الموضوع: إستفسار عن e90 موديل 2008

المشاركة الأصلية كتبت بواسطة MohamedGafar

هي كباس تكييفها مش قد كده وبياخد وقت على ما يبرد العربية وعن تجربة! أنا مستني دخلة الصيف وعرفت واحد ممتاز بيركبلها كباس ياباني ، وعن تجربة مع واحد صاحبي.... ثلاجة بمعني الكلمة!

كباسها ألماني وواضح إنهم مش بارعين في قصة الكباسات!!!

تحياتي.

شكراً يا باشا على المشاركة.........بس كلام المهندس فرحات تحت بيوضح أن الكباس بتاعها يابانى بس كان فيه مشاكل فى 2006 و 2007.......ممكن يكون حظك جه فى واحد من دول

المشاركة الأصلية كتبت بواسطة farahat

أحمد باشا
أسف على التأخير في الرد علي سؤالك


بالنسبة لل-320i موديل 2008 يعني إنت بتتكلم على ما قبل ال-facelift ، ودة معناه إن لو بتتكلم على المواتير فقدامك موتورين (على حسب هي إنتاج فين وتاريخ انتاجها كام بالتحديد ) ، لكن نفس الفتيس ونفس العفشة وكل حاجة .


بالنسبة للكماليات فهي ذي كل عربيات بمو بتتحدد كمالياتها حسب طلب الوكيل في البلد إلي بتستوردها ، ومن الكماليات دي ال-iDrive ، في مصر كان الوكيل بيعملها بدون iDrive لحد منتصف 2007 وبعدين قرار يضيف كماليات زيادة من بابا التسويق فزود ال-iDrive وفتحة السقف في أخر 2007 وأول 2008 ، وزود أبنوس وغير شكل الجنوط ، كل دي تغيير كماليات لكن العربية هي هي .
وبالتالي عشان تحدد الكماليات لازم تعرف العربية دي تحديداً كان نازل فيها إيه في الإمارات في السنة دي (زي بالظبط لو تفتكر الميجان بفئاتها الأربعة في 2005 و-2006 و-2007 و-2008 ، كل سنة كان بيغير الكماليات في كل فئة بشكل غير التاني ! )

فرحات باشا الكبير...........كده أنا فهمت

بس سؤال تانى....هل لو جبت ال vin ممكن أعرف التفاصيل دى ؟ و منين ؟

المشاركة الأصلية كتبت بواسطة farahat

أما بخصوص التكيف ، فكدة كتير شوية ، لأن التكيف بتاعها كويس جداً ، إلا إذا أن فيه مشكلة أو تكون إنت عمله على اوتو ، لو عايز تجرب ثبت إنت الحرارة ومخارج الهوا واقفل ال circulation وشوف التبريد شكله إيه ، لو لسة بطيء يبقى فيه مشكلة يا إما في الفريون يا إما الكباس .
على فكرة الكباس بتاعها كويس جداً وهو ياباني من إنتاج Calsonic ، لكن ظهر فيه مشاكل في بعض الموديلات الأولى في 2006-2007 والمفروض إتعدل في الشحنات إلي بعد كدة .

طيب يا فريون يا كباس...........الكلام حلو لحد دلوقتى ( بس مش قوى يعنى:-) )

طيب هل لو هو كباس......مش المفروض ان التبريد يبقى مش قد كده على طول ؟

و لا ممكن يبقى زى ما أنا وصفت............بياخد شوية وقت و بعد كده بيشتغل زى الفل ؟

المشاركة الأصلية كتبت بواسطة farahat

الفتيس مفروض إنه برضه زيت مدى الحياة (lifetime oil ) ، وبرضه هو نوع معين زي بتاع سكودا ، لكن الفرق إن الشكاوى منه أقل كتير وفيه ناس كتير برة مصر وجوة مصر عملين بيه 160 ألف وأكتر ولسه شغال كويس ، وشفت بنفسي عربيات حاطين زيت من العادي والفتيس شغال كويس جداً مفيش فرق يذكر (سقتها بنفسي مش بفتي وإنت عارف :) )
الفرق إن فتيس السكودا والفولكس هو من إنتاج شركة Aisin اليابانيية لكن تجميع صيني ، أما فتيس BMW من إنتاج ZF الألمانية . ، ونفس الفتيس راكب في حوالي خمس أو ست عربيات من ماركات مختلفة منهم حبيبتي الجاجوار XF :)

هايل هايل هايل.............يبقى كده الفتيس مفيش منه قلق إن شاء الله.

المشاركة الأصلية كتبت بواسطة farahat

بعض العيوب الشائعة هي تيل الفرامل والطنابير بتتاكل بسرعة أكتر من العادي ، المساعدين العادية مش ال-M-Sport مش بتعيش كتير ، الكاوتش الرن فلات طبعاً ، مقبض الباب الداخلي والكونسول بيقشر زي الميجان (ودة بقى الطبيعي في عربيات كتير دلوقتي عشان المصنعين بيوفروا في الخامات عن طريق إستخدام تكنولوجي دهان أحدث لكن عمرها أقل )، السنتر لوك بتاعها أحياناً فيه وحدات منه بتعلق لوحدها وبيغيروها في الضمان عشان دة عيب صناعة ، الموتور مفيش عليه تعليق بس أحيانا فيه وحدة بتاعت ال-Valvetronic

ودي إلي بتعمل ال-VVT بتحتاج تتغير لأنه بتأثر على السحب شوية (حالات قليلة لكن متكررة ).

نيجى بقى للمشاكل دى.........التيل متوسط عمره 20 ألف أو 25 ألف ولا أقل من كده كمان ؟

و الطنابير ؟

مشكلة الرن فلات أيه ؟ و هل لو هغير الكاوتش فى وقت ما ممكن أبقى أغيره بكاوتش عادى و لا فيها مشاكل ( غير أن الأستبن هيبقى ملهوش مكان ) ؟

مقابض الأبواب شفتها فى كذا عربية بصراحة.......منهم أودى A4 S line و طبعاً فى الميجان........مش مشكلة دى مع أنها بايخة.

طيب و وحدة ال valvetronic دى غالية ؟

و سهل إصلاحها أو تغييرها لو باظت و لا محتاجة حد متخصص

المشاركة الأصلية كتبت بواسطة farahat

دي تقريباً كل العيوب إلي شفتها من خلال تجاربي مع الموديل دة في عربيات سواء عملتها بإيدي أو كان حد بيعملها .
لكن في المجمال الموديل دة واحد من انجح موديلات الفئة التالتة لأن مافيش فيه عيب جوهري ولا في شاسيه ولا موتور ، وبالتالي لو العربية سعرها كويس توكل على الله .


المنوال ممكن أبعتهولك على الخاص لو تحب عشان حجمه كبير .

المانيوال لو ينفع تبعتهولى على الأيميل أو ترفعهولى على أى موقع و تبعتلى اللينك يبقى فل يا باشا.

دلوقتى عاوز أعرف برضه طقم الكاتينة المفروض يتغير على كام ألف كم ؟


شكراً يا باشا على المعلومات المفصلة القيمة

المشاركة الأصلية كتبت بواسطة ahmedsadek82

السلام عليكم , معلش يا ريس اتأخرت عليك في الرد , بس استاذنا فرحات عامل الواجب ... بص يا سيدي عندي كام رد على استفساراتك :
1) بالVIN ممكن نعرف انهي محرك N43 و ده 170 حصان , او N46N و ده 156 حصان و ده في موديلات مصر من اول 2008 او N46 و ده 150 حصان

فرحات ده وحش من يومه ( وحش بفتح ال ح ) :)

طيب نعرف منين لو جبت ال vin ؟

المشاركة الأصلية كتبت بواسطة ahmedsadek82

2) بالنسبة للتكييف اؤكد على كلام فرحات بأنه جيد جدا , بالنسبة لأنه بياخد وقت ده غالبا نقص فريون , ممكن تكون السربنتينة والاكسبنشن فالف (محتاجين تغيير) , اكشف على دورة التبريد كويس عشان الحاجات دي بتعملها حوالي 5000 ج في مصر

أنا فعلاً حد قالى أنه ممكن يكون الأكسبانشن فالف......بس هو مشافش حاجة هو بس بيقول لو مش فريون ممكن يكون الفالف.

المشاركة الأصلية كتبت بواسطة ahmedsadek82

3) موضوع الvalvtronic حصل معايا شخصيا و ده سسعره حوالي 5000 ج في مصر بس مدفعتش في رغم ان الضمان خلص عشان الالمان محترمين و في حاجة اسمها good wil , بس متقلقش منه لأنه مش متكرر بنسبة كبيرة

طيب هل فيه أعراض لبوظان ال valvtronic ؟

أنا مش عاوز أعتمد على التوكيل لأنى مش عارف الهيستورى بتاع العربية أيه و كانت بتصين فين لحد دلوقتى.

المشاركة الأصلية كتبت بواسطة ahmedsadek82

4) بالنسبة للتيل و الطنابير بتعتمد على اسلوب القيادة , التيل اامامي بيعمل حوالي 34000 كم و ده كويس جدا طبعا و الطنابير الامامية حوالي 80 - 90 الف كم , والتيل الخلفي قريب من كده برده

طب ده كويس..........34 ألف ده زى الفل مقارنة بالميجان.........كنت بغير فيها التيل على 25 بالكتير.

بس مقارنة بالعربية اللى بعتها من شهرين يبقى قليل :)
بايعها عاملة 67 ألف كيلو و مغيرتش التيل و لا مرة و كنت بعمل الصيانة فى التوكيل و مقالوش فى أخر مرة أن التيل محتاج تغيير قريب......بس دى كانت 4x4

المشاركة الأصلية كتبت بواسطة ahmedsadek82

5) الكاتينة في كل بي ام جنزير و مش بتتغير , اللي بيتغير سير الدينامو و الكمبريسور كل 60000


العربية جميلة جدا و تعتبر الامتع في فئتها في القيادة , بس ظبط التكييف عشان الحر بتاع الخليج

تمام كده...........شكراً يا باشا على الرد.

المشاركة الأصلية كتبت بواسطة farahat

أحمد باشا ..
ما شاء الله الإجابات بتجيلك من جميع الاتجاهات أهو :)


أن عباس هاجوب على النقاط الباقية التي لم يتم الاجابة عليها عشان تكون الصورة كاملة عندك ..
موضوع ال-vin ممكن تعرف منه تاريخ الانتاج والموتور والمواصفات العامة ، لكن مش الأوبشن ليست ، لو عايز تعرف الأبشنس بتكون عن طريق حاجة اسمها الvo أو ال-vehicle order ، ودي بتكون عند الوكيل أو بتكون متبرمجة على كنترولات العربية في أماكن معينة ، منها بتعرف كل الكماليات إلي نزلت بيها العربية دي من مصنعها ، لو بتكشف في التوكيل أو بتكشف عند حد فاهم كويس في ال-bmw هيجبهالك مظبوط ، وهي مفيدة قوي على فكرة في معرفة اللعب إلي اتعمل في العربية ؛)


موضوع ال-valvetronic دة ما تقلقش منه ، ده مش عيب متكرر خالص ، دة عامل كدة ذي ترس الدفزور إياه ، بس دة كهربا ، موتور كهربا راكب في وش الموتور ، تمنه حوالي 650 دولار و تغييره بيحتاج حوالي ساعة ونص ساعتين (أنا بكلمك بنظام عندكم ؛) )، بس للأسف بيحتاج معايرة بعد ما يركب ، يعني لازم توكيل أو حد متخصص bmw.
بس ذي ما قلتلك مش مشكلة كبيرة لأن عيب مش متكرر ، وهو واحد من عيوب الموتور ، يعني أول ما يحصل هتلاقي check engine نورت مع ضعف في السحب عن الطبيعي .


التيل الأصلي فعلاً بيعد م أبين 25 و-30 ألف حسب سواقتك ، وموضوع الكاوتش دة مشكلته إنه ناشف قوي ، كمان مع عفشة ال-bmw الناشفة طبيعي بتحس إن المواضيع صعبة قوي ، بس أعتقد موديل 2008 هيكون فيها second generation run flat ، ودة أنعم شوية ، و حالياً فيه الجيل التالت ودة بيقولوا إنه أحسن كتيير ، وبقى قريب من العادي بس لسه محدش جربه في أي شركة أو موديل .


ال-user manual هتلاقيه قاعد عندك في الميل بقاله شوية :)


وأخر حاجة بقى ، صورة للموتور أهي أثناء تغيير valvetronic ، وموديل 2008 برضه :)
باين فيها تحت الكاتينة الجنزير ، والمكان إلي على الشمال دة هو مكان تثبيت الموتور الكهربا بتاع ال valvetronic ، بس مكناش لسة نضفنا مكانه عشان نركب الجديد :)

حبيب قلبى من جوة :)

شكراً على المانيوال يا باشا

و على الأجابات

أنا مش فارق معايا حاجة فى الكماليات لأن هنا مفيش اللعب بتاع مصر إلا فى عربيات معينة و من فئة معينة........يعنى مش قلقان من ده........أنا بس عاوز أعرف أى موتور اللى موجود فيها.

و برضه الرن فلات مش هيفرق هنا كتير علشان طبيعة الشوارع مختلفة عن مصر.

هههههههههههههه ماشى يا حاج فرحات

أنا مش هرد عليك علشان عارف ظروفك أيه............خصوصاً بعد ما الدركسيون اليمين ظبطك :)