الموضوع: هوندا سيتى أم أوكتافيا a4

إسمح لي إني أقول رأيي
أنا معايا سيتي مو2010 من حوالي سنة. وركبت الأيه فور أكتر من مرة مع كذا واحد من معارفي. وتقييمي كالآتي:
الشكل الخارجي: السيتي أشيك من وجهة نظر الجميع وغير كده هي غير منتشرة فتلاقي إنها ملفتة للنظر جدا.

الصالون الداخلي: طبعا السيتي أشيك بمراحل. وهي أذواق ولكن الكل بيشكر في شكل عربيتي من جوا.

قوة الموتور: تحسم لصالح السيتي موتور 1500 أي في تك. قوي جدا وغير كده البودي أخف من الإيه فور.

الفيتيس: الفيتيس المتطور للسيتي بيتفاعل أحسن وأذكى من الإيه فور. وده بتحس بيه مع إختلاف طرق سواقتك. يعني بيعرف إنت بتشد فينقل متأخر ولا ماشي براحتك فينقل بدري.

الثبات: الإيه فور تتفوق على السيتي في النقطة دي. بس متهيألي الفرق مش كبير.

السرعة القصوى: السيتي محددة إلكترونيا ب 190 رغم إن الموتور يجيب أكتر من كده. لما بمشي على 160 الأر بي إم بيبقى على 3500 لفة فقط.

توفير إستهلاك البنزين: لصالح السيتي بمراااااحل. تحسه 1000 سي سي مش 1500 أي في تك

الراحة للراكبين: عن تجارب شخصية ومن ناس ركبت عربيتي وركبت الإيه فور، السيتي أكثر راحة ونعومة وكنبة خلفة أوسع وعزل أحسن من الإيه فور.

الأوبشنز: بصراحة ما بصيتشي على أوبشنز الإيه فور. بس أنا مش محتاج حاجة زيادة عن اللي عندي. أوتوماتيك، إيه بي إس، 2 إير باج، زجاج كهرباء، مرايات كهرباء، سي دي محترم جدا.

قطع الغيار والصيانة: بصراحة معرفش الفرق بين الإتنين ولكن أنا عربيتي عملت بيها لحد دلوقتي 9200 كيلوا وكيل اللي صرفته عليها 440 اللي هما صيانة ال 5000. وفي كمان 440 لما أروح أعمل ال10000. بس مافيش مليم زيادة.

سعر إعادة البيع: متهيألي الإيه فور تكسب عشان هي منتشرة أكتر من السيتي.

والسلام ختام

مقارنه رائعه يا فروزن