الموضوع: سؤال لمالكى عربيات لادا

انا لو مكانك هاشتري لادا روسي زيرو و ازودلها شوية كماليات و هيه أقيم من الشاهين من وجهة نظري الشخصية دا لو حضرتك شاريها عشان تبقى عربية للعمر حقيقي استهلاك معقول للبنزين و راحة بال واعتمادية جدا ومصاريف صيانة رخيصة وقطع غيار (عند البقال) في كل حتة .. وحتى شكلها أجمل من الشاهين

لادا
الزيرو فى حد ذاته ميزه ( كام سنه بدون استبدال لقطع غيار استهلاكيه )
ال لادا لسه بتتجمع فى مصر - ولسه بتيجى استيراد تقريبا اوكرانى مش روسي
ال لادا هتلاقى موديل 2011 وكمان 2012 بعد شهر تقريبا وده الاحسن كموديل عالى
ال لادا قطع غيارها ربما تكون الارخص
ال لادا بما انها لسه بتتصنع فقطع الغيار هتكون متوفره مستقبلا ايضا وبسعر رخيص
ال لادا طلعتها الاولانيه كويسه وثباتها جيد لحد 100او 110



ال لادا عربيه ناشفه فى القياده ومش محببه للستات
ال لادا عيبها المشهوره بيه ملص البيض وحله بسيط غير البيض بنوع جيد اول باول والاصلى هيعيش معاك يمكن 3 سنوات اكتر او اقل حسب القياده وبعد كده غيرهم بنوع جيد كل سنتين مثلا وبرضه حسب القياده وسعرهم بالتركيب اقل من 250 جنيه
ال لادا عربيه مش بتاعه جرى بسرعات عاليه على الطريق حلو 110 وبلاش تعديها رغم انى الموتور ممكن يوصلك لاكتر من كده بس الدركسيون اللى على علبه مش حلو للسرعات العاليه

الشاهين
بطلوا تصنيعها او تجميعها اعتقد من 2007 لكنها عربيه جيده لانها مقبسه من ال 131
فى منها اختيارات كتير للموتور

اعتقد الاتنين فى الوسع واحد بس الشاهين يمكن اعلى فى الارتفاع

اخيرا
لو عايز عربيه عمليه وبدون رفاهيات وتستحمل خشونتها فى القياده مقابل رخص الصيانه وتكلفه التشغيل وعلى فكره بسافر بيها وكويسه - هات ال لادا -
لو غير كده هات الشاهين او عربيه تانيه فى سعر الشاهين بس تكون منتشره زى ال لانوس بنصح بيها لو حالتها كويسه

الأستاذ abokoko جايبلك من الآخر :)

بس في حاجات بسيطة عاوز أضيفها

اللادا بتتصنع للآن في روسيا وفي 2105 بتتصنع زيرو للآن في روسيا ... وشركة الأمل بتستورد من روسيا 2107 و لحد موديل 2011 شوفت بنفسي افراج جمركي لعربيات لادا من روسيا يعني 100٪ روسي ولا صحة لشائعات اوكرانيا

وبالنسبة للثبات على السرعة انا باجيب عالصحراوي 130-140 والعربية ثابتة جدا الحمد لله وبتبدا الاهتزازات شوية بعد 140 بس مافيش فقد في القدرة على السيطرة و احكام الفرملة بس عشان تبقى متطمن قبل ما تاخد مشوار سفر بعيد تروح لبتاع كاوتش محترم بريدجستون مثلا وترصص و تكون رابط زوايا عجل عند حد كويس واكيد رابط العفشة وهتمشي وانت متطمن خالص ما تقلقش :) وما تقلقش من الحرارة خالص بس بشرط ماتكونش بتحرق على الغيارات بغباء يعني ماتمشيش على الرابع على سرعة 120 و RPM 4500 كده العربية هتسخن اكيد فاهم قصدي :)

ونصيحة أخيرة انزل الشركة الهندسية واركب الشاهين واطلع على الأمل اركب اللادا وشوف انت مرتاح في انهي عربية اكتر والله الموفق ان شاء الله :)

بص يا باشا انا كنت في حيره زيك بالظبط معايا 30000 جنيه و كنت محتار اني اجيب شاهين موديل قديم او اجيب لادا موديل عالي و بعد البحث و المقارنات لقيت ان اللادا تكسب الشاهين و ركبت الشاهين محسيتش بفرق يذكر فتوكلت علي الله و اشتريت لادا