بتاع المفاتيح يقدر بس ينسخلك على السلاح الجديد نسخة من المفتاح القديم يفتح الابواب (السنتر) والشنطة لكن ميدورش العربية ولو بالطبل البلدى .. والسبب ان دوارة العربية متكودة بشفرة بتتحمل على جزء (يسمى بلغة الصنايعية الفحماية) حاجة شبه الفيوزات اللى بتبقى فى الكاسيتات او الراديوهات (شبه لمبة نيون صغيرة جدا جدا) بتركب جوة علبة المفتاح وعند الدوران بيقوم ايموبلايزر العربية بقراءة الشفرة منها ومن ثم تشغيل العربية
انا كان ليا تجربة مشابهة الى حد ما .. المفتاح الاصلى التانى ضاع مع شنطة المدام لما اتسرقت فحبيت اعمل مفتاح تانى مطابق ولما سألت فى التوكيل دخلونى فى حوارت طويلة عريضة وخوفونى انه ممكن ميشتغلش وممكن نغير كنترول ايموبلايزر وكبروا الموضوع فأنا خوفت اعمله ولكن انا كنت اشتريت المفتاح فاضى بالسلاح من المركز الرئيسى فى ابو رواش وقولت اعينه عندى لحد ماشوف حل .. المهم جاتلى فكرة الى حد ما كانت حل مقبول بالنسبالى وهى ان نحط فحماية فى المفتاح الجديد ونحمل عليه اكواد العربية ونخرط السلاح على المفتاح القديم وبالتالى اقدر افتح العربية وادور (لكن من غير ريموت لان مفيش بوردة جواه) بعيدا عن وش التوكيل ووجع الدماغ .. بالفعل طلعت على واحد بتاع مفاتيح عندنا ركبلى فحماية وحمل اكواد العربية واتكلفت 250 جنيه + 120 جنيه تمن المفتاح فاضى من التوكيل يعنى الموضوع كله حوالى 400 جنيه والمفتاح شغال كويس بس عيبه الوحيد ان ساعات العربية انذارها بيشتغل لما بفتحها بيه بس بتبطل كلاكسات لما ادورها ولكن انا بس عاينه استبن لاقدر الله عشان لو المفتاح الاصلى اللى ضاع يبقى فيه نسخة تانية اقدر افتح بيها العربية بدل ما اغنى ظلموه.
فى حالة الاخ هوجان صاحب الموضوع كان الاسهل بدل ماتوجع دماغك انك تخرط المفتاح الجديد على القديم وبتاع مفاتيح شاطر زى اللى انا روحت له كان سهل جدا ينقل كل محتويات المفتاح القديم (اللى اتفصل عن بعضه) الى المفتاح الجديد ويبقى عندك مفتاح بريموت طبق الاصل من مفتاحها الاصل ولكن عامة الف مبروك عليك مادام اشتغل تمام.
المفضلات