شوف انا جربت طريقتين قبل كده و كذلك جربت منظفين
الطريقة الأولي هي زي مانت عملت كده بالضبط العربية دايره و ترش الاسبراي داخل البوابة مع التزويد جامد عشان العربية متتخنقش و تبطل و بطلت اعمل الموضوع ده لأني أعتقد انه معظم الوسخ اللي في البوابة بينزل في المانيفول و بيوسخه و ده فكه و تنظيفه صعب جدا و مقرف و محتاج تخصص شوية و ايضا أعتقد انها بتوسخ البوجيهات كمان و أخيرا احتراق مركبات المنظف مع البنزين هيخرج مواد الله اعلم هي ايه و هتبوظلك الكاتاليتك (علبة البيئة) ده لو عندك علبة بيئة أساسا
الطريقة الثانية و دي اللي انا بفضلها و عملتها في عربيتي الحالية و بطلت أعمل السابقة و هي انك تفك البوابة بره خالص و تنظيفها تمام و بعدين ركبها تاني و هما بالضبط 4 مسامير ألانكيه مقاس 5 هتفكهم و لكن خلي بالك من سلكة الأرضي المربوطة في جسم البوابة و كذلك الخراطم الموصله بها و كذلك فيشتها ركبها كويس و كمان خلي بالك جيدا من الجوان اللي موجود تحتها لو مخرجش معاها اتأكد انه ثابت في مكانه و لو خرج تأكد انك ركبته وانت بتقفل تاني
المنظفين اللي استخدمتهم وهما نوع يسمي منظف جاف و ده زي مثلا (منظف الكاربيراتير بأنواعه +منظف الفيديو او اكاي + منظف الدوائر الالكترونية)وده منظف لما بترشه بينظف و يزيل بسرعه ولكنه يتطاير ما تبقي منه و ده كويس جدا وهو المطلوب ولكن سمعت انه بينشف مفصلات البوابة و حامي عليها و بيتحتاج انها تتزيت تاني ب wd40 حتي تعمل بشكل جيد وده اللي انا عملته أخر مره
ونوع أخر يسمي منظف زيتي و ده wd40 وما يشابهه و ده بينظف أيضا جيدا و لكن ليس بقوة السابق و لكنه مش حامي زي السابق و ايضا يوجد به نسبة تزييت ولا يؤثر علي البوابة و لا مفصلاتها الداخليه
وخلي بالك ان التنظيف فقط لجسم البوابة وليس للفيشة الكهربية الخاصة بها لأن الفيشة أساسا مصممه و بداخلها جوانات و بلاستيك تمنع دخول اي أتربه علي أطراف التوصيل وانا عمري مفكيت فيشة لأي حساس او غيره في الابيزا او الكوردوبا و لقيتها مثلا مجنزرة ولا متربه ولا متوسخه بأي شيء طالما مقفوله في بعضها و بتقفيل المصنع مستحيل يدخل جواها اي شيء طالما مرتكبه في بعضها صح و بحالتها حتي لو غرقتها مياه او زيت من بره هتفكها تلاقيها من جوه بتلمع و كمان من وجهة نظري ان المنظفات دي لو اترشت علي الجوانات دي هتبوظها و أساسا لا توجد حاجه لتنظيف الفيش كما ذكرت
انا شايف انك تفكها بره احسن و لو عليها شحوم و زيوت كتير اغلسها بمنظف جاف كويس و في النهاية عيد عليها ب wd40 علي خفيف للتزييت فقط
المفضلات