الموضوع: سنة اولى قطط :) ياريت اي نصايح يا جماعة

اهلا اهلا .. انتى انضميتى للقايمة
مبروكككك
اولا لو احتجتى حاجة .. كلمى المدام او كلمنى واحنا نقولك على كل اللى انتى عايزاه من اكل وشرب وعلاج وكل حاجة للقطط
خبره من 2007
بص يا ستى عشان باقى الاعضاء يستفادوا معاكى اللى غاوين فى الموضوع ده

بخصوص الرمل :

لو هى اتعودت وهى صغيرة زى باقى العائلة عندها على الرمل .. خاليكى معاها على الرمل
بس ابعدى عن الرمل اللى عند اى موان .. عشان الرمل ده بيكون موجود فى الشارع .. وبيكون عليه امراض كتير .. ومفروض اننا بنحمى القطة وحطنها فى البيت .. بكدا بنجيبلها الامراض لغاية عندها
خاليكى فى الرمل الطبى .. فايدته .. امن جدا للقطط .. وكمان مش بيعمل ريحة بسرعة .. ولو عندك قطة واحدة فى البيت .. الكيس الرمل ممكن يقعد معاكى حوالى شهر ونص .. بتحطيه على 3 مرات
وكل يومين تطلعيه فى الشمس ربع ساعة .. ويفضل تجيبى الرمل الحجرى اللى حبيباته على شكل رمل حجرى .. مش حبوب صغيرة بتتحوصل وتتجمع .. ده عن تجربه
والرمل الطبى .. ابعدى عن النوع المصرى .. وده تمنه فى حدود 15 جنيه الكيس 2 لتر
وخاليكى فى الرمل الطبى المستورد .. حتى لو كان صينى .. فى رمل كويس جدا اسمه فرش ستب .. بيتباع فى حدود 30 جنيه ال2 لتر تقريبا .. وده خاليكى فيه
وحرام تجيبى الكرستال منه عشان غالى جدا

بخصوص العلاج:

لازم يبقا عندك قطرة للعين عشان الاحمرار والافرازات .. ولو تعبانة تديها نقطة فى كل عين حوالى مرتين فى اليوم .. ولازم يكون عندك دواء للترجيع اسمه موتليم تاخده فى سرنجة 3 سنتى مرة فى اليوم لغاية ما الترجيع يخف.. ولازم يكون عندك دواء للاسهال زى الانتينال .. تفكى الكبسولة وتحطة نص الكبسولة فى سرنجة 3 سنتى وتديها للقطة .. والنص تانى اخر النهار .. يعنى الكبسولة تقسيمة على مرتين فى اليوم .. وفى الوقت اللى يكون عندها اسهال .. امنعى اكل السمك واكل الالبان والزبادى ..
لازم يكون عندك فيتامين .. خاص بالقطط .. بيكون زى القطرة .. بتنقطى بيه على الاكل نقطة كل يومين حتى وبتجبيه من عند مزرعة سامى فى الزمالك
او ممكن تجيبى بداله فيتامىين اطفال من اى صيدالية اسمه مالتى سانستول ودوا تانى اسمه ديكال .. المالتى سانستول عشان فيتامين أ و د .. والديكال عشان العظم
والاتنين تديهم للقطة 3 مرات فى الاسبوع مثلا .. ابره 3 سنتى من كل دواء
و طعمى القطة التطعيم الرباعى .. وبعد كدا حطعميها كل سنة

بخصوص العناية
فى الشتاء بلاش حموم عشان السقعة .. ونظفى للقطة بس بقطنة بخل
وفى الصيف حمميها مرتين فى الشهر بشامبو نيوزرال
التسريح 3 الى 4 مرات فى الاسبوع .. وبالاخص فى منطقة الرقبة والبطن وعند الرجل .. وياريت يكون بعكسل الشعر كمان عشان تطلعى الشعر الميت وتجددى الخلايا
ياريت كل اسبوع تقصى ضوافرها عشان تتعود من صغرها على كدا .. اهم حاجة الضوافر اللى قدام .. وخلى اللى ورا عشان اللى ورا بتكون زى فرامل بتثبت بيها نفسها القطة لو حتقع من مكان مرتفع
ودان القطة كل اسبوع تنظفيها بمحلول البوريك اسد تجبيها من الصيدالية العادية .. يكون تركيزه قليل .. وتظفى بيه منطقة الانف
نوعى كل فترة مكان الاكل .. كل 5 شهور مثلا لو تقدرى تجيبى طبق اكل جديد او تغيرى طبق الاكل من باب التغير .. عشان القط مش يحس بملل
لازم يكون عندك فرشتين من فرش التسريح للقطط .. واحدة واسعة السنون بتعتها وواحدة ضيقة
ولازم يكون عندك قصافة ظوافر
وبخصوص الجواز .. حتى لو طلبت الجواز قبل سنة .. اصبرى لما عمرها يكون 9 شهور او 10 شهور وجوزيها .. عشان عضمها يتحمل الحمل .. والمرغمة اللى بتعملها عليكى دى دلع ولعب مش اكتر

بخصوص الممنوعات :

.. الاكل المقلى بالزيت .. الشكولاتة .. الفاكهة .. اللبن الدسم بلاش منهم
وبلاش الاكل المجففة للقطط زى الويسكاس وخلافه تاكل لوحده بدون عيش او على خضار .. وكمان يستحسن بلاش منه اصلا
بلاش اكل لحوم ناية .. زى لانشون وزى بلوبيف
السمك بزيادة غلط
التونة الزيت بتعها .. يعنى ممكن بس تغسل التونة من الزيت .. ومش كتير
الكبدة كترها غلط

بخصوص الاكل :

فى الاول .. هاتى كيس دراى فود .. لازم يكون عندك .. عشان فيه فيتامينات لقطة وحيفيدها .. بس اوعى تديه للقطة وش كدا .. وتحطى دراى فود تاكله لوحده .. بمعنى
انتى بتحطى الاكل اللى بتحطيه للقطة .. مثلا خضار مع لحمة .. تكونى جايبة الدراى فود وتطحنيه وتحطى الحبوب مطحونة على الاكل .. وتهرسيها كمان فى بعضها مش تسبيها على وش الاكل .. لانها ذكية ممكن تلحسه
بالطريقة دى انتى بتخليه تاكل اى كل مش عايزه تاكله .. لان عليه نكهة الدراى فود
وكمان بتديها فيتامين ليها
بصى بقا نيجى للاكل الاكل بجد
ريحى روحك واعملى الاتى
جيبى زى ما قولتلك الدراى فود يكون نوع ماوى مكس او كات شو او رويال كانون .. ودول افضل الانواه اللى فى السوق .. ومن اسمائهم .. بدات فى الارخص فالاغلى
المهم اطحنى الدراى فود وخاليه فى كيس .. عشان ترشى على الاكل .. والاكل اعملى الاتى
اعملى حلة كبيرةةةة قطع فيها جزر وكوسة وبطاس وحطى معاهم فاصوليا خضرا مثلا بس الفاصوليا مش كتير .. والجزر اسلقيه لوحده عشان يطون مهرى
المهم بعد ما تسلقى الخضار المشكل ده .. حطيه فى اكياس على قد وجبات فى الفريزر .. على قد وجبتين فى اليوم .. ولما النهاردة مثلا ماما عاملة فراخ .. تاخدة حتة من الفراخ وتحطى على الكيس اللى حتطلعيه من الفريرز ده .. عاملة لحمة وهكذا
وبردوا مش كل يوم خضار خضار .. نوعى
يعنى مثلا ممكن تسلقى رز بمياه .. من غير زيت ولا ملح .. وتحطى عليه قطع فراخ صغيرة او لحمة من اللى طبخينة النهاردة ..
ممكن مكرونة مسلوقة .. وعليها تسلقى كبدة .. وتهلاسيهم .. الكبدة من غير بصل ومن غير توم .. لان الحاجات دى غلط على القطط
حاولى تخترعى وتالفى وجبات .. يومين فى الاسبوع تنوعى فيهم الاكل عشان القطة ممكن تزهق وتطلب كنتاكى وتذلك
والفطار .. مرة نستو .. ومرة بيضة .. ومرة مثلا لب الفينو معاه نستو .. او معاه بيضا
وممكن ترشى عليه الحبوب المطحونة وهكذا
المهم 3 وجبات فى اليوم .. عشان القطة مش تحس بكسل ..
وكمان ياريت مش تحطى الاكل بكميات فى الطبق ..على قد ما تاكل .. المهم مش بزيادة عشان مش يتبقا وتعملك اضراب ووتعود وتزهق
ولو عايزة تدى القطة لبن تشربه .. يبقا لبن خالى الدسم .. او لبن العادى بس خفيفيه بمياه عشان ميبقاش دسم .. 3 مرات فى الاسبوع .. بس حبة صغيرين دافيين

بخصوص اللعب :

طبعا القطة فى الاول بتكون مطنشة وتقيلة فى البيت .. عشان عقبال ما تتعود على المكان .. وبتعمل احيانا انها طرشة .. بس بعد كدا حتجننك

المهم هاتى حبل والعبى معاها .. حركى ايدك من ورا قماشة .. حتتجنن .. هاتى ليزر والعبى معاها

انا كنت بجننها بالليزر ده واخليها تلف حوالين نفسه وتدوخ ههههههههههههه



فى النهاية .....

اللى عايز قطة يا جماعة عندنى قطة زيادة للتبنى .. فا اللى عايز قطة وعنده طولة بال .. وبيحب القطط وتربيتهم ومش حيفرط فيها يقولى .. لان عندى قطتين ومش قادر على الاعتنا بالاتنين .. والاتنين اناث

بس اللى يخدها مش تاجر او عايز ياخدها للجواز لقط عنده وبعدين يرميها عضم
انا عايز حد معندوش قط وحابب يربى قطة

القطة عمرها 4 سنين .. شيرازى

بس كدا ...

ولو احتجتى اى حاجة يا دونزى انا تحت امرك