الموضوع: يا جماعه خلي بالكو من تقارير واسعار الصيانه في مركز السبع

عربيتي صني موديل 2004 خليجي مانيوال انا من خارج القاهره فكنت بكسل اسافر مخصوص علشان اعمل صيانه للعربيه في التوكيل وكنت بعملها كلها عند اي ميكانيكي المهم بدأت المشكله اني لقيت فيه صوت خشانه في العربيه والصوت دا بيزيد روحت للعفشجي قولت ممكن تكون بلية عجله قالي المشكله في الفتيس الصوت طالع منه قولت اتاكد روحت للميكانيكي قال نفس الكلام وقالي اشتري فتيس جديد افضل المهم انا فضلت اصلح الفتيس فقالي على عفشجي كويس روحله وشوف هيعمل ايه روحت للعفشجي التاني قال نفس الكلام ان العيب من الفتيس بس حدد المشكله فين في الفتيس وهي فيه اربع بليات في مجموعة السيتوليك (زي الكورونا في الجر الخلفي) هما اللي عاوزين يتغيرو وبدل تكاليف فك وتركيب وسعر البلي نجيب فتيس مستعمل احسن قولتله افضل اني اصلحه قالي اخاف بعد ما نفكه يكون البلي مش موجود شوف التوكيل لو البلي موجود هاته من هناك ونركبه المهم اتصلت بمركز السبع الموجود بزهراء المعادي وكلمت قسم المبيعات قالي موجود وتقريبا كان سعر الواحده 125 جنيه ولو مش موجود هطلبه من نيسان ويوصل خلال اسبوع (كلام جميل جدا) اتصلت على خدمة العملاء وحجزت للصيانة سألوني العربيه عامله كام كيلو علشان نحدد نوع الصيانة قولتلهم انا عندي مشكله في الفتيس وعايز اكشف عليه قالتلي البنت بس كدا رديت وسالتها لو عملت كشف كامل على العربيه يتكلف كام قالت 500 جنيه قولتلها خلاص خليها كشف على الفتيس والعفشه لأني حاسس انها ضعفت شويه المهم روحت في الميعاد وقابلني الموظف اللي هايستلم العربيه ولقيته محضر ورقه فيها بياناتي وبيانات العربيه وكاتب فيها كشف على الفتيس والعفشه ومتفق مصنعيه 500 جنيه وسألني الفيس مالو قولتلو على الصوت وان العفشه حاسس انها ضعفت سألني انت فعلا متفق على 500 جنيه مصنعيه قولتله دا في حالة الكشف الكامل على العربيه وحسيت ان الموضوع فيه حاجه بخصوص المبلغ قولتله اكشف على الفتيس بس ولما نشوف فيه ايه نشوف هنعمل ايه بعد كدا قال مفيش مشكله بس عموما كشف العفشه هيفرق 40 جنيه بس ودا اللي اكدلي ان فيه حاجه مش مظبوطه المهم استلم الموظف العربيه ودخلها الورشه وطلعت الاستراحه فوق ولقيت كرسي فاضي جنب فاتحه زجاج بتبص عل الورشه دخلت عربيتي وكنت شايفها رفعهوها وكشفوا عليها من تحت وبعد كدا نزلت وركبها المهندس وخرج بيها بره الورشه للتجربه وبعد فتره طلبني على الموبيل وقالي انزل اقابله تحت ولقيته محضر تقرير كالتالي محتاجه تغيير فتيس وتغيير شكمان كامل ومجموعة دبرياج وتغيير اربع مساعدين وكاوتش تراب للمساعدين ومقصين امام وبارات دركسيون وقواعد موتور قولتلو ماله الشكمان قالي فيه لحامين ومصدي قولتله هو لحام واحد كانت العربيه اتخبطط مني من تحت والتاني دا في الصاجه اللي فوق الشكمان اللي مغطياه قالي اصله مصدي قولت وايه المشكله مش دايب ولا فيه اخرام دي علامات صدا عاديه جدا مقارنه بان عمره 6 سنين واقامتي في مدينه ساحليه قالي بس اكيد فارق في صوت العربيه قولتله العربيه ناعمه جدا ومفيش تغيير في الصوت بخصوص الشكمان وعموما هو غير متوافر عندهم اما بالنسبه للمساعدين قالي الاربعه تعبانين ومحتاجين تغيير وقالي على اسعاهم امامي الواحد بـ 1200 وخلفي بـ 1000 بدون الوست قولتله نوعهم ايه قال نيسان طيب صناعه ايه قال نيسان وبارات الدركسيون قال بتخبط في المطبات ومحتاجه تغيير بس مش عارف سعرها لأنها مش موجوده برده طيب وقواعد الموتور قالي فيهم واحده مقطوعه والباقي تعبان وقالي على سعرهم برده وكانوا غاليين قولتلو العربيه لما بتكون دايره وانا واقف مش بعرف غير لما ابص على rpm مفيش هزه خالص ولا صوت قال لأ القواعد تعبانه طيب والمقصات فيها ايه قال الجلب بتاعتها تعبت وبنغير المقص كامل وقالي على سعره برده وكاوتش التراب مقطع ومحتاجه اربعه جداد وقالي على سعرهم الواحده بـ 100 جنيه وبالنسبه لمجموعة الدبرياج قالي هو الديسك حالته مش كويسه وطالما هنغير الديسك نغير الاسطوانه بالمره وسعرهم 900 جنيه نيجي للمهم الفتيس الي لازم يتغير وسعره 11 الف جديد ومش موجود قولتله عيبه ايه اللي بايظ قولتله دا كل الموضوع الأربع بيليات بتوع السيتوليك وموجودين عندك قالي بس فيه تروس تعبانه قولتله بس مفيش اي مشاكل في الغيارات ولا في المشي قال لأ بايظ قولتله طيب لو فكيته ونشوف فيه ايه قالي يتكلف مصنعيه فقط 2000 جنيه قولتله طيب والضمان قالي شهر واحد فقط قولتله طيب لو جبته استعمال وجيت اركبه عندك رفض وقالي مش بنركب غر الحاجات بتاعتنا عرفت انها خسرانه واني امشي احسن قولتله خلاص متشكر وهمشي قالي براحتك بس نصيحه الفتيس دا لازم يتغير وماتصلحش فيه اي حاجه وقالي روح سدد وخد الوصل واستلم العربيه من بره روحت لقيت الفاتوره بـ 500 جنيه + 10% ضريبه اجمالي 550 قولتله العربيه ماتكشفش عليها بالكامل قالي ماليش دعوه انت متفق على المبلغ دا قولتله دا في حالة الكشف الكامل قالي خلاص ارجع للموظف اللي اتفق معاك على المبلغ طلعت للاداره فوق اتكلمت مع الموظفه اللي اتفقت معايا بالتليفون قولتلها احنا اتفقنا في حالة الصيانه الكامله بس العربيه متعملهاش صيانه كامله دا كان كشف عل الفتيس فقط ولغيت الكشف على العفشه بس المهندس كشف عليها برده نزلت اتكلمت مع المهندس اللي كشف على العربيه بعدين قالتلي هدخل العربيه تاني للورشه يتكشف عليها فطبعا بعد اللي حصل رفضت بشده رجعت لمهندس تاني دا تقريبا مدير الصاينه قالي ايه المشكله قولت انا سالت الكشف الكامل بيتكلف كام بس انا مكشفتش على العربيه كشف كامل يعني الموتور محدش بص عليه وحتى العفشه قولت ماتكشفوش عليها قالها المبلغ دا غلط فعلا اي كشف عادي على العربيه بيكون بـ 100 جنه فقط اما في حالة طلب العميل كشف عن حالة العربيه سواء للبيع ام الشراء دا اللي بيكون بـ 500 وبنكشف فيه على العربيه سمكره ودهان حتى مياه الراديتير بنكشف عليها وبنكتب تقرير كامل عن حالة العربيه اما بالنسبه للي اتعمل معاك يتكلف 100 بس وبالنسبه للموتور هدخل العربيه تاني الورشه يتكشف عليها بنفس التكاليف (طبعا الفرق كبير جدا خمس اضعاف المبلغ) دخلت العربيه الورشه تاني للكشف على الموتور ودخلت للمهندس في الورشه وهو بيبص على الموتور لقيته فاتح الكبوت وبيبص على الموتور وهو داير بعد كدا داس بنزين كام مره وشغل المكيف ورجع تاني يبص على الموتور وقاله حالته حوالي 70% ودي حاله جيده مقارنه بعمر العربيه سالته اشمعنى بصيت على عمرالعربيه دلوقتي ضحك ومردش وقالي استلم العربيه من بره الورشه هطلعهالك مع السواق (لما كنت مسافر برا وكنت اودي العربيه التوكيل يتكشف عليها كانت بتتوصل على الكمبيوتر للكشف على اي اعطال وكان بيتحط في الشكمان جهاز لقياس نسبة البنزيز المحروق والرصاص لظبط الموتور ومعرفة حالته وحالت شمعات الاحتراق ورشاشات البنزين وهذا لم يحدث داخل مركز السبع).

خرجت روحت على العفشجي ووريته التقرير بص على العربيه وقالي المساعدين فعلا محتاجه تتغير وجلب المقصات تعبت ودي مش بتتغير المقص بيتغير كامل وقواعد الموتور سليمه وبحاله جيده جدا وبارات الدركسيون قالي هات علبة دركسيون استعمال افضل وارخص ومجموعة الدبرياج فيه هزه بسيطه جدا لو هتنزل الفتيس غيرهم بالمره.

روحت للميكانيكي قالي الموتور كويس والقواعد سليمه وكويسه.

روحت لواحد بتاع شكمانات قالي كويس برده وبحاله جيده جدا ولا يحتاج للتغيير.

روحت بورسعيد اشتريت فتيس استعمال الخارج مع مجموعة الدبرياج كامله الراجل قال 4000 جنيه في الآخر اتفقنا على 3400 جنيه وروحت اركبهم المهم المفاجئه كانت ان الديسك سليم والاسطوانه هي اللي تعبانه والمفاجئه التانيه ان حالت اللي خارجين من عربيتي افض من اللي اشتريتهم الراجل الميكانيكي قالي هنركب الديسك بتاعك اما الاسطوانه لازم واحده جديده واشتريناها جديده نوع مش فاكر اسمه ياباني بـ 150 جنيه وركبنا والعربيه الحمد لله بحاله جيده جدا.

المفاجئه التالته الميكانيكي قالي انت اتسرعت واشتريت فتيس لو كنا فكينا القديم هو كل اللي بايظ فيه بليتين بس كنا ندور عليهم ونركبهم كان اوفر بكتير قولتو المهندس في التوكيل قال ان فيه تروس بايظه قالي لأ مافيش اي مشاكل في التروس حتى عرض عليا انه نصلحه ونبيعه.

رجعت بورسعيد للراجل ورجعت مجموعة الدبرياج ورجعلي 300 جنيه.

اسعار الاربع مساعدين كاملين مع السوست بـ 800 جنيه استعمال من بورسيد.

الخلاصه التوكيل ناس محترمه بيتكلمو باسلوب كويس بس اسعارهم غاليه جدا وخبرتهم وشغلهم زي اي ورشه عاديه فيها صنايعي شاطر بل ممكن يكون الصنايعي افضل وعايز يغير كل حاجه في العربيه لمجرد انها حالتها 80% بغض النظر عن عمر العربيه او القطعه دي عامله مشكله ام لا ولا يوجد عندهم معدات للكشف على الموتور باختصار مجرد تغيير زيوت وفلاتر وصيانه للعفشه مع العلم انهم لم يقومو بالكشف على تيل الفرامل او الطنابير والدليل معرفتي ان التيل الخلفي محتاج لتغيير وعندهم غسيل للعربيه وسمكره ودهان بس اعتقد مفيش عندهم فرن للدهان يعني بيكون في مكان مكشوف.

عندهم حاجه جميله بعد اسبوع من زيارتك ليهم بيتصلو يسالو عن حالة العربيه بعد الصيانه بدون النظر الى ماتم في الصيانه واتصلوا وسالوني عن حالة العربيه بعد الصيانه وكان ردي انا ماعملتش صيانه قالي بس انت كنت حاجز عندنا صيانه من اسبوع وكنت موجود رديت انا كشفت على العربيه بس لكن ماعملتش اي صيانات قالي آسف وقفل.

السبع تشخيصهم للأعطال سىء وبعد ذهابى لهم لضبط الموتور 4مرات إستمرت الرعشة فيها و لم يتمكنوا من أصلاحها بس هم عندهم ميزه إنهم بيطمنوا عليك بعد ما تخرج من عندهم بكام يوم ليطمئنوا على الإصلاح ولما تقول لهم إن العيب زى ما هو و ترجعلهم تانى يلطعوك 2 -3 ساعات ويطلعولك العربية زى ما هى.