[overline]

بسم الله الرحمن الرحيم

انا معايا نيسان تيدا هاتشباك 2006 1800 سي سي
كنت حاجزها وانا في السعودية من 2005 واستلمتها في اول دفعة راحت للشرق الأوسط

المهم جيت ابيعها هناك السنة إلي فاتت جابتلي 20 الف ريال فقلت حرام
انا هجمركها واجيبها مصر
المهم الحمد لله جبتها ورخصتها من 3 شهور

نيجي بقى للي حصل معايا امبارح

كنت ماشي 200 على طريق السويس في الحارة الشمال ورا هيونداي جيتز وفجأة آلاقي بتاع الجيتز حدف يمين واتقلب قلبة وحشة جدا
وطلع السبب انه رمي يمين عشان في 128 واقفة وعطلانة في الحارة الشمال
طبعا بتاع الجيتز حدف يمين من هنا وانا الآقي ال 128 في وشي مفيش متر ونص
رجت بعزم ما عندي وانا على 200 جبت الدركسيون يمين في شمال وبسم الله ما شاء الله على ثبات العربية لدرجة انها معومتش حتي

الحمد لله انا عدت على خير وانا إلي استاهل عشان ماشي على 200
بس بجد عربية محترمة وثبات ممتاز مع العلم ان العربية ستوك ومش لاعب فيها خالص وفيها الجنط ال 15 كاوتش 185/65

وطبعا انا من الصدمة كملت في طريق السويس وموقفتش اشوف بتاع الجيتز ومعرفش حصله ايه
الكلام ده الساعة 7 ونص بعد دخلة المطار ، إلي شاف جيتز او بقايا جيتز يقولي حصله ايه

مستنى آرائكم والحمد لله ان ربنا ستر ومنصحش حد يمشي اكتر من 100 !
[/overline]