الموضوع: تقرير صيانة الـ 20000 كم أوتو إجيبت أبو رواش

السلام عليكم و رحمة الله و بركاته
اتصلت بالمركز الساعة 9 صباحاً و سألتهم عن الحجز في نفس اليوم الساعة 2 ظهرا و تم الحجز
نزلت من الشغل الساعة و احدة و ربع و روحت أشتري زيت ليكوي مولي زي م أخويا حسين قالي...بس للأسف لم أجد عبوات 1 لتر و اشتريت عبوة 5 لتر بـ 295 جنية من مركز زيوت خلف مركز البحوث في الدقي
طلعت الدائري عند مقار و روحت أبو رواش و الحمد لله و صلت أوتو إجيبت الساعة 2:15 و بصراحة العلامات الإرشادية كتير و متوهش و هو أول يمين بعد نزلة طريق مصر إسكندرية الصحراوي من محور 26 يوليو تمشي حوالي 2 كم تلاقيه على إيدك اليمين
مهندس الإستقبال إسلام غازي غاية في الإحترام و استلم العربية بعد 5 دقائق من وصولي و كتب في الورق إن معاد الإستلام المتوقع هو 4:30 (كلام معقول )
استلم مني العربية و جرب فيها كل حاجة بنفسه و طلبت منه إن محدش يلزق أي حاجة أو أي شعار على العربية لأني بحب العربية تفضل سادة... قاللي بس هما لزقوا خلاص شعار أوتو إجيبت ... قلتلوا يا راجل هما لحقوا ... قالي طيب بص كدة ... ببص على الزجاج الخلفي لقتهم بالفعل لزقوا أوتو إجيبت .... طلبت منه أنهم يشيلوها .. و الموضوع ده بيحصل معايا في كل صيانة و في أي مركز خدمة و في كل مرة بطلب منهم يشيلوها عشان ستيكر نايل موتورز يفضل منور لوحده
و سلمت المهندس الزيت اللي أنا جايبه معايا و كنت معلم على الجركن علامة تحدد منسوب الـ 2.7 لتر اللي مكتوبة في الكتاب بتاع العربية و نفسي يعملوا حاجة في التوكيل تعاير الـ 2.7 لتر بتاعة الصني... يعني مش مقبول إن كل توكيلات نيسان و كل المراكز المعتمدة بيحظوا الـ 2.7 بالنظر و في منهم بيحط 3 لتر على طول ... المفروض إن التوكيل يكون مكان لدقة المعايرة و زي ما بيهتموا انهم يستخدموا مفاتيح عزم لربط المسامير و الصواميل و الطبات المختلفة .. يكون في وسيلة دقيقة يعايروا بيها موضوع الزيت ده
ما علينا
قلتله على مشكلة الصوت اللي من الشكمان ( و ديه اللي اكتشفها حسين ربنا يكرمه ) و الصيانة العادية 20000 كم
المكان فوق الرائع و النظام و الإمكانيات 10/10 و لسة كمان لما يخلص كله هيبقى إن شاء الله تحفة معمارية و هندسية و ميكانيكية في أبو رواش
المركز كان فاضي نسبيا مقارنةً بباقي مراكز الصيانة اللي روحتها قبل كدة و ده عشان هو لسة جديد و ماتعرفش قوي و يمكن عشان بعيد نسبيا عن وسط البلد
الغريب إن العربية فضلت واقفة من حوالي الساعة 2:30 لحد الساعة 3:15 ما دخلتش الصيانة لا هي و لا أي عربية تانية و كان في حاجة زي إجتماع مع العمال و الورشة فاضية تماما .... و في أخر اليوم لما سألت المهندس إسلام قال لي إن ده وقت البريك بتاع العمال
المهم شربت المشروب الساخن و أكلت الباتيه و العربية الحمد لله دخلت الورشة لكن بعد ما دخلت فضلت برده حوالي 15 دقيقة محدش قربلها و الغريب إن مافيش في الورشة إلا عربيتي و عربية تانية بتاعة شخص محترم اتعرفت عليه هناك اسمه استاذ رمضان و هو كمان كان مستغرب من موضوع إنهم كل ده مبدأوش في الشغل
كلمت أستاذ رمضان و شخص أخر عن المنتدى و مميزاته و الجو الأسري و دعوتهم للإنضمام معانا و يارب نشوفهم قريب في بيتنا الكبير نايل موتورز
أخيرا الشغل بدأ في العربيتين معا ً (عربيتي و عربية الأستاذ رمضان ) و الشغل مخدش أكتر من 20 دقيقة ... بسم الله ما شاء الله شكل العمال محترفين و كل واحد عارف بيعمل إيه بالضبط
العربية طلعت من الورشة الساعة 4 تقريبا و راحت على الغسيل قلت تمام قوي كدة يبقى الوقت التقريبي اللي كتبه مهندس الإستقبال (إسلام غازي) في الأول 4:30 كان في محله
و المفاجأة إن العربية طلعت حوالي الساعة 5:20 و أنا شايف إن ده كتير قوي قوي قوي .... ساعة و تلت غسيل ... و لما قلت للباش مهندس إسلام قالي معلش الإستيكر بتاع أوتو إجيبت خد وقت كتير عشان يشيلوه ( كلام مش مقنع خالص ) بس مهندس إسلام اعتذرلي بأدب جم و الراجل خلوق جدا بسم الله ما شاء الله و بيحرجك من كتر زوقه

التقييم

الصوت بتاع الشكمان راح فعلا و لما سألت كان إيه قالي كان في حديدة في الشكمان متنية و عدلناها
تم تغيير البوجيهات و فلتر الهواء و فتر الزيت و الزيت في الصيانة و أداء العربية تحسن بالفعل و لكن ليس التحسن المتوقع
و الحكم على الأداء سيتضح أكثر في الأيام القادمة
فرامل اليد بقت تقيلة قوي قوي و أنا عارف إن الموضوع ده بسيط و هو رجلاش بيتزبط بس مين بقى يضرب المشوار ده تاني و السؤال هو ليه اتغيرت ضبته أصلاً
غسيل العربية أكتر من رائع ... حقيقي تحفة بس برده ساعة و تلت كتييييير
الطريق الفرعي من طريق مصر اسكندرية الصحراوي لحد أتو إيجيبت سيء للغاية ... قاهر العفشات و محطم قلوب المساعدين ... أتمنى أنه يبقى أحسن في الزيارة القادمة إن كان في العمر بقية

أسف على الإطالة
السلام عليكم و رحمة الله و بركاته

الف مبروك على الصيانه و من كلام الناس قبل كده عن الزيت استنى عليه شويه و ان شاء الله تحس بفرق