استفسارات بخصوص جين 2

**alaa7sh** · 10-12-2011 10:48 PM

كنت مسافر من يومين وطالع علي طريق الكريمات وكنت رايح لـ بني سويف. وكان طريق محترم والعربية قمة في الاحترام والثبات بمنتهي الأمانة. مع العلم انا كنت عامل 2900 كيلو لحد دلوقتي. "مع العلم اني بمشي في طرق متكسرة كتييير
بس في كام مشكلة ظهرولي.
أولها. العربية دايما بتميل علي اليمين لما بثبت الدريكسيون !
ثانيا: العربية وانا مسافر الدريكسيون كان بيترعش في ايدي بس مش أوي
دخلت بني سويف وببص ع الموبايل وفجأة كان في حاجة زي العتب خرساني بيفصل الحارات وانا ماخدتش بالي منه. قمت لابس فيه وكل اللي في العربية اتهبدوا مع الخبطة. نزلت والحمد لله الخبطة كلها جات في الجنط والكاوتش. ومافيهوش حاجة غير لو اسود من الخبطة طبع ع الجنط فقط.
المشكلة الكبيرة بقي وانا راجع القاهرة تاني لاحظت ان من سرعة 80 لحد 140 بلاقي رعشة قوية جدا في الدريكسيون وبتختفي شوية لما بوصل للـ 170 + اشتكوا الراكبين في الكنبة الورانية من رعشة في الكرسي نفسه !

معقولة العربية تكون عايزة ترصيص وهي حاليا وصلت للـ 3000 كيلو ؟
وتنصحوني باية بخصوص الميل لليمين عندي؟

**eng.m7md.ali** · 10-12-2011 11:08 PM

هيا فعلا ممكن تكون محتاجة ترصيص ومش شرط تكون العربية ماشية كتير ده بيعود على الطرق المصرية الجميلة اللي بتمشي عليها ومتنساش كمان الخبطة اللي جات في الجنط دي ممكن تكون اثرت كمان وعوجت الجنط والله اعلم
احسن حاجة روح اكشف عن حد محترم زي بريدجستون عمارات العبور واطلب انك ترصص وشوف هيقولك ايه
وان شاء الله خير

**Europian** · 11-12-2011 03:48 AM

فعلا الترصيص مش مرتبط اوى بلكيلومترات قد ارتباطه بحاله الطرق
واكتر حاجه ممكن تخليك محتاج ترصيص خبطه جنط جامده زى اللى بتحكى عنها ده
عموما رصص واظبط ضغط الاطارات وكله هيبقى تمام انشاءالله

**Europian** · 11-12-2011 03:51 AM

بلنسبه ان العربيه بتميل يمين اعتقد ان ده حاله عامه فى الجين تو خصوصا 2011 مش عارف ليه بس عموما ظبط الاطارات 31 قدام و 28 ورا وانشاء الله تتظبط الدنيا معاك ولو استمر الموضوع اعمل ظبط زوايا وانشاء الله كله هيبقى تمام

**m_marmoush** · 11-12-2011 09:08 AM

ممكن تكون الخبطة أثرت فى العفشه أو تنت حاجه..... مش شرط خالص تكون ترصيص خصوصا بعد حادث

**alaa7sh** · 11-12-2011 03:43 PM

طيب من رأيكوا أتقل ع العربية لحد صيانة الـ 5 الاف واعملها في عصام وصفا واكشف ع العفشة بالمرة
والا ماستناش واعملها في بريدجستون ؟

**Nistelrooy** · 11-12-2011 04:06 PM

عصام صفا ماعندوش خدمة الكاوتش والحاجات دي بس ممكن يديك كارت تعملة في بنزينة جنبهم مش فاكر اسمها ..

انا افضل بريدجستون .. انا عامل عندهم زوايا وترصيص .. وواخد خصم علشان حاطط ستيكر نايل موتورز

الزوايا بخمسين وبقت بـ 35 علشان الاستيكر ..

-----------

ولو انتا رايح الصحراوي ( الصيانة خليها هناك )