الموضوع: مفاجأت صيانة الألف !!

د.إيهاب .. أشكر لحضرتك كلامك المشجع ..
أولاً ده مركز جسر السويس ..
ثانياً العيوب متنوعة فى الموديلين يعنى مو2006 بمشاكله المعروفة وغير المعروفة مثل العفشة وعلبة الدريكسيون والتكييف وبعض العيوب الآخرى وإن كنت أرجح أن معظمها مشاكل كهربا مثل المرايات والزجاج بتعلق .. وكان واحد من اللى كان بيشتكى من التكيف بعد ما عمل التعديل قال أن التكيف أصبح ثلاجة بس كان عنده مشاكل كتير تانية .. وبالنسبة للموديل 2007 أنا مقابلتش إلا واحد بس وكان عصبى جداً على الرغم أنه كان مروش العربية وعامل فيها شغل كويس واللى أنا فهمته من كلامه أنه راح التوكيل 7 مرات علشان يغير دسك واسطوانة وفى كل مرة بيرجع نفس العيب وبصراحة كان عنده حق إنه يكون عصبى ..
ثالثاً أنا من خلال ملاحظتى لطقم المركز بصراحة الكل بيعمل بكل جدية حتى مدير المركز خلال فترة تواجدى لم يجلس فى مكتبه إلا أوقات قليلة .. لكن الواضح أن معرفتهم بالسيارة غير مكتملة وده كان ملاحظ من خلال العيوب التى تعالج ثم تظهر ثانية ..
رابعاً أنا كنت فى الأساس رايح أعمل الصيانة الدورية من تغير زيت والفلتر والمشاكل اللى عندى نسيت أبلغ عن بعضها مثل صوت الصفارة مع الفرامل والحدفة اليمين .. لكن بعد اللى أنا سمعته عن مشاكل العربيات التانية حسيت ان عربيتى طلعت فلته .. لكن على العموم اللى أنا كنت بشتكى وقلت لهم عليه إتعالج ..
خامساً مستوى المركز بصراحة لم يعجبنى حاسس ان فيه لخبطة وكله سايح على كله يعنى من الأخر مفيهوش تنظيم (على فكرة دى تانى مرة أدخل فيها مركز خدمة فى حياتى)

تفاصيل الكلام مع مدير المركز د.شوقى نصير (وليست مقابلة)..
فى الأول حبيت أستفسر عن كلام المحترم ا.بايو .. وبعد المفاجأت اللى أخذتها عن الأنسة بسمة .. وجهت كلامى مع د.شوقى وأوضحت له أن المنتدى به ما يقرب من 1000 عضو والرابطة تضم مايقرب من 50 إلى 60 عضو .. وكنا عايزين أنه يكون هناك تعاون بين المنتدى والمركز فرحب الرجل وقال مفيش مشكلة بس كان عايز يعرف تفاصيل فرديت بأننى سأنقل هذا الكلام وقد أعطانى كارت خاص له .. وحبيت استفسر منه على آخر أخبار السيارات ومشاكلها والحلول وقطع الغيار وخلافة (متقولش صحفى) وأجاب الرجل بكل بساطة على كل الأسئلة .. بالنسبة للمركز فهو يعتبر الثانى بعد مركز الصحراوى .. بالنسبة للعيوب المزمنة فالمركز قد عالج حوالى 300 عربية عنده والعمل مستمر لتعديل باقى السيارات (التعديل المقصود علبة الدريكسيون والعفشة) أما بالنسبة للتكييف فالعمل بدأ من امبارح وعملنا 15 عربية .. بالنسبة لقطع الغيار فمعظمها موجود ولا قلق من هذه الناحية الأن .. بالنسبة لخلافة عندما ذكرت له على عدد ا‘ضاء الرابطة قال لى أنه يحمل هم اى واحد .. وبصراحة الرجل كان فى منتهى النشاط طوال فترة تواجدى بالمركز .. على فكرة أنا لا أعمل دعاية للمركز ولا حتى للعربية لكنى أنقل الصورة التى رأيتها من وجهة نظرى عن تجربتى ..

تفاصيل الكلام مع المهندس وليد الشربينى ..
واضح من أن المهندس وليد متابع للمنتدى منذ فترة كبيرة لأنه ذكر لى أم أ.آمر والمعروف أن أ.آمر غائب عن المنتدى منذ فترة بسبب الأمتحانات .. وقد حاولت أن أجعله يشارك معنا فى المنتدى ليس بصفته مهندس فى شركة أبو الفتوح ولكن بصفته مهند متمرس لكنه رفض وقال إنه يدخل كزائر (بصراحة أنا أشك فى هذا الكلام) .. المهم الحديث دار بشكل كبير عن السيارة وما فيها من مشاكل وقد قلت لكم من قبل أنه أعطانى سيارته الـ BMW لمقارنتها بالمشاكل التى ذكرتها فى سيارتى .. وفى الحقيقة نفس أحساس السواقة واحد فى السيارتين لكن مع إختلاف الجلسة المريحة جداً فى سيارته .. وقد قال لى أنه عندما علم أن أبو الفتوح سوف يعمل مع سيارات صينية أنه سيترك العمل لكن عندما علم بالمواصفات الفنية الخاص بالسيارة تراجع عن قراره ولأنه يحب العمل مع أبو الفتوح .. وقد قال لى أن السيارة رقم واحد فى فئتها وعن المشاكل أن الناس مستعجلة على الحكم على السيارة .. وأن هناك حكم خاطئ عن السيارة .. وبعد هذا الكلام رجعنا إلى المركز ثانية فطلبت منه أن نكمل حديثنا وأن يعطينى الفرصة لتصوير عمليات الصيانة للسيارات لنشرها فى المنتدى فقال لى بعد فترة سنكمل الكلام .. وجت الفترة دى أكتر من مرة وكل ما أشوفه ألقيه مشغول فقول أستنى شوية لغاية مكلمته وهو ماشى ومستعجل علشان بيجرب عربية عن فرصة التصوير داخل المركز فرد إنه ممنوع وسابنى ومشى .. ومشوفتوش تانى إلا فى فترات متقطعة ومكانش فى فرصة أكلمه لغاية ما مشيت من المركز ..
ملحوظة صغيرة قالها لى واحد من اللى بيعمل صيانة أنه فى مرة كان بيعمل صيانة وسئل المهندس عن حل المشكلة فرد عليه المهندس أن العربية كويسة كدة على قد فلوسها وأنه لا ينتظر حاجة جديدة فالرجل راح باعت إيميل لمركز خدمة العملاء عن اللى حصل من المهندس ده .. وراح بعد فترة للمركز تانى لقى المهندس ده شلوه من صيانة الأسبرانزا وخلوه مع عربيات الـ BMW فقط ..
تقريباً هذا هو كان يومى فى مركز خدمة أبو الفتوح بجسر السويس ..

وآسف على الأطالة ..
وتقبلوا تحياتى ..