انهي احسن عربية اجبها بيتلز ولا 128 مع الاسباب؟ علما بانها هتكون اول عربية اجبها و شكرا
عرض للطباعة
انهي احسن عربية اجبها بيتلز ولا 128 مع الاسباب؟ علما بانها هتكون اول عربية اجبها و شكرا
انا شخصيا لو هشتري هختار 128 للاسباب الاتية :
1- قطع غيار متوافرة جدا وجديدة وسعرها رخيص
2- اي حد بيفهم فيها بخلاف البيتلز ليها ناس متخصصة
3- بحس ان 128 اوسع شوية في الصالون والشنطة
4- مع احترامي للبيتلز مش برتاح لشكلها أبدا (مع ان هي من العربيات اللي تنفع تتخانق في شوراعنا مع السواقين البلطجية)
5- الروشنة بتبان في 128 عن البيتلز
الف شكر يا باشا لردك بس فى رائيك انهي عربية ادئها احسن؟؟؟؟
بص أنا هاقوللك مميزات و عيوب البيتلز من وجهه نظرى
المميزات:
- قطع غيارها معمره
- عفشه خدمه شاقه
- عاليه فى المطبات
- استهلاك بنزين معقول جدا
- أعطالها قليله و معروفه
- بترجع زيرو لما تتشد
- بتجرى جامد (حتى لو موديل ستينات)
- تبريد هواء ( لا يوجد بها رادياتير و مشاكله)
- صاجها جامد و الامان فيها عالى
العيوب:
- بابين فقط و لذلك تناسب استخدام اسره صغيره
- شنطتها اماميه و اماكن التخزين فيها قليله
- ليها ميكانيكيه متخصصين و مش اى حد بيفهم فيها او يعرف يصلحها
- سعر اعاده بيعها اقل طبعا من ال 128
آداء من حيث التسارع والسرعة
معرفش للاسف
لاني حاولت اسوق البيتلز 3 مرات ومعرفتش
مكنتش عارف اقعد اصلا
بس اصحابها بيأكدو انها جراية وثابته
وبعدين فكرة الماتور ورايا دي حاسس ان الماتور محطوط فوق دماغي
وش فظيع (في ناس بتحب صوته عادي)
في حاجة كمان كل قطع غيار الصاج بتاعتها استيراد ونادرة
لانك بتدور على عربيات مصنعة من الستينات
بص لازم تحط فى بالك قوى ان العربيتين بقالهم اكتر من ربع قرن ماشيين فى الشوارع فده اكيد غير كتير من حاله الزيرو و لذلك النصيحة انك تحاول تختار حسب المميزات و العيوب العامه التى ذكرناها و حسب احتياجاتك و كمان مهم جداً بعد كده حسب الحاله العامه للسياره بعد الكشف بدقه عليها علشان ما تدبسش فى مشاكلها بعد كده لا قدر الله. و بالتوفيق
رايي البيتلز افضل
صيانتها قليله(ابلاتين وكوندنسر وطقم بوجيهات ولو حبيت تمنجها بتغير سير الدينامو)
مفيهاش كاتينه ودي احلي حاجه فيها
استهلاكها في البنزين قليل جدا يعني خدت 130 كيلو ب12 لتر
قطع غياراها غاليه شويه بالنسبه ل128 بس الميزه انها بتبقي نضيفه مش مضروبه زي الفيات
بتاخد 2كيلو ونص زيت
ثابته جدا علي الطريق
لو مظبوطه بتقفل عدادها(كانت مع صاحبي مو71 جبنا بيها 140 علي الدائري اللي هو اخر عدادها وموتور 1200سي سي)
لو عملت فيها اي حاجه بتبان عليها
دركسيونها خفيف علشان التقل كله ورا
بس نصيحه اللي بيركبها بيبقي غاويها مش واخدها عربيه وحلاص
معلش احب بس اصحح معلومه فى كلام حضرتك و هو ان قطع غيارها موجوده و مش كلها استيراد و لا حاجه (طبعا مش زى ال 128) و كمان معلومه تانيه انها كانت تنتج زيرو حتى عام 2003 و لذلك قطع الغيار الجديده موجوده و السياره دى انتجت من عام 1938 حتى عام 2003 و انتج منها 21 مليون سياره خلال هذه الفتره و كان فى مقوله شهيره بتقول ان هتلر خسر الحرب العالميه بس كسب قلوب العالم بالبيتلز :S_thum1[1]:
البنزينه غالبا لوحدها اكيد ما تنفعش لانك ببساطه مش هتلاقى حد بيفهم فيها فى البيتلز و لازم تاخد معاك ميكانيكى يكون امين و هو اللى هتوديهالو الصيانه بعد كده علشان يكشف عليها كويس و كمان يتاكد ان سعر الشراء معقول و بعدين ممكن تروحوا البنزينه ترفعها و هو معاك لو عايز يتاكد من حاجه تحت
الف شكر يا رجله علر ردكوا و مساعدتكوا
العربتين ليهم ميزه وعيوب
البتلز ميزتها
سابته فى الطريق وخصوصا وانت بتجرى الاعطال فيها قليل . قطع الغيار غاليه شويه لكن معمره . بتليق عليها التوريش ركب بس طقم جنوط مع كام استكير نضيف وشويه اكسسوارات وتلاقيها مرسيدس . كفاية انها المانى . وعلى فكره سواقتها مختلف عن اى عربيه تانيه
عيوبها من وجهة نظزرى انها المكانيكيه قليلين بس موجدين قطع غيارها برده مش بتلاقيها فى اى مكان بس موجوده وفى امكان معروفه زى الطلبيه وفيصل والهرم والحرفين وجسر السويس . هيا تبريد زيت العربيه شتويا بتحب الجو الشتوى . وانها بابين بس
128
مميزتها من وجهة نظرى قطع غيارها رخيصه وبتلاقيها فى اى مكان . ليها مكانيكيه فى اى مكان . سهله فى بيعها
اربع بيبان وشطنه وصالونها كبير . وبتليق عليها الزواقه
عيوبها من وجهة نظرى
كل فتره صغيره على حسب ماشيك والمطباط والحتت المكسره تغير جلب ومساعدين . الشاسيه ضعيف لكن ليه علاج . مش سابته فى الجرى . مشاكلها كتير لكن ليها حلول
لو عملت مقارنه حطلع النتيجه ان البيتلز سواقه . 128 منظر
وبايدك انت تختار
هو فى حد ممكن يقارن 128 بالبيتلز للاسف الناس الى ادلت بأرائها اكيد ميعرفوش يعنى اية بيتلز
على فكرة انا ركبت الاتنين ولا وجة للمقارنة بينهم البيتلز اكفأ فى جميع النواحى متانة وتبريد هواء وعفشة دبابة وجراية وثبات ملوش حل وقطع غيار معمرة موتور بوكسر (اقل حجما واقوى عزما بمراحل ) يكفى ان بورش هو الى عملها .ها اقول كمان ولا كفاية.
لادا سمارا احسن من العربيتين....السمارا موتورها اقل حاجة ١٣٠٠..ةشاسيها نفس شاسية الجولف ٢...وقطع غيارها عند بتوع اللادا....و٤باب...وظريفة جدااا...وانا حاليا بدور علي واحدة نضيفة منها...علشان اشتريها..
ياباشا اللادا سمارا موتورها بالعرض...وكبااالن مش كورونا....وهي علي اسكاترا زي ال١٢٨ كدة....وعفشتها ناعمة...ومافبهاش مشاكل البيض زي اللادا العادية....صدقني عربية محترمة ...وموجودو في تركيا وفي روسيا تاكسي ...وسيارات شرطة....وعربية مخترمة بجد...انت هاتركب عربية زي الجولف...وبنص تمنها!
بداية أرفض بشدة مقارنة عربية من أفضل ما صنع الانسان (بيتلز )بعربية مفيش سبب مقنع لوجودها من اساسه ( 128 ) .
بيتلز عربية سريعة , ثابتة , قطع غيارها موجودة و سعرها معقول , ليها صنايعية كويسين و فاهمينها تمام و كمان هيه عربية قليلة الصيانة و قليلة الاعطال و حمالة قسية ...
كمان هيه عربية مميزة و تقدر تعدل فيها كتير زي ما انت عايز
حجمها صغير بس 4 افراد متوسطي الحجم هيركبوها بشكل معقول بس هيكون صعب ان يكون معاهم شنط .
عربية ممتعه جدا في سواقتها ......... بس هتحتاج فترة على ما تتعود عليها ... في الاول مش هترتاح ليها لكن بعد اسبوعين تلاتة هتلاقي نفسك رايح عليها جري ..
الحقيقة انا استمتعت بكافة التعليقات اللى قريتها لانها من ناس بتعرض ميزة وعيوب كل عربية منهم وده اهم حاجة فى المقارنة العربيتين دول كانوا معايا واهم الفروق بينهم
1- الثبات الفولكس تتفوق
2- المتانة الفولكس تتفوق (طلعت بيها فوق رصيف عالى ولا حصل حاجة متهيألى لو أى عربية تانية كانت جابت شاسيه)
3- فى الشاسيه الفولكس احسن ال128 سيئة للغاية كان معظم بتوع ظبط الزوايا والزراجين صحابى
4- بالنسبة للموتور الحقيقة موتور الفولكس اهم حاجة تتأكد منها وانت بتشترى العربية ديه لانه لو مش سليم ها يتعبك مش كتير اللى يعرفوا يعملوا له عمرة صح ولما يبوظ يستحسن يتغير لكن لما يكون سليم بيبقى ممتاز هانقول هنا انه فى حالة عمل عمرة للموتور ال128 أحسن لان الفولكس بتحتاج لميكانيكى وخراط فاهمين أوى علشان يعرفوا يضبطوا عمرة الموتور
5- من ناحية الوسع 128
6- الشنطة ال128
7- متعة القيادة ومكان وقاعدة السائق الفولكس احسن بصراحة انا حبيت سواقة العربية ديه جداً
8- من حيث العفشة الفولكس تتفوق بمراحل من حيث المتانة وال 1303 ناعمة جداً فى المطبات عن ال 1300
9- من حيث الاعتمادية الفولكس
10- سعر قطع الغيار مافيش فرق بينهم كتير يعنى فى العفشة زى بعض بس كعمرة موتور الفولكس أغلى والاتنين قطع غيارهم موجودة
الخلاصة لو انا مكانك هاجيب فولكس وخاصة علشان الشوارع المكسرة بتاعتنا ال128 بتتبهدل فيها بس خلى بالك لازم تكون سليمة جداً وخاصة الموتور لان تمنه استيراد بين بين 3000 ال 1200،1300 الى 4000 لو 1600 الكلام ده لما كانت العربية معايا وخلى بالك العربية ديه ليها مواتير أكبر
وبعدين هاتها احدث من الستينات علشان الدنجل اللى موجود فى موديل الستينات قطع غياره اقل ويا سلام لوجبت ال1303 مش هاتنزل منها يعنى هاتبقى غاوى تعمل مشاوير علشان تنبسط بسواقتها لأن عفشتها أنعم من ال1300 واكبر شوية فى الصالون وربنا يوفقك
انا عندى بيتلز و جبتها علشان بحبها مع ان كل العائلة والاصدقاء كانوا ضدى
وناس كتير من اللى كانوا رافضين انى اجيبها حبوها بعد ما ساقوها
البيتلز فى المطبات والرمل والطين تحس انك راكب جيب
فى السرعة والسحب والشد متحسش انك راكب عربية موديل قديم
بس فيها عيوب لازم اقولهالك وانتا لازم تحسبها كويس
العربية ديقة من ورا مفيش حد هيرضي يركب معاك غير ولادك لو صغيرين واول ما هيكبروا هيفضلوا المواصلات
من ادام القاعدة كويسة بس بتدايقك لما تيجي داخل العربية
الشنطة اللى قدام يادوبك تاخد الاستبن لان كلنا مش مركبين الكاوتش الرفيع قوى الاصلي اللى بيبقي ليه مكان ادام بس ال 1302 و ال 1303 الشنطة اوسع
بالنسبة للشنطة اللى ورا الكنبة لو انتا استغنيت عن السماعات يا دوبك تاخد الكوريك وشنطة عدة وكام كيس خضار هيبقي طالع نصهم سادد الازاز
العربية ورا حر جدا فى الصيف حتى لو ماشي سريع لان طبعا مفيش ازاز بيتفتح ورا
فى البداية هتلاقي سواقتها فى الزحمة صعبة لانك مش شايف الجنب اليمين ادام ولا عارف اخر بوز العربية فين وعند الرجوع للخلف نفس الكلام مش هتشوف حاجة
لكن مع الوقت هتحفظ ابعادها
واسوأ عيوبها
الفرامل ضعيفة لانها طنابير وبتحتاج صيانة كل شوية وضبط
الموتور غالى جدا ال 1200 وال 1300 بيعمل 3500 و 4000
ال 1600 بييعمل 6000 و 7000 دى اسعار المواتير المضمون انها تكون كويسة
الفتيس من 700 الدنجل بيوصل ل 1000 علشان حالته تبقي كويسة
علبة الدريكسيون لموديلات 1302 و 1303 بتعدى ال 1000 جنيه دا لو لقيتها
الاكصدامين 500
الاربع رفارف من 1200 الى 1500
البابين 600
الحجات اللى فاتت معمرة لانها المانى استيراد بس طبعا الحالة اهم حاجة
اما باقي قطع الغيار الجديدة زى طلمبة البنزين والاسبراتير والكاربراتير الجوانات والاولسيهات ومساتر الفرامل فدول للاسف صينى و البرازيلي برضه مضروب دا اذا كان برازيلي اصلا
الميكانيكية بتوعها مخصوصين والكهربائية كمان مفيش ميكانيكي او كهربائي عادى يعرف يشتغل فيهم الكهربائي العادى كبيره يظبطلك النور لكن المارش والدينامو انسي
تكلفة طقم الشامبر بالمصنعية 750
تكلفة العمرة من 2000 الى 3000 والعمرة الصح 5000
الخلاصة
لو انتا شاب والعربية ليك لوحدك هات البيتل بس يكون عندك استعداد تتعلم بعض اساسيات الصيانة زى تغيير البوجيهات والابلتين والكوندنسر وسير المروحة
وطبعا لازم تجيب ميكانيكي كويس يختبرها
وفى نقطة مهمة اعادة البيع للبيتل تقيلة يعنى لو جبتها مفيش تراجع
لكن ال 128 اشهر ميزة فيها انها بتتباع بسهولة يعنى لو جبتها ومعجبتكش تقدر تبيعها وتجيب حاجة تانية
خللى بالك من ابنه عمرو لسة ناصب على زميلنا هنا فى المنتدى عامله صيانة وبايعله قطع غيار بايظة وواخد 500 جنيه
ممكن الراجل يظبطه فى فلوس
او هو يعقدك من العربية علشان يدبسك فى واحدة من عنده
ممكن تروح لعاطف عند جراج اثر النبى فى اول المعادى
او تنزل فيصل او الهرم الميكانيكية كتير
اللى عايز يبيع البيتل ممكن يروح معاك المانيا علشان تكشف عليها لانها تقيلة فى البيع
نصيحتي هات عربيه تعرف تبعها ومتخسرش كتير لانها اكيد مش هتبقي عربية العمر
يا باشا اسمع كلامي بالله عليك.....والله السمارا عربية تحفففففففففة....انت هاتبقي راكب عربية محترمة وبنص تمنها!!!....العربية دي والله ممتااااااازة.........واسعار قطع غيارها عبيطة جدااا....وشاسيها قضيبين زي القطر...مش علي علب زى ال128...وواسعة جدا ....و4 باب....وزلطة علي الطريق...كفاية انها ....موجودة في المانيا وروسيا...وموجودة في اوكرانيا....اتفرج علي فيلم الديلر....انا ان شاء الله بخلص في واحدة....وهاتكون معايا باذن الله بكرة ....
السمارا هاتبقي في حدود 12 ل17 الف....بس صدقني عربية...ومالهاش اي علاقة بالادا ال2107...انعم منها بمراحل..
مش عارف اقولك ايه بس حاسس ان كلامك مبالغ فيه شوية او انا اللي واخد فكرة غلط عن العربية . انا كانت مع واحد صاحبي وكانت تقيلة جداااااااا في سواقتها العربية كانت بتعوم في الغرز ( بس عادي يعني قول زي ال 128 في النقطة دي انما البيتلز اكيد تفرق عنهم ) وطبعا قطع غيارها تعتبر غالية غير اللادا 2107 . الصراحة كنا بنفضل نعزم على بعض مين اللي يسوق خاصة لو مشوار طويل