الموضوع: اللوجان اتخبطت والحمدلله

النهاردة كنت في التوكيل و فعلا فيه رفة في طمبورة كباس التكييف و للاسف مش هينفع الحل بتاع فصل التكييف عن الموتور مؤقتا لازم السير يركب علي كل طمبورة التكييف و تدور معاه
الكباس نوعه ساندن ياباني موديله sd7v16
انا اتصلت بتوكيل ساندن اللي في المعادي وسالتهم عن امكانية تصليحه و قالوا لازم يشوفوه الاول عشان يقدروا يحددوا ان كان يتصلح و لا لا
انا بكره مسافر القاهرة و هاخده معايا و هروح لتوكيل ساندن و اشوف امكانية تصليحه و بفكر اني اشوف سعر الكباس الجديد نفس النوع اللي راكب عندي بكام عندهم لو لقيته ارخص من التوكيل بمبلغ يستاهل هشتريه من عندهم بس خايف من قصة الضمان طيعا لو. انا اشتريته من توكيل رينو هيكون ضمانه اكيد يس مش عارف ايه وضعه مع توكيل ساندن

رينا ييسر الحال و اخلص من الوش دا احسن انا خلااااااص زهقت و محتاج العربية

تحياتي

النهاردة كنت في توكيل ساندن اللي في المعادي و شافوا الكباس و بعد المعاينة الفني اللي هناك قال الاكس نفسه معووج و ملوش حب و هنحتاج نركب كباس جديد )-:
انا بصراحة زعلت جدا و سلمت امري لله و قلت في نفسي خلااص مفيش فايدةالوالد كان معايا و الح علي واحد فني تاني كان نايم وقاله يا ريت تبص علي الكباس دا و لو طلع سليم انا هبسطك و هراضيك
فعلا الفني التاني صحا من النوم و بص عليه و قال الاكس سليم و المشكلة في الطمبورة بس و لو اتغيرت المشكلة هتنحل و الكباس يشتغل زي الفل
كلمنا المهندس سمير عبدالغني و قلت له ان المشكلة في الطمبورة و الراجل فعلا ذوق لدرجة كبيرة جدا و متعاون لاقصي حد
المهندس سمير طلب من الفنيين اللي في التوكيل انهم يشوفوا كباس جدجي نفس الحجم و يفكوا منه الطمبورة و يركبوها في الكباس
و فعلا فكينا طمبورة من كباس جديد بتاع عربية بيجو ٣٠٧ تمنه ٢٦٠٠ جنيه و علي فكرة الكباس الساندن نفس اللي راكب في عربيتي بيعمل ٣٦٠٠ جنيه عندهم يعني توكيل رينو يزيد عنهم ٢٠٠ جنيه بس
تكلفة الطمبورة الجديدة ٥٠٠ جنيه بالتركيب
المهم ركبنا الطمبورة الجديدة و الحمدلله الرفة راحت و بيلف كويس
دعواتكم معايا انه يركب بدون مشاكل في مركز الخدمة و ما يكونش في اي مشاكل في اي حاجة تاني في العربية و اخلص و استلمها و ترجع زي ما كانت

خلاصة الكلام نصيحني لاي حد انه لو لا قدر الله تعرض لاي موقف مشابه للي انا اتعرضت به يا ريت ما يخليش اي حد يحاول يعمل فيها فاهم و يلعب في العربية
انا لما حصلت المشكلة دي واحد حاول يخدمني ويساعدني و حاول انه يبعد الركبة المعصورة عن الطمبورة و قعد يضغط عليها بعتله حديد جامدة و انا متأكد ان اللي عمل كدا في كباس التكييف هو العتله اللي الاخ دا بيعمل بيها