بسم الله الرحمن الرحيم
كان نفسي يبقي تقرير قنبله بس شكله هايطلع بمبه
نخش في الموضوع
بعد يوم الصيانه العالمي لصقور نيسان في اوتو ايجبت حصلت علي توصيه بتغير الكاوتش لان بصراحه دا الكاوتش اللي كان جاي في العربيه وماشي عليه 59000 كلم والحمد الله
فور ماخرجت من المركز ماكنشي في دماغي غير اني اغير الكاوتش وفورا بدات اعمل اتصالاتي
طبعا كنا يوم31-12-2011 السبت وعلي يوم الاثنين لقيت واحد من معارفي بتصل بيقول انت كنت عاوز كاوتش جديد قلتله ايوه
قلي تعالي فورا قلت ماشي
ورحت وعينك ماتشوف الا النور
لقيته مجهزلي 4 فرد كاوتش بجنوط سبور بحالت الزيرو
خالعهم من عربيه نوبيرا لسه شاريها وهيبعها لزبون
اصل هو تاجر عربيات
الكاوتش ستار ماكس توركي سرعات بنقشه شيك قوي ومقاسه195-55-15 والجنط اندونيسي مروحه جامد لونه فاميه ميتالك فاجر
ماطولش عليكما رحت قايله قصر وعايز كام من الاخر
2500 جندي
2000 جندي
2250 جندي
قلتله حلال عليك
رحت شايلهم وماشي
تاني يوم رحت لبتاع الكاوتش عشان كان في فرده فيها مسمار
قام مصلح الفرده وجينا نركب ..........................
اوباااااااااااااااااااااا اا
ده مش هيركب يابيه
لييييييييييييييييييه
طلع محور الجانط صغير عالطنبوره بتاعة الصني
واتاري ان ابعاد المسامير بتاعة الكوري بتبقي اصغر من الياباني
فالتحيا اليابان
المهم جالي اكتأب وادايقت خاص
وبعدين بيني وبنكم قلت قدر الله وماشاء فعل
هي العمليه مش ناقصه حسد
ممكن لو كانوا ركبوا كنت اتفقعت عين من اياهم تمام
وبعدين لو كانوا ركبو كانت العربيه هتهبط عالاقل 10 سم
والعمليه مش ناقصه حك في المطبات
المهم خدتهم ورجعتهم لصاحبي وانا لازعلان ولا مبسوط
النهارده بقي نزلت الزقازيق ولفيت علي كذا واحد بتاع كاوتش وسعرت كذا نوع
gt اندونيسي 350 تعبان
goldفرنساوي خط اندونيسي 450 وده كان حلو
roadstonكوري 475 غالي عالفاضي
المهم زهقت لف في الزحمه لما وصلت لواحد لسه فاتح جديد بس عامل شغل عالي قوي فقلت اخش اسعر برضو
المهم لقيت صاحب المحل واد شباب عسل وبياع شاطر
قلتله عالمقاس195-65-15 ورانج الفلوس حوالي 400 جنيه
فقلي انت احسن حاجه ليك الجود يير البولندي ب450 جنيه
وقلي انه زي الالماني ابو 550 جنيه
المهم قلتله اشوفه فقام بنفسه ببدلته وجرفتته الشيك وطلع الفرده من كوم كاوتش
فطلع في ايده فرده جود يير الماني اصلي
ودهالي علي انها البولندي
انا اول ما مسكت الفرده وعاينتها وقريت اللي عليها وحسيت ان الفرد حلوه قوي وفيها ليونه مش طبيعيه قلتله بس هو ده طلبي
بس دي مكتوب عليها الماني
قلي لا معلش البولندي هي دي
فعاينت البولندي حسيت انها زي الحجر وهتدوشني في العربيه
فقلتله لا انا عايز الالماني ماتزبط السعر قلي هامشيها 500
وعشان انا امي دعيالي خد بالي من تاريخ الانتاج 10\36
فقلتله دي فات علي انتاجها سنتين
يمين شمال خلاص 475 جنيه وتركب وتحط نيتروجين وترصص الاربعه علي حساب المخيل
قلتله استبينا
1900 جندي عدا ونقدا وعشره جنيه بقشيش الصنايعيه
التجربه بعد التركيب
بصراحه حاجه غريبه
1 السحب اتغير خالص العربيه مش بتفرك عالفاضي
2 العربيه زي مايكون ماكنشي فيها فرامل قبل الكاوتش
3 نعومه لاتوصف في المطبات وهدوء في صوت العفشه
4 خفه في الباور
5 عالسرعات العاليه الكاوتش مالوش صوت زي ماكنت خايف لاني كنت ماكد عالراجل في حكاية الصوت
اخيرا عايز اعرف ايه رايكوا في الاسعار والتجربه واهم حاجه رايكوا في موضوع تاريخ انتاج الكاوتش الاسبوع 36 لسنه 2010
هل كده يعتبر قديم وممكن ياثر علي عمر الكاوتش
ولا كده يعتبر في رانج حديث الانتاج
معلش صدعتكوا بس كئني قاعد مع اخواتي بندردش