الموضوع: عربيتي أتخبطت 307 ومحتاج مساعده في أسعار القطع وأمكانها

السلام عليكم ورحمة الله وبركاته.
الموضوع بإختصار ياجماعه أني كنت مروح من أسبوع ونص وكنت ماشي في طريق مجوز رايح جاي, في الحارة المقابلة كان في أتووبيس ماشي براحه في أمان الله, المهم طلع واحد من وراه بعربية لانسر وعايز يعديه ويخطف الغرزة بسرعه ومكنتش المسافه تجيبه, وبدل ما يهدي داس عشان يدخلها بالعافيه المهم أنا لسه بوسع له يمين عشان يعدي من وسطنا.. لاقيته داس فرامل مرة واحدة حس إنها مش هتجيبه وسمعت صوت كاوتشه بيسحف علي الأرض معندوش abs وفضل يسحف لحد ما خبط فيا والأتوبيس كمل عادي..

طبعاً نزلت كلمت النجدة وهوا كان بيفكر يجري, أول حاجة عملتها بصيت علي رقمه وقعدت أردده في دماغي كذا مرة عشان منساهوش لحد ما أكلم النجدة, هوا اما شافني ببص علي رقمة وبتصل بالتليفون ركن بعيد بحوالي 150 متر بعد ما كان هيمشي. المهم جات النجدة والأفندي طلع معهوش لا رخصة سواقة ولا بطاقة شخصية. والنوبتجي اما شاف كاوتشه معلم حوالي 60 متر علي الأرض وفي الحارة بتاعتي عرف إن الغلط كان من عنده. بس كان قدامي خيارين يا نتصالح ويصلحهالي يا نعمل محضر.
المهم هوا كان قايلي هصلحهالك, فلما قلنا نتصالح وتصلحهالي قالي هدفع 500 جنيه !!!!

قلت له طب يلا بينا علي القسم.. في القسم قالو لازم يحجز العربيتين وانا كنت متوقع دا.. ونستني المهندس عشان يجي الصبح يعاين مكان الحادثة وكنا يوم خميس قالك هنستني للسبت, ودا اللي مكنتش متوقعه !! فبقول للظابط ما هو النجدة عاينت المكان وقالو الغلط من عنده لأنه جيه علي حارتي ودايس فرامل لمسافه طويلة و لو أستنينا للسبت مش هيكون في حاجة تتعاين علي الأرض. قالي وكمان هتباتو في القسم أنتو الأتنين عشان تتعرضو النيابة يوم السبت..!!!!
فبقوله طب أزاي أنا مخبوط ومتضرر والحادثة واضحة جدا لحضرنك واللي جم عاينو مكان الحادثة + أنو مش معاه لا رخصة سواقة ولا بطاقة شخصيه..

بصراحة أنا صدري بيضيق أما بفتكر اللي حصل لأني كنت متضرر قدامهم وهما عارفين والمفروض يساعدوني وهوا مش معاه أي ورق وغلطان بس محدش جاب لي حقي.. بس دا اللي حصل بأختصار المهم تنازلنا عن المحضر وأخدنا العربية ومشينا, وهوا كمان مشي عادي ولا اكنه خبطني ولا أكنه راح القسم من غير بطاقه ولا رخصة الخ.


اللي أنا طالبه منكم لو حد عنده فكرة أو خبرة بأسعار قطع الغيار المتضررة أستيراد أو بسعر معقول وأماكنها لأني لسه مكملتش المبلغ بس ناوي إن شاء الله أول ما أكمله أنزل الحرفين ووكالة البلح بس مش عارف لسه هروح لمين.
فا ياريت لو حد يقدر يفيدني في أسعار الحاجة دي أستيراد أو بالمكان اللي أقدر أجيبها منه بأسعار معقولة لأن أسعار التوكيل هتبقي صعبة جدا خصوصاً الأكصدام, وهوا كدا كدا معرض لأنه يتحك أو يتخبط في أي وقت. عشان كدا أنا فكرت في الأستيراد أو حاجات سعرها يكون معقول.
بس الحاجات اللي ليها علاقة بالميكانيكا او العفشة هجيبها أصلي إن شاء الله.



الأجزاء اللي متضررة عندي دلوقتي :-
- الرفرف الأمامي (خلصان)
- الأكصدام (بيقولو مينفعش يتصلح)
- الفانوس الأمامي مكسور0. (الوش + الشاسية) *بس لاحظت ان كل اللمبات سليمة + موتور الهيدلايت. *هل في امكانيه أني اجيب فانوس من غير اللمبات والموتور ولا مش هتفرق كتير.
- المساعد علي ما أعقتد لحد الأن لو مكنش المقص تضرر معاه.
*لأن الفردة اللي قدام مميلة شوية ناحية العربية والطارة مش مظبوطة. يعني لو ماشي طوالي الدركسيون بيكون بالطول مش بالعرض أكني لافف الدركسيون نص لفة.

أنا موديل عربيتي 307 sw موديل 2007 عشان لما سألت علي أسعار قطع كانو بيطلبو مني رقم الشاسية عشان رقم القطع, بس هوا أخر شكل من 2007.

العربية مركونة بقالها حوالي أسبوع ونص علي ما أكمل لها المبلغ اللي هتتصلح بيه لأنه لسه مكملش لحد دلوقتي..
بعتذر لو طولت عليكم بس حبيت أشارككم تجربتي لأني تعبان نفسياً من اللي حصل وركنة العربية طول الفترة دي وفي الجو دا.
الحمدلله علي كل شئ.