الموضوع: المرور شادد حيله ... انا مبسوط

المرور شادد حيله ... انا مبسوط

السلام عليكم
كلنا بقالنا كام يوم حاسين ان المرور شادد حيله شويتين وفي اكتر من كمين في مختلف انحاء القاهره
وفي اكتر من موضوع هنا في المنتدى عن الكماين ده زي دول

http://www.nilemotors.net/Nile/260898-a.html

http://www.nilemotors.net/Nile/261047-a.html


واكتر من عضو زعلان انه اتسحبت رخصته عشان الفاميه. واكتر من واحد علق ان ده استهبال وحرام عليهم وبيلموا فلوس وخلاص والفاميه اصلا مش مشكله.

انا عن نفسي مبسوط جدا. ومع اني عاده مبعرفش اسوق في طرق السفر بالسرعات المقرره بس لو اتسحبت رخصتي رادار هكون سعيد.

طيب ليه

البلد بقالها فتره كبيره جدا من غير حملات مرور او حملات امنيه والنتيجه:
1- انتشار رهيب لسرقه العربيات.
2- عربيات كتير ماشيه من غير نمر اصلا وموتوسيكلات كمان.
3- انفلات امني ومروري رهيب. كميه عربيات بتمشى مخالف بالهبل.
4- انتشار البلطجيه والسلاح بطريقه مش طبيعيه


اعتقد ان حان الوقت ان احنا نرجع نطبق القوانين سواء انت كنت مقتنع بالقانون ولا لا. الموضوع ان القانون بيطبق وده مكسب كبير جدا. ولو انت خايف على عيلتك اكيد هتحب ان الكماين ده تزيد مش تقل.


ناس كتير هتختلف معايا في ان الفاميه مفروض ميسحبوش الرخصه وكده حرام والشمس وبتاع. انا عن نفسي شاري الشماسه الصغيره اللي بتتلزق ده وكفايه عليا جدا. ومش هختلف معاك في رأيك ولا حاجه انا هحترم رايك. بس الموضوع انك لو فكرت كويس هتتفق معايا اننا لازم نبقى دوله قانون يطبق فيها القانون على الكبير والصغير حتى لو احنا مش مقتنعين بيه وبعدين نبقى نفكر مع بعض في تعديل القوانين عشان تناسب احتيجاتنا. وعشان نطبق القوانين لازم نطبقها كلها اللي عاجباك واللي مش عاجباك.


وخد بالك راجل المرور اللي بيسحب منك الرخص مش بيرخم عليك ولا حاجه بالعكس ده بيعمل شغله وبس. ومينفعش تطلب منه يطبق جزء ويسيب جزء.



ياريت كلنا نساعد رجال المرور في كده ومحدش يرخم عليهم وانا مقتنع ان لو المرور فضل شادد حيله كده واحنا جينا على نفسنا شويه هنتعود على تطبيق القوانين ونحترم نفسنا ونحترم الاخرين.

مهندس ماجد