تقرير سريع عن صيانة 80000 في أوتو أيجيبت

**Hossam_Zaky** · 02-01-2012 05:45 PM

أجمل صيانة عملتها للعربية من يوم ما أشتريتها
و تقريري حيكون مختصر جدا بعد ما شفت تقارير أخواني اللي سبقوني و كمان عشان عندي مشكلة في النت بتفصل كل شوية فمش واخد راحتي

علي الرغم من اللخبطة اللي حصلت في يوم السبت لأنقطاع الكهرباء بمركز أوتو أيجيبت صباحا ألا أني مكنتش متضايق وده كان لوجود عدد كبير من أعضاء أسرة نيسان / نايل موتورز بالمركز يومها لعمل صيانات مما أدي لتحول صيانة عربيتي إلي أحد لقاءات نيسان / نايل موتورز المميزة و مش حذكر أسماء عشان مش حقد أدي كل واحد حقه

لكن شكر خاص طبعا لحبيب الملايين أ / أحمد مصطفي اللي أهتم بنفسه و راح كمان وقف مع عمال شركة الكهرباء لأستعجال أعادة الكهرباء و كلمني بعد ما مشيت لأعادة تسليم عربيتي للصيانة زي ما المركز كلمني عشان أرجع أعمل الصيانة

و كمان زميلنا العزيز أ / أحمد رحيم أبو مروان اللي تشرفت بمعرفته جالنا المركز لمجرد انه عرف بوجود اعضاء من المنتدي بأوتو أيجيبت و أخدنا معاه لكارفور داندي مول لحين ما الكهرباء ترجع و الصيانة تبدأ

وكمان شكرا لأوتو أيجيبت بداية من الحجز مع الأستاذة / أمنية و أهتمامها بأعضاء المنتدي وصولا للمهندسة / أمينة اللي تحملت كتييير اليوم ده لأني كنت كل شوية بأطلب منها طلب يخص العربية و مع عدم وجود أتصالات لأن الكهرباء ماكنتش رجعت بالكامل داخل المركز أكتشفت أنها كانت في كل مرة تتحرك بنفسها لصالة الصيانة أو قطع الغيار للأجابة عن استفساراتي

نوصل لصيانة ال80000 و المتضمنة تغيير الأتي :
سير الدينامو / سير التكييف / زيت الموتور / زيت الفتيس / زيت الباور / زيت الفرامل / ماء الريدياتير / بوجيهات / فلتر هواء / فلتر تكييف
مع فحص العربية فحص شامل و أعطائي تقرير بالأجزاء المطلوب تغييرها خارج الصيانة المعتادة مثل تيل الفرامل و خلافه
علما بان عربيتي أشتغل عليها عدد 2 فني و ده أختصر كتير من وقت الصيانة

- تكلفت الصيانة 1209.00 جنية بعد خصم 300 جنيه مصنعيات ضمن عرض أوتو أيجيبت المصنعيات مجانا بالأضافة لفيلتر زيت مجاني عشان أستعملت زيت توتال من عندهم
علما بأني وجدت أن التكلفة في مراكز الصيانة الأخري حوالي 1200 جنيه بالمصنعيات و لما بحثت بالموضوع و ( طلعت الفواتير القديمة ) تبين أن أوتو أيجيبت أضافة بندين
- فلتر التكييف ( مكنش عندي في العربية ) تم تركيبه و تمنه 180 جنيه بدون مصنعية لأنه ضمن بنود صيانة ال80000 اللي مصنعيتها مجانا في العرض بتاعهم
- تم تغيير زيت الباور بتكلفة حوالي 120 جنيه ضمن بنود المصنعية المجانية ( مكنتش غيرته في صيانة ال40000 )

الجانب السلبي اللي وجدته كان بعد انتهاء صيانة العربية و توجيهها لقسم الغسيل لأن الفترة اللي العربية أخذتها في الغسيل كانت طويلة و إن كانت أتغسلت كويس بصراحة و أعتقد ده سوء تنظيم مقدرش أقف عنده مع ظروف انقطاع الكهرباء و عدم قدرة الأقسام التنسيق معا لأن الأتصالات ماكنتش اشتغلت

في النهاية و بعد ما طولت عليكم و زهقتكم أنصح الجميع بالمنتدي عند عمل الصيانة بأي مركز يكون بالحجز مسبقا و ياريت اللي رايح صيانة في وقت معين يكتب موضوع بالميعاد و المركز يمكن يكون فرصة لتلاقي الأعضاء بدل ما كل واحد يكون بمفرده

**Youssef.Awad** · 02-01-2012 06:41 PM

مبروووووووووووووووووك يا حسام ع الصيانة وعقبال ال100 الف عن قريب
وتوضيحك للفاتورة والزيوت والفلاتر دى شىء مهم جدااااااا .. شكرا للتوضيح
وطبعا كل الزيوت فى اوتوايجيبت ماركة توتال

**zeznia** · 02-01-2012 07:07 PM

الف مبروك ياريس
وربنا يبركلك في عربيتك
كنت عايز اقولك زيت الباور المقصود اللي كان تمنه 120 جنيه ممكن يكون قصدهم علي زيت الفتيس
وفي الحاله دي الفتس بياخد 4-5 لتر يبقي التكلفه دي مظبوطه لان سعر اللتر الموبيل 25 *5=125 جنيه
وفي نوع اعلي تمنه 45*5=225
غير لو كان قصده عالباور ستيرنج زي ماكنت فاكر

**Ahmed.TV** · 02-01-2012 07:11 PM

الله ينور على التقرير القوى السريع ده

وياريت كل واحد من الاعضاء ميرتكزش على نقطة السوال عن تكليف الصيانة .. لان ممكن تروح تعمل صيانة
وتلاقى فى حاجات فى العربية مش عايزة تتغير وممكن كمان بيفرق من مركز لمركز اذا كان ماشى زى ما قال كتاب الضمان

يعنى فى مراكز مش بتهتم بتغير زيت الفرامل بعد 24 شهر او 40 الف وكمان زيت الباور وهكذا فممكن مش يحطوا تكلفتهم فى الصيانة وبالتالى لما تسال تلاقى ان سعر الصيانة اقل عن مركز اخر .. ودى بتعمل لخبطة للناس اللى بتسال

وطبعا الصح ان الكل يمشى زى اتو ايجيبت ما ماشية على كتاب الضمان .. وكمان فى ميزة عندهم .. مش بيغيروا حاجة محتاجة تتغير .. لكن الضرورية بتتغير طبعا

والميزة الاهم .. انهم بيفلوا العربية صح .. فى الصيانة

يا جماعة معلش لدرجة انهم مش بيرموا فردة الكاوتش على الارض .. فى ايه كمان

وغير كدا بتاخد تقرير عن حالة العربية اجبارى ومجانا .. فيه ايه اللى اتعمل فى العربية من فحص

بصراحة حاجة محترمة

ومعلش يا حسام وبردوا ليوسف موضوع الغسيل ده .. لسه عامل فعلا مشكلة عندهم .. عشان المغسلة لسه بتتعمل وانا وريتكم المغسلة وهى بتتبنى .. وبعدين كل الغسيل مانيول .. وطبعا بيكون عندهم عربيات ورا بعض فلازم سرعة

ان شاء الله هما وعدونى بان الموضوع ده حيخلص فى اقرب فرصة باذن الله

والمهم فعلا ان اغلب الاعضاء فى تقاريرهم فى الصيانات انهم حسوا ان العربية خرجت من المركز اكنها جديدة وان الصيانات جيدة جدا

وده حاجة كويسة بالنسبة لمركز لسه فاتح جديد وتقييم هائل

وان شاء الله يستمروا على كدا

وباذن الله اى سلبيات تحصل نبلغهم بيها عشان يقدروا يطوروها الى ايجابيات

والناس بصراحة محترمة وبتسمع وبتسجل كل الملاحظات وكل القصور اللى بيقعوا فيه .. وبيهتموا بمعالجة السلبيات

تحياتى ليهم

وتحياتى ليك يا حسام

وعايز الصوررررررررررررررررررررر ررررررر