الموضوع: مفاجئات جامده من نيسان مصر .... عشان خاطر الصقور

المشاركة الأصلية كتبت بواسطة ahmedibrahim

السلام عليكم ورحمة الله وبركاته

بصراحة العرض ده شدنى وبدأت أتصل بيهم وعرفت النهارده من مدير معرض السبع اللى فى 18ش الحرية من ش النزهة
أن عقد البيع بيكون بين العميل والبنك (مش المعرض).. فهل ده كافى؟
أنا بصراحة بحاول أبعد عن شبهة الربا لأن لو على الفائده القليله ففى بنوك بتدى فائدة منافسة وقدامك كل العربيات مش نيسان وبس..
فبصراحة لو الموضوع على وضعه ده برده فيه شبهه ربا يبقى حغير على (قسطك مع رينو) واشوف نظامهم ايه هما كمان لان فايده التقسيط بتعاتهم 9% ومباشر برده
حد يفيدنى ربنا يباركلم :)

ما هو كده لو عقدك بينك وبين البنك ...... يبقي المعرض مالوش علاقه
والتقسيط المباشر ده ميمشيش
شوف اللي يريحك بقي ..... او البنك الوطني ده لوعايز تقسط
اللي يريحك ان شاء الله
متنساش بس الاستخارة ربنا يكرمك ...في اي حاجة حتي نوع العربية و اوتو ولا مانيوال واللون كل حاجة
وربنا ييسرلك كل خير يارب العالمين

المشاركة الأصلية كتبت بواسطة epnmasr

أنا بطلب الإجابه بأمانه ولله وليس تشكيك في رأي حضراتكم
لأني سمعت إن في ناس كتير الفتره دي بدأت تشتكي من مشاكلها وتجميعها المصري وبدأت تظهر عيوب مش زي الأول وكمان فيه تقصير في التوكيل
طبعاً أنا بسئل حضراتكم لأنكم بالنسبه لي أهل الذكر وأنا أترك أمري إلى الله ثم إليكم وفي إنتظار ردودكم الكريمه

انا فاهم قصدك بس انا رأيى ان اغلب ملاك الصنى فى الفترة الاخيرة اشتروها عن غير اقتناع وفقط لسعرها وكمالياتها وفيه كتير اشتروها عشان انتشرت فى الشوارع ومن جواهم مفكرين انهم هايركبوا عربية زى العربيات الكورى كده خفة ورشاقة وطيران وبتجيلهم صدمة عصبية اول يوم ما يستلمها او يروح تانى يوم يرخصها ويسمع زئير محركها ويحس بنشوفية عفشتها وعدم راحة كراسيها (بالنسبة له طبعا) فيقعد يسب ويلعن فيها ويذم فى اللى صانعينها ومجمعينها وانت عارف بقى اول ما الثقة فى النفس والاختيار تتهز يبقى عليه العوض
طبعا ده كلام افتراضى ومن وحى خيالى وتفسير ممكن يكون لحالات فردية مش حالة عامة يعنى لأن فى الاول والاخر كل واحد بيروح يشترى اى عربية بيشتريها بمحض ارادته دون اجبار
لكن الكلام العلمى المدعوم بادلة مادية ملموسة ويشهد على كده صفحات المنتدى والمواضيع الكتير اللى فيه عن نيسان
شوف حتى بنفسك كمية المشاكل من سنة او اتنين كان كام ومن مين .. ودلوقت قد ايه؟ وكله مثبوت بالتاريخ والساعة
الحاجة التانية شوف كمية العروض اللى اتعملت على صيانة ومبيعات النيسان فى مصر واى توكيل تانى لا مؤاخذة اخره ينزل 3-5 الاف جنيه فى سعر العربية لما الشكل الجديد يقرب ينزل وعن نفسى من واقع الناس اللى اعرفهم معاهم عربيات زيرو كتير على مدار ال3 سنين اللى فاتوا وحتى 10 سنين ورا .. اتخن واحد فيهم عمل صيانات العربية حتى انتهاء الضمان ومنهم اللى راح صيانة ال 1000 وخلع ومنهم اللى مقضيها تغيير زيت وفلتر برة فى اى بنزينة والكل هربان من التوكيلات وعمايلها
فى نيسان الوضع مختلف تماما .. اكتر مراكز خدمة عربيات فى مصر عليها اقبال وبدون مبالغة فى اى صيانة ليا فى اى مكان باقعد اقلب فى موديلات العربيات اللى داخلة المركز استعجب لما الاقى عربيات كتير فات عليها 3 سنين يعنى ناس خلصت الضمان ولسه بتروح توكيلات !!!!!!!!
وشوف كمية العروض والخصومات اللى ما بيعديش شهر والتانى وتلاقى مركز بيقدم عرض او حملة عاملاها نيسان كلها بمناسبة او غير مناسبة
يعنى بكل بساطة ليه ابهدل نفسى وعربيتى واروح اركب قطع غيار مضروبة او اصلى اقل كفاءة من الموجودة فى التوكيل + مصنعيات بدون او بكفاءة فى التركيب واغامر بأى حاجة ممكن تحصل والفرق بين الاتنين ما يستهالش اصلا المجازفة بين واحد ايده فى 25 عربية عالاقل نفس الشغل يعنى بيفك ويركب وهو مغمض وواحد غلبان على قده اول مرة تدخله نيسان الورشة بيقف يقولها (اكلك منين يا بطة) ويفتى ويعك الدنيا !!!

الخلاصة:
رأيى الشخصى ان اليومين دول بتوع نيسان ايا كانت مستوردة او مجمعة محليا
لأن فيه اختلاف جذرى بين التوكيل والوصاية اليابانية 100% (واقفين بنفسهم على خطوط الانتاج وبيراقبوا كل حاجة فى مراكز الخدمة) وبين اى منافسين فى مصر اخرهم يستوردوا العربية وفاتحين كام مركز خدمة وكام معرض لزوم ارضاء الشركة الام برة للحفاظ على عدم سحب التوكيل منه ولا بيحل ولا بيربط فى اى مشكلة او شكوى الا اذا وصلت لبرة
وعندك بدل المثال الواحد 5 كمان: هيونداى - كيا - سكودا - فولكس - رينو .. اعلى مبيعات واسوأ خدمات .. وهو ده الفرق والاختيار متاح للجميع