الموضوع: بونتو 2003

شكرا على الردود , جزاكم الله خير

المشاركة الأصلية كتبت بواسطة ahmed.ali

انا شايف سعرها معقول علي عدد الكيلومترات و خصوصا انها الكامله

حضرك عرفت منين انها الكاملة (تقصد ايه بالكاملة)

اللي يحكم الحالة والدواخل... فبه سمكري نضيف فحصهالك ولا لأ؟ وماصورتش الدواخل لييه عشان نشوفها؟ أهم حاجة الشنب والفخاد والعتب مايكونش فيهم نقطة غلط.

وبعدين الكابوت والسقف دول راشين ولا لازق مط؟ ولو لازق اتأكد ان اللصق دا مش مأثر علي السقف (نقطة مهمة جدا) عشان اللصق بياكل دهان السقف. اتأكد كمان انه مش مغطي بيهم عيب.

حضرك عرفت منين انها الكاملة (تقصد ايه بالكاملة)

قصده جميع كماليات.. زجاج كهربا وحبشتكنات كدة.

المشاركة الأصلية كتبت بواسطة crayvor

اللي يحكم الحالة والدواخل... فبه سمكري نضيف فحصهالك ولا لأ؟ وماصورتش الدواخل لييه عشان نشوفها؟ أهم حاجة الشنب والفخاد والعتب مايكونش فيهم نقطة غلط.

معلش العتب و فهمته ايه الشنب و الفخاد دول (معلش خبرتي -1)

وبعدين الكابوت والسقف دول راشين ولا لازق مط؟ ولو لازق اتأكد ان اللصق دا مش مأثر علي السقف (نقطة مهمة جدا) عشان اللصق بياكل دهان السقف. اتأكد كمان انه مش مغطي بيهم عيب.

بصراحة أنا لسة ما شوفتش العربية , أنا جبت الاعلان من على النت و صاحبها في السويس يعني مشواااار
و بالنسبة لموضوع اللزق ده أنا سالته عليه قالي ده كاربون و ممكن تشيله زي ما انت عايز

قصده جميع كماليات.. زجاج كهربا وحبشتكنات كدة.

مستر Crayvor حضرتك مشرفني في كل مواضيعي بحد متشكر ليك و على تعبك معايا في الموضوع السابق أيضا

http://www.nilemotors.net/Nile/263398-a.html

و ألف شكر لباقي الأعضاء

أنا نازل النهارده السوق , دعواتكو معايا ان ربنا يكرمني بحاجة كويسة

المشاركة الأصلية كتبت بواسطة himalking

مستر Crayvor حضرتك مشرفني في كل مواضيعي بحد متشكر ليك و على تعبك معايا في الموضوع السابق أيضا

http://www.nilemotors.net/Nile/263398-a.html

و ألف شكر لباقي الأعضاء

أنا نازل النهارده السوق , دعواتكو معايا ان ربنا يكرمني بحاجة كويسة

العفو يا باشا مافيش أي مشاكل.

معلش العتب و فهمته ايه الشنب و الفخاد دول (معلش خبرتي -1)

الشنب هو الجزء اللي ورا الاكصدام الأمامي وبيبقي شبه ال defender كدة وهوة ده الجزء الأساسي اللي بيصد الصدمات من قدام. أي لعب فيه معناه ان العربية دي اتخبطت من قدام.. طب تعرف منين؟ شوف لو فيه أي عوجان من أي شكل حتي لو كان صغير (المفروض دا جزء داخلي مايتلمسش الا لو كان اتخبط). شوف لو فيه ميل بزاوية مثلا أو آثار رد ع السخن.
تاني حاجة تتأكد ورا الشنب الجزء اللي ماسك الفوانيس.. برضه اتأكد ان الدهان فابريقة وان مافيش أي حاجة من السابق. كمان اتأكد ان الفوانيس بايتة ف مكانها بوضع سلس ومافيش اي حاجة داخلة عافية أو فيها بروز أو غوار عن باقي العربية (معناها ان الجزء ده مردود قبل كدة حتي لو ع البارد).
تعالي بقي وانت ماشي لورا. بص ورا الرفارف الجزء ده وأحد أهم الأجزاء ف العربية هو الحتة اللي ماسكة المساعدين (هي دي الفخدة) اتأكد من الجزء ده زي ما اتأكدت من اللي قبله.. وبص ع الفخدة لو فيها أي لحام عند الصواميل اللي ماسكة المساعد أو فيها أي حاجة غربية أو مثلا صامولة وضعها غلط.
تعالي بقي للعتب. افتح كل باب وبص حواليه ف المجري اللي بيبات فيه الباب لو فيه أي حاجة غريبة. بص علي القوايم اللي ماسكة العتب ودقق فيها لو فيه أي حاجة غلط معناها ان العتب متغير. العتب نفسه بص عليه من تحت واتأكد انه سليم عشان ماتعرفش حالته من كتر المطبات عامل ازاي.. خلي بالك برضه عشان كتر تعرضه للعوامل الجوية بيخليه يضرب بارومة.
الأبواب نفسها شوف ناحية المفصلات لو فيها أي حاجة متنية أو فيها لحام.. أقفل الباب جامد شوية واسمع صوته ممكن تلاقيه متغير عن باقي الأبواب (حتسمع شخلله سنة أو زي ما يكون فيه صدي صوت) معناها ان الباب ده مفكوك قبل كدة.
بص ورا عند الشنطة.. زيح الفرش ولو عندك قدرة تشوف جزء من الصاج اللي تحته بص عليه للتأكدز شيل الجزء البلاستيك اللي ورا الفوانيس وبص من علي الرفرف وراه. شوف لو فيه أي جزء مردود ع السخن (المردود ع السخن حتلاقي دايما نقط غامقة فيه من مطرح التسخيين).
خلاص؟ بص ع الدهان بوجه عام لو فيه أي حاجة غريبة.. لو فيه كلاكيع معناها ان وراها معجون..
آخر حاجتين ف الدواخل.. تعالي للكبوت وبص عليه من تحت.. شوف لو فيه لحامات مفرقعة أو متعاد عليها. كمان ورا الفخاد بيبقي فيه ف جزء كبير من العربيات جزء لحام "فلتو" لو نزلت انهاردة حاصورهولك أو اسأل عليه حد يقولك مكانه. شوف الاتنين في وش بعض واتأكد انه سليم والدهان اللي عليه فاريقة.

جوة العربية بقي عاوزك تتأكد من حاجة واحدة. التابلوه. اتأكد ان مافيش أي نوع من أنواع اللصق باينة من الجناب. كمان التابلوه بايت في مكانه كويس.. أقفل العربية والزجاج ودور واتأكد ان عزله كويس. عشان بس تتأكد ان التابلوه ماتخلعش قبل كدة.
افتح الأبواب ودور تاني وعلي ال RPM ل 5000 ولا حاجة.. لو الصوت عالي قوي تحت العربية يبقي الجكمان مخروم.

بس يا سيدي.. فيه بقي الحاجات العادية (تجارب الكهربا والميكانيكا والتكييف الخ الخ) كل دي حاجات سهلة تعملها. أنا بس باقولك علي الحاجات اللي بتستخبي عشان ماحدش يلبسك ف حاجة مضروبة.

وربنا ان شاء الله يوفقك للي ف بالك.