موتور 1600 ولا 2000 سى سى للبولو؟

**vwlover** · 24-05-2008 06:36 PM

السلام عليكم يا جماعة عاملين اية كلكوا,انا معايا عربية بولو 1000 سى ىس استيراد,وبصراحة عاوز اعلى الموتور واسقط حاجة اكبر عشان القوة والسحب والتحمل انتوا فهمنى طبعا فاية رايكم اسقط موتور كام للبولو؟ مع العلم انى شفت بولو برة 2600 سى سى ,فاية رايكوا 1600 ولا 2000 سى سى؟ويا ترى سعر الاتنين اية؟لو انا اديتة موتور وخدت الموتور التانى؟وهل لازم اركب عفشة كونى؟مستنى ردودكم,شكرا

**MMamdouh** · 25-05-2008 12:04 AM

الاتنين حلوين طبعا بس راعى ان الاتنين حيغيروا كتير فى مصاريف ترخيص العربية... و مصاريف البنزين كمان

ايا كان الموتور اللى حتجيبة حيبقى جامد بس الاهم تجيبة بعفشتة و فتيسة و الكونترول و الضفيرة بتوعة لان وزن العربية و سرعتها حيتغيروا تماما و مستحيل عفشتك و فراملك الحالية يعرفوا يتعاملوا مع الوضع دة

برضة راعى ان الموتور اللى حتجيبة يكون له قطع غيار فى مصر عشان متتسوحش لو حاجة باظت فيه

لو منك اجيب ال1600 لان البولو خفيفة و ال1600 حيعمل معاها شغل جامد و كمان البنزين مش حيبقى عالى زى ال2000

MMamdouh

**MMamdouh** · 25-05-2008 10:55 AM

كل العفشة... سوست و مشاعدين و مقصات

MMamdouh

**vwlover** · 25-05-2008 11:18 AM

شكرا يا جماعة على ردودكم الجميلة,بس انا انبارح اكتشفت حاجة لما روحت عند واحد جارى يعتبر هو المستورد الوحيد لقطع غيار الفولكس الاستعمال فى اسكندرية,وفوجئت ان البولو مابيركبلهاش الا موتورها الاصلى البولو بردة بس السى السى بتاعة عالى,ومينفعش الجولف ولا الودى لان قواعد الموتور مختلفة وقالى ان الموتور بحاجتة كاملة + ال abs + المساعدين الاماميين هيتكلفوا 7000 ج,فانا مش عارف المبلغ دة احطة واجيب حاجة المانى اعلى موتورها اصلا عالى ولا اغير الموتور,بس اعمل اية بحب البولو,اية رايكوا؟

**volkeswagin** · 25-05-2008 11:23 AM

هى حاجه ترجعلك انت هتحب تركب جولف ولا بولو

بس كا سعر الحجات دى اعتقد انه تحفه مدام كامل بتفيسه بحاجه واكد على التكيف

والكمبيوتر بتاعه

المتور بتاع الجولف لواحده لو هتجيبه حاجه محترمه مش هيقل عن 3 او 4 وبيوصل ل 6 لو هتجيب ال 2400
اعتقد السعر حلو اما اللى بتتكلم انك تغير البولو ده حوار تانى

بس فرق السعر كبير جدا بين البولو والجولف لو فى نفس السنه يا اما هتنزل لجولف اقل منها بكتير

**Islam_galal** · 25-05-2008 12:30 PM

أنا كنت سمعت و العهدة علي الراوي
إن البولو 1000 CC مايركبلوش غير 1000cc
و ذلك لان الحوض أبعاده أصغر من البولو ذات الموتور الأكبر
بينما البولو 1300CC مثلا يركبلها 1200 و 1600

أنا رأيي تتأكد الأول من المعلومة دي

**NaderNabil** · 25-05-2008 12:49 PM

يا أستاذ اسلام الحوض واحد و الأبعاد واحدة في العربية مش بتتغير من موتور لموتور....ده بالعكس حوض البولو واسع جدا و يشيل مواتير كبيرة...خصوصا البولو 2001

و علي فكرة 7000 ده سعر ممتاز لو شامل فعلا كل الحاجات ديه....بس الكلام ده لو انت غاوي لعب و مستعد تتحمل تغيير الورق في المرور...و مش هاتجيبلك تمن الحاجات اللي ركبتها اثناء البيع