشين بيه

فانت ما بين نارين....لا قادر تتقبل الناس و بلاويها و عمايلها.....و لا قادر تتحول و تبقى زيهم

عايز اقولك بس بما انك قولت انك عارف اخرتها ايه و مهما عملت و و وصلت و...و....فانت هتسيب كله فى الاخر

قبل ما تعمل حاجة لحد اقف لحظة و اتأكد ان نيتك لربنا ...عشان لو طلع كويس و بيقدر خير و بركة

لو ما طلعش ...برده خير و بركة....لأنك عارف و متأكد انك ما عملتهاش هدر ..فاكيد مش هاتزعل

ده يمكن تلاقى شخص جايلك ...و عارف انه (....) و جاى لمصلحته..و ....و ....و ...و تبقى بينك و بين

بتضحك على لفه و دورانه فى طلب مصلحته....زى الاخ اللى بيعزمك ع الفرح كده

و تلاقى نفسك بتعمله اللى هو عايزه....و انت قصدك بيها ربنا..ع الرغم ان الشخص نفسه مايلزمكش بتلاتة تعريفة

بس طبعاً ده مش معناه انها تبقى تكية لكل من هب و دب

بس يمكن لو اكدت ع نفسك فى موضوع النية ...... يمكن يخفف عنك شوية

لكن فى رأيى " لو انا كنت فهمتك صح" مش هتسريتح تماماً ...طول ما انت عايش فى السيرك

لا عارف تسلم من الى فيه و لا عارف تبقى زيهم و تتعايش...و لا عارف تتقبل الوضع كما هو عليه

اتمنى تكون فهمت الهذى اللى انا بقوله .....عشان انا نفسى مش فاهمه!!

و أسف ع الاطالة يا دوك .....

الاقيش عندك حاجة للمغص ينوبك فيه ثواب؟؟!

إنت فاهمني تمام تمــــــــام
بص
أنا عمري ماعملت حاجة علشان الناس تقول إني عملت
يعني لما واحد ماعرفوش أوصله في سكتي بالليل مثلا...ده هيفدني بإيه ؟؟
مش هيفدني بحاجة .. لربنا ولأخرتنا .. ومن غير تعب ولامجهود إضافي
لما واحد ماعرفوش .. وأنا عارف إنه زبالة ومعفن وبينا مشاكل قبل كده وأنه عمري ماهيقول في حقي كلمة حلوة , لما تجيلي علشان أركب محلول لوالدتها بالليل (أنا حكيت القصة دي قبل كده) , ولما ركبت المحلول , قالتلي إتفضل من غير مطرود
يعني روحت له البيت وإحنا متخانقين قبل كده بسبب الشكك
روحت لربنا .. ولحياة إنسان ممكن ربنا يجعلني سبب في إنقاذه
وفي الأخر إنطردت من البيت

تخيل شعورك إيه؟؟؟؟؟

**shaddadfalcon1** · 20-11-2011 10:19 PM

ده طبع الفلاحين وطول مانت عايش في ارياف هتفضل كده طول عمرك
انا كنت زيك بالظبط بس انا كنت بضطر احرم نفسي من كل حاجه حلوه عشان محدش ينق
كنت لما اروح انا ومراتي لاهلها نسهر عندهم الاقي الناس عماله تقولي خير رايح فين وتاني يوم لامي يسالوها برده ولو شاري حاجه يفضلو يبحلقو فيها ويقولوك اتفضل باللي معاك
ولو زهقت واتمشيت شويه في الارض يقولك ده فاكر نفسه ماشي علي الكورنيش
ولو اتكملت بنضافه شويه مش بالطريقه الحلوفه اياها يقولك ده بيستعر من اهله

كل ده انتهي بقرار حازم اني اسيب البلد للأبد وبروح يوم الجمعه اشم هواء نضيف واشوف اهلي وشكرا

انت بقي عايش لوحدك وفي الأرياف يبقي انت اللي جايبه لنفسك يادوك

**Donzi** · 20-11-2011 10:23 PM

لاحظ يا احمد ان انت في مكان ريفي و هي دي طبيعة الناس في الارياف بيبصوا لاي حاجة و لاي حد و بيحبوا الكلام بالعاطل و الباطل

يعني المشكلة مش فيك و لكن دي طبيعة المجتمع اللي انت متواجد فيه

**A7MED_PHARMA** · 20-11-2011 10:59 PM

القصة بإختصار
والدي من الشرقية .. إتجوز وأخد مراته وإشتغل في كفرالشيخ
أنا طلعت للدنيا هناك
كفرالشيخ للي مايعرفهاش .. من أجمل بلاد مصر بدون مبالغة
بينك وبين مصيف بلطيم ساعة بالعربية .. مصيف خرافي
بينك وبين الطريق الدولي ساعة .. ومنها تطلع إسكندرية , أو العريش أو أي مكان براحتك في أقل وقت
المحافظة كلها مساحات خضراااا مع الإحتفاظ بطابع المدن أكتر من طابع الريف
أنا كنت عايش في ميدنة سكنية تابعة لشركة الدلتا للسكر ...أكبر شركة مصنعة لسكر البنجر في الشرق الأوسط
تخيلوا

عمارات أقفية (يعني الشقق مش فوق بعضها ..الشقق جمب بعضها)
حمامات سباحة+صالات جيم+ملاعب خماسية وطايرة +قاعتين إسكواش+ملاعب كرة قدم بالحجم الطبيعي
باصات
رحلات للعاملين بالشركة
غاز طبيعي لحد البيت
جراج تحت كل عمارة بمساحة العمارة نفسها
جدار عالي بيعزل المدينة دي عما حولها .. طانت وسط المساحات الخضرا
أفراد أمن مسلحين وغير مسلحين
ماحصلش فيها حادثة سرقة واحدة طول الــ 24 سنة إلي عشتهم فيها
تسيب عربيتك مفتوحة(بدون مبالغة) وتطلع تنام وإنت مطمن
مساحات خضرااااا وجناين بين العمارات .. ناس راقية .. الكل ماديا مرتاح وصعب تلاقي حد ماكنش راكب عربية
أقل واحد في التجمع السكني ده التابع للعاملين بالشركة كان معاه تويوتا 94 ..أقل واحد
باصات مجانية للمدن المحيطة , كل نص ساعة رايح جاي
رحلات لبورسعيد والمصايف وأليكس .. وكلها بأجر رمزي جنيه لكل فرد
العيش كان بييجي لحد البيت بإشتراك رمزي كل شهر .... جنيه واحد
حفلات ترفيهية في المناسبات والأعياد وأول كل شهر
قاعة سينما .. وقاعة أفراااااااااح مهولة
مهما أوصف مش هتتخيلوا
والأهم
الناس كانت في حالها كده ... أصحاب وحبايب بدون حقد ولا غل

أنا كنت عايش في جنة
العربية كانت بتتغسل كل شهر مرة .. وعمري ماغسلت الصالون بتاعها وهي هناك وأحلف على كده
هنا بقا
كان لازم نرجع للجذور .. لما الحج قرب يطلع معاش
طلبت منه نعيش في أي مدينة .. ولو في الشرقية ,يبقا في الزقازيق المدينة ع الأقل
لا
بنى البيت وكلفه مايقارب الــ 400 الف
ودفسنا فيه
هو من حقه يعيش حياته مكان مايحب
لكن أنا ماقدرش

العربية بتتغسل في الاسبوع مرتين..والصالون بغسله يوم ويوم
الناس وحشة جدااااا
وكل إلي إنتوا عارفينه
تخيلوا

يعني كنت عايش في أرقى مكان حد ممكن يعيش فيه .. وفجأة ألاقي نفسي في بيئة غريبة عليا ومطلوب مني التأقلم
يعني
كأنك جبت صقر , وغرقته في البحر وطلبت منه يعيش زي السمك
مستحيل

ودي مشكلتي
التأقلم معاهم صعب ... ولو حصل التأقلم ده فعلا .. هتبقا مصيبة
أنا ماعرفش أعيش بالطباع دي ... ماقدرش

وإلي قال (من عاشر القوم أربعين يوم ... صار منهم ) راجل كداب وشششششششش

**A7MED_PHARMA** · 21-11-2011 02:06 AM

مش يوتوبيا يا إس
كان فيها بعض العيوب .. عيوبها أقل مايكون
الشركة دي شركة مساهمة..العاملين فيها لهم أسهم كبيرة
يعني بيتحكموا في مصاريف الشركة .. وكانوا مدلعين نفسهم خدمات
دي حاجة

أنا مش بتكلم دلوقتي ع موضوع الشغل..بالعكس
أنا بحب شغلي جداااااااااااا
واحد داخل ياخد علبة دوا بـــ جنيه ...أديهال ويديني الجنيه .. السلام عليكم وعليكم السلام
كل إلي مدايقني
المكان
والناس

هنا في الأرياف .. الكهرباء بتقطع لمدة 6 ساعات ...عاااااااااااااااادي جداااااااااااااااااااااا
التليفونات مقطوعة وأنا دلوقتي داخل من فلاشة إتصالات ..مقطوعة من شهر أبريل إلي فات .. يعني من 8 شهور .... وعااااااااااااااااااااااا ااااااااااادي جداااااااااااااااااااااا

هنا الناس بتشكك من الصيدليات ..وعاااااااااااااااااااااا ااااااااااادي
هنا الناس تخش تاخد منك قرص أسبيرين فرط بشلن .. وعااااااااااااااااااااااا اادي
هنا الناس ممكن تخش تطلب منك عدد واحد لبوسة , وشكك ...عاااااااااااااااااااااا� �ااااادي
هنا الناس بيدوا نفسهم الحق وفاضيين إنهم يقيموك ويحكموا عليك .. وعااااااااااااااااااااااد ي من حقهم
هنا البناس تشوفك راكب عربية ورايح جاي بيها .. يقولوا عليك صايع وفاااااااااااضي وهايف عاااااااااااااااااااااااا دي من حقم
هناك
هناك محدش فاضي لحد
هناك محدش بيحكم على حد .. كل واحد حر طالما إنه ماعداش حدود الأخرين
هناك مكان راقي .. وشوارع نظيفة
هناك خدمات
هناك مفيش حاجة إسمها الكهرباء تقطع أكتر من 5 دقايق
هناك مفيش حاجة هناك أساسا إسمها النت تقطع أو الخطوط تتسرق
هناك الصيدليات بتبيع الدوا بالعلبة أو بالشريط بالكتير (هنا بنبيع بالحباية ...وباللبوسة فررررررط)
هناك تحس إنك مش شاذ عن الي حواليك .. ناس زيك وإنت زيهم

هنا تحس إنك مختلف ....مش بالضرورة مختلف أحسن أو أسوأ
لكن هنا في الأرياف ..أي واحد مختلف يبقا وششش راجل تيتتتتتتتتتتتتتت

جرب يا ss إنك تعيش في مكان زي كفرالشيخ ..وتحديدا في المجتمع الي أنا كنت عايش فيه
وجرب تيجي تعيش في الفلاحين

مش هتحس بكلامي غير لو جربت تعيش في الأرياف شهر على بعضه..تعيش فيها بطباع إين المدينة
أنا لما كنت بنزل اجازة زمااان البلد , أنا طبيعي بصحى الساعة 8 الصبح لو ورايا حاجة
طيب لما أكون نازل إسبوع أجازة في الصيف في بيت عمي في البلد .. ييجي يصحيني مع أولاده إلي بيسرحوا الغيط الساعة 4 الفجر ليه ؟؟؟
ولو ماصحيتش معاهم .. يبصولي على إني (دلوعة وفرفور وفافي وتويتي ونايتي وبسكوتة ودونزي)
بالنسبالهم الدكتور
يعني واحد بكرش ونظارة .. ولابش قميص مكوي وبنطلون إسود كاروهات ..وبيكلمهم من أرنبة مناخيره
لكن دكتور لابش جينز , ولابس تي شيرت .. وراكب عربية سبويلر وجنوط ولونين
يبقا بالنسبة ليهم دكتور (لامؤخذة) تيتتتتتتتتتتتتت وفافي وفرفور ونايتي وبسكوتة وتويتي..يعني م الأخر دكتور ماينفعش

فهمتني يازميلي