الموضوع: تقييم سيفيك الجيل التامن ما لها وما عليها

طبعا يا جماعه كلنا مستنيين حد يعمل تقرير عن السيفيك الجديده و هنقعد نضيع الوقت في مقارنات مع القديمه فقلت ياواد اعمل التقرير ده عشان نفكر الناس بالجيل التامن و اقول على كل المميزات و السلبيات من وجهه نظري المتواضعه


HONDA CIVIC 8TH GENERATION VTI
2009-2010









اولا: الشكل الخارجي:

طبعا مش هنتكلم عن الشكل يكفي ان بعد 5 سنين و الناس اتعودت عليها لسه بتشد العين بعكس اي عربيه تانيه بعد ما تنتشر
و بالنسبه للارتفاع عن الارض انا شايف ان العربيه ما بتحكش نهائي بعكس عربيات كتيره زي الباسات مثلا بس يمكن عشان التصميم فالناس متهيألها انها بتحك في طوب الارض

التقييم :

ممتاز-95%











ثانيا: الصالون الداخلي و الكماليات:

بالنسبه للكراسي رغم انها منخفضه بس بصراحه مريحه و يغلب على التشطيبات الخاصه بالتابلوه و وضعيه الجلوس جوده كافيه لا ترقى لمستوى الفخامه

المميزات:

1- تابلوه رقمي جميل ( DIGITAL )
2- شيفت بالطاره (PADDLE SHIFT)
3- 4 ايرباج
4- كاسيت usb-ipod
5- التحكم في ارتفاع الكرسى و الدركسيون

العيوب:

1- عدم التحكم في ارتفاع مسند اليد (الظاهر اليابانيين فاكرين نفسهم ابو طويله) مخلي كوع الواحد في الهوا بدل ما يسند فما لوش لزمه
2- ملمس الطاره ناشف ولازم يا تركب كسوه جاهزه هتبقى مريحه جدا في السواقه بس الشكل يع اوى عليك وعلى حربي السروجي يكسيهالك بالكامل هيبقى شكلها كويس و ملمسها يتحسن
3- الفانوس نوره زينون على عادي
4- بعض ايقونات التابلوه تصميمها مش حلو (مبين النور - مثبت السرعه) تحس زي ما يكونوا اتكروتوا

التقييم:

جيد 72%

ثالثا: العفشه:

طبعا مش هاطول في النقطه ديه وهاقول ملتي لينك بس انا شايف انها من انعم العربيات اللي سوقتها

التقييم : ممتاز 93%

رابعا: الثبات:

ممتاز يادوب عشان الالماني اثبت زياده

التقييم : 88%


خامسا: الفتيس:

مقارنة بالاربع نقلات و السبع نقلات انا شايف ان خمس نقلات عمليه جدا لانها بتوازن ما بين الاحتفاظ بالعزم مقارنه بالاربعه و تقليل عدد مرات التهنيج بين النقلات في حالة السته او السبعه
وانا شايف ان الفتيس بالرغم انه بيضيع جزء من قدرة الموتور الا انه انسب حاجه للشوارع الزفت الزحمه و اللي مش مصدق يشوف مهازل mmt اللي لغوه في تويوتا و DSG اللي مستمر بفشل منقطع النظير في VW (انا مغير 2 فتيس DSG في 2010 عشان ماحدش يقول المشكله اتحلت)

التقييم :

ممتاز 90%


سادسا: المحرك و الاداء:

بصراحه دي كانت اكتر نقطه محيراني بعد فشره الوكيل الشهيره (140 حصان) و هو 123 و خصوصا اني من خلفيه الماني تربو TSI
اولا مش ذنب هوندا ان العربيه تنزل 1800 سي سي و نركبها هنا 1600 سي سي بسبب الامخاخ اللي حطت قانون من ايام ما كانت الناس بتجيب امريكاني سنة 70 بتعمل 80 كيلو في الصفيحه ومش عايزه تغير فكرها رغم ان لو خلوها لحد 2000 سي سي الحصيله هاتزيد بسبب ان العربيه اغلى و ماحدش بيستورد اصلا السعات العاليه انما تقول ايه في الغباء
نرجع للموضوع بصوا ياجماعه المفاجئه ان احسن وقت تستمع فيه و انت ماشي يبقي في طريق متوسط الزحام فعلا احساس جميل بالعزم (2000-3000 لفه) ومانصحش تزود عن كده لو ماشي عادي عشان العزم ما بيزيدش للدرجه وكمان العربيه طلعتها جميله و قويه وزي ما تكون بتنط كل ما تشيل رجلك و تحطها
نيجي للشد ياباشا من اول 4200 لفه و طالع العربيه بتتجنن تسارع متزايد زي ماتكون بتربو وده طبعا بسبب نظام
I-VTEC اللي استاذنا الكبير سامح شرحه من قبل وصعب اي عربيه 1600 تجاريها

التقييم:

جيد جدا 83% عشان الاداء بيقل حاجه بسيطه مع التكييف


سابعا: التكييف:

هو ممتاز بس هاديله جيد جدا بسبب مشكله الرعشه الشهيره كل ما الكباس يشتغل

التقييم : 84 %

ثامنا: الفرامل:
جيده جدا بعد ظبطها في التوكيل و ظبط توقيت حساسية ال ABS

التقييم : 77 %

تاسعا: الاعتماديه:

لو فيه اكتر من ممتاز العربيه تستحقه عن جداره فعلا عربية كل الاوقات و المناسبات و الاشخاص شبابي - عائليه - وسط البلد - طوالي-سفريات عائليه - تسارع - ثبات 100%

التقييم النهائي

[gdwl]ممتاز 87%[/gdwl]

للامانه تم الحساب مباشره من اول مره بدون تعديل اي تقييم

كل عام و انتم بخير و صحه

اهداء من صاحب الموضوع الى نايل موتورز

تم التعديل بواسطة مشرف القسم 13ب

22/02/2012

1:30 م

المشاركة الأصلية كتبت بواسطة hosammoner

عارف يا استاذ هانى الحمد لله بالنسبة ليا العربية دى مفيهاش عيوب جوهرية تبقى مضايقاك غير عيب واحد فقط وهو الضعف الشديد فى الاكصدامات اى تريحه خفيفة تلاقيها خرجت من مكانها وممكن كلبساتها تتقطع كمان الموضوع دا سخيف بصراحة انما كعربية ممتازة لابعد الحدود رفاهية ثبات شد موتور نعومة كله ممتاز الا قطع الغيار طبعا اوفر شويتين

العربيه عندي يا راكنه في جراج البيت يا جراج الشغل في حته مخصصه و مركب كاميرا خلفيه فموضوع الاكصطدمات بعيد عنه لحد دلوقت و ربنا يستر و العربيه لحد يومين ماكانش فيها خدش لحد ما خدت مسمار رخم من واحد ابن ------ مسافه ما ركنت 3 دقايق
و فعلا ملحوظه حضرتك سليمه