الموضوع: انتى طالق

انت عارف ليه كلام نظرى لأن حسن النية لوحده مش كفاية ده لو فى نية اصلا شوف الناس بعد الطلاق بتطور حاجات فى نفسها ازاى لأنهم مصرين ينجحوا فى العلاقة الجديدة
لو كانوا اشتغلوا علحاجات دى ايام جوازهم احتمال كبير كانوا انقذوه

شوف ازاى بتعامل الآخرين بشكل ارقى لأن بناخد الطرف الآخر على انه مسلم بيه ففى حين ان مستحيل تدخل على زمايلك فى الشغل من غير ما تسلم ممكن تدخل البيت بدون اى اهتمام ولا تبص حتى لشريكة حياتك لو كل واحد فكر ان فى كاميرا بتنقل لعالم الخارجى هو بيتصرف ازاى مع شريكه اكيد هيتصرف بشكل مختلف

وفى حالة ذهنية تسمى العجز المكتسب يصبح الأنسان سلبى و تهكمى وبائس ويصدق ان مفيش حاجة ممكن يعملها تغير وضعه الحالى زى عصفور اتعود عالحبسة فى القفص ومش راضى ياخد باله ان الباب اتفتح

وبغض النظر عن اللى الطرف الآخر بيعمله فانت شريك فيه لأنك بتسمح بسلوكه ده او بتشجعه

واحيانا الأنسان بيفضل يبقى فى الركن الآمن رغم ان وضع العلاقة مش هو اللى حلم بيه بس مفيش مغامرة=مفيش خسائر
الوضع اسهل من انك تحاول تغير او خايف من الفشل
واحيانا بيكون الأنسان صعب الأرضاء ومفيش اى حاجة بتكفيه او ناس معتقدة انها فاقدة الكفاءة او معندهاش وقت للعمل على العلاقة


يعنى الخلاصة الكلام هيفضل نظرى طول ما الواحد لا عنده الرغبة ولا القوة ولا الحماسة انه يتخلص من البؤس اللى هو فيه ورضى بيه ولبيدور على النجاح فى اماكن تانية زى الشغل او الأصدقاء او توصل انه يصاحب وخلاص كل الحلول دى اسهل من المحاولة واحتمال التعرض للفشل

انا للأسف مش عرفة الناشر هو مكتوب عليه من بره صرح:فكر يصنع حضارة

لو حد عايزه من اهل المنصورة انا شفته فى عوض الله
بس تحذير لا مراتك تقرا العنوان تحط لك السم فى الأكل ولا تطلع الفرفر وتقوصك تفتكر انك ناوى تطلقها: )

الكلام ده كله جميل جدا يادكتوره بس المشكله ان لازم الطرف الاخر يكون متقبل

يعني مثلا انتي فاهمه الكلام ده كويسه لو قلتله لزوجك وهو كان متقبل وحسيتي بتحسن اكيد نفسك هتتفتح تكلمي

لكن تخيلي الزوجه عملت كده ومظبطه الدنيا وعامله جو رومانسي وحاجه اخر جنتله والراجل رجع اول مادخل البيت قالها ايه باهانم اللي انتي عاملاه ده انتي فاكره نفسك في مسلسل تركي وقام مديها اللي فيه النصيب من كلام وضرب واهانه تفتكري هتكمل اي حاجه ؟

نفس الكلام لو الراجل داخل ببوكيه ورد جميل علي مراته وعايز يعمل جو حلو قامت قايلاله ياما جاب الغراب لامه طيب مكنت هز نفسك بكيلو لحمه نرم بيه عضمنا
تفتكري هيعبرها بعد كده؟

القرايه لازم تبقي من الطرفين مش من طرف واحد بس وعشان كده الزوجين لازم يكونو طباعهم زي بعض او متقاربين عشان ميبقاش فيه صدام فكري

مشاكل الجواز :
دماغ البنات مسافره راحله
الرجاله عايزين برضوا يقضوها بمب و مراجيح

ايوه طبعا الموضوع صعب وكبير ومحتاج مجهود مستمر من الطرفين لا ينقطع والا تبقى بالضبط زى واحد مقتنع انه لازم يجى له مرتبه من غير ما يروح الشغل ولا يتحرك من السرير ولو محصلش يزعل هى الحياة كده كفاح ومفيهاش حاجة بالساهل

بالنسبة لأنه لازم يكون موقف الطرفين هو ده اللى عجبنى فى كتاب د فيل انه بيعرض حلول حتى لو الطرف التانى مش معاك على نفس الخط

المشكلة كمان ان مخنا عنده قدرة غريبة على خلق افكار مخيفة وتصديقها بعد كده واكتر حد يقدر يحبطك هو انت نفسك


واكيد الحلول ايا كانت معتمدة ان اصلا فى بينهم تقارب فكرى ان التنين دول كانوا معجبين ومشدودين لبعض فى يوم ماوكانوا بيحبوا يقضوا وقت مع بعض
اما لو واحد اساء الأختيار تماما وكانت بت خنيقة مثلا ومخها فى الشرق وهو فى الغرب يبقى لازم يدفع تمن الجحيم اللى اختار يدخله برجله واحيانا يبقى الطلاق هو الحل الوحيد للمشكلة
ولو حتى كان وصل لطريق مسدود برضه المحاولة مش هتخسره حاجة

بس الشرط لأى حد هيفكر يحاول انه يفهم ان دى مجهودات هتستمر للأبد لأن ببساطة لو تحمس شوية وبطل هيبقى زى ما بتتحمس مثلا للريجيم وتخسر وزن فعلا وبعدين تفقد حماستك وتقرر تاكل براحتك وتتمنى جسمك يفضل رشيق يبقى ده المستحيل بعينه فالموضوع مش مجرد حسن نية ولا حتى قوة عزيمة بس لكن عزم جاد على الأستمرارية وانك يوميا تصحى تفكر تعمل ايه يضيف لعلاقتك بالضبط زى ما بتصحى تغسل وشك ولا يمكن تنزل بالبيجاما