الموضوع: تجربتي مع اللوجان

المشاركة الأصلية كتبت بواسطة me_medoo

بسم الله الرحمن الرحيم

السلام عليكم شباب النيل ...أنا النهرده عاوز أديكم تجربتي مع اللوجان علشان الي بيفكر يشتريها يعرف كويس أيه عيوبها .

أولاً : في المجمل العربية اللوجن عربية حلوة وجميلة الشكل وشكلها فخم وضخم وتعتبر الأجمل وسط مثيلاتها من الانوس والفيرنا لكن وحط تحت لكن دي خمسين خط :

1- العربية تكيفها رائع وجامد جداً لكن يافرحتي في هوى سخن جي من تحت التابلوة من الطور للكبينة عدل ولاحظت المشكله دي حتى عند زميلي الي عندهم نفس الموديل انا كنت جايبها 2011 .

2- قزاز العربية ضعيف جداً وميسواش تلاته تعريفة طول ما انتا ماشي يقعد يزقزق جمب منك وكأنوو مفكووك .

3- بيدخل زجاج السيارة الشمس كاملة بجميع أشعتها البنفسجية والحمراء والصفراء للي يخلي الكبينة نااااااااااااااااااااااار في الصيف .

4- العربية سفاحت بانززززين عن مثيلاتها من ال 1600 سي سي .

5- على الرغم أن فراملها قوية وحلوة تيل الفرامل بيبدء يصفر من الوقوف بالزحمه المتكرر ... ولازم تغيرو كل 30.000 كيلو على ماسمعت .

6- العربية سريعة وجراية بس تحس أنها بتزعق وتنهج لمن تجريها وصوت المطور يامشاء الله متسمعش الي جمبك نهائي .

7- توكيلها زي الزفت ويعد على الاصابع ... ولو جربت تروح كده وتخطف رجليك لمطلع المقطم واتفرج على أعظم توكيل في التاريخ ياراجل دي لو ورشة في الحرفين هتكون أنضف من كده ... وأسعارهم هيا نفس أسعار التوكيلات الفخمه المكيفه الي بتشوف عربيتك بيتعمل فيها أيه ... وشوف الجمال والحلاوة لمن يرموو عربيتك في الجبل لحد مايجي دورها ... ولازم تروح الساعه 8 الصبح أوعه تنسى لازم تيجي بدري علشان تمشي 4 العصر ... ومتنساش تحجز قبليها بفترة كبيرررررررررررررة علشان الصيانة .

8- الأضاءة بتاعت العربية زي الزفت لمبة بتنور بعييييييييييد ولمبة قدامك بمتيرين ولو ركزت هتلاقيها حرف أكس على الارض وعندك مساحة عامية في الرؤيا الليلية .

9- فتحت شبابيك العربية الكبيرة زي الزفت أن قفلت الشباك علشان تسمع الي جمبك من صوت أزعاج المطور تتخنق من الحرررر الي داخلك على الكبينة وأن فتحتوو تلاقي الهوى ضارب في صرصور ودنك ومتسمعش الي جمبك نهائي ده غير انو بيطير شعرك وينعكشوو كأنك كنت بتتخانق .

10- عمرك ما هتحس بالامان بعد 120 ولا بالثبات دي أصلا أصلا بعد المية بتبقى طااااااير ولو في سبت فكة واقع على الارض قدامك لو فديتو ممكن تنقلب .

11- مفاتيح الكهربا بتاعت الشبابيك الخلفية محطوطة في مكان عقيم جداً ولازم توطي علشان تطولوا لو عاوز تفتح او تقفل الشباك .

12- سرعة فتح وقفل الشبابيك بطيئة جداً وياريتني جبتها فاضية مش كاملة على الاقل هتحرك بالأوكرة بتاعت الشباك أسرع من كده .

13- بالنسبة للهيكل الخارجي الجميل والفخم هو هو بنفس وزن الانوس (الضعيفه) لكن اللهم هما شادينو على الاخر بحيث يضعف قوتو فلو واقف في موقف والعربية الي جمبك عيل صغير فتح الباب بقوة وخبط خبطة صغيره في عربيتك تحس أنها خبطة كبيرة لأن صاجها ضعيييف جداً وأقل خبطة تحسها حدثة .

14- بالنسبة للمسحات بتاعت العربية كارثه في عالم السيارات بتمسح 60% من القزاز فقط وترفع الميه فوق وطبعاً لأن البرفريز بتاعها واقف بنسبة 80 درجة فالمية بتنزل تناي على القزاز وتوسخو بالذات في النص لذلك نصيحه يتشغلها على طول ياتجيب حتتين وحده في ايدك وانتا سايق والتانية في ايد المدام وطلع راسك من الشباك وأمسح البرفريز ههههههههه .

15- وأجمل كدبة تسمعها في العربية أن فيها باور ... قال بور قال ...

16- أما عن الأبواب حدث ولا حرج جرب كده تفتح أي باب من الي ورى وتقفلوو وهتحس على طول برزعت الباب الجميلة ويقولك يا باشا الرينو كلو كده .

17- العربية دي فيها ميزة مش هتلاقيها في اي عربية ... عمرك شفت سقف عربية من جوا بيهبب بسرعه ويبقى كلوو هباب ووساخة وتراب وعفار ...بص كده في اي عربية لوجن وشوف قد أيه سقفها الداخلي من جوا قذر وده نتيجة الهوى الي بيدخل من المطور للكبينة بسبب سخونيتوو بيتصاعد للسقف بحكم انو عالي ومتكملش اسبوعين وغير تلاقي السقف قد ايه قذر ...بس حلو بسيط هتلك مكنسة كهربا مع العربية كل أسبوع أكنسوو . ملاحظة الهوى الي بيجب من المطور للكابينة بيجيلك من تحت التابلوة أو من وراه من منطقة الأقدام كده .

18- عربية غير عاطفية بالمرة ومتحسسش بأي متعه نهائي في سواقتها

في المجمل هيا عربية حلوة وربنا يوفق الي عاوز يشتريها ... ممكن لو واحد ركيب كان بيركب فيت و 128 والكلام ده يحسها أمله ونقلة نوعية في حياتو ... وهيا يمكن تقدر تقول عليها لادا 2011 او شاهين 2011 مطورة فقط لاغير .
ويمكن للي ملوش خبرة في العربيات يقول عليها وااااااااااو بس هيا مكملتش نص حرف الواو بس الحق يقال العربية عالية عن الاسفلت وعائلية وتكيفها ممتاز بس لولا عيب حرارة الكبينة وانا كنت جايبها فضي وكبينتها بتسخن في الصيف حتى بالليل بحس ان الكراسي مولعه وحرارة المطور طبيعية فما بالكم لو اشتريتها سودة كنت عملت ايه ... والكراسي فرشها فبريكه أمال لو ركبتهم جلد كنت عملت أيه في حرارت الكبينة .
والله على ما أقول شهيد ...

بالمناسبة خبراتي السابقه وما ملكته في السيارات والملك لله ( كابريس 86كامري 88لانوس2004 بيجو 505 كرولا 96 ماتريكس 2006شاهين 2003 تويوتا يارس 2008 نيسان مكسيما 2000 وسوبارو vxr ) .

الكلام دة فيه مبالغة رهيبة و دة ممكن يضلل ناس كتير
1-الهوا السخن اولا مش ملحوظ اوى كدة و بيركبوا عازل مجانا فى التوكيل
2-الازاز مش بيعمل الاصوات دى معايا
3-اشعة الشمس مش بتدخل بكافة انواعها و الدليل نضارتى بتغمق مع الاشعة دى photo gray و لما بحطها على التابلو مش بتغمق..الشمس بتدخل العربية زى اى عربية تانية
4-لا تعليق على استهلاك البنزين !! سفاحة؟؟؟
5-التيل مش بيصفر معايا الحمد لله
6-صوتها عالى زى اوروبى كتير بس بسمع اللى جمبى سبحان الله
7-تجربتى مع التوكيل لطيفة و ببقى شايف العربية و قعدت اقل من ساعتين و عملوا كل الملاحظات
8-الاضاءة مرضية بالنسبة لى و بتتحكم فى ارتفاع اللمبات...يمكن مكانتش تمام معاك
9-يعنى مش عارف اقولك ايه الغى الشبابيك يعنى؟ D: عموما بما ان حضرتك سقت كل العربيات دى فا مش محتاج اقولك ان فوق ال 130 مثلا لازم صوت الهوا يضايقك بدرجات مختلفة (حسب اتجاه الهوا كمان) ..معلش عيب اللوجان ان فيها ازاز
10-انا بجيب 160 و الثبات مش وحش مش ضايع اوى كدة !
11-مكان زراير الازاز زى الكسيل القديمة و مش ظريف اوى
12-سرعة فتح الازاز ابطأ من اللنسر مثلا حاجة بسيطة ../ش سريعة اوى بس مقبولة
13-الخبط دة بالذات تعالى شوف عربية اخويا تريلا دخلت فيه و ما شاء الله تقول خبطو موتوسيكل..و دخل فى لانوس جابت فوانيس و شنطة و اكصدام و اللوجان ما شاء الله زى ما هى (شاسيه قوى) الصاج ضعيف فى (بعض) المناطق مش كلو و برضو اقوى من اللنوس و اكيد من الياريس
14-مساحات عادية جدا ! المرسيدس معانا المية بتوصل للسقف على فكرة..و مخرج المية على الكبوت بيتظبطD:
15-الباور اتقل شوية من الفيكترا القديم..أخف شوية من الابيزا الهاف باور..فى النص كدة..لا يقارن بالباولر الالكترونى
16-قفلة الباب اللى ورا تقيلة شوية
17-السقف عندى نظيف و منضفتوش قبل كدة
18-تجربة سواقتها كويسة مش مرسيدس يعنى بس احسن من الفيرنا بالنسبة لى (مش هتتعب اوى كدة) D: و انا فقرى بحب اسوقها ! قعدتها عالية و انا بحب كدة بس اعتقد مش حلو لو واحد طويل اوى

انا الحمد لله بستخدم عربيات كتير و عمرى ما سقت 128 و اتعلمت على فكترا 2000 سي سي اوتوماتيك و بسوق مرسيدس عيون و نيسان و لانسر و الانترا و نيو اكسنت و جالانت و فرنا و نوبيرا و كورولا و ابيزا .دة اللى فاكره دلوقتى..و سبحان الله مسوقتش ال 128 ولا لادا ولا شاهين مع احترامى لهم

هههههههههههههه يانهار ابيض انت دمرت العربيه خالص ههههههههه
على العموم كلامك فى محله وانا معاك فى الكلام ده

ودى وجهات نظر اصلا من الاول

بس اهو الواحد بيقول عربيه خاصه بيا احسن من تاكسى ولا مكروباااااااااااص ههههههههه