الموضوع: هو للدرجة دي ورشة دهان التوكيل مبالغ بها ؟

السلام عليكم

من حوالي كام شهر كنت عايز اظبط الاكصدام و رفرفين فرحت التوكيل و سبتهالهم عملوها لمدة حوالي 10 ايام ! مش مشكلة الايام بس قلت ده التوكيل هاخد حاجة بيرفكت و فعلا كنت بعدي عليهم كل يوم او يوم بعد يوم و اتابع بنفسي و الورشة عندهم بتبقى زحمة غير طبيعية بالمرة كأن مينفعش تعمل عربيتك الكيا او الرينو بره!

المهم بقى وقت الاستلام اول حاجة في حاجة كده كانت سايلة على باب السواق (اللي المفروض ميجيش جنبه لأن مفيهوش حاجة اصلا و فبريكة) قعد يقول ده كان كده طبعا سبته و كلمت مدير التوكيل و خلصنا الموضوع و عملوها و اخدتها بعد ساعتين.
تعالوا بقى للملاحظات الحالية بعد مرور فقط 3 شهور..
1- الاكصدام نطر البوية في اكتر من مكان و قشرت
2- القطعتين الفيبر اللي في الاكصدام اللي لونهم غير لون العربية, قشروا اكتر من مكان هم كمان
3- الرفرف الخلفي ظاهر فيه كأن البوية سايلة منه كده غير انه في حتة صغيرة كده بدأت تقشر بس صغيرة اوي.

قصاد كل ده اخدوا تقريباً 1000 جنيه من غير ضرايب للحاجات دي بس

و من كام يوم الرفرف الخلفي حكيت بيه حاجة بسيطة في عامود في الجراج لان النور كان ضعيف جوا فقلت فرصة و رحت عملتها عند صنايعي بره بس الناس شكرت فيه ,, اولا رحتله 12 عملها و استلمتها على 10 بالليل و اخد في الرفرف و قطعتين الفبر اللي في الاكصدام 350 جنيه سمكرة و دهان و لحد دلوقتي الحمدلله مية مية.

دلوقتي بقى محتاج افهم كده حاجة... اللي افهمه اني لما بروح توكيل بدفع اكتر من الضعف بس باخد حاجة مضمونة .. لكن ازاي تقشر كده و تنطر مع نفسها ؟! يبقى انا استفدت و دفعت كل ده ليه؟! هل بيستخدموا نوع بوية سئ مثلا ولا مصنعيتهم اللي سيئة معنديش فكرة رغم انهم قعدوا يشكروا في نفسهم انهم بيستخدموا مادة "فيلر" عشان مياه و بارومة و كلام كده .

ملحوظة: دي تجربة خاصة بورشة سمكرة و دهان التوكيل ملهاش اي علاقة بالورشة الفنية للتوكيل(بالعكس تماماً).

المشاركة الأصلية كتبت بواسطة momo10000

حبيبي يا درش .....

للاسف رجاله التوكيل في اسكندريه في الضيااااااع ...

يعني البويه اللي قشرت دي .... معناها انه استخدم مثبت ردي ... ودي عيب قوي .

معلش يا صديقي .... اهم حاجه انك ظبطت الدنيا .. وكل حاجه بقت تمام.

من حق ... في حد عندي في الراس السوداء .... اسمه حسان .... دكتور استشاري سمكره ودوكو .

ايمن باشاااا .. والله انا عارفهم كلهم و محترمين و على اتصال على طول و بيظبطولي الدنيا الحمدلله سواء اسعار او خدمة بس ده في الورشة (كهربا او ميكانيكا) لكن الدهان كده بالنسبة ليا منتهي معاهم.
تماام لو كده انا عايز اعمل الاكصدام فعلا هكلمك اخد بياناته. بس الاهم بقى اني منتظرك ;)

المشاركة الأصلية كتبت بواسطة col. Eng. Khaled

ده السبب الرئيسي إني مأمنتش على عربيتي

أغلب التوكيلات كده سواء مأمن أو لأ .

خالد بيه, انا اصلا مش مأمن بس بحب دايما اعمل كل حاجتي اي كانت في التوكيل من صغيرة لكبيرة.