الموضوع: رابطة مالكى الاكسيل-الجزء الثانى

المشاركة الأصلية كتبت بواسطة ahmedzizo131

بسم الله الرحمن الرحيم
على فكرة يا جميل
اسامة شديد دى حبيبي جدا جدا جدا و هو اللى شارلى عربيتى و من ساعتها و انا بقولة الله بياركة علية
بجدا انسان محترم و امين فوق الوصف
ربنا يباركلة
على فكرة انا ساكن قريب منه
و اذا ان شاء الله رحتله فى وقت بلغنى و نتقابل عنده

شكرا ياباشا علي اهتمامك بالرد علي مشاركتي..
انا لم اتناول الاسطي اسامه شديد بالنقد لشخصه لاسمح الله..فهو له مني كل احترام كشخص...وهو فعلا انسان مهذب ومحترم كما تقول...ولكن علي المستوي المهني هو ضعيف جدا في موضوع تكييف السيارات وده عن تجربتي الشخصيه..واسمح لي احكيلك وياريت متزهقش مني ومن التفاصيل الممله..

لما اشتريت سيارتي الاكسيل الكامله مانيوال 96 التكييف كان عطلان..وصحابها قال (كالعاده) التكييف محتاج شحن فقط...المهم وديتها عند واحد اسمه احمد عريبي في الازاريطه خلف جراج كوته..كل اللي عمله انه شحن فريون وحط صابون برغاوي علي الوصلات وقاللي كله تمام ومافيش تسريب..ولهف 150 جنيه ..ويادوبك تاني يوم التكييف ولا كأنه موجود..ولما لارجعتله ماافادنيش بحاجه ..

ولأني من قاطني سيدي بشر..رحت للمعلم اسامه شديد..وبعد ما فتحت الكابوت ودورت العربيه وشغلت المكيف ومن نظره واحده لقيت المعلم اسامه بيقول بطل العربيه..الكومبريسور ده حركته مش مظبوطه وبايظ ولازم تغيره وسعره استيراد 450 جنيه !!! كده خبط لزق بدون مناقشه ومن غير فحص !!..طبعا مقتنعتش بكلامه وربنا هداني اروح لورشه المدينه المنوره..وهي بالمناسبه قريبه جدا من اسامه شديد (وراه بحوالي شارعين او ثلاثه)..ومتفرعه من جمال عبدالناصر برضه..

هناك لقيت راجل محترم لابس شيك تقولش دكتور..والاهم انه بيشتغل باسلوب علمي (systematic) ..بص علي التكييف وقال للصنايعيه اللي تحت ايده فكوا التلاجه (اللي تحت التابلوه)...لقينا التلاجه شبه سايحه وبايظه خالص وغرقانه زيت اسود لزج..وكمان لقي الاكسبانشن فالف بايظ وكمان مافيش ال pressure اللي بيخلي الكومبريسور يشتغل ويفصل مش يشتغل علي طول..غيرنا التلات حاجات دول وشحنا فريون من اول وجديد ..والتكييف بقي تمام. وزي الفل بجد.وسالت الراجل (الشيك) ده وقلتله هل الكومبريسور محتاج يتغير؟؟. ضحك وقال مين ال (.....) اللي قالك كده..الكومبريسور سليم وزي الفل..هو كانت حركته بطيئه بسبب تلف التلاجه والاكسبانشن..المهم اتكلفت الشغلانه 750 جنيه بالشحن بالمصنعيه بقطع الغيار بكله..والتكييف بقي تمام التمام..

كان بس فيه حاجه ناقصه وهو الفاكيوم السيلينويد اللي بيعلي الموتور علشان يقوي التكييف في السيلانسيه..وقلت أأجله وقت تاني خصوصا بعد اللدعه اللي اتلدعتها (ال 750 جنيه)..

لما الجو ابتدي يحر..قلت اركب الفاكيوم ..رحت للمدينه المنوره لقيتهم زحمه..ولأني كنت مستعجل (كنا بالليل) رحت لأسامه شديد. (ما حرمتش ).وسألته علي الفاكيوم لقيته عنده وب 80 جنيه..قلت له توكل علي الله وركبه..

لقيت الصبي بتاعه عيل ضايع جدا وشكله لسه جاي من الفلاحين ولسه بيتعلم..الصبي فك الفاكيوم القديم بصعوبه --من غير ما يفك عمه الكربيراتير--وانا ماسكله بطاريه الموبايل بتاعي علشان يشوف (مهانش عليه يشغل البارادوس)..وبعدين حط الفاكيوم الجديد برضه بصعوبه وبرضه وانا ماسك الموبايل لما ايدي وجعتني..بعدها الفاكيوم اشتغل والماتور علي مع التكييف..وحاسبت المعلم اسامه واديت بقشيش للولد ومشيت..

بعد 3 دقائق فقط ..لقيت العربيه صوتها عالي جدا كأني دايس بنزين جامد..وال rpm علي 4. رغم اني طافي التكييف.رجعت لأسامه..قعد يبص ويفحص ويقيس بالافوميتر..وبعدين قال: اصل الكوبريسور بتاعك معلق وشغال مع نفسه حتي وانت مطفي المكيف..وده معناه ان الكلاتش بتاع الكومبريسور بايظ وعايز يتصلح !!! ( يا راجل ما انا جاي بيه سليم ومافهوش حاجه..حبكت الكلاتش يعطل وهو عندك بعد ماركبت الفاكيوم)..واضاف اسامه بيه اني لازم اجيله بكره الصبح واسيب العربيه علشان يحل الكباس ويغير الكلاتش واجي استلمها 9 بالليل !!!

طبعا بعد تجربتي السيئه مع اسامه قبل كده في موضوع الكومبرسور اللي قال انه بايظ واتضح انه سليم..ما وثقتش في كلامه ورحت جري علي ورشه المدينه المنوره..واول حاجه عملوها فكوا عمه الكربيراتير..وبعد الفحص اتضح برضه ان الكومبريسور سليم ومش معلق زي ما اسامه بيه قال...ولا كلاتش ولا كتاوت ولا دياولو...بل ان اللي بايظ هو الفاكيوم (الجديد)اللي حطه اسامه بيه وهو اللي خللي الكربيرتير يعلق!!

طبعا ركبولي فاكيوم جديد والتكييف بقي تمام التمام..ورجعت بسرعه لاسامه بيه ورميتله الفاكيوم بتاعي واخدت الفلوس من غير ما يفتح فمه..وتأكدت ساعتها انه صنايعي علي قده جدا..مره كان هيغرمني كومبريسور..والتانيه كان هيغرمني حل كومبريسور وتغيير كلاتش وكتاوت!! والعيب كله في الفاكيوم بتاعه اللي هو ركبه!!!!

ايه رأيك بقي ياباشا في المعلم اسامه شديد؟؟