الموضوع: ..:::بالصور :::.. تجربتي مع تركيب فوانيس شبورة أصلية لـ f3

المشاركة الأصلية كتبت بواسطة sv065

السلام عليكم ورحمة الله وبركاته


إخواني الأفاضل منذ أن إشتريت الجميلة BYD-f3 منذ حوالي عامين ونصف وأشعر بالضيق لعدم وجود فوانيس الشبورة الأصلية بالسيارة رغم أنها فئة GLX-I جميع الكماليات وظللت أسعي في عدة اتجاهات لتركيب هذه الخاصية عندي ولكن للأسف فشلت في العثور علي فوانيس أصلية أو متوافقة ولو من أي ماركة تصلح للتركيب علي الجميلة سواء بالتوكيل أو بمحلات الكماليات وبعد دراسة إتأكدت إن السيارة مجهزة بضفيرة الكهرباء لتركيب نظام فوانيس الشبورة.


ففكرت في عمل تعديل علي العواكس المثبتة بالجميلة التي هي عبارة عن شكل فانوس مفرغ بحيث تتحول لفوانيس شبورة.






وبالفعل قمت بتركيب فوانيس شبورة زجاجية صغيرة -من النوع العادي الذي يصلح لأي سيارة- داخل العواكس التي بالجميلة عن طريق قطع هذه العواكس بالكاوية من الخلف لمساحة تكفي لإدخال فانوس الشبورة الصغير ثم قمت بتثبيته بالسيلكون والغراء السريع جيدا وجهزته للتوصيل علي الضفيرة لأني لاحظت وجود فيشتين مخصصتين لفوانيس الشبورة موجودة خلف الإكصدام الأمامي للتوصيل مباشرة دون قطع بسلك الضفيرة الأصلي أو عمل توصيلات خارجية غير آمنة وذهبت للتوكيل لتوصيل هذه الفوانيس المعدلة علي زرار الشبورة الخلفية الموجود أصلا إلا أني فوجئت بالرد المنطقي بعدم إمكانية ذلك لخطورته الشديدة التي تتمثل في أن العواكس المثبتة بالسيارة ضعيفة علي تحمل حرارة الفانوس الذي ثبته بداخله ويمكن أن تسيح وتتسبب في عواقب لا يعلمها إلا الله وسبق أن حدث ذلك مع أحد مالكي السيارة فضلا عن أن مفتاح الشبورة الخلفية قدرته لا تتحمل تشغيل لمبات الشبورة الأمامية.


فعدلت عن فكرة توصيلهم وعدت من نقطة البداية أبحث عن الفوانيس الأصلية وزاد عليها مفتاح نور الشبورة الاصلية لذا يجب إستبدال ذراع النور الموجود علي يسار الدريكسيون بذراع به مفتاح لنور الشبورة الامامية ولكن دون جدوي أيضا.





وبالصدفة أثناء تواجدي بالتوكيل فرع القطامية سألت عن إمكانية قيام التوكيل إستيراد فوانيس شبورة أصلية ففوجئت بوجود فوانيس شبورة أصلية أساسا عندهم فسارعت بشراء طقم تبينت بعد ذلك أنه كان آخر طقم بالمخازن فحمدت الله واشتريته وكانت المفاجأة الثانية هي السعر ... تخيلوا الطقم الأصلي كامل باللمبات الأصلية كمان سعره كام بعد الضريبة ؟؟؟ !!!

140 جنيه مصري ..... الصراحة .....يابلاش.









وبالفعل ركبتهم بمعرفتي عن طريق فك الإكصدام ولقيت الفيشة الموجودة خلف الإكصدام لونها أزرق وواضحة بتركب تمام بالمقاس عليهم دون أي تعديلات - ملحوظة الفانوس اليمين الكابل بتاعه في الضفيرة بيكون متني ومجنب تحت قربة مياة المساحات وعلبة زيت الباور -تقريبا لأن المكان ده حساس شوية وكله سيور- علشان ممكن ما يكونش باين زي الكابل الشمال.


وكده نبقي خلصنا 50% من المهمة نيجي بقي للنقطة الصعبة وهي أولا الحصول علي مفتاح يصلح للتركيب بجوار لمبة الإنذار وأزرار التحكم بالمرايات تحديدا مكان الكوينز اللي خلعته علشان أفضي مكان للمفتاح ثم توصيله علي الضفيرة بالأسلاك المخصصة لنور الشبورة.


بالنسبة للمفتاح اشتريت واحد جديد ب 100 جم من الحرفيين محل العالمية تويوتا بعد فشلي مع محلات المستعمل تقريبا المحلات كانوا بيكسلوا يدورا أصلا مش عارف ليه لما كنت أقول عاوز مفتاح شبورة تويوتا حتي لو مفتاح الإنتظار -الفلاشر- بتاع المكروباص التويوتا لأنه نفس المقاس في التابلوه


ما علينا .. الصراحة المفتاح كان سيء للغاية وباين عليه خاماته مش تمام .... قلت اللي موجود وخلاص لأني كنت لفيت كتير ومالقيتش ورحت بيه للتوكيل علشان أركبه وخفت ألعب أنا في المنطقة الحساسة دي وأنا لست خبرة فقلت إدي العيش لخبازه أحسن وعلشان أنهي الموضوع الطويل ده وأروح بيتنا بنور الشبورة شغال فلما وصلوا الفيشة علي الضفيرة ركزت وعرفت بقي بياخد السلك من لمبة النور الخاصة بالمبين بتاع نور الشبورة اللي في لوحة العدادات بعد ما عمل تست عليها وإتأكد منها علشان يوصل عليها المفتاح اللي لما اتركب في التابلوه كان بيعلق ومش بيشتغل لسوء خامته كما وضحت فقلت للفني في المركز وهو الصراحة كان محترف في شغله وعارف بيعمل ايه بالظبط ودي نقطة مهمة جدا قلت له كمل التوصيلة علي كده وانا حابقي اغير المفتاح من المحل اللي اشتريته منه قالي ماشي فاضطريت أرجع المفتاح تاني للمحل في الحرفيين وغرمت 25 جنيه عالفاضي ثمن الفيشة بتاعته لأنها كانت اتوصلت خلاص ورميتها تاني.


وبعد لف ودوران اشتريت مفتاح إستعمال بفيشته من الحرفيين برضه وبنفس الثمن من واحد صديق اكتشفته بالصدفة هناك بس فرق السما من الأرض مفتاح أصلي فعلا شكلا وموضوعا ووصلت فيشته بإيدي علي السلوك اللي كانت في الفيشة بتاعة المفتاح التعبان ... مانا خلاص عرفت الصنعة بقي وبفضل لله وحده شغال تمام زي الفل وبينور نور أخضر في التابلوه مبين الشبورة جنب عداد البنزين زي ماهو باين في الصور.































وتوتة توتة فرغت الحدوتة


ومن هنا أنادي السادة الأفاضل في التوكيل بتوفير ذراع النور الأمامي المزود بمفتاح شبورة أصلي يتركب مكان المفتاح العادي المزودة بيه السيارة مرة واحدة فك وتركيب بدل اللف والدوران علي موضوع المفتاح الخاص بالشبورة الأمامية لأنه طالما الفوانيس موجودة يبقي الصح تكون بالمفتاح الأصلي.


معذرة إخوتي لأني قد أطلت عليكم وأرجو أكون وفقت في شرح تجربتي لتركيب الفوانيس ومرحبا بأي إستفسار لكم في هذا الموضوع .


خالص تحياتي..

السلام عليكم

الف مبروك على التركيب والمثابرة و العزم ......

سؤال اخى الكريم ...1- هل البى واى دى f3 المانوال فيها مكان لكشافات الشبورة الامامية و الخلفية ؟؟؟وهل يوجد مبينات لهم فى التابلوه ؟؟؟؟ولها مفتاح امامى وخلفى للشبورة ؟؟؟

وجزاك الله خيرا ....

طبعا انا اعلم بالمجهود المبذول فى التصوير والشرح والوصف الدقيق فعلا سيادتك كما قلت لك سابقا ابو السخاوة والرجولة كما عهدت سيادتك وربنا يبارك فيك جدا المهم مثل الاول كان الذى يريد يشترى سيارة كان يطلب سيادتك وسيادتك كنت تذهب معه لشراء السيارة برغم مشغولياتك الكثيرة احتمال الذى يطلب تركيب الفوانيس يطلب سيادتك للاشراف على التركيب
المهم من اجل ان لانزيد اتعابك وجمايلك علينا نعرف هل الصنايعى موجود فى القطامية ولا فى الاسكندرية وهل هو موجود ام غادر وشكرا مليون مرة على مجهود سيادتك الرائع

المشاركة الأصلية كتبت بواسطة alaa0000000

السلام عليكم

الف مبروك على التركيب والمثابرة و العزم ......

سؤال اخى الكريم ...1- هل البى واى دى f3 المانوال فيها مكان لكشافات الشبورة الامامية و الخلفية ؟؟؟وهل يوجد مبينات لهم فى التابلوه ؟؟؟؟ولها مفتاح امامى وخلفى للشبورة ؟؟؟

وجزاك الله خيرا ....

وعليكم السلام ورحمة الله

بارك الله في حضرتك وأشكرك جدا علي كلامك الطيب والحمد لله كل شيء تم كان بتوفيق من الله وحده

بخصوص BYD مانيوال والمفروض أنها إما G-i أو GL-i حسبما عرفها الوكيل بمصر هي نفس مواصفات سيارتي GLX-i بالظبط في هذه النقطة وجميع هذه الموديلات متوفر بها نور شبورة خلفي شمال + عاكس يمين أي هيكل فانوس مفرغ مثل الفوانيس الأمامية وأحيانا يقوم البعض بتوصيل لمبة صغيرة به ليضيء مثل الفانوس الشمال.





والسيارة مجهزة بمفتاح مستقل بالتابلوه لنور الشبورة الخلفي وهو واضح بالصور المرفقة بالموضوع الأصلي علي يسار أزرار التحكم بالمرايات وكذلك له لمبة مبين بالعدادات مميزة لونها برتقالي اما نور الشبورة الأمامي فهو كما وضحت متطلبات تشغيله بالموضوع الرئيسي وهو سبب هذا الموضوع أصلا لأن نور الشبورة الأصلي لا يتوفر كامل من المصنع إلا في موديل GLX-i NAVI المزود بجهاز DVD وGPS

أتمني أن أكون قد وضحت كما ينبغي

خالص تحياتي

المشاركة الأصلية كتبت بواسطة elmanahry

طبعا انا اعلم بالمجهود المبذول فى التصوير والشرح والوصف الدقيق فعلا سيادتك كما قلت لك سابقا ابو السخاوة والرجولة كما عهدت سيادتك وربنا يبارك فيك جدا المهم مثل الاول كان الذى يريد يشترى سيارة كان يطلب سيادتك وسيادتك كنت تذهب معه لشراء السيارة برغم مشغولياتك الكثيرة احتمال الذى يطلب تركيب الفوانيس يطلب سيادتك للاشراف على التركيب
المهم من اجل ان لانزيد اتعابك وجمايلك علينا نعرف هل الصنايعى موجود فى القطامية ولا فى الاسكندرية وهل هو موجود ام غادر وشكرا مليون مرة على مجهود سيادتك الرائع

دكتور مناهري حضرتك إن كان فيه سخاء زي ما حضرتك تكرمت وذكرت فـإحنا إتعلمنا من حضرتك ومن إسلوبك الجميل والمستفيض وإزاي نحاول نوضح المعلومة للغير بقدر المستطاع وأنا ماعملتش حاجة خالص غير أني باحاول أنقل اللي اتعلمته لأني عارف إن فيه ناس كتير عاوزة تشغل نور الشبورة زيي بالظبط ويمكن أكتر كمان والخطوة القادمة إن شاء الله حاركب له زينون بس لما ألاقي وقت وعلشان بيحتاج تعديل بسيط لأسلاك الفانوس وعاوز أعمله بنفسي.




والتوصيل اللي باعتبره أهم وأخطر نقطة كان نفسي أعمله في مركز الإسكندرية لكن للأسف ماكنش فيه وقت متاح لي للسفر ولذلك تم في مركز القطامية ولم يستغرق أكثر من 10 دقائق شغل وكان يوم السبت الماضي وأعتقد إن الفني ما زال هناك والموضوع بسيط جدا طالما الفني فاهم هو بيعمل ايه


وأنا تحت أمر الجميع في أي شيء



خالص تحياتي

المشاركة الأصلية كتبت بواسطة ehabpopo

مشكور يا استاذ / وليد على مجهودك وعلى موضوعك المفيد جدا ... وبصراحة انت مثال اكثر من جيد على الصداقة بكل معانيها ... لانك مش بتبخل على اى حد بالمعلومة ... وكمان توضيح المعلومة اكتر من اللازم ...
واعتقد ان شكل المفتاح حلو مش وحش ... والف مبروك يا باشا على التركيب .. وعقبال الزينون

العفو يا باشا علي إيه وعقبال عندك بس بالذراع الأصلي الكامل إن شاء الله

المشاركة الأصلية كتبت بواسطة ziabassem

ممتاز يا وليد باشا في المجهود والمحتوى اللي أضفته للأعضاء .. وده شيء مش غريب عليك .. فأنت عمدة البي واي دي .

باسم باشا حبيبي تلاميذك يا كبير