الموضوع: استفسارات بخصوص زيت الشنبر

يا جماعة الخير أرجو الإجابة ، وبالمرة ضيفوا عندكم السؤال ده:

هل كل السيارات المانول بيضاف لها زيت للفتيس، طيب سيارتى بقالها معايا سنة ونصف ومالقتش فى الموتور أو الفتيس أى مكان ينفع يكون مدخل لزيت الفتيس، تنصحونى بإيه؟؟؟

السيارة ديهاتسو ميرا 98 كربراتير

زيت الشنمبر بيتحط بعد كل تغيير زيت و مفروض تغيير الزيت بعد 2000 كم و المفروض طبعآ تغير الزيت بدرى علشان بيكون اتلوث من كبس المحرك و اللى يقدر يحدد المحرك يقعد اد ايه عوامل كتيره منها طريقة السواقه و مدى التآكل فى المحرك و لو المكنه لسه مبطلعش زيت من الشكمان اتوقعلك انها ممكن تكمل معاك 30 الف لكن لو فيه حرق ويت جامد من الشكمان ممكن تعمل معاك من 10 الى 15 الف و فيه طريقه كويسه تقدر تحدد انت فى انهى مرحله هناك 3 مراحل اساسيه فى حياة اى محرك الطريقه افتح غطاء الزيت و سيبه على المحرك و دور لو الكبس تمام التمام مفروض ان الغطاء يفضل ثابت فى مكانه و هى ديه المرحله الأولى و لو فضل يتهزهز فى مكانه زى غطاء الأبريق الساخن يبقى فى مرحله متوسطه من العمر و ممكن تعمل معاك العربيه 50 الف لكن لو جيت تدور و طار لفوق يبقى كده بيودع و جهز مصاريف العمره لأنه فى اى وقت ممكن ميدورش تانى و يبقى جاب آخره

شكرا على ردك أخى الكريم
إلى الآن والحمد لله فإن الشكمان لا يظهر فيه آثار زيت ولكنه دائما (مهبب بغبار أسود دقيق جدا) لكنه مش مزيت

إن شاء الله أعمل اختبار غطاء الزيت اللى أشرت إليه

النقطة اللى عاوز أتأكد منها هى موضوع تغيير الزيت كل 2000 كم ، إن أصلا بعد وضع الزيت بحوالى 1000 كم بلاقيه خس النص (يعنى الزيت وصل لمنتصف مؤشر القياس) وبالتالى بازوده لحد علامة max ولما يعمل 1000 كيلو كمان ألاقى نفس الموقف ، فهنا أتصرف إزاى؟؟ هل أنزل شوية الزيت اللى فاضلين وأحط زيت جديد ومعاه علبة من الشنبر؟؟؟ ولا أكمل زيت وخلاص ؟؟؟ ولا أعمل إييه؟؟؟
مع التذكير إن الموتور كمان بيسرب زيت (عشان ما حدش يفتكر إن سبب النقصان هو التآكل فقط)
برجاء الإفادة

طبعآ ابسط تسريب بيسبب نقص كبير انا كان عندى جوان عمود الكرنك بيسرب زيت و طنشت لقينه بينقص ربع كل 900 كم و لما اتعمل مابقاش فى نقص و جرب اختبار الكبس و قولى بس لازم تكون العربيه سخنه و جرب تحط زيت شل سوبر اصفر و معاه زيت شنمبر و شوف ايه الأخبار ممكن يقعد معاك تكتر من الأحمر و بردو لو نقص افضل زوده لحد 2500 كم

المشاركة الأصلية كتبت بواسطة shoudy2005

و فيه طريقه كويسه تقدر تحدد انت فى انهى مرحله هناك 3 مراحل اساسيه فى حياة اى محرك الطريقه افتح غطاء الزيت و سيبه على المحرك و دور لو الكبس تمام التمام مفروض ان الغطاء يفضل ثابت فى مكانه و هى ديه المرحله الأولى و لو فضل يتهزهز فى مكانه زى غطاء الأبريق الساخن يبقى فى مرحله متوسطه من العمر و ممكن تعمل معاك العربيه 50 الف لكن لو جيت تدور و طار لفوق يبقى كده بيودع و جهز مصاريف العمره لأنه فى اى وقت ممكن ميدورش تانى و يبقى جاب آخره

عند إجراء الاختبار ده والعربية ساخنة لم يتحرك غطاء الزيت من مكانه
دلوقتى أنا مازلت محتار فى موضوع إنى استخدم زيت شنبر لإنى خايف يكون الموتور حالته لسه مش وحشة للدرجة دى، وكمان الجو بدأ يبرد وبالتى التسخين صباحا هيبقى أصعب مع إضافة زيت الشنبر

عاوز أضيف حاجة كمان : إن العربية بتدخن من الشكمان مع كبس دواسة البزنين بشدة والفتيس ممور
إنما لو العربية واخدة غيار مهما أكبس مبالقيش دخان طالع من الشكمان

وبالتالى كل الميكانيكية اللى حكموا على الموتور إنه خفيف بنوا رأيهم ده من تجربة العربية على الواقف

يا ترى أعمل إييه

اسمحوا لى ان اطرح معلوماتى عن هذا الموضوع
بالنسبه لزيت الشنبر فاسمه الاساسى معالج زيوت oil treatment
وهو يعمل على رفع درجة غليان الزيت وطبعا طالما هناك غليان توجد فقاقيع هواء التى يمكن ان تفصل الزيت عن الاجزاء المعدنية فتسبب تاكلها فبالتالى يضمن زيت الشنمبر وجود طبقة رقيقة مستمرة من الزيت على اجزاء المحرك الداخلى ويمكن استخدامه اثناء وبعد تجميع الموتور فى العمرة بنسبة 1/1 مع الزيت العادى وفى الاحوال العادية يمكن اضافة400مل على غيار الزيت وممكن باستعماله اطالة فترة غيار الزيت العادى او المعدنى حتى 5000 كيلومتر
الدخان الملحوظ مع دواسة البنزين فى المور ممكن من الكاربوراتير لو اسود ولو ابيض متطاير اى سريع الاختفاء يكون بخار ماء خاصة فى الشتاء او فى بداية الدوران صباحا واذا كان ابيض يسهل تتبعه ومع حمل الموتور يكون الموتور خفيف بالاعلى عند الشنبر وممكن يكون الموتور خفيف ولا يدخن ولكن يحتاج عمرة اذا زودت rpmولاحظت صوت رزع اسفل الموتور اما الدخان فقط فممكطن يحتاج شنبر فقط وارجو التعليق على كلامى ممن عنده دراية

المشاركة الأصلية كتبت بواسطة maka

بس زيت الشنبر بيتقل الزيت وبيخلى صوت الموتور عالى جدا فى اول

الدوارة ومعنى كده ان الاحتكاك عالى جدا و استنزاف سريع للموتور

ماهو علشان كده انا متردد فى استخدامه لحسن يؤدى لنتيجة عكسية
ده بالإضافة إنى مش متأكد تماما من أن حالة الموتور عندى تستلزم استخدامه

أرجو من إخوانى أيضا إفادتى فى هذا السؤال "
هل كل السيارات المانول بيضاف لها زيت للفتيس، طيب سيارتى بقالها معايا سنة ونصف ومالقتش فى الموتور أو الفتيس أى مكان ينفع يكون مدخل لزيت الفتيس، تنصحونى بإيه؟؟؟

السيارة ديهاتسو ميرا 98 كربراتير "