الموضوع: انا عاوز حق اخويه

سلام عليكم ..
بصراحه انا ترددت كتير جدا اكتب الموضوع ولا لا ...بس لما لقيت نفسى مش قادر اوصل لحل ..قولت مفيش حل غير انى اسأل الناس هنا ..
الموضوع طويل شويه ..او شويتين ..اتمنى المهتم ميزهقش ..بس لازم احكى القصه كامله عشان الى هيقول رايه ..يكون فاهم القصه كويس
اخويه الكبير احمد ...24 سنه ..ليسانس اداب احمد هادى جدا و دايما يبتعد عن اى مشادات او خناقات او اى حاجه فيها عصبيه و عنف ..كان واخد حياته ببساطه و هدوء و تسامح يحسد عليه
دخل الجيش ..يوم 18\7
مركز التدريب بتاعه كان فى دهشور ..
يوم 26\7 الساعه 1 الظهر
واحد اتصل بوالدى ..انت فلان ؟ اه ..طيب ابنك فلان فى الجيش ؟ اه ..طيب ابنك تعبان شويه و عاوزك تروح تاخدله اجازه ! تعبان ازاى ماله ؟؟ تعبان و خلاص روح شوف ابنك و متتصلش تانى لان انا بكلمك من سنترال ..طيب انت مين ؟؟ مش مهم روح بس شوف ابنك ..وقفل ..والدى اتصل تانى ..رد واحد و قاله هنا سنترال !
والدى اتصل بظابط فى الجيش قاله حصل كذا كذا ..قاله طيب انا هشوف و اكلمك تانى
فات نص ساعه ..والظابط متصلش
والدى نزل جرى خد العربيه و مشى ..رايح دهشور !
كل ده انا مسافر القاهره ومعرفش حاجه
المهم بعد ساعه الظابط اتصل بوالدى قاله ..البقاء لله احمد توفى امبارح ..و هو دلوقت فى مستشفى المعادى بتاع الجيش
والدى راح المستشفى و جاله ناس قرايبنا و اصحاب والدى هناك ..كل ده انا معرفش حاجه
طلع ان احمد اتنقل المستشفى قبلها بيوم ..يعنى يوم الاتنين و وصل المستشفى الساعه 5 و نص المغرب على كلام المستشفى بيعانى من ارتفاع فى ضغط الدم و درجه الحراره..و توفى الساعه 11 باليل ..
و الطبيبه الشرعيه مقدرتش تحدد سبب الوفاه و عليه تم تحويله لمصلحه الطب الشرعى ..(مشرحه زينهم)
الوقت كان بقى متأخر ..
قالو هيبات و بكره يروح المشرحه ..
انا كنت عرفت خلاص ..
تانى يوم روحت المشرحه ...
الناس كلها رفضت انى ادخل اشوفه ...
لكن الى شافوه (اثق جدا فى 2 منهم) قالو انه فى"نزيف من الفم ..و الانف ..وكدمه صغيره على صدره ناحيه اليمين" ..وانه مبتسم ..زى ما يكون نايم و بيحلم حلم حلو ...
كل ده مفيش اى اخطار رسمى من الجيش بالوفاه
لما روحت المشرحه كان فى واحد هناك عقيد تقريبا ملوش اى تلاتين لازمه ...قال انه جاى يسلمنا "احمد"
المفاجأه :
كان فى حاله وفاه من دهشور بردو ..و برده فى نفس اليوم (لكن متنقلش لمستشفى المعادى و اصلا توفى فى الطريق)
الناس فى المشرحه بيأكدو ان الحاله التانيه (اسمه طاهر) ..جسمه ما شاء الله قوى جدا ..وضخم ...لكن عنده كسور عديده فى الجسم ..(الضلوع...الرقبه..الرجل)

بعد كده تم التشريح ..و طلعنا تصريح الدفن ...و الجيش كان جايب "ميكروباص من غير كراسى ورا عشان قال ايه ..يوصله المحله !! ومصممين انه يركب فيه مينفعش يركب فى العربيه الى احنا جايبينها ..و مصممين انهم يطلعو على قسم اول المحله ..ونستلمه من هناك ..
بعد شويه كلام ..مضينا على الاستلام ادام المشرحه ..و خدناه فى العربيه الى جايبينها احنا و رجعنا ..
و على ما اذكر انهم حاولو يمضونى انى استلمت كافه متعلقاته و رفضت ...

لحد هنا ...سمعنا حاجات كتير عن سبب الوفاه ...
1-خد حقنه غلط
2-وقف فى الشمس كتير و قال انه تعبان قالوله بطل دلع
3-الكتيبه بتاعه عملو مشكله ..و تم تكدير الكتيبه كلها من 7 صباحا الى 4 مساءا فى الشمس من غير الكابات ...
4-تعب و قال انه تعبان اتشتم ...ظابط حاول يضربه ..طاهر(حاله الوفاه التانيه) تدخل عشان يدافع عنه ...ضربوه هو كمان (لكن مفيش اثار ضرب فى جسم احمد)
5-حاجات كتيييييييييييير كلها بيقولك و سمعت و تلاقي و اكيد و يمكن ..
روايه الجيش بتقول ..و برده بشكل غير رسمى
انه وقف فى الطابور عادى مع زمايله ...
فجأه لقوه وقع فى الارض
نقلوه على مستشفى الوحده ..لقو حالته متأخره
خدوه فى عربيه "قائد المركز" لمستشفى المعادى "الى اصلا مفروض مش بيدخلها عساكر" ...

حاولت اسال مجندين كانو معاه ...بيخلعو ..
واحد منهم قالى متسألنيش فى تفاصيل ..و "روح خد حق اخوك من الجيش"
طيب عملو فيه ايه ؟؟ يقولى معرفش
يمين شمال مش بيقول حاجه
عرفت بعدها ان المخابرات العسكريه استلمت المركز (مش متاكد) و ان المجندين نزلو اجازه بدرى (دى متاكد)
وعرفت ان قائد المركز و النائب تم عزلهم من الخدمه العسكريه و التحقيق معاهم ..(مش متاكد)

افلام كتير و حاجات كتير بسمعها ...

بعد كده الجيش قعد يماطل بطرق كتير جدا فى استخراج شهاده الوفاه ...
و رائد فى الجيش ادالنا اخطار الوفاه عشان نطلع بيه شهاده الوفاه من جهه مدنيه ..لحد ما الجيش يطلعلنا شهاده وفاه من عنده...و دى مطلعتش لحد دلوقت ..
وقالو ان هيطلع لينا تعويض ..و معاش ! (اخويه خدم فى مركز التدريب 6 ايام)
المهم قولنا التعويض تلاقه 1000 جنيه ولا حاجه

ولكن جه عقيد من الجيش و معاه نقيب ..و معاهم 50 الف جنيه ...16 و شويه لوالدى ..و زيهم لوالدتى و زيهم لخطيبته (كان كاتب كتابه و اعتبروه متزوج)(كله طلع صدقات جاريه لاحمد الحمد لله)
الغلطه :
طبعا مفروض كل واحد منهم يمضى على استلامه المبلغ ...حصل ان والدتى دخلت للظباط و شتمتهم و كده ..فوالدى مضى مكانهم كلهم من غير ما يقرأ هو بيمضى علي ايه ....
بس العقيد بيقول .."سياده المشير لما عرف بحاله الوفاه أمر بصرف المبلغ ده "
السؤال المهم بقى ...
فين تقرير الطب الشرعى ؟؟
الطب الشرعى قال انه هيطلع بعد 25 يوم
قعد شهرين و يمكن اكتر ..و عرفت انه طلع على النيابه العسكريه
روحت المشرحه قالولى روح خده من النيابه العسكريه الى فى الهرم
روحت هناك ظابط حقير متعجرف قالى وانت مالك ؟
اخوك مات و انت دفنته و القصه انتهت ..التقرير ده لينا احنا ...
بدون دخول فى تفاصيل تحرق الدم معرفتش اجيب التقرير ..
بواسطه قدرت اعرف نص بند سبب الوفاه ..وكان "ارتفاع شديد فى ضغط الدم و هبوط حاد فى الدوره الدمويه نتيجه التعرض لضربه شمس مع "وجود كدمات بالجسم نتيجه السقوط على جسم صلب"
روحنا لمحامى عسكرى هنا ..قال انه هيقدم طلب بأسمنا ..بيطالب فيه انه يحصل على تقرير الطب الشرعى و معرفه سبب الوفاه ..
على كلام المحامى محدش رد عليه ..رغم انه بعته اكتر من مره ..
المحامى بيقول من وجهه نظره الوفاه غير طبيعيه ...و مفروض نرفع قضيه ..
بس احنا مش واثقين فى المحامى لان سمعنا عنه كلام مش لذيذ و مفيش محامى عسكرى غيره هنا ..


احنا مش عاوزين فلوس
احنا عاوزين نعرف :
1-ايه الى حصل ؟
2-مين السبب
3-ياخد عقابه
المشكله ..
1-هنثبت ازاى ؟
2-هنعرف ازاى؟
فى ناس كتير بتأكد ان حتى لو فى حاجه عمرى ما هعرف اثبت و القضيه خسرانه خسرانه
وان جرح مش هيتقفل
وانه قضاء ربنا
وناس بتقول لا ..حق و لازم ييجى
القرار مش سهل
القضيه فيها مشاكل ..وجرح كبير جدا خاصه لوالدتى ..وخصوصا لما تعرف ان حد اذاه
انا اسف الموضوع مش مترتب ولا منظم و يمكن ناقص معلومات
انا طلعت الكلام من دماغى خبط لزق فى الموضوع
يا ريت الى يرد ..يقرأ الموضوع كويس
ولو عنده استفسار يسألنى ..
وقبل ما يقول رأيه يفكر كويس