حد يفهمني يارجاله
البلد دي ماشيه بضهرها في موضوع العربيات
حد يفهمني يارجاله
البلد دي ماشيه بضهرها في موضوع العربيات
فعلا الرقم خرافى
هو فى العربيات بس!!!!
عشان الموازي ليها في الأوبشنز اوروبي ب 300
انا برضوا كنت معترض على الرقم ده وفعلا علشان لو نفس المواصفات وعربية محترمة اوروبية هايبقى الرقم خيالى بس ده للاسف الى عملاه الجمارك برة مصر ممكن تركب عربية مثلا تويوتا rav4 بحد اقصى 5000 دولار لاغير وفيها كل حاجة برضوا
يعنى اللى بيدفعهم بقى فى عربيه صينى اللى بريليانس يبقى ايه بقى
اولا السؤال الصح
ازاى لسه فى ناس بتفكر ان ال 150 فى الكورى حرام وان الكورى مايجيش حاجه جنب اليابانى والاوروبى
ثانيا شوف اليابانى والاوروبى وباقى العربيات بكام
خللي الناس تفرح
عاوز اقول كلام منطقى فى الموضوع دا ؟؟
اولا : مما تتكون العربيه .؟
1- محرك (موتور) ... الشركات الكوريه اثبتت تطويرها المستمر و انتاجها بل و احتكارها بعض التكنولوجيات فى المحركات حتى الأن.
2-تصميم خارجى : بيتهيألى اليابانى صاحب فلسفة ضعف القشره الخارجيه للسياره .. ولا هو لما كوريا و الصين تتبانها نقول لأ العربيه ورق . احب اضيف ان تصميمات و جمال السيارات الكوريه شبة قفزة بالسيارات للمستقبل ( على لسان احد مصممى هيونداى - تصميم السياره وهى فى حالة السكون كأنها سياره كونسبت امام عينك )
3- انظمة التعليق : السيارات الكوريه تحتوى على كل انواع انظمة التعليق التى هى فى الأصل من موردين يعنى ممكن تلاقى فى الهيونداى نظام تعليق افضل كمان من اليابانى .. اليابان هدفها كان التوفير فى العمليه الأنتاجيه .
4-الأعتماديه و المساحه الداخليه : طبعا كل اللى ركب عربيه كورى عارف يعنى ايه اعتماديه و اد ايه العربيات الكورى اثبتت نفسها فى وقت قصير دا بالأضافه لأسعار قطع الغيار اللى هى جزء لا يتجزأ من العربيه و ضرورى انها تتوافر و بسعر معقول.
بالنسبة لسعر 150.000 جنيه .. بعد الكلام اللى فوق .. هنشوف انهم عادى جدا .. لأن حكاية كورى و يابانى مبقتش مقياس .. زى سوق الموبيلات كدا .. الماركة تتحدث عن نفسها ..
الشركات الكوريه رضينا ام ابينا .. تحصد اكبر عدد من الجوائز فى العديد من دول العالم و على رأسها السوق الأمريكيه و الأوروبيه...
الكورولا سياره محترمه بس لو هتجيب عربيه عاديه بتصميم جميل ب 155.000 جنيه عشان يابانى .. ولا اجيب عربيه فيها من الشكل و المتانه و الأعتماديه و التكنولوجيا اللى يرضينى ناهيك عن الكماليات اللى لو فى اليابانى هتعدى ال 280.000...
سعر تويوتا افينسس فى السوق المصرى 225.000 جنيه مصرى ( مانيوال بكاست سى دى ) عجايب :)
و لو لم تختلف الأذواق لبارت السلع .. تقبلو الأراء .. بصدر رحب .. و شكرا :)
فعلا مبقاش مقياس الكوري عن اليابانى ونشوف شركة هيونداي والي قرتلها خبر من 6 سنين بيقول انها سنة 2020 هتبقي اكبر تالت شركة انتاج سيارات ف العالم وانا شايف ان هما ماشين ف الاتجاة السليم
الموضوع بسيط خالص ياباشا اللي هايجيب عربيه كوري ب 150 بتبقي قسط مش كاش لانه لو معاه 150 كاش كان دفعهم في عربيه الماني مثلا موديل 2006 او 2007 الا قليل اوي اللي يدفعهم كاش في عربيه كوري ودا بيكون مالوش في العربيات اوي يعني مايعرفش الفرق بين العربيتين وثقافه شعب قطع غيار وسعر اعاده بيع والحاجات دي لو الجمارك اتشالت من علي العربيات كل الناس هاتركب الماني
لأ معلش يا رجاله,,,
الأوروبى اللى تقليده الكورى بـ150 ألف... بيبقى ثمنه 170-190 ألف..!! مش الضعف زى ما انتو بتقولو..:no1:
أو بمعنى آخر: الكورى هو اللى سعره غالى, ومبالغ فيه 20-25% على الأقل..؟!!
يعنى.. العربية الكورى اللى ثمنها 150 ألف.. لما تقارنها بالأوروبى (كـ تكنولوجى, ومكونات) المفروض تتباع بـ120 ألف آخرها..:alien42:
بالنسبة لليابانى (كورولا مثلا): وهو مين قالك أن سعرها أصلا مش مبالغ فيه.. برضه :rfds:
طبعا الكلام مش "و خلاص".. لأ, أنا أقدر أقارن كل مسمار فـ عربيتين أوروبى vs كورى.. والناس تحكم: مين يستاهل فلوسه أو ما يستاهلهاش؟؟!!!
وبصرف النظر عن جزئية الـValue for Money..
مجرد انتشار الكورى وقطع غياره, وارتفاع سعر اعادة البيع.. برضه لا يبرر السعر الخزعبلى لعربيات المفروض انها generic..؟؟!!!
زى بالظبط لما تفتح محل اكل و تعمل سندوتشات فى الاول بتعمل الشندوتش رخيص و شكلو حلو فبتشترى فى الناس تلاقى المحل زحمه فتبتدى تجيب لمجرد انو زحمه مش لمجرد ان اكلوحلو فا صاحب المحل يلاقى زحمه فيغالى السندوتش و الناس تجيب برضو ماهم واخد سمعه بقا و الناس تكون زحمه اكتر و هكذا و هكذا
حد فاهم حاجه
ازاي الكوري مش اقل من ال الياباني والاوروبي مش فاهم
ده كفايه الاصوات العجيبه اللي دايما عفشه الكوري بتعملها والمراجيح وخلافه
كمان انتو بتشوفو العربيه من جوه عامله ازاي كلها بلاستيك في بلاستيك زي اللعبه بالظبط
انا مره مهندس قاللي ان العربيات دي منتج مختلف تماما تماما عن العربيات الياباني والاوروبي وعمرها الافتراضي 5 سنين بس
الكورى فى الفترة الاخيرة اتطور فى حجات كتير ذى:
فطبيعى ان سعره يزيد, هى المشكلة فى الناس اللى لسة مش ادره تصدق ان الكورى اتطور و بيضرب اليابانى فى معظم الفئات و بصوا على التقارير و الريفيوز العالمية برة و انت تشوفوا الكورى اتطور ازاى و هو بينافس اشد المركات اليابانية و الالمانية فى نفس الفئة و بيتغلب عليها, و فعلا الشركات الكوريه رضينا ام ابينا .. تحصد اكبر عدد من الجوائز فى العديد من دول العالم و على رأسها السوق الأمريكيه و الأوروبيه
- جودتة و اعتماديتة
- الكماليات و الاوبش ( بصمة, سنسور بارك, تكييف تاتش, ....)
- تصميماتة المتميزة جدا
- جودت الخامات المستخدمة (مقارنات بالموديلات الكورية القديمة و ليس الالمانى)
- قوة الماتور و الاحصنة
- ناقل الحركة ذو 6 سرعات (لسة مفيش يابانى نفس الفئة ذى هوندا او كورلا او مازدا 3 او لانسر بفتيس 6 سرعات)
- زيادة المساحة الداخلية (لزيادة قاعدة العجلات)
ده ميمنعش ان الاسعار مبالغ فيها بردة من الوكلاء بشكل يضايق
تم حذف صوره التوقيع لكبر حجمها مما يؤثر علي تنسيق صفحات المنتدي
برجاء تصغير الحجم ووضعها مره اخري
مشرف عام 1
انا هحكى تجربه شخصيه
معايا كرولا 2002 اتقلبت كام قلبه حلوه بعد ما نقل خبطها
رحت عند سكرى مشهور
واقف عنده عربيات قالبه كتير المهم
كان فيه النترا 2007 و فيرنا 2008
برضو مقلوبين المهم الاكتشاف العظيم الى اكتشفته ان سقف الكرولا فيه 6 قوايم بالعرض 2 كبار فى الاول و الاخر و 4 ف النص
الفيرنا هما 3 2 كبار وواحد ملوش لازمه فى النص غبر او يشيل لمبه الصالون
الانترا كان فيه 5
2 كبار و 3 صغيرين
المفاجأه بقى ان القوايم الكبيره بتاعت الهيونداى ف نفس قوه و حجم القوايم الصغيره
من الاخر القوايم ورق و علشان كده الفيرنا غيرت السقف لونه قالب فى رمل
و انا اتسمكر عادى
مش هقول غير ان العربيه بعد ما قلبت الاربع بيبان بيفتجو و يقفلو عادى
و هوا ده الفرق ف الفلوس
حد فاهمنى
ياباشا كل العربيات سعرها مبالغ فيه
عارف لو الجمارك اتشالت مش هتسمع عن الكوري ولا عن الصيني
هتبقا عربيات الطبقة الكادحة
لكن فعلآ هيا البلد ماشية بضهرها في كل شيئ والسبب يرجع الي تخلف عقولنا احني لا نلوم غير ثقافتنا
يمكن عشان الصيانه تكلفتها اقل من الاروبي بس انا عن نفسي مش بدفع ع الكوري كدا
كوري هاهاها
انا اركب عربية امريكي موديل 57 ولا اركبش كوري او صيني موديل 2011 بصراحة وصراحة الصراحة كمان
وبعدين عايز اعرف بس هي الناس هتفضل مخدوعة لحد امتي
يعني يقولك عربية موتورها قدرتة 100 حصان عند عدد اللفات القصوي
يعني هو في حد هيجيب اخر الار بي ام ؟؟؟ واصلا قدرة العربية في المشي الطبيعي متقربش حتي من 70 حصان
بالنسبة للامان مظنش ان اي عربية صيني او كوري فيها اي امان بالمقارنة بالالماني والامريكي مثلا يعني تلاقي عربية ب150 الف ولو واحد سند ايدة علي كبوتها يتطبق فين الامان بئي؟؟؟ عموما انا من الناس الي ميهمهاش شكل العربية اد مايهمني اساسياتها وقوتها وقوة موتورها وعزمها
هتجيب عربية بي ام مثلا هتي لو موديل 90 دفع خلفي و1600 سي سي وتقارن عزمها بعربية امامي 1600 كوري ؟؟؟؟؟؟ مفيش مقارنة اصلا
من الاخر هي عربيات اة كويسة لكن اسعارها مبالغ فيها جدا
محدش يقول الهيونداي مثلا وحشة بس محدش يقول بردو ان في اي وجة شبة بينها وبين عربية الماني مثلا مع ان الاسعار قربت من بعضها جدا جدا وبردو الناس تختار كوري
طب لية ازا كان قطع غيار الكوري بقت اغلي من الالماني موديلات من 90 لحد 2007
معرفش بصراحة الشعب دا هو الي بيدي الحرامية فرصة يسرقوة وبمزاجة لانة بيحب الي يدحك علية بكلمتين
انا مقلتش وحشة انا بقول هي عربيات كويسة اة لكن لا تقارن بالالماني او الاوروبي عامة وكمان سعرها عالي جدا جدا جدا بالنسبة لجودتها
يعني لما تلاقي عربيات صيني مفيهاش اي حاجة عدلة مجرد شكل وخلاص وتتباع ب 100 و150 وناس تشتريها بالسعر دا وتسيب الاوروبي يبق دا اية؟
بالظبط
حتي انا رئيي مع توقيعك
ربنا يخليك
انا عن نفسى استحالة ادفع 150 فى عربية اى عربية كورى
الكورى عربيات اقتصادية و عملية و اعتمادية جد بس صفر متعة قيادة و ينقصها الثبات و النعومة و قوة الفرامل و انتى راكبها و بتجرى بتبقى خايف
والكلام ده عن تجربة ركوب عربيات 15 سنة كلها زيرو و اغلبهم كورى زى لانوس و النترا و دول ركبتهم سنين طويلو و اجرت برضه اكسنت و ماتريكس فترات طويلة و كانت من اسوء العربات الى سقتها فى حياتى
ركوب اليابانى حاجة تانية خالص حسيت بيه لما للاسف لما بعت المازدا 3 لظروف السفر و ركبت للاسف النترا بعدها و الاتنين كانو زيرو بس فرق شاسع فى الاداء و الثبات
انا لو هادفع 150 الف استحالة اركب هيونداى تانى و لا حتى كيا و من غير تفكير يا اوكتافيا يا مازدا 3 او لانسر شارك
هوا الكوري معروف انه اقل من الياباني
بس مفيش حد يقدر ينكر ان الكوري في الفتره الاخيره اطور تطور رهيب في الشكل والاوبشنز والمواتير
وقريت كلام عن العفشه والكلام ده
بالصدفه امبارح وانا بقلب في اليوتيوب لقيت الفيديو ده سوناتا واكوورد ودي طبعا هوندا محترمه وعربيه تاني معرفش نوعها
اتفرجوا علي الاختبار واحكموا بنفسكوا
Hyundai Sonata VS Honda Accord slalom test - YouTube
سيبك من الفيديوهات دي عشان دي مجرد دعاية للسوناتا مش اكتر
دي طريقة اعلانية فاشلة بيعتمدو عليها برة للدعاية في انه يطلع المنتج بتاعه احسن من المنتج المنافس ويطلع المنتج المنافس باسوء شكل
يعني بالله عليك انت تصدق ان الاكورد تعمل اللى في الفيديو ده ؟ مع العلم ان الاكورد تعتبر من اعلى فئات الهوندا وفئة اعلى من السيفيك
طب وليه مايكونش واحد ليه فى العربيات ويعرف الفرق بس مش عايز يركب عربيه مستعمله 6 سنين وهايصرف عليها اضعاف اللى هايصرفه على الزيرو
ارخص عربيات اوروبى سيدان الفانتازيا والجيتا سعرهم هاى لاين 215 و225
يعنى لو هانقارنهم بعربيه زى الالنترا يبقى الفرق 70 الف جنيه
طبعا مع كامل احترامى للجيتا اللى هى احسن من الالنترا فى كل حاجه تقريبا والفانتازيا اللى متتفوقش غير فى حاجات قليله
بس الفرق فى السعر مش بسيط
ولو الكورى مبالغ فى اسعاره ممكن يبقى مبالغ فى 10 - 15 الف بالكتير مش يكون بيتباع ب 150 وهو يستاهل 100
و شوف برضه العربيات اللى حواليه اللى هما يعتبروا من نفس الفئه بكام
الكورولا 2012 مبالغ فيها طبعا زى ما انت قولت
السيفيك 2012 متوقع انها تنزل بيزيك ب 175
امبريزا الجديده اكيد برضه سعرها هايعدى جامد
اللى اسعارهم قريبه الشارك والمازدا بس دول 2011 واكيد هايغلوا فى 2012 غير انهم مش احسن من الالنترا فى كل حاجه يعنى مش متفوقين تماما زى الجيتا مثلا لأ ممكن يبقى فى كل واحده ميزه او اتنين بالكتير
بالظبط كدا طبعا فى استغلال ومبالغه فى الاسعار وتزويدها كل شويه بدون مبرر لكن بنسبه برضه يعنى لو الكورى بقى اغلى من الالمانى حد هايشتريه مستحيل
بس بالرغم من المغالاه والمبالغه فى السعر مازال ارخص بمبلغ وقدره
ياجماعه بس هاتولي عربيه كوري واحده عفشتها محترمه وفيها الحد الادنى من الراحه وتعيش فعلا
مافيش!!!
مفيش اية بس ..... اقل نسبة اعطال فى الكورى بص خواليك وشوف بيتبهدل قد اية واعتماديتة قد اية ...
طب حنروح بعيد لية ... اية عربية فى فئة الكارينز مثلا فى سعرها ونفس مواصفتها
ماشي شكلها حلو واوبشن بس اخبار عفشتها ايه؟
أيون :) الفروق بسيطه مش شاسعه
الاوكتافيا هى هى متغيرتش من سنة 2004 لحد النهارده غير الفيس ليفت بتاع الفوانيس فى 2009 , مقابل عربيه لسه مصممه السنه اللى فاتت
موتور 1600 8 صمام كامه واحده 102 حصان عزم 148 نيوتن , مقابل موتور 1600 16 صمام كامتين 130 حصان عزم 157 نيوتن
المساحه الداخليه لصالح الالنترا
الشكل الرياضى الحديث والايروداينمك لصالح الالنترا
استهلاك الوقود ( مانيوال ) ببنزين 91 النترا 6.1 لتر لكل 100 كم فانتازيا 9.5 لتر لكل 100 كم ولو ببنزين 95 الفانتازيا تبقى 7.1 لتر لكل 100 كم ( الارقام من البروشور الرسمى لكل عربيه )
الفتيس نقطه متساووين فيها
نقط تفوق الفانتازيا اولهم واهمهم التعليق الخلفى ملتى لينك مقابل تورشن بيم للالنترا
خامات وتقفيل احسن شويه ثبات افضل شويه
فرق سعر حوالى 70 الف
دا اللى فاكره دلوقتى وعموما دى وجهات نظر واكيد فى ناس كتير مش هايعجبهم كلامى بس انا رأيى نستنى فانتازيا الشكل الجديد 2013 عشان تبقى المقارنه عادله وساعتها اعتقد ان الفانتازيا هاتكون افضل فى حاجات كتير زى الجيتا الجديده كدا
لأ ياباشا,
دى مش أى عفشة خلفية.. دى أحد أفضل الـSetup للملتى-لينك اللى موجودة.. (اللى هو VW Golf/Jetta 4-Link multi-arm Suspension) :plusone1:
والتانية مش أى Torsion-Beam: دى أسوأ Setup لعفشة خلفية دنجل/قنطرة فـ العالم, لا ثبات, ولا comfort ولا مناورة وهاندلينج... ولا أى حاجة ولا الهوا..؟!! :banzai:
طبعا الخامات والتقفيل.. الفرق شاااااااااسع يا راجل, مش محتاج اتكلم على كمية الـCheap plastics اللى شوفتها فـ الألنترا 2012..؟؟!!!
الثبات.. برضه الفرق مش "شوية" :bump1: صباح المراجيح والرعب بتاع الألنترا فى الـManoeuvring على السرعات, طبعا غير الفرامل (مش محتاجة كلام, ومش جديدة عـ الهيونداى)..!! :11:
وبرضه الصاااااااااااج والصلابة والـdurability.. فيه فرق بين حاجة اتعملت عشان تعيش, وحاجة اتعملت disposable.. هههههههههههه
ياباشا فرق الـ70 ألف جنيه مبرررررررررررررر, ده أصلا الألنترا فيها 20-30 ألف زيادة..؟!!
بس عندك حق فـ موضوع الموتور.. الصراحة الأوكتافيا (والجيتا) ماينفعش عربية بـ200 ألف و موتور ضعيف, وقديم أوى كده..؟؟!!!
بدون مااقرا الردود دي كلها احب اقول رايي وممكن يكون مكرر
مفيش عربية في مصر سعرها مش مبالغ فيه
ال 150 الف دول ممكن ادفعهم في عربية كوري زي مثلا هيونداي جينسس بس للاسف سعرها غالي جدا وكمان ممكن كيا اوبتيما و كيا سبورتاج الجديدة او ممكن شيفروليه كروز اللي بتنزل برة .. لان الكوري مش بس فيرنا وسيراتو يعني في حاجات كتير تستاهل وبتكنولوجيا عاليا جدا